ঐখোয়গী মীতৈলোল অসি ইমালোলনি হায়দুনা খক মীরাইরোইদবনি: শ্রুতিকুমার
ইম্ফাল, দিসেম্বর ১৬ : ঐখোয়গী ইমালোল মীতৈলোল অসি খক মীরাইরোইদবনি। হেক অপোকপী ইমাগুম লোলবু লুনা নীংলবদি ঐখোয়গী ইয়েক ইরোল চাওখৎলোইদবগী মরম লৈতৈ হায়না গৌড়নগর পদমপূখ্রি, হোজাই আসামগী সাহিত্য ভূষন এন্দ রিনোন রাইটার লাইরেনলাকপম শ্রুতিকুমারনা ফোঙদোকখ্রে।
ঙসি নোর্থ ইষ্ট বাইওগ্রাফি ফোরাম (এন ঈ এফ বি) অমদি রাইটার্স প্লেটফোর্ম মণিপুরনা শীন্দুনা নোংমগী ওইবা নেসনেল সেমিনার ওন এ স্পেক্টিক্যুলর কনফারেন্স ওন মণিপুরী লেংগ্বেজ, লিটরেচর এন্দ কালচার হায়বা হীরম অসিদা কাঞ্চিপুরদা লৈবা মণিপুর য়ুনিভার্সিটিগী আর্থ সাইন্সেস দিপার্টমেন্টকী সোনেট হোলদা পাঙথোকখিবা থৌরমদা শ্রুতিকুমারনা মখা তারদুনা হায়খি, মপান লমগী মীশিংনা ঐখোয়গী লোল লৈতে, ময়েক লৈতে হায়না করেম্নরকপদা লোল লৈ অমদি ময়েকসু লৈজৈ হায়খি। অদুবা লৈজরিবা ময়েক অসি য়াম্না ৱাহন্থোক লৈবা ময়েক্নি হায়না খুমদুনা মীতৈ ময়েক য়েক্তুনা মহাক্না তাকখিবা কয়া য়াওখ্রে।
মহাক্না মখা তানা হায়খিবদা, মীতৈ ময়েক্তি মীওইবগী হকচাং কয়াৎ কয়াবু তাকপা ঙম্বা ময়েক্নি। খুদম ওইনা হায়রবদা কোক হায়বা মতমদা ঐখোয়গী হকচাংগী মরু ওইবা শরুক অমা ওইরিবা কোকপু খঙনহল্লি। অমরোমদা, য়েক তরেৎকী মীহুৎ অমমম কোক হায়বা ময়েক্তা য়াওই। কোক হায়বা লাইয়েক্তা চখৈ তরেৎ য়াওই হায়না তাকপদা বাঙ্গালি মচা কয়া ময়া কুমখি হায়না ফোঙদোকখি।
ঐখোয়গী মীতৈলোল অসি ইমালোলনি হায়দুনা খক মীরাইরোইদবনি। লোলগী কান্নবা খঙলক্তুনা মালেমগী লৈবাক কয়ানা মাগী-মাগী মমালোল চাওখৎনবা ঙম্বা থাক্তা হোৎনরি। মণিপুরগী ওইনসু ইমালোলবু ক্লাসিকেল লেংগুয়েজ ওইহন্নবা কন্না হোৎনরিবা অসিদা ঐখোয় পূম্নমক্না অঙম্বা মতেং পাংফম থোকই হায়খি। ঙসিগী থৌরম অদুদা শ্রুতিকুমারনা অথোইবা মীথুং ওইখি। নোর্থ ইষ্ট বাইওগ্রাফি ফোরামগী ফাউন্দার চেয়ারমেন অমদি কালচারেল এক্টিভিষ্ট কে বি ইঙারেম্বনা থৌরম মপূ ওইখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু