বঙ্গলাদেশ মণিপুরী কবি নামব্রম শংকরগী অহানবা শৈরেং লাইরিক “ নুংশিবী”- লাইরিক অসিগী থম্মোয় পাউদম -- তোংব্রম অমরজিৎ
পুন্সিদা ওনশিল্লদুনা করিগুম্বা হেক হেক ৱাহং হংনিবা ফাওরকপা তাংকক কয়া মীওই মপোক্তা পোকলবা মীপুম খুদিংদা ফাওরকপা ৱাখল অমনি। নুংঙাইরবা মীকুপশিংদদি ৱাহং হংনিংবগী মতম থোকলক্তে। মরমদি নুংঙাইরবা মিকুপশিংদা পুকনিং থম্মোয়না মকা লাম্না লৈরুবনা। তৌইগুম্বসুং মীওই মপোক্তা পোক্লগা তৌরু তৌরুবা থবক খুদিং, থাংলুবা খোঙথাং খুদিংদা খুরৌ থাংবা, লাইবক মপা চুমদবা, অৱা –অনা, মীশি মীনা থেংনরবা খুদোং চাদ্রবা মতমদদি ৱাহং কয়া থোক্লকই, অদুনা হংনিংলকই পুন্সিদা ওনশিন্দুনা করিগী অসিগুম্বা অৱাবসি থেংনহল্লিবনো হায়না। করিগুম্বা মতমদনা ইশ্বরদা ওনশিল্লগা নিন্দা তৌবসু য়াওদবা নত্তে। মসি পুম্নমক তাইবঙগী হৌনাশানি। পোকলবদি নোংমা শোয়দনা শিবা তাবনি। অৱাবা লম্বেল লৈরবদি নুংঙাইবা লম্বেলসু লৈফম থোকই। অদুবু ৱাহংদি হ্ংনিংই কবিনা পুন্সিদা। ...
লাইরিক্কি মমিং- নুংশিবী(২০১৫)
অইবা- নামব্রম শংকর
অফোঙবা- বঙ্গলাদেশ মণিপুরী সাহিত্য সংসদ,
তপোবন লমা বাজার, সিলেট
লাইরিক্কী মখল-শৈরেং
লাইরিক্কী মখূম- এন যোগেশ্বর অপু
লাইরিক্কী মমল- টাকা- ১০০/-
লাইরিক্কী লমায় মশিং-৪৮
নামব্রম শংকর সিলেট শহরগী নয়াবাজারদা ১৯৭৩গী জানুৱারি তাং ১৭তা পোকপনি। মহাক্কী অপোকপা সিলেট লৈবাক পষ্ণাইতকি ঈশৈ শকপা ওইবীরম্বা কর্ণমণি সিংহ কৌই অমদি অপোকপিগী মিংনা শ্যামা দেবী কৌই। য়ূম্বাল পুন্সিদা অপর্ণা সিনহাগা য়ুম্বানদুনা মচা নুপা অনী আহেন অমসুং আথোই অনীগী অপোকপা ওইজবা ফংজখি। মেন্দিবাগ সরকারী প্রাথমিক বিদ্যালয়, রাজা জি. সি. হাই স্কুল মথংদা এম সি কলেজতগী সোসিওলোজিদা এম. এ. পাস তৌখি অমসুং মতম কুইনা দেইলি সিলেটের ডাক পত্রিকাদা থবক তৌরম্মি। বংলাদেশ মনিপুরী সাহিত্য সংসদকি অচঙবা থৌমীনি। সোসিএল এক্তিভিস্টনি।
চৎলিবা লম্বেলসে খুনাইনা অমসুং পুন্সিনা পন্থুং অমমমদি লোয়না লৈরি। অদুবু পন্থুং অদু য়ৌঙমদনা খাংঙুথক্তা পুন্সি থাউমৈসু মুৎখিবা কোংগাইনি। অদুবু মসিমদি নিজবা য়াইনা হায়না হেক হেক খল্লকপা মতাংসু লাক্লি পুন্সিদা অদুগুম্বা তাংককশিংদা পুকনিং অনী লোংদনা নিজনিংই য়াইফথৌনি অমা কবি শংকরনসু পোকনফম লমদম নুংশিবী মনিপুর মহাক্কী অমসুং লমদম অসিদগী চাদা নাওদা শন্দোকখ্রবা মখোয়গীদমকসু য়াওনা। অমুক অমুক আশাদি লৈরবসু পুকনিং ৱাখলদি মরক্তা শোন্থারকপসু য়াওদবা নত্তে মসিবু সিম্বোল ওইনা শিজিন্নরি থাউমৈনা। অদুনা নুংশিবা থম্মোয় মপাউ অমা চেল্লকলি শৈরেং অসিনা য়াকাইরোল শক্লদুনা। ‘নিজবা’ –অঙাংবা অশংবা থাউমৈনা চাকথেক্লে/ মীৎ অসে/ ৱাখলসে/ উসিল্লকত্রে ফজবা, নুংশিবা কাউথোক্লে/ কুপশিল্লক্লে ঙৌদোংনা নিংথিরবা থাবল/ মকসিল্লে/ মমসিল্লে/ কাউথোক্লে ঐখোয় ঐখোয়গী পন্থুংফম/ মৈরী পিকথরক্লবা থম্মোয়গি থাউমৈ/ থোইনা ঙাল্লসনু থম্মোয় খুদিং।” (লাঃ ১০)
পুন্সিদা ওনশিল্লদুনা করিগুম্বা হেক হেক ৱাহং হংনিবা ফাওরকপা তাংকক কয়া মীওই মপোক্তা পোকলবা মীপুম খুদিংদা ফাওরকপা ৱাখল অমনি। নুংঙাইরবা মীকুপশিংদদি ৱাহং হংনিংবগী মতম থোকলক্তে। মরমদি নুংঙাইরবা মিকুপশিংদা পুকনিং থম্মোয়না মকা লাম্না লৈরুবনা। তৌইগুম্বসুং মীওই মপোক্তা পোক্লগা তৌরু তৌরুবা থবক খুদিং, থাংলুবা খোঙথাং খুদিংদা খুরৌ থাংবা, লাইবক মপা চুমদবা, অৱা –অনা, মীশি মীনা থেংনরবা খুদোং চাদ্রবা মতমদদি ৱাহং কয়া থোক্লকই, অদুনা হংনিংলকই পুন্সিদা ওনশিন্দুনা করিগী অসিগুম্বা অৱাবসি থেংনহল্লিবনো হায়না। করিগুম্বা মতমদনা ইশ্বরদা ওনশিল্লগা নিন্দা তৌবসু য়াওদবা নত্তে। মসি পুম্নমক তাইবঙগী হৌনাশানি। পোকলবদি নোংমা শোয়দনা শিবা তাবনি। অৱাবা লম্বেল লৈরবদি নুংঙাইবা লম্বেলসু লৈফম থোকই। অদুবু ৱাহংদি হ্ংনিংই কবিনা পুন্সিদা। শংকরগী ৱাহং হায়না মিংথোনবা য়াম্না তেনবা শৈরেং অসিদা অসুম্না ইরি - “অৱাবা মচুগী কল্লবা লম্বেনসিদা/ নঙসু চৎলি/ মা’সু চৎলি/ ঐসু চৎলি/ অসুম কয়ানি চৎখিনি, কয়ানি?” (লাঃ ১১) ৱাহং ময়াম মরক্তা ঐখোয় পুম্নমক চৎলি পন্থুং অমগী। করম্বা মতমদা য়ৌগনি হায়বা কনানসু হায়বা ঙমদে। মসিনি পুন্সিগী নুংঙাইবসু। রুমিনসু হায়, “Be like a tree and let the dead leaves drop” অরিবা উনানা কেনখ্রগা অনৌবা য়েন্নিং চোংলকপদুসু পুন্সিনি। অহিংবনি অমসুং আশানি।
হাইকু শৈরেংগী মওংদা ইবা পরেং অহুম্না শাবা ৱাহন্থোক য়াম্না লৈবা শৈরেংসু য়াওরি কবি শংকরগী লাইরিক অসিদা, অমুক্তা য়েংবীয়ু মখাগী পরেংশিং অসি- শৈরেং মমিংসু ‘ঐ-নঙ-মা’ হায়না মিংথোল্লি। “ অমা- খৈদেনদগি মমল তাঙনা লৈরকপা/ লুনা পামুনা শিজিন্নরবা পোৎচৈ/ মথৌ লোইরগা মল্লক্লে হায়না হুনজেক্লবা” মসি কয়াদা ফজরিবা শৈরেং খুৎইনো। মসি মহৌশাগী থৌইনশিন্দি নত্তে মীওইবগী কান্নবতা উবা অমসুং খনবা পুকনিং মতা অদু ফোংদোক্লি। কান্নরমদাইদা মরুপ শান্নবা, ওইজবা থিবা পুকচেল অদুগী মশকনি। কান্নদ্রবা হন্না ফাওবা হেক য়েংদবা ফজদবা হৌনদবা মীওইবগী ফত্তবা লীচৎনি হায়নিংই। মসি কবিদি কয়া পামজদনা ইরি। অদুগা অনীশুবা শৈরেংগী পান্দুপ্তনা- “ ইন-খোনবনা কান্নদ্রবনি খন্দুনা হুন্দোকলম্লবা/ থীরবা কোঙগ্রেঙ্গী মনুঙদা/ নোংম নোংমগী মপূঙ ফারক্লবা মুক্তা।” লৈখোম লৈনাং মরক্তা ফজরবা থারোনা ফুগাইনা শাৎলদুনা নুংশিবা লৈনম য়েনবগুম্না চংখোল্লি পান্দুপ অসিগী শৈরেংসিসু। অচাওরম পাম্বা কনাগুম্বনা পীদোল্লবী য়ূমগী নুপীবু হুন্দোক্লমদুনা অতোপ্পা নুপী লৌখ্রবা মতুং মমা অদুনা মচাবু মী ওইহণ্ণবা হোৎনদুনা লায়রবগী ফদি ফরা মরক্তা মনি মুক্তা সনা হি য়াই ফংবগুম্না থোকপসু য়াওদবা নত্তে। অরংবা খুদিং সনা নত্তে অদুগা পাৎথি কোমথি মরক্তসু হি য়াই থোকই হায়বনি। পুন্সিদা থাজবা থম্মু অরং অরাক্তা হেন্না মীকাবসু মাংজবা লাকই হায়বদু তাক্লি। ফজরবা ইমেজরি ঙাক্তনি মফমসিদা শিজিন্নরিবসি। অদুগা অহুম্বা অরোইবা পন্দুপ অসিদা অমুক ইরি, “ মীনা শিজন্নদ্রবা ঈশিং অপুম্বগী খোংবান/ হঙোই ঙাচ্চ্রক মরক্তা/ হরাউনা জগোই শারবা শরেং” (লাঃ ১৩) পন্দুপ অহুমসিদা ফোংদোকনিংবসি পুন্সিবু লুনা পামুনা য়েংহন্নিংবা ইঙ্গিৎ ফোংদোকপা থেংনৈ। পুন্সিগি খোঙথাং অসিমকসু চেকশিন্না চৎহন্নিংই।
নেস্নেলিজমগী স্পিরিট মপূং ফানা ফোংদোকপা অদুগা শিজিন্নরিব ৱাহৈশিংগী মতিক ময়াই নিংথিজনা হাপ্লবা শৈরেং অমসু য়াওরি, ‘কনানা হায়রিবনো’ হায়না মিংথোনবা শৈরেং অমা। শৈরেংদি পংশাং শাংবা নত্তে অদুবু মতিক ময়াই য়াম্না চেল্লি। কবি হংলকলি, “ কনানা হায়রিবনো/ লমজাওদা ফাঁসি পীখি মা’বু?/ ইমা লৈপাক কনবগীদমক লানথেংনখিবা/ থৌনা ফরবা কনাবু হাৎপা ঙমখিবগে/ কৈদৌঙৈ কনানা?” য়াম্না ফজবা পরেংশিংনি। তাইবঙ মীওই মপোক্তা পোক্লগা ইমা লৈবাক্কীদমক থৱায়না পোন্থা পীখিবা অথৌবশিংদি শিবা নাইদনা লৈহৌরি। শোন্নরি মখোয়গী মিংলেনবু তাইবঙনা। অদুনা কবিনা মখোয়দি হাৎপা ঙমদে চংনা লাইরৈবাক তানখ্রবনি হায়বসি ফোংদোকনিংবনা ৱাহং অসি হংলিবনি। মমা লৈবাক মরমদমগীদমক হিংখিবা থৌনা ফরবা মখোয়গী মতিক ময়াইবু অসুম্না অমুক ইরি, “মখোয়গী কল্লবা নুঙগী থবাক/ করম্বা ব্রহ্মাস্ত্রনা থুগাইগনি?/ মখোয়গী লৈপাক নীংবা লাইনিং/ করম্বা আপ্সরানা কায়হনগনি?/ মখোয়গী মপাল নাইদ্রবা মখুত্তা/ কনানা, করম্বা থৌরিনা পুনগনি?/ কনানা হায়রিবনো/ লমজাওদা ফাঁসি পীখি মা’বু?” (লাঃ১৪)
