আপডেট:
image

ধর্ম ওন্থোকপা -- আই. এস. থিংগোম

লাইনিং লম্বী খেন্নবগী মতুং ইন্না মীগী মরক্তা ৱাখল খেন্নবা অমসুং কাঙলুপ তোখাইনবগী চৎনবীসু উবা ফংলি। লাইনিং লম্বী খেন্নবগী মরমনা কাঙলুপ মশেন নুংশিনদবা, ঈরাং থোকপগী খুদম কয়াসু লৈরিবনি। মরম অসিনা লাইনিং খেন্নবা হায়বসিনা মীওইবগী মরক্তা অৱাবা অমদি তমথিবা ওইহনবগী মরম অমসু ওইদবদি নত্তে। অদুনা হৌজিক্কী সরকারনা লাইনিং খেন্নবগী মরক্তা নুংশিননা লৈনবগী পান্দমদা য়াম্না চেকশিন্না য়েংশিল্লি।

 

মালেমদা ধর্ম হায়বদি লাইনিং নত্রগা লাইনিং লম্বেনগী মশীং য়াম্মী। মীওইবগী সভ্যতানা হৌরকপদগী লাইনিং কয়াসু চৎনবা হৌরকই। মতমনা চৎশিল্লকপগী মতুং ইন্না অনৌ-অনৌবা ধর্ম কয়াসু পোক্লকখি। অরিবা লাইনিং কয়া অদু থাদোক্লগা অনৌ-অনৌবা লাইনিং লম্বেনদা লাইমিং লৌবসু চৎনৈ। পুৱারীগী লামায় হাংদোক্তুনা য়েংলুরবদি ধর্ম অমদগী অমদা লাইমিং লৌবগী মরম য়াম্না লৈ। কলিঙ্গ লানদা মায় পাক্লবগী মতুংদা মহারাজ অশোকনা অমুক হান্না লান তৌররোই হায়না খনখি।

লোয়ন-লোয়ননা মহাক্না উপগুপ্ত কৌবা লাইনিংবা অমগী মফমদগী বৌদ্ধ ধর্মদা লাইমিং লৌখি। মণিপুরদসু পামহৈবা নিংথৌনা হান্নগী লাইনিং অদু থাদোক্লগা রামান্দি ধর্মদা লাইমিং লৌবগী ৱারীসু ময়াম্না খঙনরি। নিংথৌনা লাইমিং লৌরবগী মতুঙদা প্রজাশিংসু লাইরেন মতুং ঙা-ইন্নবগী মওংদা লাইনিং অদুদা খোংদারক্কনি। ধর্ম অমবু হৌদোকপীবা লাইনিংবা অদুনা শন্দোক্লম্বগী মতুংদা মহাক্কী শিষ্যশিং অমদি মদুগী কাঙলুপ, মিশন নচিংবনা শন্দোক্তুনা লৈগনি।

মীয়াম্না থাজরকপদগী অনৌবা লাইনিং অদুদা পামজনা ওন্থোরকপনি। নিঙোল অমা খেন্নবা লাইনিংগী নুপা অমদা লুহোংলবদি মাগী লাইনিংসু অদুম নুপাগীদুদা হোংলক্কনি। নিঙোল অদুগী লাইনিংদুদা নুপা অদুনা ওনশিল্লকপগী খুদম খরসু লৈবা য়াওই। মীওই কাঙলুপ খরনা ওইজবা ফংবগী পান্দমদা লাইনিং ওনবগী থৌদোক থোকপসু য়াওখি। conversion to cnovenience অমদি forced conversion হায়বসি মমাংচত্তা নিংথৌ পাল্লিঙৈগী মতমদনা হেন্না চৎনরম্মী।

হৌজিক্কী মতমদসু মরম অমা নত্রে অমদগী ওইবরসু লাইনিং ওন্থোকপসে অসুম তাব ফংলি। লাইনিং লম্বী খেন্নবগী মতুং ইন্না মীগী মরক্তা ৱাখল খেন্নবা অমসুং কাঙলুপ তোখাইনবগী চৎনবীসু উবা ফংলি। লাইনিং লম্বী খেন্নবগী মরমনা কাঙলুপ মশেন নুংশিনদবা, ঈরাং থোকপগী খুদম কয়াসু লৈরিবনি। মরম অসিনা লাইনিং খেন্নবা হায়বসিনা মীওইবগী মরক্তা অৱাবা অমদি তমথিবা ওইহনবগী মরম অমসু ওইদবদি নত্তে। অদুনা হৌজিক্কী সরকারনা লাইনিং খেন্নবগী মরক্তা নুংশিননা লৈনবগী পান্দমদা য়াম্না চেকশিন্না য়েংশিল্লি।

করিগুম্বা মরম অমদগী কাঙলুপকী ঈরাং থোক্লকপসু য়াই খঙলবদা চেকশিন থৌরাং ওইনা ধারা ১৪৪ লাওথোক্তুনা মফমদুদা মীয়াম পুনবদা অথিংবা থম্মী। কাঙলুপ ঈরাং হেঞ্জিল্লক্লবদি মতম খরনি কার্ফিউ থমদুনা লাকশিন্নবা হোৎনৈ। মরম অসিনা লাইনিং ওনবা, লাইমিং লৌবা নচিংবসি সরকারনা তরাই তরাইনা লৌশিন্দে। লাইর-অনংশিংনা লৈবা মফমদা নম হাদুনা লাইনিং ওন্থোকহনবগী থৌওং খরা উরকপদগী সুপ্রীম কোর্ট য়ৌনা খন্নবা হৌরক্লে।

হৌখিবা ডিসেম্বর ১২ দা অশ্বিনী কুমার উপাধ্যায় কৌবা এডভোকেটনা ফাইল তৌবা কেস অমগী মথক্তা খন্নরগা সুপ্রীম কোর্টনা য়াম্না সিরিয়াস ওইনা লৌশিনখি। কাঙলুপ অমবু নমফুদা লাইমিং লৌহনবগী মতাংদা কেন্দ্র অমদি রাজ্য সরকার অনীমক্না। থিজিনফম থোকপনি হায়বা নচিংবি। আসামগী মাজুলীদসু খ্রিষ্টান ধর্ম চৎহনবগী ফোং-ফোং শারবা থৌদোক অমা থোকখিবদগী রাজ্য সরকারনসু অকনবা মীৎয়েং চঙশিল্লকখি।

মণিপুরী খুনাইগী মনুংদসু লাইমিং লম্বী হোংদোক হোংজিনগী থৌওং অসি লেপ্তনা চত্থরি। মরু ওইনা পাক্তক্ননা হিন্দু ওইরম্বদগী খৃষ্টান, সনামহী, অপোকপা, ইথৌইকান অমসু বৌদ্ধ ধর্মদা লাইনিং হোংবসি লেপ্তনা চত্থরি। থৌওং অসিমক্না মশীং লিক্লবা খুনাই অসিদা কাঙলুপ কয়া থোক্লকপনা, অদুগা কাঙলুপ অমগা অমগা তোখায় তান্নরকপগী ঈচেল অমসু চেল্লক্লিবনি। মণিপুরগী মনুং অমসুং মপান্দা খুন্দারিবা মণিপুরী খুনাইগী মনুঙদা ইউনিটি লৈহনবা তারবদি হায়রিবা হীরম লাইনিং লম্বেন হোংবা, অমনা অমগী মথক্তা হুন্দুনা ঙাংনবগী চৎনবী লৈরোইদবনি হায়জনিংই।

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু