চীংলৈবাক মণিপুরগী নুংশিবা শৈরোল শৈথারিবা অমসুং কন্তেমপররি মণিপুরী খুনাইগী মশক উৎলিবা শৈরেং লাইরিক ‘চীংনুংখোংগী মপাউ’- মীৎয়েং অমা
লাইরিক্কী মমিং- চীংনুংখোংগী মপাউ
অইবা- হুইদ্রোম ওথেল্লো
লাইরিক্কী মখল- শৈরেং
অফোংবা- রাইটর্স ফোরম, ইম্ফাল
লাইরিক্কী মখুম-কোন্থৌজম মাইকেল মীতৈ
লাইরিক্কী মমল- লুপা ৩০০/-
লমায় মশিং- ২০৬
‘অরিকপা ৱাহৈ’ হায়না মিংথোনবা শৈরেং অসিদা কবিনা মণিপুরগী য়েলহৌ মী ওইরিবা মরু ওইনা মৈতৈনা য়াইফ-য়ুম্বালগী থৌশিল হৈবা পাম্লুবনা চহী খরসিদা মী মশিং হন্থরক্তুনা দেমোগ্রাফিদা চাওনা অকায়বা লাকপা য়াবগী ফিভম লাকশিল্লকলি অমসুং ইশাগী ইরমদমদা খুৎকন পাঙ্গলনা হিংবদা ৱাহং কয়া থোক্লকলিবা অসিদা নিংদোল পোমদুনা শৈরেং অসিগী ৱাহৈ খরদা নুংঙাইতবা ৱাখল মতা অমা অসুম্না ফোঙদোকপা থেংনৈ, “ অশুকপা উমং কিদুনা/ অঙম্বা লম্বী কারিঙৈ/ অশম্বা লম্বী চৎলুবা/ পুন্সিনা পন্থুং অমগী/ চাকখুম মশিং য়ামদ্রগা/ তুংগী মীরোলনা কদোমদা? (লাঃ ২২)
হুইদ্রোম ওথেল্লো ১৯৭১দা পিশুমথোং ওইনাম লৈকাইদা পোকই। হুইদ্রোম ইবোতোন অমদি ওক্রম নিঙোল হুইদ্রোম ওংবী তোম্বী অনীগী মচা তরাহুমদোইগী মনুংদা মহাকনা মাপলশুবনি। ইম্ফাল কোলেজদগী সাইন্স গ্রেজুয়েট লোইশিল্লবা মতুংদা হৌজীক হৌজীক মণিপুর লৈঙাক্কী হেলথ দিপার্টমেন্টতা থবক তৌরি। চান্দম নিঙোল হুইদ্রোম ওংবী ইনাওগা পুন্সি খোঙলোই ওইদুনা মপারী অনীগী অপোকপা হায়বদু ওইবা ফংজখি। রাইটর্স ফোরম, ইম্ফালগী অচংবা থৌমীনি। ইং ১৯৯৩দা মহাক্কি অহানবা শৈরেংগী লাইরিক ‘নীংতম্বা’ হায়না মিংথোনবা অসিমক মণিপুরী খোরিলোলদা অঙনবা মতমদা খুদোল তমখিবা লৈরে। মতম ফনা কুইনা কেকু লোৎলূরবা চহী কূনতরেৎ মতুংদা মহাক্কি অনীশুবা শৈরেংগী লাইরিক ‘চীংনুংখোংগী মপাউ’ হায়না মিংথোনবা লাইরিক অসি অমুক খুদোল তমলকলি।
মীওইবগী পুন্সিনা তম্লিবসি নিংশিংবনি। নুংশিবা থৌদোকশিং, ৱারীশিং পুম্নমক কাওবা ঙমদে। পুম্নমক্তগী নুংশিবা শক্তমদি ইমানি। ইমানা তাইবঙ মপোক্তা পোকপীদুনা তাইবঙ মীওইবনা মালেমদা চাদা নাওদা মথং মথং থনম্লি লেপ্তনা। ঙসিগী মীরোলনা হৈয়েংগী মীরোল অমা শেমলমগনি। অসুম্না লেপ্নাইদনা চৎলিবা তাইবঙ খোঙচৎ অসিদা লাইবক ফবা পুংফম অমদা মালেমসিদা খোঙদারকখি অশৈবা ওথেল্লোসু। অইবগী পুন্সিদা থেংনবা, থম্মোয়দা, পুকনিংদা মতম খুদিং লেংদ্রবা মমি অমা তাদুনা লৈরিবা পালেম মমাগী শক্তম অমা নিংশিং লমায়দগী পুথোক্লক্তুনা য়েক্লি নুংশিরবা ৱাহৈশিংনা অদুঙৈগী পুন্সি মহিং অদুবু শৈথাদুনা। অদুনা নুংশিনা মিংথোল্লি মহাক্কী শৈরেং লাইরিক অসিগী অহানবা শৈরেং অসিমক ‘খোঙদারকখি অসুম্না’ হায়না। শৈরেংগী পান্দুপ খরদা হৌখ্রবা মতম অমগী খুনাইগী পুন্সি মহিংদু মিৎমাংদা তশেং তশেংনা উহনদুনা শৈথারক্লি, “চক্রিদা ফৌ তক্লম্বা/ শূম্বন্দা ফৌ শুরম্বা…মথায় থায়নগী ৱারীনি/ লীবিরম্মী ইমানা…ঙসিদি,/ ইমাগী নীংশিং কুমওণ্ণা লাকপডা/ নীংশিংহল্লে ফুঙ্গা ৱারীগুম/ করম্না তাইবঙদা খোঙদারকপা…” (লাঃ ২)
লৈঙাক্কী হেলথ দিপার্টমেন্টতা থবক তৌরুবনা মণিপুরগী লোইজিং লোয়া, চীংয়া তময়া কয়াদা মথৌ পাঙথোকপা চৎপদা থেংনরকপা নীংথিজরবা খুঙ্গংশিং, মবুক মপাউ ফরবা লমদম অসিগী ফুরুপ কাংলুপ কয়াগী মীওইশিং, মখোয়গী মীয়োক মীচান ফবা মতৌ পুম্নমক কাওবা ঙমদে। ইম্ফালদগী কিলোমিটর কয়া গাড়ীনা থৌদুনা চৎলগা লৈরিবা মনিপুরগী অৱাং মায়কৈদা লৈরিবা নিংথিজরবা খুঙ্গংশিংনি অশৈবনা শৈথারিবা। ‘তুম্ফুং খুঙ্গং’ হায়না মিংথোনবা শৈরেং অসিদা লমকোই ৱারীগুম্না, প্রোজ পোইত্রিগুম্না খুঙ্গং অসিবু শৈথারি। ইনাকখুল্লবা বাইওদাইভর্সিতি, উমং ৱামংগী চংখোল্লবা মশক অমসু উহল্লি। রোমান্তিক কবিগুম্না মহৌশাদা ঙাওজবগী মশক অমসু শৈরেং অসিদা উবা ফংই। মহৌশা লাইরেম্বী মহাক্কি ইরিক ইচুম থকতুনা, মহাক্কি হি-য়াইনা চাওরক্লবা কবিনা করিগুম্বা খরদি তৌবীমল খঙবসু উৎনিংই। পীনহৈবী ইমা মহাক্কি মফমদা থম্মোয়দগী থোক্লকপা শেংলবা য়াৱানা ফোংদোক্লকই, “ চহী কূমজা কয়া কয়া/ চীংজূমগী লাইজ-ঈশিং থক্ল- থক্লগা/ করি মপাউনা খুদোল তমগনি/ হংজৈ ইদোম ইথন্তা…লোকচপকী ঈশিংখোংগী মপাউ/ তত্তনা য়ৈরি ঙসিসু।/ তম্ফুং খুঙ্গং, থুয়েং, চাকা, বেন্দ্রামাই/ য়াংখুলেন, ৱিলোং, রাজামাই…খুঙ্গংগী লম্বীনি খোয়দাজরিবা… মহৌশা ইমাগী খূৎশেমনি, খুদোলনি…/ অমরোমদা অমুক অৱাৎ অপানা থল্লবা চাকথুং ফিথুংদ্রবা অদুগুম্বা খুঙ্গংশিংগী মীওইশিং অদুগীসু করিগুম্বা খরদি লৈঙাক্কী মায়কৈদগী পাঙথোকহন্নিংই। অসিগুম্বা চীংনুংখোংগী মপাউ অমা তম্লি শৈরেং অসিদা। চীংনুং মনুংদা আশা কয়াগা লোয়ননা হিংলিবা মখোয়না আশা অমদি তৌদুনা ঙাইরি অফবা স্কুল, অফবা লায়েংশঙ, অফবা লম্বী, অফবা থকনবা ঈশিং করম্বা মতমদা ফংগনি হায়না। অদুনা হায়রক্লি কবিনা “ করম্বা নুমিৎ থা করম্বা কুমওন্দা/ হেন্না শাফগনি খঞ্জরি/ …চীং কাসি চীং চৎসি…পুন্সিগী ইথৌদাং পাঙথোক্লুসি…” (লাঃ ৫)
ৱেস্তর্নাইজেসনগী কল্লবা শাফূ মরক্তা ইপু ইবেন্না চৎলম্বা লিকলমদা ইনাৎপু ঙাকনা চৎপা, চৎনবীবু নুংশিনা থাগোন্নদুনা থম্বা, হৌরকফম্বু কাওদনা মতম খুদিং নীংশিংবা হায়বসি অচৌবা চেলেঞ্জ অমা ওইরক্লিবনি হৌজীক্কী মতমদা। পুম্নমক ওইদুনসু থায়নগী চৎনবী থাজনবী অসিবু ঙাকনা চৎলিবা, নুংশিনা লুনা খল্লিবা ফুরুপ কাংলুপ অদুগুম্বা খুনাই অদুদি হিংদুনা অদুমক লৈগনি। অদুগা মসিবু থৌওইদবশিংনা তপ্না তপ্না খোঙ্গুল মুৎলকই। থায়নগী ত্রেদিসনবু ঙাকলিবা অমসুং চৎনবীবু লুনা লৌরিবা খঙ্গংশিংগী মপাউ অদু শৈথারক্লি কবিনা লাইরিক অসিগী মরিশুম্বা শৈরেং ‘য়াংখুলেন খুঙ্গং’ হায়না মিংথোনবা শৈরেং অসিদা। য়াংখুলেনগী লেন্দস্কেপ অমা মিৎমাংদা ৱাহৈনা শক্তম শাগত্তুনা ইরক্লি, “ য়াংখুলেনগী চীংদোল অৱাংবা/ সেনাপতি জিলাগী মনুংচন/ য়াংখুলেন ৱিলোং লম্বী পাং/…কোরৌনা কোক্তোন ঙানবগুম/ শঙ্গায় পরেং লেংলিবা/ কৈরাক মথুপ নাইরিবা/ য়েকনবনা লান্দাবা ঙমদনবা/ ঙান্থোইরি চেকশিন্না/ ইপানাৎ ইপুনাৎ খুদম ওই;/…রেহাংকি, রেলৈকি (পাখঙফান লৈশাফান)/ য়েংলু উরু কুমওন কাংদা,/ চৎনবীবু ঙাক্লিদো…” (লাঃ ৭)
‘অরিকপা ৱাহৈ’ হায়না মিংথোনবা শৈরেং অসিদা কবিনা মণিপুরগী য়েলহৌ মী ওইরিবা মরু ওইনা মৈতৈনা য়াইফ-য়ুম্বালগী থৌশিল হৈবা পাম্লুবনা চহী খরসিদা মী মশিং হন্থরক্তুনা দেমোগ্রাফিদা চাওনা অকায়বা লাকপা য়াবগী ফিভম লাকশিল্লকলি অমসুং ইশাগী ইরমদমদা খুৎকন পাঙ্গলনা হিংবদা ৱাহং কয়া থোক্লকলিবা অসিদা নিংদোল পোমদুনা শৈরেং অসিগী ৱাহৈ খরদা নুংঙাইতবা ৱাখল মতা অমা অসুম্না ফোঙদোকপা থেংনৈ, “ অশুকপা উমং কিদুনা/ অঙম্বা লম্বী কারিঙৈ/ অশম্বা লম্বী চৎলুবা/ পুন্সিনা পন্থুং অমগী/ চাকখুম মশিং য়ামদ্রগা/ তুংগী মীরোলনা কদোমদা? (লাঃ ২২)
মণিপুরগী খুদোংচাখিদ্রবা নেস্নেল হায়ৱেশিংদা নোংমদা চংদবা য়াদ্রবা পোৎলমশিং মপাল লমদগী অহীং নুংথিল, নোংজু নুংশা খায়দনা তুম্বা মচেৎ চাবা মচেৎ, অহিং মিংশেল খাংদুনা চাওরবা ট্রক কয়া থৌরিবা থৌনা ফরবা হায়ৱে দ্রাইভরশিংদা মপুংদা শৈথাদুনা ইবা শৈরেংনি ‘হায়ৱে দ্রাইভর’। কবি মশামকনা দ্রাইভর অমগী পুন্সিদা থেংনরিবা অৱাবা নুংঙাইতবা, খুদোংথিবা অমদি নেস্নেল হায়ৱেশিংদা শকখঙদবশিংনা ঙাইহাক লৈতনা লম্বী থিংদুনা নোংমৈ চিন্দোলদা শেল খায়রিবা, শেল পীয়ু য়াদ্রগনা মরাল লৈজদ্রবা হায়ৱে দ্রাইভরশিংবু ওৎ-নৈবা, ফুবা চৈবা, হাৎতোকপীবা অসিগুম্বা তাহৈ উহৈদবা থৌদোকশিং অসি দ্রাইভরশিংগী পুন্সিদা থোকহনবীগনু হায়না তাইবঙ মপুগী মফমদা থৌনিজবনি। শান্তিবু ইখৌ লাংলিবা কবিনা দ্রাইভরশিংগী অৱাবশিং উদুনা, থেংনদুনা শৈথারক্লি, “ ইমুং মনুং হিংমিন্না/ শাগৈ নাতৈ লিংদুনা/ জাৎ- বিজাৎ খায়দনা/ পুন্না খুন্দা লৈতামিন্নরিবা/ লাইরৈপাক কৌবা লমদমনি;/ মীকপ মীরাওখোল তানীংদে/ কায়না মৈচাকসু খাঙহন্নীংদে/...মীৎকুপ খুদিং কিহন –খংহন্দুনা/ করিগুম্বদা থৱায়গা হকচাংগদদি শেৎনহন্দবা...ইচাশিংবু লাইরিক তম্বদদি/ মপুং ফাহনবীয়ু/ মপুগী থৌজাল নিজরি” (লাঃ ২৫) ‘হায়ৱে দ্রাইভর’ দা উৎলিবসি পাম্বৈ লৈতবা মতৌদুনি। হিংদবদি য়াদে। অদুনি অৱাবা ওইরিবসিসু। ফজবা শৈরেংনি। রিএলিতিদা ফোকস তৌরগা অশেংবা থম্মোয় পাউদম অমা থম্বনি।
হৌজিক মালেম নোংখোঙ কায়বদা থেংনরিবা শাথিরবা খুদোংচাদবশিং, অৱাবা নুংঙাইতবা, লায়েংবদা ৱারবা লায়না লাইচৎশিং, মথোং খঙদবা মতৌ অসিগুম্বা ইসু কয়া মায়োকনরিবা অসিদগী শাফগদবা থৌওংশিং পায়খৎতুনা থেংলবসু থেংনা কায়থরক্লিবা মহৌশাগী খল অসি মহৌশাগী হান্নগী ফিভমদা খল কায়দনবা মালেমসিদা লৈরিবা মীপুম খুদিংনা হোৎনমিন্নসি হায়বগী পাউজেল পুবা শৈরেংনি’ মালেমগী অঈং অশাগী খল’ হায়বা শৈরেংসি। কবিনা হায়রক্লি, “ হে! মীওইবা খুন্নাই/ মরু হুল্লে হরাওনা খঞ্জবা/ মথংগী চারোল শুরোল চত্থরনি চাউথোকচবা…/ মীকানরি মহৌশাগী লৈনুংগী লন/ চাওখৎ লমজেল তান্নরিঙৈ…/ ঊন মপৈ মপৈনা নীংখায়রক্লি তপ্না তপ্না/ …য়েংদুনা নীংঙাইদনা লৈথোক্লনু…/ মালেম পৃথিবী অমুক্তংদি কনসি।” (লাঃ ৩০)
