ইরেংবম নলিনীগী ‘মণিপুরী রাস কুঞ্জ রাস’ ফোঙখ্রে
ইম্ফাল, মে ৫ : মণিপুরী কলচরবু অৱাংবা থাক্তা পুখৎনবা হোৎনবদা অচৌবা থৌদাং লৌদুনা লাক্লিবা গুরু ইরেংবম নলিনীনা ইবা ‘মণিপুরী রাস কুঞ্জ রাস’ হায়না মিংথোনবা লাইরিক অমা ঙসি মণিপুর প্রেস ক্লবকী লোক্তাক হোলদা ফোঙখ্রে।
থৌরম অদুদা মণিপুর য়ুনিবর্সিতি ওব কলচরগী ভি সি, প্রোঃ পাওনম গুনিন্দ্রোনা চীফ গেস্ত, মণিপুর স্তেত কলা একাদমীগী সেক্রেতরি সুনন্দা থোকচোমনা স্পিসিএল গেস্ত, মণিপুর য়ুনিবর্সিতি ওব কলচরগী দিপ্যুতি রেজিস্তর দাঃ লৌরেম্বম সুরজিৎনা প্রেসিদেন্ত ওইনা শরুক য়াখি।
গুরু ইরেংবম নলিনী দেবী দান্স, ম্যুজিক, আর্ত এন্দ কলচরেল একাদেমীনা শীন্দুনা পাঙথোকখিবা থৌরম অদুদা চীফ গেস্তকী ৱারোল পীরদুনা প্রোঃ পাওনম গুনিন্দ্রোনা হায়, রাস হায়রিবা জগোয় মখলশিং অসি মণিপুরদগী হৌরকপা নৎত্রবসু লৈবাক অসিগী অতৈ মফমদা লৈরিবা রাস মখলশিংদগী তোপ-তোপ্পা মগুন চেনবা জগোয়নি। মসিমক্না লমদম অসিগী রাস অসি ক্লাসিকেল দান্স ওইনা চিংবা ঙম্লিবনি।
মণিপুরগী রাস মখল ৫ অসিমক লমদমসিগী পুক্কৈ চোন্না লৈরম্লিবা ঐখোয়গী নাৎকী অচৌবা অমদি মমল য়াম্লবা খূদোল অমনি। লৈরিবা রাসশিং অসিদা লমদম অসিগী লৈহাওদগী শেমগৎপা কাঙলোন য়াওবদা নৎতনা ফিজেৎ-চাকচাদা তোপ-তোপ্পা মশক অমসু তাকপা ঙম্লি। মসিমক্নসু মণিপুরগী রাসশিং অসি রবীন্দ্রনাথ তেগোরনা শুমহৎখিবনি হায়না ফোঙদোকখি।
চহী ৪৩ হেন্না জে এন মণিপুর দান্স একাদেমীদা গুরু ওইদুনা জগোয়-ঈশৈগী লমদা মহৈরোয় কয়া তাকপী তম্বীদুনা লাকখিবা গুরু নলিনীনা মহাক্না ইবা লাইরিক অসিগী মরমদা মরীক চুম্বা ৱাফম কয়াসু ফোঙদোকখি।
সোর্স: পোক্নফম
0 কমেন্ট:
কমেন্ট তৌবিয়ু