চহী তরেৎ খুন্তাকঙৈ মণিপুরগী নীংতম্বা পুরকখিবা নিংথৌ গম্ভীর --মাইবম তোলেন
...অৱা লাম্মীগী লুচিংবা জেনরেল মহাবন্দুলা অচৌবা লাম্মী তেঙ্গোল অমগা লোয়ননা খৃস্ত কুমশীং ১৮১৯ গী পোইনুগী নীনি পানবা নোংমাইজিং নুমিৎতা মার্জিৎপু ফানবা মণিপুরদা লান্দারকখি। মদুগী অকনবা লানফমদা মার্জিৎ নিংখৌনা মায়থীবদগী পোইনুগী ১২ নি পানবা লৈবাকপোকপা নুমিৎতা কাছার লৈবাক তান্না চেনখি। মথংদা নিংথৌনা মণিপুর থাদোক্তুনা চেনখ্রবা মতুং ঙাকপী-শেনবিনবা লৈত্রবা মীয়ামদা অৱা লান্মিশিংনা তমথীরবা মীওৎ-মীনৈ চৎথরকপদগী লৈবাক মীয়াম মথ্বায় হিংনবা মরমদম মণিপুর থাদোক্তুনা য়ূম্লোন্নবা ময়াং লৈবাক্তা চেন্নখি- খুন্তাক-লৈতাকখি- অসুম্না থোকখি পুৱারীগী চহী তরেৎ খুন্তাকপা।
মাইবম তোলেন
মৈতৈ লৈবাক্তা পানখিবা নিংথৌশিং মরু ওইনা মৈদিংঙু পামহৈবগী মতুংদী হৌনা নিংখৌ মচাশিংনা নিংখৌ খুবম মুন্নবগী মখোয় মশেল য়েংখীনবা, লৌতুনবা, মীচঙ খোম্নবা, হাৎনবগী ৱারী কয়া মণিপুরগী পুৱারীগী লামায়দা ময়েক লানা ইদুনা লৈরি। মতম'দুগী নিংথৌ কয়ামনা মপূক্নিংগী অপাম্বদু লাকশীনবা ঙমদবগী মহয়-লৈমা মশীং য়াম্না লৈমিন্নবা, মখোয়গী মচাইবুংঙোশিংগী মরক্তা পূকচেল তিন্নদবা, মিনুংশি চেন্দবা, কল্লক- মিহৌবগী অমোৎপা থৌদোক কয়ানা পুৱারীবু অমুবা মুকনা মশক থীহনখি- লৈবাক মীয়ামদা অৱাবা চৈথেঙ নংহনখি- মীচমগী পুন্সি লোমহনখি- মীকপ-মীরাওখোলনা লৈবাক মীয়াম্বু তেংখাহনখি- ঙসিদগী চহী চনী শুপ্না মরিগী মমাঙদনি-খৃস্ত কুমশীং ১৮১৯ দগী ১৮২৬ ফাওবা মণিপুরনা চহী তরেৎ চূপ্না মীখা পোন্দুনা লেনখিবা মদুগী ৱারীনি চহী তরেৎ খুন্তাকপা।
চহী তরেৎ খুন্তাকপা থোকখিবগী মরম :
মৈতৈ নিংথৌ চীংথংখোম্বনা খৃস্ত কুম ১৭৯৮ দা নোংচুপ বঙ্গগী মুর্শিদাবাদতা নোঙ্গাখ্রবা মতুং নিংথৌ লৈমা মরিনা পোকপা মজাইবুংঙোশিংনা লৈবাক্কী নিংখৌ খুবম মিহৌবদগী পূকচেল-খোয়জেন তিন্ননা লৈঙাকপা ঙমখিদে। মজাইবুংঙো নিংথেমহন লাবন্যচন্দ্রনা লোইরেন খোম্বা মিংথোল লৌদুনা খৃস্ত কুমশীং ১৭৯৮ দা নিংথৌ ফম্বাল তোংলে। মহাক্না লৈঙাকপা চহী অনী শুরকপদা নোংমা শগোল কাঙজৈ শান্নবদা শোয়খিবনি হায়না পাউথোক্তুনা নিংথৌ লাবন্যচন্দ্রবু শগোলদগী য়ৈথুদুনা তাহল্পগা ময়াম চঙদুনা ফুদেক্লগা শিরে হায়দুনা মনুং কাঙজৈবূংদা হুন্দোক্লগা চেন্নখিরম্মী।মদুগী শরৌ’দুনা খুম্বোংময়ূমগী মীওই খরনা মখোয়গী নিঙোলনা পোকপা কবোতাবা গম্ভীর সিংহবু নিংথৌ ওইহন্নবা শীনখিবা থৌরাঙনি।
নিংথৌগী মথংখনবা মনাও ইবুংঙো ঙাংবম চনু হরিমতীগী মচা মজাইবুংঙো লাঞ্জিংলেন মধুচন্দ্রনা মহাক্কী থাজরবা মনাইশিংবু নিংথৌ কনবা, লায়কল্লবা শাদুনা চৎহনখি – মথ্বায় থারমদ্রবদি লোইশিন্নবা অরোনবা পাউতাক পীখি। মনাইশিংনা হিংলল্লিবা নিংথৌবু অশি লৈবাক্তা যৌহনখি। মদুগী মতুংদা খৃস্ত কুমশীং ১৮০০ মধুচন্দ্রনা তম্লেনখোম্বা মিংথোল লৌদুনা নিংথৌ ফম্বাল কাখি। মহাক্না মশাগী মরাল কুপশিন্নবা খুম্বোংময়ূমগী ফস্নাইবা কয়ামা হাৎখি অদুগা গম্ভীর সিংহবু ময়াং লৈবাক (কাছার) তা লোই থাখি। মধুচন্দ্রনা চৌরজিৎপু মথংখনবা অদুগা মার্জিৎনা লাঞ্জিংলেন ওইহন্দুনা লৈবাক ঙাকপা হৌখি। অদুবু নিংথৌ মচীন-মনাওশিংগী মরক্তা মতম কুইনা পূকচেল-খোয়জেল তিন্ননা লৈঙাকপদি ঙমখিদে। মতম খরা মতুংদা চৌরজিৎনা ময়াম্বা নিংখৌ মধুচন্দ্রগী মথক্তা লালহৌনবা থৌরাঙ তৌরুবদা নিংথৌনা খঙদোকখিবদগী মণিপুরদা লৈবা য়াদদুনা চৌরজিৎ কাছার তান্না চেনখি। চৌরজিৎনা কাছারদা চেনখ্রবা মতুংদা মার্জিৎনা মথংখনবা অমসুং লাঞ্জিংলেন ওইহৌখি।
চহী অহুম মতুংদা খৃস্ত কুমশীং ১৮০৩ গী লমতা থাদা চৌরজিৎনা কাছারদগী লাম্মী খোম্লগা নিংথৌ মধুচন্দ্রগী মথক্তা লাল হৌরকখি। চৌরজিৎকী তেঙ্গোলনা সপ্তাইথেলদা লৈরে তাবদগী মার্জিৎনা লাম্মী পুরগা লাল ঙাক্লবগীদমক খোঙশাল্লক্তুনা মাক্লংদা থুংলরে। অসোমদা চৌরজিৎকী অপোকপা চীংঙাখম চনু দেবহুতিবু মধুচন্দ্রনা কোনুংদগী তান্থোক্লুবগী মহয় ওইনা দেবহুতিনা মার্জিৎকী মনাক্তা চৎখিদুনা মার্জিৎপু ময়াম্বা চৌরজিৎকা পূনশিন্দুনা মধুচন্দ্রগী নিংথৌ খুবম মুন্নবা ঈনশিনখি। মরমদি মার্জিৎকী অপোকপী অখাম চনু চন্দ্ৰমুখীনা মার্জিৎনা য়াম্না পীক্লিঙৈদা লৈখিদবনা চৌরজিৎকী মমা দেবহুতিনা নাউকোন্দুনা য়োক্লকখি। অদুনা দেবহুতিনা নখোয় নচীন-ননাও অনীনা শিন্ন-শিন্নদুনা চহী মঙা মঙা নিংথৌ ওইমিন্নৌ হায়বদগী মখোয় অনী মমাগী য়াথং মতুং ইন্না মধুচন্দ্রগী মথক্তা লান্দাবদগী নিংথৌ মায়থীদুনা কাছারদা চেনখি।
খৃস্ত কুমশীং ১৮০৩ দা চৌরজিৎনা ফালোক ৱাইরোংবা মিংথোল লৌদুনা মণিপুরগী নিংথৌ ওইরগা মনাওইবুংঙো মার্জিৎনা মথংখনবা অমসুং লাঞ্জিংলেন অনীমক ওইদুনা লৈবাক ঙাকপা হৌখি। মথং চহীদা খুস্ত কুমশীং ১৮০৪ গী মে থাদা মধুচন্দ্রনা মচানুপী ইন্দ্ৰপ্ৰভা লৌবা ময়ানুপা কাছার নিংথৌগী লাম্মী পুদুনা মণিপুর তম্না লাক্লগা লম্মাংদোংগী শামুপন্দা নিংথৌ চৌরজিৎকী লাম্মীগা অকনবা লাল শোক্নখি । মদুগী লান্দা মধুচন্দ্রগী মপুন্সি লোমখি ।
চৌরজিৎনা নিংথৌ ফম্বাল তোংবা চহী মঙা শুরকপদা মার্জিৎনা মঙোন্দা নিংথৌ খুবম পীবিরো হায়রুবদা মতম খরা ঙাইখো হায়রকপা, মথংদা অমুক ওৎলৈ-পালৈ তৌদুনা লৈখিবা- মদুদগী মার্জিৎনা নীংবা কায়বদগী মশাগী মীচঙ খোম্লগা চৌরজিৎকী মথক্তা লাল হৌখি। মদুগী লান্দা মায়থীরবা মার্জিৎনা তমু তান্না চেনখ্রগা অৱাগী কোনুং য়ৌখি। অৱা নিংথৌ বোদাউপয়াদা মতেঙ পাংবিয়ু হায়জরুবদা অৱা নিংথৌনা মচীন-মনাও অনী খৎনবদু তাইশিন্নবিদুনা হান্নগুম লৈমিন্নহনখি-অদুবু কুইনা চৎনখিদে। মদুগী মতুংদা মার্জিৎনা অমুক হন্না লাল হৌখি- মদুদসু মায়থীবদগী কাছার তান্না চেনখি। কাছারী নিংথৌ কৃষ্ণচন্দ্রনা মার্জিৎপু মকুবোক হাৎপা মীশক্নি খন্দুনা তাথী-তাওইনা তৌবিখি ।
খোংলম তৌদুনা গুম্ভীর পুশিল্পকপা ঃ
চঙজফম ফংদ্ৰবা, নীংবা কায়রবা মার্জিৎনা মহাক্কী খোঙলোয় খরগা লোয়ননা মতেঙ পাংবিনবগীদমক অমুক হন্না অৱা নিংথৌগী মনাক্তা চৎখিরম্মী। করিগুম্বা মহাকপু মণিপুরগী নিংথৌ ওইহল্লবদি কবো তম্পাক অৱাদা পীগনি অমসুং মশামক অৱাগী মখা পোন্না লৈগনি হায়রুবদ অৱা নিংথৌ য়ারদুনা মশীং য়াম্লবা লান্মী তেঙ্গোল অমা পীদুনা মণিপুরদা লান্দারকখি। মদুগী লাল অদু চৌরজিৎ নিংথৌনা মায়থীদুনা মনাওনুপা গম্ভীর সিংহগা লোয়ননা কাছারদা চেনখি।
Seven year's Devastation II (1819-1825) : (chahi taret khuntakpa) @ RKCS Gallery
খৃস্ত কুমশীং ১৮১৩ গী লমতাগী ১৭ নি পানবা য়ুমশকৈশা নুমিত্তা মার্জিৎনা নোংপোক ৱাইরোং পামহৈবা মিংথোল লৌদুনা নিংথৌ ফম্বাল তোংখি। মহাক্না অৱা লৈবাক্তা চহী তরেৎ লোম চঙজফম লৌদুনা লৈরকপা মতমদা উরকখিবা অৱা কোনুংগী লূবা-নানবা, অরঙ-অরাকশিংদু মহাক্কী মপূক্নিংদা য়াম্না পামখি। অদুনা মহাক্না অৱাদা পীথোকখ্রবা কবো তম্পাক্তগী মহাক্কী মী থাদুনা চীংশু উ য়ালহন্দুনা ফজরবা কোনুং অমা শাখি। মদুগী থৌদৌ অদুনা অহল ওইরক্লবা অৱা নিংথৌ বোদাউপয়াগী মপূক্নিংদা য়ান্না ৱারৌখি। মহাক্না মার্জিৎকী মথক্তা থবক লৌখৎপা নংদনা শিখিবদগী মশূনুপা বাগিদাউনা খৃস্ত কুমশীং ১৯১৮ দা অৱাগী নিংথৌ ওইখি।
অৱাগী নিংথৌ বাগিদাউগী নিংথৌ ফম্বাল তোংবগী থৌরমদা য়াওরনবা অমদি মখা পোনবা লৈবাক অমা ওইবগী হৌনবী ইকায়খুম্নবা উৎনবা কৌরকখি। মদুদা মার্জিৎনা মরৈবাক থাদোক্লগা অৱাদা চৎলবদি চৌরজিৎ অমদি গম্ভীর সিংহ অনীনা লান্দারত্তুনা নিংথৌ খুবম মুনখিবা য়াই হায়শিন্দুনা চৎখিদে। মদুদগী মার্জিৎনা অৱা নিংথৌবু উশিৎতবনি খন্দুনা অৱা লাম্মীগী লুচিংবা জেনরেল মহাবন্দুলা অচৌবা লাম্মী তেঙ্গোল অমগা লোয়ননা খৃস্ত কুমশীং ১৮১৯ গী পোইনুগী নীনি পানবা নোংমাইজিং নুমিৎতা মার্জিৎপু ফানবা মণিপুরদা লান্দারকখি। মদুগী অকনবা লানফমদা মার্জিৎ নিংখৌনা মায়থীবদগী পোইনুগী ১২ নি পানবা লৈবাকপোকপা নুমিৎতা কাছার লৈবাক তান্না চেনখি। মথংদা নিংথৌনা মণিপুর থাদোক্তুনা চেনখ্রবা মতুং ঙাকপী-শেনবিনবা লৈত্রবা মীয়ামদা অৱা লান্মিশিংনা তমথীরবা মীওৎ-মীনৈ চৎথরকপদগী লৈবাক মীয়াম মথ্বায় হিংনবা মরমদম মণিপুর থাদোক্তুনা য়ূম্লোন্নবা ময়াং লৈবাক্তা চেন্নখি- খুন্তাক-লৈতাকখি- অসুম্না থোকখি পুৱারীগী চহী তরেৎ খুন্তাকপা। মসিগী মমাঙদসু 'খুন্তাক অহানবা’ অমা থোকখি-মদুনা মৈতৈ নিংথৌ মরাম্বনা পানখিবা খৃস্ত কুমশীং ১৭৫৮ গী মতমদনি। মদুদসু অৱাগী লাঞ্জিংলেন আলুংপয়াগী মখুৎতা মায়থীবা নংখি। তৌবতবু মদুনা শূপ্নগী নুমিৎ ৯ নি খক্তনি। চীংয়া-তময়াদা লাঞ্জেন্নদুনা লৈরুবা মীয়াম মশা-মশাগী ময়ূমদা অমুক হঞ্জিন্নরগা হান্নগুম খুন্দা-লৈতানা পানবা ঙমখি। অদুবু চহী তরেৎ খুন্তাকপদদি লৈবাক মীয়ামগী অৱাবা পন্দোম লোমখি - কাং-খোং চাইখি চহী তরেৎ।
মৈতৈ নিংথৌ মচাশিংনা কাছারদা লৈঙাক্তুনা পানখিবা :
নিংখৌ মার্জিৎনা মণিপুর থাদোক্তুনা চেনখিবা মতমদা শ্রীগোবিন্দবু পুরগা চৎখি অমসুং ময়াম্বুং চৌরজিৎকী মফমদা চঙজদুনা শ্রীগোবিন্দবু খূৎশিন্নখি। মনাও মার্জিৎপু চৌরজিৎনা ঙাকপিদুনা চঙজফম পীখি। মতুংদা কাছারগী নিংথৌ গোবিন্দচন্দ্রবু চৌরজিৎ-মার্জিৎ অমসুং গম্ভীর সিংহ মখোয় অহুম্না কাছারদগী তান্থোক্লগা মখোয় মচীন- মনাওশিংনা যেন্থোক্নদুনা কাছারদা কোনুং লিংখৎতুনা পানবা হৌখি। কাছারগী খা- নোংপোক থংবা, তিলাইন চীংশাংগী নোংচুপ থংবা লমদম গুমরাদা গম্ভীর সিংহগী কোনুং ওইখি, মার্জিৎনা জারিবন্দা অমসুং চৌরজিৎনা তিলাইন চীংশাংগী নোংপোক্তা লৈবা লমদম সোনাইমুখকী দুঙ্গুরিপারদা কোনুং ওইখি। অৱা লান্মীনা মার্জিৎপু হিংনা ফানবা আসামগী মফম পূন্না তপ্না তপ্না চঙশিল্পভূনা বৃত্তিশকী লৈঙাক মখাদা লৈবা লমশিং অৱানা খূদুম চনবা হৌরকখি।
চহী তরেৎ খুন্তাকপগী লাল মমাঙদগী মৈতৈ নিংথৌ মচাশিংনা কাছারদা ময়ূম-ইঙ্খোল লিংদুনা লৈবা হৌখ্রবনি। নিংথৌমচা নরসিংহনা খৃস্ত কুমশীং ১৮১৪ দগী খোইরেন পাকী খোইরেন্দা খুন্দা লেংওন্দনা পাৎ অমা কংনবা ঈশীৎপগী পাউ তাবদা নিংথৌমচা গম্ভীর সিংহনা খোঙ্গূল লীদুনা থিরুবদা মমা লৈবাকপু অৱাগী মখূৎতগী কন্নবগী অকনবা ৱাশক্কী চাংয়েং তৌরম্লিবা মহাক্কা থেংনখি। মপু মপু মচীন-মনাও ওইরম্বা অমদি গম্ভীর সিংহনা চহীদা খরা হনবা মরম্না য়াম্বুং হায়না খঙনদুনা তিন্নরগা লৈমিন্নবা হৌখি ।
অসোমদা কাছার লৈবাক পূম্নমক মৈতৈ নিংথৌমচা অহুম্না মচেৎ-মচেৎ য়েন্থোক্নদুনা পানমিন্নরবসু মখোয় মশেল অপোকপী মমা তিন্নদবগী হৌনবী পূকচেল-খোয়জেল তিন্নরক্তবা, নিংথৌমচা ওইবগী অচৌবা তান্নরকপা, মতীক-মপাঙ্গনগী মূক্নরকপদ লৌতুনবা হৌরকই— গম্ভীর সিংহ অমসুং মার্জিৎ অনীনা কোক চুংশিন্নখি। ময়াম্বুং চৌরজিৎপু শরৌ শীব্দুনা কাছারদগী তান্থোকখি অমসুং সিলেত্তা চঙজফম লৌদুনা লৈখি৷
অৱাগী মখূৎতগী মণিপুর নীং-খা তমহন্নবা থৌরাঙ তৌবা :
মৈতৈ নিংথৌ মচাশিংনা কাছার লমদম পূম্নমক খূদুম চনখ্রবা মতুংদা কাছারগী নিংথৌ গোবিন্দচন্দ্রনা মহাক্কী খুবম হঞ্জিনবিনবা বৃতিশকী মফমদা হায়জখি-মদুদা বৃতিশনা য়াবিরক্ত্রে। মথংদা গোবিন্দচন্দ্রনা অৱাদা চৎখিদুনা নিংথৌ বাগিদাউদা হায়জরুবদা য়াবিরকপদ অৱা লান্মী তেঙ্গোলনা মায়কৈ অহুমথোক্লা আসামগী নোওগাঁউ- জৈয়ন্তিয়া অমদি মণিপুরদগী লান্দাবা হৌখি। মতাঙ অসিদা নিংথৌমচা মার্জিৎকী খুদোংখীবা থোক্লকপা য়াই খন্দুনা মহাকপু সিলেত্তগী মাইল ৫০ লাপ্না লৈবা খুঙ্গং ভানুগাছকী নিলকুথিদা লৈহনখি। মদুগী খুঙ্গং অদুদা নিংথৌমচা মার্জিৎ খৃস্ত কুমশীং ১৮২৬ মেরাগী ৫ নি পানবা থাংজ নুমিত্তা মপুন্সি লোমখি।
অৱা লান্মীশিংনা আসামগী মফম অয়াম্বা মথং-মথং খূদুম চনবা হৌরক্তুনা বৃতিশকী লৈঙাক লম য়ৌশিল্পকখি। অৱানা লান্দারকপা থিংনবা খৃস্ত কুমশীং ১৮২৪ গী মার্চ চৈচৎ ৫ দা বৃতিশনা অৱাগী মথক্তা লাল লাউথোকখি। কাছারগী লান্দা অৱা লান্মীনা কেপ্তেন দেবিদ স্কোতপু ফাদুনা তিলাইন চীংদা মখোয়গী লানবন্দা মীফা ওইনা থমখি । বৃতিশ লান্মীনা কেপ্তেন স্কোতপু কন্নবা হোৎনবদা মায় পাকপা ঙমখিদে। মদুগুম্লবা বৃতিশকী খুদোংথীরবা মতমদা মৈতৈ নিংথৌ গম্ভীর সিংহনা বৃতিশকী মফমদা খূজু-খূৎলায় অমসুং লান্মী পীরবদি কেপ্তেন স্কোতপু কনবিগে অদুগা অৱাশিংবু মণিপুরদগী তান্থোক্তুনা নীংতম্বা ফংনবা হোৎনবদা মতেঙ পাংগদবনি হায়বা ৱাফমদা য়ানবা পুরক্তুনা গম্ভীর সিংহ অমদি নরসিংহ অনীনা বৃতিশকী লান্মী পুদুনা তিলাইন চীংগী অৱাগী লানবন্দা নুমিদাংৱাইগী মতমদা মায়কৈ মরিদগী কোয়শিন্দুনা লান্দাখি।
লানবন্দা খঙহৌদনা লান্দারকপদা অৱা লান্মীশিংনা লানবন ঙাকথোক্লবা লাল তৌনরিঙৈদা শরীৎ-শরাৎ হৈরবা গম্ভীর সিংহনা অৱাগী লানবন মনুংদা নারোন্দা শগোল নুংশিৎকুম য়াঙনা থৌদুনা চঙখ্রগা খূৎলৈ থুনা দেবিদ স্কোতপু শগোলদা হাপকৎতুনা পুথোক্লগা লাকখি অমসুং বৃতিশকী মফমদা শিন্নখি। অহীং অদুমক্তদা অৱাশিং লান্নীং হন্দুনা মণিপুরলোমদা চেনখি। মসিগী থৌদোক অসিদগী গম্ভীর সিংহ অমদি নরসিংহবু বৃতিশশিংনা যাম্না লুনা তৌখি মথংদা সিলেত্তা কোনুং শেশ্বীদুনা নুংঙাইনা লৈহনখি।
বৃতিশশিংনা অৱাশিংগী মথক্তা লান্দানবগীদমক ইস্তর্ন ফ্রন্তিয়ারগী কান্দিং ওফিসার বৃগেদিয়ার জেনরেল সুলধামগী লুচিং মখাদা বৃতিশকী খোঙ লান্মী লীশীং মরি ধাকাদগী সিলেত ফাওরগা কাছারদা থুংলখি। মখোয়না বদরপুরদগী বাশকান্দিদা লম্বী শেমখি, মদুগী মথংদা বাশকান্দিদগী জীরি ফাওবা মাইল ৪০ শাংবা খোঙলম্মী শেম্বা লোইখি । অশূকপা উমং লান্থোকপদা লৈখোম থোকপা অঙম্বা চীং লম্বী অমদি নোংজু-পান্থা ওইবনা নীংবা কায়বদগী মখা তানা চঙশিনবা ঙমদনা লাঞ্জঙ অদু মহয় চাদনা হন্দোরকপা তাখি।
মৈদিংঙু চীংলেন নোংদ্রেনখোম্বা অমসুং মণিপুর লেভিগী লানঙম ফীরাল :
মহয় য়ানখিদ্রবা থৌরাঙ অদুগী মতুংদা গম্ভীর সিংহ মশামক্না মণিপুরবু অৱাগী মখুৎতগী নীং-খা তমহনবগী নীংবা হন্দ্রবা থৌনাগা লোয়ননা মৈতৈ মচা ৫০০ রোম্না শেম্বা লান্মী তেঙ্গোল অমা লিংখৎখি। মদুগী মনুংদা মৈতৈ পাঙল লান্মী ১২ সু য়াওখি। লান্মী শঙলূপ অসি মণিপুর লেভি মমিং থোনখি। অচঙবা খূজু-খূৎলয় অমসুং লান্মীশিং গী থাগী পীফম থোকপা শেনফম বৃতিশ লৈঙাক্না পীরম্মী। মণিপুর লেভিবু আসামগী বদরপুরদা লাল তাকপী-তম্বীবা লোইরবা মতুং গম্ভীর সিংহ অমসুং নরসিংহ অনীনা লুচিংলগা বৃতিশ মচা আর বি পেম্বরতন অমসুং কেপ্তেন দেবিদ স্কোত য়াওনা খৃস্ত কুমশীং ১৮২৫ মেগী চৈচৎ ১৭ তা সিলেত্তগী খোঙশাল্লকখি। নুমিৎ তরেৎনি মতুং মেগী ২৩ দা মণিপুর লেভিনা কাছারগী বাশকান্দিদা থুংলখি।
নিংথৌমচা গম্ভীর সিংহনা মণিপুর লেভি শেমগৎনবা হোৎনরিঙৈ তাল্লক্তা নিংথৌ চৌরজিৎনা মদু মায় পাক্তনবা নারোন্দা হোৎনখি— মদুদগী চৌরজিৎপু নোংচুপ বঙ্গগী নদিয়াদা ফাজীন্দুনা থমখি অমসুং নবদ্বীপতা নোঙ্গাখি।
মৈদিংঙু চীংলেন নোংদ্রেনখোম্বা গম্ভীর সিংহ
গম্ভীর সিংহন মণিপুর লেভিগী মৈতৈ লান্মীগী তেঙ্গোলগা লোয়ননা তোংজৈ মরীলগী চীং লম্বীদা লাক্লগা অঙম্বা চীংশাং পরেং লান্থোক্তুনা খৃস্ত কুমশীং ১৮২৫ গী জুনগী চৈচৎ ১০ দা মণিপুর তম্পাক্কী নোংচুপ থংবদা লৈবা মাক্লংদা থুংলখি। মণিপুর লান্মীশিংনা লেপ্তনা চঙশিল্পকপা উবদা অৱা লান্মীশিং নিংথৌ কোনুং থাদোক্তুনা চেনখি। মৈতৈ লান্মীশিংনা লান্নীং হন্দুনা চেনখ্রবা অৱাশিংগা মথংগী নুমিৎতা অন্দ্রোদা অকনবা লাল শোক্নখি। মদুদা অৱাশিংনা মায়থীদুনা কবো তম্পাক য়ৌনা চেনখি। অৱা লান্মীশিংনা চেনখ্রবা মতুং খৃস্ত কুমশীং ১৮২৫ ইঙাগী ২৬ নি পানবা (জুনগী ১২) নোংমাইজিং নুমিৎতা চীংলেন নোংদ্রেনখোম্বা মিংথোলগা লোয়ননা গম্ভীর সিংহনা নিংখৌ ওইখি ।