খুনাই অমা অনাবা ওইরে হায়বসি করিদা খঙবা ঙমগনি হায়রগদি মখোয়গী লৈবাক অদুবু লুচিংলিবশিং অদুগী থবক থৌওংশিংদা অদুম উবা ফংগনি। মসিবু কবি নামব্রম শংকর ফজরবা ইমেজরিদা অসুম্না মিংথোল পীরি ‘লাইকোই’ হায়না মিংথোন্দুনা। “ নশাদা হাকৎচরিবদো লাইকোইনি/ লৈপাক মাইবা য়েংহল্লু/ লৈপাক থৌবুরেল খিবিকনা তাকপিখি।/ ঐদি ৱাখলনা লাম্বা ফংদে/ মখোয়না শেম্বা লৈপাক্কী মশাগী/ শাথিরবা লাইকোইগীতমক/ করম্বা মাইবা য়েংহনগনি।” (লাঃ ১৭) অনা লায়কন্নরবা খুনাই অমগী মশক অদু উবা ফংই। মসিগী হৌরকফমদি ঐখোয় মীয়ামসু য়াওরি ফত্তনবা শিনবদা অদুবু লুরিবদি লুচিংব ফত্তবা লমদমদা মীয়ামদি অমুক্কা হেন্না শাথিবা অনাবনা নারকপা তাবনি। অদুনা অসিগুম্বা হৌজীক হৌজীক থোক্লীবা থৌদোকশিং অসিদা কবিদি চমম্নবা মতৌদুনি শৈরেং অসিদা উৎলিবসি।
ইমা মনিপুর নুংশিনা য়েংদুনা ইরকপা শৈরেংনি, ‘ৱারবী ইমা’। ঙসি ঙসিমক থোক্লিবা লান, কাংলুপ ফুরুপশিংগী মুকনবা, ব্লেক লোগী চৈথেং পুম্নমক অসি য়েংলুবা তারুবদা তেংথাদবা ঙমদে ইমাবু পোক্লিবী ঐখোয় পুম্নমকপু নাওকোল্লিবী পোকনফম লমদম ইমা মনিপুর মহাক্কীদমক কবি নামব্রম শংকরনসু। অদুনা ইরক্লি, “ শক ফজবী লন লৈবীদো/ মীগী মমানি/ শক থিরবী চৎপা ৱারবীদো/ ঐগী ইমানি।/ সোডিয়াম থাউমৈ ঙালহৌবদো/ মীগী শহরনি/ ব্ল্যাক আউটনা মমহৌবদো/ ঐখোয়গী লৈফমনি।/ তাঙলবা পাজেরো চেলহৌবদো/ অতোপ্পা লম্বেলনি/ নোংমৈ তম্না জীপ ঙংহৌবদো/ অদুনা ঐখোয়গীনি।/ ৱারবী ইমা নঙসে হৌগৎলো/ নচা ময়ামসে চেৎনা কোনশিল্লো…” (লাঃ ৩০) য়াম্না নুংশিবা শৈরেংনি। রিএলিতিদগী খক নান্থোকলগা লৈবা ঙমদে কবিনা। অদুনা ইমাবু কৌদুনা হায়জরক্লিবনি অফবা লমদম অমা উনিংবনা ইখৌ লাংলদুনা।
লৈবাক নীংবা শৈরেংশিং, অথৌবশিংবু শৈথাজবা শৈরেং য়াম্না তেন্না শাফু কন্না মতিক ময়াই চেনবসু য়াওরি।
টিকেন্দ্রজিৎ : অথোয়বা থৌনা অমা
ৱাংলে নঙসে চীংদোন মাপলদগীসু/ পাকলে নঙগী লাইবক লোকতাকতগীসু/ নঙগী ফল্লবা থবাক য়েংলুবদা/ ইকাইনা লুকথখ্রে পাণ্ডব য়াইমা ভীম/ মকশিনখ্রে নুমিৎকী মঙাল/ ঙাল্লবা নঙগী শকফম উরুবদা/ মীথোয় নঙগী অহেনবা ঈরিক অদো/ চেল্লসনু মীতৈ ঈখোঙ খুদিংদা/ স্যালুট কৎচরি হন্না হন্না/ অথোয়বা হে ইবুংঙো টিকেন্দ্রজিৎ।”
লাইরিক অসিদা পুন্না শৈরেং ৪০ য়াওরি। অহানবা লাইরিক ওইরবসু শৈরেং ফজবা কয়াদি য়াওবা থেংনৈ। মনিপুরী খোরিলোলগী পুক্কৈদা লেপ্তনা লাইরিক কয়া খুদোল তম্বীরকখিগনি হায়না থাজবা থমজরি।
0 কমেন্ট:
কমেন্ট তৌবিয়ু