image

আসামগী কাছারদা মীতৈ ময়েক ডিপ্লোমা কোর্স হৌদোকখ্রে 


সিলচর, জানুয়ারি ১৩ :  মণিপুরী য়ুথস ফ্রন্ট ওব আসাম (এম.ৱাই.এফ.এ) না শিন্দুনা ঙরাং জুগাই মথুরা এম. ই স্কুল বিন্নাকান্দি, কাছার, আসামদা মীতৈ (মৈতৈ) ময়েক্কী ‘ডিপ্লোমা কোর্স’ মীতৈ ইরোল ইয়েক লোইনাশিনলোন অপুন্বা লুপ (মীলাল) গা খুৎশম্নরগা হৌদোকখ্রে হায়দুনা মাইফাগী মায়কৈদগী চেরোল অমদা খংহনলকখি । 
থৌরম অসিদা মাইফাগী প্রেসিদেন্ট থাংজম ব্রোজেন সিংহ না ময়াইতাংবল লৌরগা অহৈনবা মীথুংলেন ওইনা মীলাল, ময়াই লোয়শঙ, ইম্ফালগী প্রেসিদেন্ট খাইদেম ইঙোচা অমসুং স্পেশাল গেস্ট ওইনা মাইফাগী ভাইস প্রেসিদেন্ট ঙাঙোম বসন্ত সিংহ, গেষ্ট ওব অনার ওইনা আসাম মণিপুরী মুসলিম য়ুথ ফ্রন্ট (এএমএমৱাই এফ) এডভাইজর আব্দুল হাদিম, মীলাল জিরি মশা লোয়শঙগী জেনারেল সেক্রেটারি খুন্দ্রাকপম রাজকুমার মঙাং লোয়ননা কালাম উদ্দিন থৌরমগী ফম্বাক্কী লৈতেং ওইনা শরুক য়াখি হায়রি। 
মাইফাগী এডভাইজর সেরাম হেরোজিৎ না অসুম্না ফোংদোকখি, ঐখোয়না ময়েক অসি তম্নবা হোৎনবা মথৌ তাই, ঐখোয়না ঐখোয়গী ইয়েকপু খংদবা হায়বসি য়াম্না লুরক্লি, অদুনা ঐখোয় পুম্নামক্না তম্বা খংবা মথৌ তারে। অদুনা ডিপ্লোমাসে মাইফানা তম্নবা হোৎনজবনি। মখাদা মাইফা না শিন্দুনা পাঙথোক্কদৌরিবা ময়েক্কী ডিপ্লোমা কোর্স অসিবু মায়কৈ কয়াদগী পুন্না য়াওশিন্দুনা লোল অসিবু চাওখৎপদা পুম্নমক্না থৌদাং লৌবিয়ু হায়না মাইফাগী প্রেসিদেন্টনাসু মীয়ামদা খংহনখি। 
ঙরাংগী থৌরম অদুদা মাইফাগী সেক্রেটারি জেনারেল তম্পাকময়ুম সালাউদ্দিন, ভিপি তম্পাকময়ুম রেহান উদ্দিন, এডভাইজর নিঙোম্বম রঞ্জিত সিংহ, উত্তম শর্ম্মানা চিংবা শরুক য়াখি হায়দুনাসু চেরোল অদুদা নিংশিংলকখি ।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু