গুৱাহাতি, জুন ২৩ : আসামগী মশক নাইরবা সিতিজেনশিংনা ঙসি মণিপুরদা থোক্লিবা ঈরাং অসিগী মতাঙদা প্রাইম মিনিস্তরনা তুমিন্না লৈশিনবা অসিদা অঙকপা পোকপগা লোয়ননা অথুবা মতমদা শান্তি পুরক্নবা আপিল তৌখ্রে। মখোয়না মখা তানা মণিপুরগী মীপূম খুদীংমক্না অখাং কনবগা লোয়ননা মখল অমত্তগী ভাইওলেন্সকী থবক চত্থদনবসু আপিল তৌরি।

মণিপুরদা হৌজিক অকিবা অমসুং নিংবা কায়বনা পীক থল্লবা ফীবম অমা ওইবগা লোয়ননা আইন লৈতবগী মওং অমদা লৈরে হায়না অহোম নাগরিক সমাজগী চেরোল অমনা হায়রি। লিতরেচর, একাদেমিক্স, হান্নগী পুলিস ওফিসার, ব্যুরোক্রেত, জর্নেলিস্ত, অইবা, এদভোকেট য়াওনা তোঙান তোঙানবা শিনফমদা থবক তৌরম্বদগী পোত্থারবা সিতিজেন ৭০না সাইন তৌবা চেরোল অদুনা ভাইওলেন্সনা কৈদৌনুংদা অফবা পুরক্তে। মরম অদুনা ফুরুপশিংগী মনুংদা ভাইওলেন্স থঅদোক্তুনা নুংশিনবা পুরক্নবা হোৎনমিন্নসি। ঐখোয় মশেল নুংশিনদবা অমসুং ভাইওলেন্সকী থবক্না খুন্নাই অমবু কৈদৌনুংদা অফবা ফীবমনা লৈহল্লোই হায়রি।  

ফীবম অসিদা স্তেত অমসুং সেন্ত্রেল গবর্নমেন্তকী থৌদাংগী মরু ওইবা অদু পল্লদুনা হায়, গবর্ণমেন্ত অনীমক্না পূন্না হোৎনদুনা শান্তি পুরক্পা য়াবা ফীবম অমা হান্না লৈহনগদবনি। হীরম অসিগী মতাঙদা প্রাইম মিনিস্তরনা ৱাহৈ অমা ফাওবা ফোঙদোক্তুনা তুমিন্না লৈশিল্লিবা অসিনা অঙকপা পোকহল্লে। মণিপুরগী হৌজিক ওইরিবা ফীবম অসিদা পি এমনা অথুবা মতমদা অকনবা মীৎয়েং চঙদুনা শান্তি পুরক্কদবনি।

মণিপুরদা মে ৩দগী হৌদুনা চত্থরকখিবা কাঙলূপকী ঈরাংদা মী ১০০ হেন্না লৈখিদ্রে, য়ূম-কৈ কয়া মৈ চাকখিবদগী মী লীশীং ৫০ হেন্না রিলিফ কেম্পতা লৈরিবনি।

সোর্স: পোক্নফম