আগরতলাদা অশাংবম মীনকেতনগী মপোক নুমিৎ পাঙথোকখ্রে
আগরতলা, ৩ মে : আধুনিক মনিপুরী সাহিত্য হৌদোকপীরম্বা শক্লাইরবা কবি অশাংবম মীনকেতন সিংহগী চহি ১১৯ শুবা মপোক কুমওন থৌরম ঙরাং ২ মে, ২০২৫ ইং, ঈরাই নুমিৎ আগরতলাদা চীংলেম্না পাঙথোকখ্রে হায়দুনা মনিপুরী লিতবেরী এন্দ কলচরেল ফোরম, ত্রিপুরাগী সেক্রেতরি খোইস্নাম মংগলনা থাদোরকপা চেরোল অমদা ফোংদোরকখি।
মনিপুরী লিতবেরী এন্দ কলচরেল ফোরম, ত্রিপুরানা শিন্দুনা আগরতলাগী তরৌ মৈতৈ লৈকাইদা পাঙথোকপা কুমওন থৌরম অদু সাহিত্য অকাদেমি, নিউ দিল্লি মনিপুরী এদভাইজরি বোর্দ মেম্বর শক্নাইরবা এসি, নেত্রজিৎনা অথোয়বা মীথুংলেন ওইরগা মনিপুরী সাহিত্য পরিষদকী ভাইস-প্রেসিদেন্ট সেলৈবম খেলামোহন, ফোরমগী এদভাইজর আরকে, তরুনজিৎ সিংহ অমসুং শক্লাইরবা অইবা ময়েংবম অভিরাম সিংহনা ঈকাইখুম্নবা মীথুংশিং ওইখি অদুগা ফোরমগী সেনিয়র মেম্বর লাইপুবম রঞ্জন শর্মানা থৌরম অদু প্রিসাইদ তৌখি হায়রি। মীথুৎলেনশিংগা লোয়ননা থৌরমদা শরুক য়াখিবা ময়াম্না মীনকেতনগী ফোতোদা হৈ-লৈ কৎখি অমসুং মিনিট অনী তুমিন্না লেপ্তুনা লাই ওইখ্রবা কবিবু ঈকাইখুম্নবা উৎখি।
ফোরমগী সেক্রেতরি খোইস্নাম মংগলনা ময়াম্বু তরান্না ওক্তুনা থৌরমগী নুংগী ওইবা ৱারোল পীরবা মতুং সাহিত্য অকাদেমি মনিপুরী এদভাইজরি বোর্দ মেম্বর খোই্স্নাম বীরলানা কবি অশাংবম মীনকেতনগী পুন্সী অমসুং থবক হায়বা হিরমসিদা পেপর অমা পাথোকখিসু হায়রি।
থৌরমগী অথোয়বা মীথুংলেন এসি নেত্রজিৎনা হায়খিবদা, জাতিগী লন ওইরবা ঐখোয়গী খুন্নাইগী অচংবা অহলশিং অসিবু ঐখোয়না হেন্না নৈনবা চৎঙি, মখোয়গী ৱাখোল্লোন অমসুং পান্দম হৌরক্লিবা মীরোলগী মফমদা য়ৌহনবর্গী থৌদাং ঐখোয় ময়াম পুন্না লৌফম থোকই। আধুনিক মনিপুরী সাহিত্য হৌদোকপীরম্বা শক্নাইরবা কবি অশাংবম মীনকেতনগী থৌরম অসিনা লমদম অসিগী অইবশিংবু সাহিত্যদা সোয়দনা থৌনা অমা পীগনি হায়দুনা পনবিরম্মি হায়রি।
অরোইবদা কবি সিজা মলিনা, সেলৈবম খেলামোহন, হিজম সারিকা, খুন্দ্রাকপম কনিকা, ক্ষেত্রিময়ুম পিনাকি অমসুং হিজম বাবলিনা কবি মীনকেতন না ইরম্বা শৈরেংশিং পাবদা শরুক য়াখি হায়দুনা খংহনলকখি।
0 কমেন্ট:
কমেন্ট তৌবিয়ু