কেকে ৱাহেংবমগী 'ঐ অমদি কেন্সর' হায়বা লাইরিক বুক ওফ ৱাৰ্ল্ড রেকোর্দ চনবা ঙমখ্রে
ইম্ফাল, এপ্রিল ১৫: মতম অমা ওল ইন্দিয়া রেদিও, ইম্ফালগী এনাউন্সর ওইরম্বা মশামক কেন্সর পেসেন্ট অমা ওইনা ট্রিটমেন্ট তৌদুনা লৈরিঙৈ মতমদা মহাক্কী পুন্সি ৱারীদা যুম্ফম ওইবা 'ঐ অমসুং কেন্সর' হায়না মীংথোনবা লাইরিক অসি লেমজনিংঙাই ওইরবা বুক ওফ ৱাৰ্ল্ড রেকোর্দ চনবা ঙমখিবগা লোয়ননা রেকোর্দ অসি চনবা মণিপুরী লোলগী অহানবা লাইরিক ওইরে।
কেকে ৱাহেংবম লাইরিক 'ঐ অমসুং কেন্সর' হায়রিবা লাইরিক অসি বোবো খুন্দ্রাকপমনা পাব্লিসর ওইদুনা পেট্রিওটিক রাইটার্স ফোরাম মণিপুরগী বেনর মখাদা ২০২১ গী মার্চ ২১ দা ফোঙখিবনি।
মধ্যপ্রদেশকী ইন্দোরদা লৈবা রোথি ৱেলনেস ফাউন্দেসনগী ফাউন্দর মনসি বাজপাইনা ঙসি এপ্রিস ১৫ গী অযুক্তা ওফিসিয়েলি কেন্সর সর্ভাইবর কেকে ৱাহেংবমনা মালেমগী মীয়ামদা কেন্সর সর্ভাইবর অমা ওইরগসু থৌনা লৈনা হিংগদবনি হায়না পীরিবা মমল নাইদ্রবা পাউজেল কয়াবু শকখঙদুনা মহাক্কী লাইরিক অসি প্রেসটিজিয়স বুক ওফ ৱার্ল্ড রেকোর্দকী মনুং চলহনখিবনি।
কেকে ৱাহেংবমগী লাইরিক অসিগী কোভরদা মথকথংবা শরুক্তা মহাক্কী নিংথিরবা মাইথোং থম্লগা মখা ইথং থংবদা কেন্সর নারৈঙৈ মতমগী ফিবম শোক্লিঙৈ মতমগী ফোটো হাপ্পি। ফোটো অসিগী মখাদা 'লোইখ্রে ঐগী পুন্সিগী নুংঙাইবা, ঙাইরি নুমিৎনা ময়ুম চংলকপা' হায়না ইরি। মতম শাংনা কেন্সর লায়নাগা শাগোন্নদুনা অশিবগা পাঙ্খক ওইদুনা লৈরম্লবা হৌজিক্লা কেন্সরবু মাইথিবা পীরম্নগা ঐখোয়গী ইরক্তা হিংদুনা তোল্লা তারবা, কা হেন্না ৱারবা মীওই শিংগীদমক হ্যিমেনিটি সার্বিসকী লমদা কথোকপগা লোয়ননা লৈবাক মীয়ামগী থবক থৌরম কয়াদা মাংজিল থাদুনা শরুক য়ারি। মহাক মতম অমা ওল ইন্দিয়া রেদিও, ইম্ফালগী এনাওন্সর ওইনা থবক তৌরমখি।
কেকে ৱাহেংবম
কেকে ৱাহেংবম ফিল্মগী এক্তর অমসুনি। মহাক্লা কুমখিবা ফিল্ম খরদং পল্লবদা রাকেশ নাওরেমনা পুথাকপা ওসি মৈরানা দাইরেক্সন পীবা লৈইসিগী ৱাংমদা, ঙাইনা ঙাইনা, ঈগী খোঙ্গুল, জিতেন্দ্র নিংঙোন্বমনা দাইরেক্সন পীবা থোইচা পার্ট ২ অমসুং ৩, গুনিন্দ্রোনা দাইরেক্সন পীবা নিঙোল লাকপা অসিনচিংবা পনবা য়াই।
মহাক মশা ঈশৈ ময়েক ইবা মীওই অমসুনি। ঐ অমসুং কেন্সর হায়রিবা লায়রিক অসি ইংলিস, হিন্দি অমসুং বেঙ্গলি লোলদা হন্দোক্নবা থৌরাংসু তৌরি হায়রি।
সোর্স: পান্দম
0 কমেন্ট:
কমেন্ট তৌবিয়ু