• 132
• ২৩শে জুলাই ২০২৪ ইং
• Share on:

আর্টস সোসাইতি মণিপুরগী গ্রুপ আর্ট একজিবিসন ‘ভোইস ওফ কলর এন্দ স্ত্রোক্স’ 2024 -- তোংব্রম অমরজিৎ

চহী য়াঙ্খৈগী খোঙচৎ হায়বসি য়াম্না শাংই। উপাল ওইনা হৌরবদি মনা পুংলদুনা উহৈ য়াম্না পাল্লদুনা মরু লুকনা লৈরবা চীং লেম্লবা তলা পামেল হায়বদু ওইরবনি। লৈবাক লৈহাও চেল্লবা চীংলৈবাক্কি মণিপুরদসু কলাগী ওইবা উপাল অমদি ১৯৭২দা থারমখি মতম অদুগী লময়ানবা ভিজ্যুএল আর্তিসশিংনা। ঙসিদি চহী য়াঙ্খৈ মপুং ফারে আর্ট সোসাইতি মণিপুর। ইকায়খুম্ননিংঙাই ওইরবা মণিপুরগী গভনরনা চিফ পেত্রোন ওইবা সোসাইতি অসিগী মেম্বর পুন্না ২০০ হেন্না লৈ। সোসাইতি অসিনা আর্টকি ওইবা থবক থৌরম কয়া মতম মতমগী পাঙথোক্তুনা লাক্লি।মসিগী মনুংদা নেস্নেল অমসুং স্তেটকি থাক্তা আর্ট একজিবিসন, ৱার্কশোপ, শেমিনারনচিংবা কয়াসু চাং নাইনা পাঙথোক্তুনা লমদম অসিগী ভিজ্যুএল আর্টিসশিংবু পুকনিং থৌগৎতুনা লাক্লি। চৎলিবা চহী অসিগী মে ২৯দগী জুন ৫ ফাওবা নুমিৎ ৮ চুপ্না কোলকাতাদা লৈবা মমিং চৎলবা আর্টকি সেন্তর অমসু ওইরিবা একাদেমি ওফ ফাইন আর্টসতা আর্ট সোসাইতিগী ‘ভোইস ওফ কলর এন্দ স্ত্রোক্স’ হায়না মিংথোনবা গ্রুপ আর্ট একজিবিসন অমা পাঙথোকখি। য়াম্না মায় পাকনা পাঙথোকখিবা একজিবিসন অসিমক আর্ট সোসাইতি মণিপুরনা চহী য়াঙ্খৈ শুরকপগী সনা ফুদোংবা চহীগা মরি লৈনবা শিনখিবা একজিবিসন অমনি। মসিদা লমদম অসিগী সেনিয়র অমসুং জুনিয়র ভিজ্যুএল আর্টিস পুন্না ৩০গী আর্ট ৱার্ক ৪২ উৎখি। গ্রুপ আর্ট একজিবিসন অসি মমিং লৈরবা নেস্নেল ললিত কলা একাদেমি এৱার্দি তাপাস কোনার, সেনিয়র আর্টিস অসিনা হৌনবী মতুং ইন্না মায়খুম হাংদোকখি। হৌদোকপগী থৌরম অসিদা আর্ট সোসাইতি মণিপুরগী হৌজীক হৌজিক প্রসিদেণ্ট ওইনা থৌ পুরিবা শকনাইরবা ভিজ্যুএল আর্টিস থিয়াম দেবেন্দ্রনা প্রিসাইদ তৌখি। মণিপুরগী ভিয়্যুএল আর্টিসশিংনা পুথোক্লকলিবা আর্ট ৱার্কশিংবু থৱায় থানা য়েংদুনা লাক্লবা তাপাস কোনারনা লমদম অসিগী আর্টিসশিংগী কলাদা উরিবা কমপোজিসন অমসুং মফোংদোকশিংদা অসুম্না হায়রক্লি, “ Their language of art is very modern and the practices are very contemporary. I believe if those art works are possible to place in any gallery of the world it will be at par with the international work.”

     অরিবম জয়চন্দ্র শর্ম্মাগী ‘ সাইলেন্স কম্যুনিকেটস দোট দোট দোট’

মনিপুরী সাহিত্য পরিষদনা কলা ভুশণ পীদুনা ইকায়খুম্নবা উৎখ্রবা লমদম অসিগী সেনিয়র ভিজ্যুএল আর্টিস অরিবম জয়চন্দ্র শর্ম্মাগী ‘ সাইলেন্স কম্যুনিকেটস দোট দোট দোট’ হায়না মিংথোনবা ওইলদা য়েকপা বুধা অমসুং ৱাহোংগী পেন্তিং অসিমক ওন্থোকনা চংখোল্লি। বেকগ্রাউন্দা উৎলিবা চন্দোল মচুগী তবা তবাবা ব্রস স্ত্রোক অসিনা ইং ইং লাওবা ইম্প্রেসন অমদি অয়েংবশিংবা ফাওহল্লি। য়ুম্লেম্বম অৱাঙম্বা মৈতৈগী আর্কাইলিক্তা য়েকপা ‘ৱেতিং’ মিংথোনবা রিক্সো থৌবা নুপা অমনা চিন্তা তৌদুনা মী লাকপা ঙাইবগী শক্তম অসিমক হৌজীক্কি মতমদা থেংনরিবা চাকখুম মৈ মুত্তনবা হোৎনরিবা লায়রবগী পনখৈ মখাদা হিংলিবা কয়াগী পুন্সি ময়েক শেংনা য়েক্লি। বসন্তারাজ সনাসমগী ‘ Blood moon, Fire arrow & War horse’ উৎলিবা শগোল অসি মতম অমদা শাফম লানফমদা মথৌনা ফনা লমদম অসিগী ঙমখৈ ঙাকপদা চাওরবা থৌদাং লৌরম্বা পাঙ্গলবা শগোলদুনি। ঙসিদি পুৱারী ওইহৌরে। অথৌবা লান্মীসু পাঙ্গল ফুদোকপা ঙমখিদবগী মতৌ অমা উৎলি অদুবু তেন্দোংদা মচিল থৌরবা তেঞ্জৈদি লৈরি অকোয়বদা লান্মৈণা চাকশিল্লক্লবসু। য়াম্না ৱাহন্থোক লৈবা পেন্তিংনি। আর্টস সোসাইতি মনিপুরগী হান্নগী সেক্রেটরিগী থৌসু পুরম্বা ব্রমহাচরিময়ুম বিশম্ভোর শর্ম্মাগী ‘পিজ-২’ মিক্স মেদিয়ানি। পেন্তিং অসিদা উৎলিবসি সনা খোঙনাং মনাতনা য়োম্লবা বুধানি। মখুৎনা থারো অমা নুংশিনা পায়রি। অইংবা অতপ্পা শান্তিবু ইখৌ লাংলিবা পেন্তিং অমনি। মহৌশা মালেমদা শান্তিগী পাউজেল পিনিংলি।

         ব্রমহাচরিময়ুম বিশম্ভোর শর্ম্মাগী ‘পিজ-২’

সরাংথেম বোবি সিংহগী ‘Untitled- III’ কন্তেম্পররি আর্টনি। পোস্ত মোদর্ন ৱার্ল্ড অমগী ফ্রেগমেন্টরি ওইরবা, চমম্নবা, সোল্যসন লৈবদি মাল্লগা সোল্যুসন পুথোকফম খঙদবা, চরাংনবা, ইমম মম্বা আশা খরতমক উবা মতমগী লাই অমখক রিপ্রজেন তৌনবা হোৎনরি। থিয়াম দেবেন্দ্র সিংহগী ‘রোকস্কেপ’ মহৌশাদা হেন্না নকশিন্নবা, অৱাংবা চীংদোল, অকনবা নুংমূ, লৈচিল শান তাবা, ইচিক চিকপা মহৌশাগী মশাইকোল অমা ওইল পেন্তিং অসিদা উবা ফংই। য়েংবা য়াম্না নুংঙাইবা অতপ্পা অইংবা মহাও অমদি পিরি। ইম্ফাল আর্ত কোলেজতা পেন্তিংগী এসিস্তেন্ট প্রফেসার ওইরিবা হাওবম দেবব্রতা সিংহগী ‘মাইথোং সেরিস-১৬’ আর্কাইলিক কলরদা য়েকপা নুপী অমগী মায়থোংগী পেন্তিংনি। মায়থোংগী অকোয়বদা শাৎলিবা লৈরাংশিংনা মহি চেল্লি। লৈনা খরসু লৈমন চল্লি। কুরাকসু পায়রি। মায়থোংসিনা হুমাংনা লুপ্লি। ৱাহন্থোক য়াম্না লৈবা পেন্তিংনি। আর কে দেবরাজকি ওইল পেন্তিংদা ‘ দিতরিওরেসন’ হৌজীক হৌজীক ফোং ফোং শানা থেংনরিবা ইনভাইরোমেন্টেল থ্রেদ ওইরবা তুরেল অমসুং পাৎ কোমদা দম্পিং সাইত ওইশিল্লকপদগী ঈশিংদা হিংলিবা ঙাদ্গী হৌরগা থৱায় পানবা পুম্নমক্কি মফমদা লাক্লিবা অকিবগী মশক ওইরবা কন্তামিনেসন অদুগী ভিভিদ ইমেজ অমা পেন্তিং অসিদা উৎলি। মৈত্রম বোইচান্দ সিংহগী ‘মেলাণকোলি দ্রিম’ ক্যুবিজমদা নকশিনবা মখলগী পেন্তিংনি। হেনবা তেন্সুবাগী পেন্তিং ‘দোন’ চীংখৈ হুল্লকপা অয়ুক্কী শক্তম ফোঙদোক্লি। মৈনম ইরিকখোম্বা মীতৈগী ‘কম্পোজিসন-১’ দা উৎলিবসিনা স্কাই স্ক্রেপ্পরশিংনা, কংক্রিক বিল্ডিংশিংনা অনৌবা শকলোন লৌরক্লিবা পুন্সি মহিং অদু উৎলি। য়েংকোকপম জোবিতা দেবীগী দ্রাইপোইন্টতা য়েক্লিবা ‘ঐগী শক্তম অমা’ য়াম্না ফজবা এক্সপ্রেসননি। নুপী অনীখক মায় মায় ওনশিন্দুনা করিগুম্বা খরা পাউদম্নরি। অৱা নুংঙাই শরুক য়ামিন্নবগী মতৌনি। সোইবম কোরৌঙানবা মীতৈগী ‘কেজ’ শরং মনুংদা হিংলিবা পুন্সি কয়াবু রিপ্রজেন্ট তৌরি। মোংফমগী নুং ময়াম মরক্তা মফি থোংদ্রবা মীওই অমনা ঈগী ঈপাক্তা থৌরবা য়োৎপি মরক্তা ফম্লি। কন্তেমপররি আর্টকী ফজবা খুলান্থোক্কি পেন্টিংনি হায়নিংই। গুরুময়ুম কৃষ্ণদাস শর্ম্মাগী ‘সোলিত্যুদ’ ইম্প্রেসনিজমদা নকশিনবা, মহৌশাগী লেন্দস্কেপ অমগী ব্রিলিয়েন্ট ওইবা হঙ্গামপাল মচুনা লোকপা, নুমিৎ মঙালনা তাম্না উরকপা, অচিকপা অয়ুক অমগী পেন্তিংনি। য়েংবা য়াম্না নুংঙাই। চান্দম লালিতকি ‘দেস্তিনেসন’ আর্কাইলিক্তা য়েকপা শান্তিবু ইখৌ লাংলিবা পেন্তিংনি। মমা অমনা পীক্লিবা মচাবু মথানুংদা নুংশিনা চেৎনা কোল্লি চরৈ ফিনা চেকশিন্না য়োমদুনা। মসিগী অকোয়বদনা ইরৈগুম্বনা শাহুম্না ইকোয় কোয়শিল্লবা মরক্তা খুনু অনীনা পাইরি মশা তুফাং খপ্লদুনা। য়াম্না ফজবা ৱাহন্থোক পিবা পেন্তিংনি। থোইদিংজম লোকেস্বোরি দেবীগী ‘শেল্ফ প্রোতেক্সন’ য়েংবদা পুকনিং হুবা থম্বাল চাম্ম নিপালদা থম্বাল মশানা চেকশিন্না শেন্নজবা মথৌ অদুনা এবস্ত্রেক ওইনা পুথোক্তুনা য়েকপনি। ব্রিলিয়েন্ট পর্পল মচুগা মাজেন্তাদা হেন্না মচু হাপ্তুনা অয়েংবশিংদা ইম্প্রেস তৌহনবা ঙম্লি। নহা ওইরিবা কোন্থৌজম মাইকেল মীতৈগী ‘Nature-XV’ মেদিয়ম্না কোলাজ আর্টনি। লেন্দস্কেপ অসিমক য়াম্না ফজবা মখলগী আর্টনি।

মণিপুর স্তেট কলা একাদেমি মনা ফংখ্রবা মাইবম মণিঙৌ সিংহগী ‘The pangs of peace’ মনিপুরগী হৌজিক ওইরিবা ফিভম অসিগসু য়াম্না চুনবা পেন্তিংনি। অমম্বদা ইমা ইবেলশিংনা লাওরিবা খোল্লাও, মিৎ পুনশিল্লবা, খুৎ পুনশিল্লবা পুন্সি মহিং, অচুম্বা অদু করিনো খঙলবসু পাম্বৈ লৈতবা মতৌ অমদি মৈখুনা মম্লবা কাচিন অমদগী খুনু অমনা মশেন মরাং মঙালগী লম্বীদা পাইশিল্লকপা, পেন্তিং অসিগী ময়ায় চবুক্তনা খুনু অঙৌবা অমনা মনিং তম্না ময়েক শেংনা মশা খপ্লিবা অসিমক য়াম্না চংখোল্লবা শান্তিগী পাউজেল পুরিবা পেন্তিংনি। সনাবম মনোরামাগী ‘দ্রিম -৬’ হায়না মিংথোনবা লিনোকত অসিমক য়াম্না ৱাহন্থোক লৈবা লাইনি। মসিদা হৌদোং লম্বোইবনা ঙায়োক চফুদগী ঙা অমা ফানবা থৌরাং তৌরি। নাকলদনা খোই অনী লৌশিন্নদুনা অমনা অমদা য়েৎশিল্লি অদুগা বেকগ্রাউন অসিনা অমুবা মচুনি। নিতিস চীংঙাখমগী ‘খ্বাং ফানেক শবা’ পেন্তিংনা মতম অমগী ইমা ইবেলশিংনা ফিশা লোনশা তৌদুনা ইয়োংগী পোৎথোকনা মীপান তাংদনা হিংলম্বা পুন্সি অদু নীংশিংহল্লি। ওইনাম তিজেন সিংহগী ‘কেবা’ অসিনা নুপী ওইবীশিংনা কেনা লৈজবা মতৌ, থোৎপা মেংবা, কেজা মৌজবা মতৌশিং পেন্তিং অসিদা উবা ফংই। য়াম্না ফজবা পেন্তিংনি। খুরাইজম পান্থোই চনুগী ‘Untitled’ উরিবসি এক্সপরিমেন্টেল ওইনা পুথোক্লকপা নুপীগী শক্তম অমনি। য়েংবা অদুম নুংঙাইবা পেন্তিংনি। মনিপুর স্তেট কলা একাদেমি মনা ফংখ্রবা নাওরেল রাজেস সিংহগী ‘A man’ Dry point য়াম্না ৱাহন্থোক লৈবা আর্টনি। উরিবা শক্তমসি মীগী মমিদা শা কৈগুম্না মমৈ পানবা, মতু পানবা, ঙকশমদা তাইদি পুল্লবসু খল্লিবা ৱাখলসি মীওইবা হায়বদুদি ওইদ্রে হায়না ফোঙদোকপা আর্ট ৱার্কনি। পেন্তিং অসিগী বেকগ্রাউন অসিদা উৎলিবসিসু কনতেম্পররি হ্যুমেন সোসাইতিনি। মনিপুর স্তেট কলা একাদেমি মনা ফংখ্রবা রাজকুমার থম্বালসনা সিংহগী ‘Simoon’ খৌগংলবা মালেমদা মীওইবনা হিংলিবা পুন্সিগী শক্তম অমা ময়েক লানা মোদর্ন আর্টকি একপ্রেসন্দা উৎনবা হোৎনরি। সালিনা নিংথৌজমগী ‘Clusive Serenity’ দা উৎলিবসিনা ইং ইং লাওবা লাইজ ইয়োক কোমদা থারো অঙাংবনা মনিং তম্না লৈশাৎ তম্বদুনি। য়েংবা য়াম্না নুংঙাইবা পেন্তিংনি। মণিপুর স্তেট কলা একাদেমি এৱার্দ ফংখ্রবা মংসাতাবম সেমসন মীতৈগী ‘Heikru Hidongba’/ Dry point উরিবসি মনিপুরগী ত্রেদিসন অমসুং কলচরদা য়াওদুনা লাক্লবা হৈগ্রু হীদোংবগা শাগোন্নরিবা হীয়াং কুমহৈ অদুগী ফজরবা মশক অমা মুবমেণ্ট য়াওণা উবা ফংবসিনি ফজরিবসি। কৈথেল্লাকপম সাইলেক্সকি ‘ Eutopia-II’ উৎলিবা শাগোল অমনা মালং খোঙনেৎনদুনা তারংদা কাংদ্রুম তান্নরিবা অসিমক য়াম্না ৱাহন্থোক লৈ। য়েংবা য়াম্না নুংঙাইবা পেন্তিংনি। বর্খা অরিবমগী ‘Back to the days’ অসিদা উৎলিবসি অঙাং অমা মমা ইরু লুবীবগী য়াম্না চম্বা পুন্সিগী মতাং অদি উবা ফংগনি। হানিত মোইরাংথেমগী ‘ফেমিলি’ হায়বসিদনা ইচম চম্বা য়েনবা অমসুং য়েনবী অনীগা য়েন্নাওশিংনা মচাক খুনবগী পেন্তিংনি। চম্না অদুম য়েংবা নুংঙাইবা পেন্তিংনি। ‘The Mountains of Hope’ হায়রিবা পেন্তিং অসিনা তোংব্রম অমরজিৎ সিংহগী লেন্দস্কেপ সেরিস ওইনা য়েকলকপগী মনুংদা সিংচাগী লেন্দস্কেপ অমনি। মসিদা মিৎনা ইংলবা লোইবী চীংশাং পরেং, উমংশিং, তরু তরু অতিয়া, লৈচিল মফোল পুম্নমক উবা ফংলি। ঙসিদি হায়রিবা চীশাং পরেং অয়াম্বা পোপি থাবশিংনা মরু কোকখিদুনা মহৌশা খূৎশেমগী ফজবা পূম্নমক মাংশিল্লক্লি। মসিদা ভিজ্যুএল আর্টসি অমা ওইনা অয়েংবশিংদা পাউজেল পীনিংলি। মহৌশা হায়বসি য়াওদ্রবদি মীওইবনা হীংবা ঙম্লোই হায়না।

আর্টস সোসাইতি মণিপুরনা চহী য়াঙ্খৈ মপুং ফারকপগা মরি লৈননা পাঙথোকখিবা গ্রুপ আর্ট একজিবিসন ভোইস ওফ কলর এন্দ স্ত্রোক্স অসিদা কোলকতা লৈবা ভিজ্যুএল আর্টিস কয়া, আর্ট লভরশিং, আর্ট কনোইসরশিং নুমিৎ খুদিং লাক্তুনা মনিপুরদগী শরুক য়াখিবা আর্তিসশিংগা ইন্তরেক্সন কয়া তৌখি। মখোয়না আর্ট ৱার্কশিং অদু উরগা মনিপুরবূ হেন্না মশক খঙখি। পাউজেল কয়াদি পেন্তিংশিং অদুনা চেল্লমখি। ঐখোয়সু শান্তি পাম্মি, ঐখোয়সু মহৌশা নুংশি হায়না। মপাল লমদা অসুম্না সোসাইতিনা গ্রুপ আর্ট একজিবিসন অমা পাঙথোকপসিমক য়াম্না পুকনিং থৌগৎনিংঙাই। য়াইফবা ওইবা ওইরসু আর্টস সোসাইটি মনিপুর।