পনবা য়াই, চহী তরেৎ খুন্তাকপা মতমদা মণিপুরদা পানখিবা মৈতৈ নিংথৌ মচাশিংদি- হেরাচন্দ্র (খৃস্ত কুমশীং ১৮২০), য়ুমজাওতাবা (মধুচন্দ্রগী মচাইবুংঙো, খৃস্ত কুমশীং ১৮২১), গম্ভীর সিংহনা য়ুমজাওতাববু তান্থোক্লগা নিংখৌ ওইখিবা খৃস্ত কুমশীং ১৮২১, জয় সিংহনা খৃস্ত কুমশীং ১৮২২, যদু সিংহনা ১৮২২-২৩, রাঘব সিংহনা ১৮২৩-২৪, ভদ্র সিংহনা ১৮২৪ দগী চহী অমা ফাদ্রিঙৈদা অৱাগী মখুৎতগী নীংতম্বা হঞ্জিন্দুনা নিংথৌ খুবম গম্ভীর সিংহগী মফমদা শিন্নখি।
অৱাগী মখা পোন্দুনা চহী তরেৎ লৈরুরবা মণিপুরবু গম্ভীর সিংহনা মণিপুর লেভিগী মতেঙনা নীংতম্বা ফংহল্লমদ্রবদি মালেমগী পাফলদা মণিপুরগী মমিং থিবা ফংলম্লোই। থৌনা ফরবা গম্ভীর সিংহ নরসিংহগুম্বা নিংথৌমচা পোক্লম্বনা মণিপুরগী নীংতম্বা অমুক হঞ্জিনবা ঙম্লমখিবনি। অদুগা পূম্নমক্তগী শীংথাবিদ্রবা- মৈতৈ নীংতম লান্মী- মণিপুর লেভিগী মখোয় চামঙা অদুগী মমিং- মথাদি লাচনবিখিদে পুৱারীগী লামায়দা। মদুগী মণিপুর লেভিগী লান্মীশিং চহী তরেৎ খুন্তাকঙৈদা মণিপুরদী ময়াং লৈবাক্তা খুন্দাদুনা লৈখ্রবা ঙসিদগী চারোল নিপাল মমাঙগী ইপা-ইপুশিং ঙাক্তনি। ইমা লৈবাকপু অৱাগী মখূৎতগী কন্দবা য়াদে হায়বা ৱাশক্কা লোয়ননা গম্ভীর সিংহনা লান্মী ওইহন্দুনা লাকমিন্নখিবনি। নীংতম্বা ফংলবা মতুংদা মখোয়না ইমা–ইপা লৈহৌরি, ইচে–ইচন, ইচীন-ইনাও পূন্নমক লৈহৌরি হায়রম্লগা ময়াং লৈবাক্তা হন্দুনা চৎখি- অমুক হল্লকপা ঙমখিদে। মতমগী ঈচেলদা মখোয়গী অনৌবা চারোল-শূরোলশিংদু মণিপুরগী ৱাংমদা লৈখিবনা ঙসিদি কাছারগী মৈতৈ, আসামগী মৈতৈ, ত্রিপুরাগী মৈতৈ, বাংলাদেশকী মৈতৈ হায়না মখোয়রু খঙনরি।
অতোপ্পা অমনা, মৈতৈগী অথৌবশিংনা মথ্বায় কৎতুনা বৃতিশকী লান্দা মণিপুর কন্নবা হোৎনখি। মায় পাকখিদে। ইমা লৈবাক্কী নীংতম নুমিৎ তাখি খোংজোমগী লানফমদা- পুৱারী অমন্বা তাঙ্ককনি– খোংজোম নুমিৎ। অমরোমদা জুনগী চৈচৎ ১২ অৱাগী মখুৎতগী নীংতম্বা হঞ্জিনখিবা লানঙম্বা নুমিৎনি- মায় পাকপগী, হরাওবগী অমম্বা নোংলক্তগী নীংতম্বগী কোরৌনা চাইথোরকপা মেঙলবা মঙাল'দুগী মমলদি খোংজোম নুমিৎতগী হেন্না লূম্না লৌফম থোকই হায়বদা হায়মনবা থোক্লোই।
অরোইবদা, অথৌবা নিংথৌ চীংলেন নোংদ্রেনখোম্বগী লৈখিদবা চহী ১৯০ শুবা কুমওন্দা ইকায়খুম্ননা ইকোক নোন্না খুরুমজরি।
0 কমেন্ট:
কমেন্ট তৌবিয়ু