ইম্ফাল লিতরেচর ফেস্তিবেলদা অইবা কয়ানা শরুক য়াগদৌরি
ইম্ফাল, নভেম্বর ২১: মণিপুর সঙাই ফেষ্টিবেল ২০২২ গী শরুক অমা ওইনা মণিপুর লৈঙাক্না খুৎশম্নদুনা সাহিত্য থৌপাং লূপ্না শীন্দুনা নুমিৎ হুম্নিগী ওইবা ইম্ফাল লিটরেচার ফেষ্টিবেল, নভেম্বর ২৫দগী ২৭ফাওবা পাঙথোক্কনি হায়না সাহিত্য থৌপাং লূপ্ (সাথৌলূপ) কী সেক্রেটারিগী চেরোল অমনা হায়রি। ফেস্টিবেল অসি ইম্ফালদা লৈবা জে এন মণিপুর দান্স একাদেমিগী ওদিতোরিয়ামদা হৌদোক্কনি। মথং মথং ওইনা মার্জিং পোলো কমপ্লেক্স অমসুং মান্ধা আইলেন্দ, লোক্তাকতা অমুক পাঙথোক্কনি।
ফেষ্টিবেল অসিদা শ্রীলঙ্কাগী মমিং লৈরবা অইবা অয়াথুরাই সন্থন, বাংলাদেশকী ঢাকাদা লৈবা বাংলা একাদেমিগী দিপুটি দিরেক্তর মোঃ শাহদাত হোসেন, কবি মোঃ সজল আহমদ অমসুং সনাতোন হামোম, কিংদম ওব লেসোথাদগী সোবোলেলো ভিক্টোরিয়া মোখলেনচিংবনা শরুক য়াগদৌরি। ওয়েস্ট বেঙ্গলদগী ব্রজকুমার সরকার অমসুং রঞ্জিতা সরকার, আসামদগী মৈস্নাম ভগৎ, আব্দুল হামিদ, বিরেন্দ্র সিংহ থাংজম, গোপাল সিংহ, মলিনা দেবী রাভা, দিল্লীদগী মিস্না চনুনচিংবা অইবা কয়াসু শরুক য়াগনি।
আই সি সি আরগী জোনেল দিরেক্টর (এন ই) ওইরিবা মুনিশ নিংথৌজম লোয়ননা মণিপুরী সাহিত্য পরিষদ মেঘালয়গী সেক্রেটারী দা: কমলজিৎ চিরোমসু শরুক য়াগনি হায়রি। ফেষ্টিবেল অসিগী হৌদোকপা নুমিৎতা ব্রজকুমার সরকার অমসুং বিনয় লহানা এদিটর ওইবা ভয়েস নাউ ৱার্ল্ড পোইত্রি টুডে হায়না মিংথোনবা ইন্টারনেসনেল এন্থোলোজি ওব ইংলিশ পোইট্রি অমসুং ফোংগনি।
গুরুময়ুম বিনোদকুমার শর্ম্মানা ইবা ৱারেংগী লাইরিক ‘লৈগী লাইশঙ’ অমসুং এন রঞ্জিতনা ইবা শৈরেংগী লাইরিক ‘মঙালগী লম্বী’ সু ফোঙগনি। শৈরেং অমসুং ৱারীমচা পাবগী থৌরম কয়াগা লোয়ননা পাঙথোক্কদৌরিবা ফেস্টিবেল অসিদা মণিপুরী সাহিত্য পরিষদ মেঘালয় অমসুং ফুঙ্গা হেরিটেজ শিল্লোংগসু খুৎশম্নগদৌরি। ইন্দিয়ানা কাউন্সিল ফোর কালচারেল রিলেসন্স (আই সি সি আর) নোর্থ ইষ্টার্ণ ফেষ্টিবেল অসিদা মতেঙ পাংগনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু