খাইদেম মনিদা হিজম ইরাবত নিংশিং মনা লান্থোকখ্রে
ইম্ফাল, সেপ্তেম্বর ৩০ : ইরাবত সেলেব্রেসন কম্মিটি (আই সি সি), মণিপুর অমদি মণিপুর ষ্টেট শুমাঙ লিলা কাউন্সিলনা পূন্না খূৎশম্ননা শীন্দুনা জননেতা ইরাবতকী ১২৮ শুবা মপোক কুমওন থৌরম পাঙথোক্তুনা সেনিয়র এদভোকেট খাইদেম মনিদা হিজম ইরাবত নীংশিং মনা ২০২৪ লান্থোকখ্রে।
সেনিয়র এদভোকেট খাইদেম মনিদা হিজম ইরাবত নীংশিং মনা ২০২৪ লান্থোকপা
পেলেস কম্পাওন্দদা লৈবা ইবোয়াইমা শুমাঙ লিলা শঙলেন্দা ঙসি পাঙথোকখিবা থৌরম অদু শরুক য়ারদুনা আই সি সি মণিপুরগী প্রেসিদেন্ট ডা. এম নরনা ফোঙদোকখিবদ, ঙসি ঐখোয়না লৈরিবা ফিভম অসি মায়কৈ খঙদনা লমজিংনবীনবা লৈত্রবা মানা মানা পাম্বদা চৎনবা খুন্নাইগী শক্তমনি। ঙসিদি ঐখোয় লহ্মাংনরবা মীয়াম ওইরে, হৌখিবা চহী খরা অসিদা ষ্টেট অসিগী ওইরক্লিবা ফিভম ঐখোয় খূদিংমক্না খঙলবা ঙাক্তনি। অসিগুম্বা তাঞ্জা অসিদা মীয়ামগী লুচিংবা জননেতা ইরাবতনা খল্লম্বা ৱাখল্লোনশিং নৈনরগা থোক্লিবা থৌদোক ৱাথোকশিং অসিগী ৱারোইশিন শোয়দনা পুথোকপা ঙমগনি। ইস্যু অসি করম্না হৌরকখিবনো হায়বা থোকই। অদুবু লৈঙাক অসিনা মীয়ামগী অপাম্বা খঙনা থবক পায়খৎপগী মহুত্তা লন্নাই ওইবা অপাম্বা লূপ্তুনা লৈথোকপগুম তৌরি।
লুচিংবা অসিনা খল্লম্বা ৱাখল্লোন থবক্তা ওন্থোকপা মতম ওইরে। মণিপুরখক্তা নত্তনা লৈবাক অসিগী অমদি মালেমগী মীয়াম্না ইরাবতনা খল্লম্বা ৱাখল্লোনশিং নৈনবা হৌরক্লে। মীয়ামগী লুচিংবা অসিনা ইরম্বা ‘ইমাগী পূজা’ হায়বা শৈরেং লাইরিক অসি ইংলিশ লোলদা হন্দোক্তুনা সাহিত্য একাদেমিনা লৌশিন্দুনা লৈবাক অসিগী মেজর লোল ২০ দা হন্দোক্কদৌরি। লুচিংবা অসিনা খল্লম্বা ৱাখল্লোনশিং নৈনদুনা তুংগী মীরোলদা ময়েক শেংনা খঙহনবা মথৌ তায় হায়খি।
ঙসিগী থৌরম অদুদা সিপিআই মণিপুর ষ্টেট কাউন্সিলগী স্টেট কন্ট্রোল কম্মিসনগী চেয়ারমেন কমরেদ লাঙ্গোল ইবোয়াইমা, সিপিআইগী স্টেট সেক্রেটারী এল থোইরেন, হান্নগী সেক্রেটরি এল সোতিনকুমার অমদি মণিপুর স্টেট শুমাঙ লিলা কাউন্সিলগী প্রেসিদেন্ট এল তোম্বা য়াওনা মশক নাইরবা মীওই কয়াসু শরুক য়াখি।
থৌরম অদুদা সেনিয়র এদভোকেট খাইদেম মনিনা হিজম ইরাবত নিংশিং মনা ২০২৪ পিদুনা ইকায় খুম্নখি। লোয়ননা চহি খুদিংগী পিদুনা লাকপা অতৈ এৱার্দশিংসু ঙসিগী থৌরম অদুদা লান্থোকখি। এৱার্দ ফংলিবশি অদুদি, ওইনাম জুগিন, অহোংশাংবম মোবি, লিসিপ্রিয়া কাঙুজম, রাকেশ মৈহৌবম, মাইবম কদম্বিনি, কবুই য়ুনিয়ন মণিপুর, অবেল ব্রিয়ম ইনপুই, খুন্দাকপম প্রেমজিৎ, নাওরেম রোবি, চনম বুধি, সাইরেম মঙলেম, চানা লুখোই, সনসম উমানন্দা, লোইতোংবম ধোরেন্দ্রো, লাইপুবম বিনো, ক্ষেত্রিময়ুম সনাতোম্বা অমদি থোকচোম সুজতানি।
সোর্স: পান্দম
0 কমেন্ট:
কমেন্ট তৌবিয়ু