ত্রিপুরা অমসুং আসামদসু হিজম অঙাংহলগী ১৩০ শুবা মপোক কুমওন থৌরম পাঙথোকখ্রে
আগরতলা, ২৯ জুলাই : মণিপুরী সাহিত্যবু মালেমদা শক্তাকপদা অচৌবা থৌদাং লৌবিখিবা মহাকবি হিজম অঙাংহলগী ১৩০ শুবা মপোক কুমওন থৌরম পাঙথোকখ্রে। ভারতকী তোঙান তোঙানবা মফম কয়াদা পাঙথোকপগুম ত্রিপুরাদসু মহাকবিগী মপোক কুমওন থৌরম পাঙথোকখি। মণিপুরী সাহিত্য পরিষদ, ত্রিপুরানা শীল্লগা এন.বি.টি, আগরতলাদা কুমওন থৌরমসি শ্রদ্ধাঞ্জলি কৎপগা লোয়ননা মহাকবিগী পুন্সি অমদি মহাক্না ইরম্বা উপন্যাস শৈরেং লাইরিক্কী মরমদা নৈন থৌরম পাঙথোকখি।
পরিষদকী প্রেসিডেন্ট এন দিলীপ কুমারনা থৌরম মপু ওইরগা পরিষদ অসিগী হান্নগী প্রেসিডেন্ট আর কে জিতেন্দ্রজিৎ, কবি এন নিরঞ্জন দত্ত অমসুং কবি য়ুম্নাম চন্দ্রকীর্তিনা প্রেসিডিয়াম মেম্বার ওইদুনা থৌরমদা শরুক য়াখি। মহাকবি অসিনা ইরম্বা উপন্যাস, শৈরেং নচিংবগী মথক্তা এল বীরমঙ্গল, কে ধীরেন অমসুং এস খেলামোহন সেন, ৱাংখেম বীরমঙ্গলনা নৈনদুনা ৱা ঙাংখি। থৌরম অসিগা মরী লৈননা শৈরেং শৈদিন্নবগী থৌরম অমসু পাঙথোকখি।
মণিপুরী সাহিত্য পরিষদ, আসাম
অমরোমদা মণিপুরী সাহিত্যবু মালেমদা শক্তাকপদা অচৌবা থৌদাং লৌবিখিবা হিজম অঙাংহলগী মপোক কুমওন থৌরম মণিপুরী সাহিত্য পরিষদ, আসামনসু শিলচরগী পরিষদ ভবনদা শ্রদ্ধাঞ্জলি য়াওনা পাঙথোকখ্রে হায়রি।
সোর্স: মরূপ
0 কমেন্ট:
কমেন্ট তৌবিয়ু