মণিপুরগী ওয়েটলিফটার সোরোখাইবম বিন্দ্যারানিসু সিলভার মেদেল ফংখ্রে
বার্মিংহাম, জুলাই ৩১ : বার্মিহাম কম্মনওয়েল্ঠ গেমস ২০২২ গী নোংমাইজিং নুমিৎ অয়ূক অঙনবদা পাঙথোকখিবা নুপীগী ওয়েটলিফটিংদা মণিপুরগী সোরোখাইবম বিন্দ্যারানি দেবিসু কেজি ৫৫ কাঙলুপ্তা সিলভার মেদেল ফংখ্রে। সাইখোম মিরাবাই চনুনা গেমস অসিদা ইন্দিয়াগী অহানবা গোল্ড মেদেল ফংখ্রবা মতুং ইকুই কুইদনা মশাগী চহী ২৩ শুরবী বিন্দ্যারানিসু সেন্টচ সেক্সনদা পার্সনেল বেষ্ট ওইনা কেজি ৮৬ থাঙ্গৎখিবদা নত্তনা ক্লিন এন্দ জার্গতনা গেমসকী রেকোর্ড ওইনা কেজি ১১৬ থাঙ্গৎতুনা অপূনবা কেজি ২০২ গা লোয়ননা সিলভার মেদেল লৌখি।
ইভেন্ট অদুদা নাইজেরিয়াগী এদিজাট এদনাইক ওলারিনোয়নি স্নেটচতা কেজি ৯২ অমদি ক্লিন এন্দ জার্গতা কেজি ১১১ য়াওনা পুন্না কেজি ২০৩ থাঙ্গৎতুনা গোল্ড মেদেল লৌখি। এদিজাট এদনাইক ওলারিনোয়িসু স্নেটচ অমদি ওভরওল লিফটতা গেমসকী রেকোর্দ থুগাইখি। ইংলেন্দগী ফ্রের মোরোন সেন্টচতা কেজি ৮৯ অমসুং ক্লিন এন্দ জার্গতা কেজি ১০৯ য়াওনা পুন্না কেজি ১৯৮ থাঙ্গৎতুনা ব্রোঞ্জ মেদেল ফংখি।
কম্মনওয়েল্ঠ গেমসতা হন্দক অহানবা ওইনা শরুক য়ারিবী বিন্দ্যারানিনা কুমজা ২০১৯ গী কম্মনওয়েল্ঠ চেম্পিয়নশিপ্সতা গোল্ড মেদেল লৌখিবদা নত্তনা কুমজা ২০২১ গী ইদিসনদা সিলভার মেদেল অমসু ফংখি। বিন্দ্যারানিনা স্নেটচ সেক্সন লোইবা ফাওবদা মশাগী পার্সনেল বেস্ট ওইনা কেজি ৮৬ থাঙ্গৎতুনা এদিজাট এদেনাইক ওলারিনোয়ি (কেজি ৯২) অমদি ফ্রের মোরো (কেজি ৮৯) মখা থাদুনা অহুমশুবা মফম কনখি। মদুগা লোয়ননা মহাক্না স্নেটচতা মিরাবাই চনুগী নেসনেল রেকোর্দ ওইরিবা কেজি ৮৬ অদুগসু মান্নহনখি।
বিন্দ্যারানি দেবিনা স্নেটচ সেক্সনগী অহানবা অমসুং অনীশুবা এটেম্পতা মথংশিৎনা কেজি ৮১ অমদি কেজি ৮৪ থাঙ্গৎখ্রবা মতুং অহুমশুবা এটেম্পতনা কেজি ৮৬ থাঙ্গৎখি। ক্লিন এন্দ জার্গ সেক্সনদা মহাক্না অহানবা এটেম্পতা কেজি ১১০ থাঙ্গৎখ্রবসু অনীশুবা এটম্পতা কেজি ১১৪ থাঙ্গৎনবা হোৎনবদা মায় পাকপা ঙমখিদে। অদুবু বিন্দ্যারানিনা অহুমশুবা অমসুং অরোয়বা এটম্পতা কেজি ১১৬ থাঙ্গৎতুনা সিলভারগা লোয়ননা গেমস অসিদা ইন্দিয়াগী মরিশুবা মেদেল ফংখি।
পনবা য়াবদি, চাইরেনদা পোকখিবী অমদি হৌজিক হৌজিক্না লাঙ্গোল নিংথৌ লৈকায়দা লৈবা সোরোখাইবম রাজেন অমদি সোরোখইবম ওংবী ইবেচা দেবিগী মচানুপী বিন্দ্যারানিনা কুমজা ২০২১ গী ৱার্ল্ড ওয়েটলিফটিং চেম্পিয়নশিপ্সতসু ক্লিন এন্দ জার্গকী গোল্ড মেদেল লৌখিবনি।
সোর্স: সঙাই এক্সপ্রেস
0 কমেন্ট:
কমেন্ট তৌবিয়ু