য়েংখোম বিহারীদা গোপাল শর্ম্মা এৱার্দ লান্থোকখ্রে
ইম্ফাল, মার্চ ২২ঃ সাহিত্য থৌপাঙ লুপ (শাথৌলুপ) না পূকৈ চোন্না লৈরিবা মণিপুরী খোরিরোলগী লমসিদা মশক থোকপা খুদোল তম্লিবা অইবা-অইবীশিং দা চহীগী ওইনা লান্থোকপা লেমজনিংঙাই ওইরবা 'গোপাল শৰ্ম্মা এৱাৰ্দ' চৎলিবা চহী ইং ২০২৬ অসিগী ওইনা লমদম অসিগী শক্নাইরবা অইবা য়েংখোম বিহারীদা লাম্বোতুনা ইকায়খুম্নখ্রে।
পোক্নফম পাউ-চেবু ঙসিগী থাক অসি য়ৌনা পুখৎলমখিবা পাউ-চে অসিগী এদিতর ওইরম্বা লৈখিদ্রবা গোপাল শর্ম্মাগী মিংদা মহাক্কী ইমুং-মনুংনা মণিপুরী খোরিরোলগীদমক কথোক্লবা মনা অসি অইবা য়েংখোম বিহারীদা হৌখিবা থাংজ নুমিতা খুৎশিন্নখিবনি। | মনা অসিদা শেল ওইনা লুপা লীশীং ১৫ গা লোয়ননা শাল অমদি সাইতেসন য়াওরি। সাহিত্য থৌপাঙ লুপনা শীন্দুনা মণিপুর প্রেস ক্লবকী লোক্তাক হোলদা 'ৱার্ল্ড পোইত্রি দে' থৌরমগা লোয়ননা পাঙথোকখিবা মনা অসি লান্থোকপগী থৌরম অদুদা মণিপুর কলচরেল ওর্গনাইজেসনগী প্রসিদেন্তসু ওইরিবা রিতায়র্ড আই এ এস কাংজম রাধাকুমার অমসুং সাহিত্য থৌপাঙ লুপর্কী প্রসিদেন্ত তোংব্রম অমরজিৎনা মথংশিৎনা চীফ গেস্ত অমদি প্রসিদেন্ত ওইনা শরুক য়াখি। লোয়ননা সাহিত্য থৌপাঙ লুপকী চেফোঙ 'শক্লোন' গী ১৯শুবা ইসুসু ফোঙখি।
য়ুনেস্কোনা মালেমগী ওইনা পীবা 'য়ুনিতি, পিছ এন্দ কলচরেল এক্সপ্রেসন থ্রু ভর্স' হায়বা থিম অসিদা পাঙথোকখিবা ৱার্ল্ড পোইত্রি দেগী থৌরম অদুগা মরী লৈননা সাহিত্য একাদেমি এৱার্দি রাজকুমার ভুবোনসনানা চেয়র লৌদুনা অইবা অইবীশিংগী শৈরেং পাথোকপগী থৌরম অমসু পাঙথোকখি।
থৌরম অদুগী নুংগী ৱারোল পীরদুনা সাহিত্য থৌপাঙ লূপকী সেক্রেতরি ময়াংলম্বম উত্তম কুমারনা হায়, ইং ২০০৩ দা সাহিত্য থৌপাঙলুপ (শাথৌলুপ) না হেক শাফোঙলকপদগী হৌনা পোক্নফম পাউ-চেগা শাগোন্নরগা লাকখি। লৈখিদ্রবা গোপাল শর্ম্মানা লমদমসিগী অইবশিংবু য়াম্না নুংশিজবা অমদি মতম পূম্বদা অইবশিংবু পুক্নীং থৌগৎপীরম্বা মীশক্নী। থোইদোক্না পোক্নফম পাউ-চেদা লুপ অসিগীদমক চাউরবা মফম অমা পীদুনা চহী দিকেদ অমরোমসি শাগোন্নরগা লাকখি। মহাক্না শাথৌ লুপকা য়াম্না নক্ননসু লোয়নরকখি।
ইং ২০১০ গী অগন্ত ৮ দা মহাক্লা লৈখিদ্রবা মতুং 'গোপাল শর্ম্মা এৱার্দ' অসি ইং ২০১৩ গী ' ৱার্ল্ড পোইত্রি দে' নুমিৎ অসিদগী লান্থোকপা হৌরকখিবনি। লৈখিদ্রবা অসিনা মণিপুরী খোরিরোলবু নুংশিজরম্বা অমদি অইবা-অইবীশিংবু ৱাংনা থাগৎচরম্বা মহাক্কী ৱাখল্লোন অদুবু ঙাক্তুনা মহাক্কী লৈহৌরিবা ইমুং-মনুংনা মনা অসি কৎপনি। মনা অসি হেক হৌবদগী চহী অমা ফাওবা লেপ্তনা চহী খুদীংগী লান্থোরক্লি হায়নসু মহাক্না মখা তানা ফোঙদোকখি।
থৌরম অদুদা কাংজম রাধাকুমারনা চীফ গেস্তকী ৱারোল পীরদুনা হায়, ঐগী পুক্নীং ৱাখলদা ফাওবা ঈহুল অদু ফোঙদোকপখক্না শৈরেং ওইদে। শৈরেং হায়বসি তানিংবা অমসুং পানিংবা পোকপা ৱাহৈ-ৱাতা কয়া চঙই। অইবশিংগী শৈরেং অদু অপাবা অমদি অতাবশিংনা নীংশিংলগা অদুমক লৈগদবা মওংদা ফোঙদোকপা মথৌ তাই। লোয়ননা শৈরেং অমদা ফোঙদোক্লিবা পুক্নীংগী ঈহুলশিং অদু মালেমদা লৈরিবা শক-চু অমদি লোল তিন্নদ্রবা মীপূম খুদীংমত্ক্তা ঈথিল পীবা ঙম্বা মওংদা ফোঙদোকপসু মথৌ তাই। শৈরেংগী চন্নফম ঙসিগী মোর্দন ৱার্ল্ড অসিদসু শোয়দনা মথৌ তারক্কনি হায়না মহাক্লা ফোঙদোকখি।
গোপাল শর্মা এরাদ-২০২৬ ফং খুবা য়েংখোম বিহারী (৮৭), ইং ১৯৩৯ গী আগন্ত ১১ দা ককচীং খুল্লেন মখা লৈকায়দা পোকই। থোইদোক্না মীয়াম্না 'ভৈরজীৎ লাইরিক' হায়না খঙনবা পন্দিত অসিগী মচানি। অপোকপীগী মিংনা কৈন্যা দেবী কোই। মহৈগী থাক্না বি এনি। মণিপুর গবর্নমেন্তগী হিন্দী গ্রেজুএত ওজা অমা ওইনা মতম শাংনা ওজাগী শিনফমসিদা লৈরম্লবা মতুং ইং ২০০৩ দা থবক্তগী পোত্থাখি।
অঙাং ওইরিঙৈদগী হৌনা ইবা-খোৎপা হায়বসিনা পুন্সিগী খ্বাইদগী পামজবা ওইরকপনা হৌজিক মশাগী চহী ৮৭ শুরক্লবা ফাওবা অইবা অসি কলম পায়দুনা লেপ্তনা ৱারেং-শৈরেং কয়া ইরি। ইং ১৯৭৯ দা ফোঙখিবা মহাক্কী 'অনৌবা পৃথিবী অনৌবা আকাশ' হায়রিবা শৈরেং লাইরিক অসিদগী চপ-চাবা অইবা অমা ওইবগী ফিদা ফংবা হৌরকখি।
অইবা অসিগী হৌজিক ফাওবদা ফোঙখ্রবা লাইরিকশিংদি 'ঙমখৈ অমা ৱাংমা লীশিং (শৈরেং)', 'অথুম্বা লমদম অথুম্বা চৈনা (শৈরেং)', 'হি অসি ঐগী (শৈরেং)', 'লাক্লে জগৎ অপুম্বা ইনাক্তা (শৈরেং)', 'অচীকপগী খোন্থাং (শৈরেং)', 'খোঙচৎ মপান্নাইদবর্গী (শৈরেং)', 'ফজবা থিবগী লম্বীদা (ৱারেং)', 'জগৎনা পুন্সিগী লমথুং নি (শৈরেং)', 'মীওইবা কনানো পুন্সি করিনো (ৱারেং)' অসিনচিংবনি।
অইবা অসি রাইতর্স এসোসিএসন ককচীংগী 'লিতরেরি এৱার্দ-১৯৯০', সাহিত্য সেবা সমিতিগী 'য়াম্বেম মনি সাহিত্য মনা-২০০৩', মণিপুরী সাহিত্য পরিষদ, ইম্ফালগী 'যামিনি সুন্দর গুহ গোল্ড মেদল-২০০৪' অমসুং 'কাব্য ভুষন উপাধি-২০০৮' পীদুনা ইকায় খুম্নখ্রে।
অইবা অসিগী শাংলবা খোরিরোলগী খোংচৎ অসিদা সাহিত্য সেবা সমিতি লিংখৎখিবা চহী ইং ১৯৬৭ কী ফাউন্দর সেক্রেতরি ওইনা তার্ম ৬ লক থৌ পুরস্বদা ইং ১৯৮৪-১৯৮৭ ফাওবনা সমিতি অসিগী প্রসিদেন্তগী ফমসু পুরম্মী।
সোর্স : পোক্নফম
0 কমেন্ট:
কমেন্ট তৌবিয়ু