অনি শুবা এসকা (সিলেট) কাপ কাং টুর্ণামেন্ট ফাইনাল অমসুং মনা য়েন্থোকখ্রে
সিলেট, ২৮ জুন : থা অসিগী ১৭দগী হৌরগা সিলেট মণিপুরী কাং এসোসিয়েশন্না শিল্লাংদুনা নয়াবাজার মৈতৈ লৈকায়গী তেংবাংগা লোয়ননা সিলেট সিটিদা লৈবা নয়াবাজার খুঞ্জাগী মন্ডপতা নুপাগী ৬, নুপীগী ৩ পূন্না কাঙখূৎ ৯না শরূক য়াখিবা অনিশুবা এসকা কাপ কাং টুর্নামেন্ট-২০২৪ ঙসি ফাইনাল ম্যাচ শান্নখ্রে অমসুং মনা য়েন্থোকখ্রে।
অয়ুক ১১ মতমদা নুপিগী শান্নবদা নয়াবাজার নুপি কাংখুৎ অমসুং শিবগঞ্জ লাইরেম্বী কাংখুৎ পাঞ্জল ১৩-১৩ ড্রো ওইখি, মথংদা শান্নরোই মী মঙা-মঙা কাপ্তুনা ট্রাইব্রেকার শান্নখি অদুসু (২-২) ড্রো ওইদুনা মথংদা অনি-অনি কাপ্নহনবদা ০-১ তা নয়াবাজার নুপি কাংখুৎ ফাইনালগী টাইতেল লৌখি অদুগা শিবগঞ্জ লাইরেম্বী কাংখুৎনা রানার্সআপ তাখি। নুপিগী মেটচতা জজনা সজল সিনহানা ওইখি ।
অমরোমদা নুপাগী ফাইনাল মেটচতা হামোমখুল মহাদেব কাংখূৎনা নয়াবাজার নুপা কাংখূৎবু পাঞ্জল ৩০-১৪ তা মায়থীবা পীরম্লগা টুর্নামেন্ট অসিগী ফাইনাল টাইতেল লৌবা ঙমখি। নয়াবাজার নুপা কাংখুৎনা রানার্সআপ তাখি। নুপা মেচতা জজনা এল. আনন্দ সিংহনা ওইখি।
টুর্নামেন্ট অসিগী ঙসি শান্নখিবা ফাইনেল মেটচকী মেন ওফ দি মেটচ এন্ড সিরিজ হামোমখুল মহাদেব কাংখুৎকী হামোম বিশ্বজিৎনা তাখি। অমরোমদা নুপিগী উইমেন অব দা ম্যাচ এন্ড সিরিজ নয়াবাজার নুপী কাংখুৎকী লক্ষীরানী দেবী না তাখি।
ঙসি পাঙথোকখিবা ফাইনেল মেটচকী মনা য়েন্থোকপা অমসুং লোইশিনবগী থৌরমদা সিলেট সিটি কর্পোরেশনগী ২৪নং ওয়ার্ডকী কাউন্সিলর হুমায়ূন কবীর সুহিন না অথোইবা মীথুংলেন, সিলেট সিটি কর্পোরেশনগী ২২,২৩,২৪ ওয়ার্ডকী নুপি কাউন্সিলর শারমিন আক্তার রুমি না অখন্নবা লেংবীরকপশিং ওইনা শরুক য়াখি।
ওইনাম সত্যজিৎ সিংহনা কন্ডাক্ট তৌখিবা থৌরমদা সোসিয়েশনগী ভাইস প্রেসিডেন্ট সমরেন্দ্র সিংহনা তরাম্না ওকপগী ৱাহৈ থমখি অমসুং সিলেট মণিপুরী কাং এসোসিয়েশনগী প্রেসিডেন্ট য়ুম্নাম নৃপেন্দ্র সিংহনা প্রিসাইড তৌখি।
অরোইবদা চ্যাম্পিয়ন অমসুং রানার্সআপ টিমদা ক্রেস্ট অমদি প্রাইজমানি য়াওনা মনা য়েন্থোকখি।
0 কমেন্ট:
কমেন্ট তৌবিয়ু