লৈঙাক্কী ৱায়েল লোইশঙ লৈরবসু, ৱায়েল কাতিনা মথৌ নীংথিজনা তৌরক্তবা মীকুপশিংদা থোকহন্নিংদবা থৌদোক কয়াদি অদুম্মক থোক্লি ঙসিসু। অরানবা পাউদা য়ুম্ফম ওইদুনা মরাল শুক্লৈ লৈজদবা মীওইশিং ফাওবা মোব জস্তিসতা ভিক্তিম ওইবা য়াওদবা নত্তে। অচুম অরান থিদোকপা নংদ্রিঙৈদা, মরালগী মতুং ইন্না ফংফম থোকপা চৈরাক পীগদবদু পীদ্রিঙৈদা অৱাফমদা তাখিবা মীগী মশিং ফনা য়ামলমগনি লমদম অসিদা। খন্থহৌদবা মিকুপ্তা ওইহনখিবা অমাং অতা কয়া, পুন্সিগী কোক্লরোইদবা দাকফমশিং অদুগা অথিবা মিংচৎ পুম্নমক ৱায়েল লোইশঙ লৈরি কাওথোকপগুম চৎনরকপা সিস্তেম অমা লাকপসি নুংঙাইতে। অসিগুম্বা মোব জস্তিস অসি তৌহন্নিংদে কবিনা। অদুনা কবিগী ‘মোব জস্তিস’ হায়বসিদা অসুম্না ইরক্লি, “...অচুম্বা ঙাঙবা কিরকপা/ অকনবনা অশোনবশিংবু তুহৎপিবা/ খন্থহৌদবা মিৎকুপ্তা/ ফৌহামগা ৱাইকুপকা/ য়ানশিন্নখিবা পাংখক ওই/...অশিবতনা মাংজবা/ নোংঙাল্লগনা য়াৎলি লম্বী লীক্লম/ ফক্লাং মরিগী কৈশুমশঙ!” (লাঃ ৪৭)
হৌখিববু নুংশিনা নীংশিংদুনা পুন্সিগী ৱাহন্থোকপু থিরকঙৈদা কবিনা অমুক নৌহৌনা থায়নগী হেন্তাককি মহাউ অদু ঙসিদি চাওখৎপনা লাক্লিবা অহোংবা মরক্তা অমুক পংনা উখিদ্রে হায়না নুংশিনা শোঞ্জবা শৈরেংনি ‘হনুবী হেন্তাক’ অদুনা নুংশিনা শোল্লকই, “ নীংশিংলকই অঙাং- নাৱা ওইরিঙৈ/ তম্বীখিবা অপোকপী ইমানা/ হনুবী হেন্তাক শুবা/ অদুবু ঙসিদি ঙম্নমক/ চাওখৎপগী ঈচেলনা পুথখ্রে/ হনুবী হেন্তাক/ ঐখোয়গী হেন্তাক।” (লাঃ ৫৯)
ফজরবা থিম কয়াদা ইবা শৈরেং মরাং কায়না লাইরিক অসিদা য়াওবা থেংনৈ। মপুংদা নীংথিজরবা চীংলৈবাক মণিপুরবু নুংশিনা শৈথারি অদুগা অমুক লমদম অসিগী ইসুশিং, খুদোংচাদবশিং, খুনাই অসিদা মায়োকনরিবা অৱাবা নুংঙাইতবশিং পুথোক্তুনা নৈনরি। পাম্বৈ থিদোকসি হায়না ফোংদোক্লী। নুপী ওইবীশিংনা খুনাই অসিদা লৌরিবা থৌদাংশিং শিংথাদুনা ইরি। ইংনা চিকনা শান্তি লৈবা লমদম অমা ওইহন্নিংই। মতুং তারকপদসু ফজরবা লাইরিক অদুমক মণিপুরী খোরিলোলদা খুদোল তম্লকখিগনি হায়না থাজবা থমজরি।
0 কমেন্ট:
কমেন্ট তৌবিয়ু