ডো. জোধচন্দ্র সনসমগী চহী ৭৯ শুরকপগী মপোক কুমওন থৌরমগা লোয়ননা নিংশিংবগী থৌরম পাঙথোকখ্রে
ইম্ফাল, নভেম্বর ২০ : মীওই কয়া লৈখিদ্রবা মতুং মখোয়না খুন্নাইদা তৌরম্বা থবকশিং অমদি মখোয়না থম্লম্বা লাইরিক লাইশু নৈনবা হায়বসি য়াম্না মরু ওই হায়না হান্নগী আর্ট এন্দ কালচারগী কম্মিস্নার কাংজম রাধাকুমারনা ফোঙদোকখ্রে।
উরিপোক অচোম লৈকায়দা লৈবা মখোনমনি মোংশাবগী শঙ্গাইদা লমদম অসিগী অইবা শক্নাইবা অমা ওইরম্বা লৈখিদ্রবা ডো. জোধচন্দ্র সনসমগী চহী ৭৯ শুরকপগী মপোক কুমওন থৌরমগা লোয়ননা নীংশিংবগী থৌরম পাঙথোকখ্রে। থৌরম অদুদা তিনখিবা মীয়াম্না লৈখিদ্রবগী ফোটোদা লৈ-শু কৎতুনা ইকায়খুম্নবা উৎখি।
পাঙথোকখিবা থৌরম অসিদা অথোইবা মীথুংলেন ওইখিবা কাংজম রাধাকুমারনা হায়, মীওইবা হায়বা অসি শিবা নাইবা জিব মখল অমনি মীওইবনা তাইবং পান অসিদা মতম খরদং লৈরিঙৈ মতমদা মানা খুন্নাইগীদমক তৌরম্বা থবক থৌরম অমদি থম্বীরম্বা লাইরিক লাইশু কয়া নৈনবা হায়বসি য়াম্না মরু ওই। ঙসি পাঙথোকচরিবা থৌরম অসি জোধচন্দ্র ডোক্তর অমা ওইরম্মী হায়না নৈনজবা নত্তে। মহাক্না মণিপুর লিটরেচরগী লমদা অমদি খুন্নাইগী য়াইফনবা থবক কয়া পাঙথোক্লম্বা অমদি মহাক্না থম্বীরম্বা লাইরিক লাইশু কয়াবু নৈনদুনা মীয়ামদা খঙহঞ্জবনি।
অইবা অসি ঈশৈ ইবগী লমদা ক্রিয়েটিভ ওইবরোমদা য়াম্না চংশিন্না ইবা পামখিবা মীশক অমনি। মহাক্না ঈশৈ ইবদা নত্তনা নোবেল অমদি ত্রান্সলেট তৌরম্বা লাইরিক কয়া অমসু খুন্নাই অসিদা থম্বীরম্মী। মহাক্না খুন্নাই অসিদা অচৌবা থৌদাং লৌদুনা মণিপুরগী লিটরেচরবু চাওখৎনবা হোৎনরম্ববু নৈনদুনা হৌগৎলক্লিবা তুংগী মীরোলদা খঙহঞ্জবনি।
লিটরেচর হায়বা লমসিদা চংশিন্দুনা মহাক্না অচৌবা ফিদা অমা কনবা ঙমখি। মসিদা নত্তনা ইন্দিয়ান লিটরেচর অমদি মালেমগী লৈবাক কয়াদা মণিপুরগী লিটরেচরবু মহাক্না ইংলিশ লোলদা হন্দোক্তুনা লিটরেচর অসিবু মালেম শিনবা থুংনা খঙহন্নবা হোৎনরমখি। মহাক্কী পোকপা অমদি শিখিবগী নুমিৎ অমদি থবানশিংবু নিংশিংদুনা নৈনজবা থৌরম নত্তে। মহাক্না খুন্নাই অসিদা অচৌবা থৌদাং লৌরম্বা অদুবা নৈনজবনি।
পাঙথোকখিবা নিংশিং থৌরম অদুদা মীথুংলেন ওইখিবা শক্নাইরবা অইবা অমসুং নৈনরোই সলাম তোম্বনা হায়খিবদা সনসম জোধচন্দ্র হৌখিবা কুমজা ২০২১ গী মে ১৬ তা তাইবংপাল থাদোকখি। মহাক্না তাইবংপাল থাদোকখিবদা মণিপুরগী লিটরেচরগী অচৌবা মাংজবা অমা ওইবদা নত্তনা মহাক্না লৌরম্বা থৌদাংশিং ঙসি ফাওবা মেনশিনবা ঙমদনা লৈরি।
মহাক অচুম অরান ফজনা খঙবা অমদি নৈনবা শীশক অমনি। মহাক্না লিটরেচরদা চংলক্তুনা মণিপুর লিটরেচরগী অমত্তা ঙাইরবা ইপিক্স খম্বা-থোইবীবু ইংগ্রাজিদা ত্রান্সলেট তৌদুনা লমদম অসিগীদমক থম্বীরম্মী অমদি ইপিক্স খম্বা –থোইবীবু ইংগ্রজিদা ত্রান্সলেট তৌদুনা লমদম অসিগীদমক থম্বীরম্মী অমদি ইপিক্স অসি চিংলোন মপাল লান্দুনা মালেমগী মফম কয়াদা খঙহনবা ঙমখ্রে। মহাক্না নেপালদা চহী ৭ পোষ্টিং লৈরিঙৈদা খম্বা থোইবীগী ত্রা্ন্সলেট তৌবা লোইরকখি অমদি অনীশুবা খম্বা থোইবী অমুক শাফোংখি।
থৌরম অদুগী থৌরম মপু ওইখিবা নাওরোইবম ইন্দ্রমনি পুৱারী নৈনরোই ওইরিবনা ডো. জোধচন্দ্র সনসম মশামক অনা-লায়েংগী ডোক্তর অমগী চপ চাবা মগুন ঙাক্তুনা লমদম অসিগী অশোন-অনাদা মীৎয়েং থমদুনা কত্থোকপগা লোয়ননা অনবাশিংবু সেবা তৌখিবা ডোক্তর অমনি। মণিপুর লিটরেচরগী ফম্বাক্তা চংলক্তুনা ঈশৈ ময়েক ইবা, নোভেল ইবা অমসুং মণিপুরীদগী ইংলিশতা ত্রান্সলেট তৌদুনা খুন্নাইগী লিটরেচরগী মফমদা অচৌবা থৌদাং লৌদুনা অৱাৎপা কয়া মেনখৎলম্বা মীশক অমনি। মহাক্না লিটরেচরগী লমদা লৌরম্লিবা থৌদাংশিং ঙসিগী খুন্নাইনা কাওবা য়াদবা অমনি হায়খি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু