শরতচান্দ থিয়ামগা উনবগী থৌরম পাঙথোকখ্রে
ইম্ফাল, ওক্টোবর ৮ : লাইব্রেরি এন্দ ইনফোর্মেসন সেন্টর, ককচীংনা শীন্দুনা ঙসি ফাওবা লেপ্তনা পাঙথোক্লিবা ‘স্পিসিয়েল সানডে’ গী ৪৬২ শুবা থৌরমদা ঙসি শক্নায়রবা অইবা শরতচান্দ থিয়ামগী উন্নবগী থৌরম অমা পাঙথোকখ্রে।
সেন্তর অসিগী ওদিতোরিয়ামদা ঙসি পাঙথোকখিবা থৌরম অদুদা মপূং ওইনা হৌজিক্কী মতমদা হৌরক্লিবা অঙাংশিংনা পোক্নফম লমদম্বু নুংশিবা অমসুং ইমা লৈবাক্কীদমক চোংথোকপা হায়বসিদা অ।বিা শরতচান্দ থিয়াম্না মরীক চুম্বা ৱাফম কয়অ ফোঙদোকখি।
মহাক্না মখা তানা, মালেমসিদা ঐখোয়গী ইমা অনীখক লৈ। অমনা অপোকপা ইমানি অদুগা অমনা পোক্নফম ইমানি। মরম অসিনা ঐখোয়না পোক্নফম ইমাগীদমক্তসু কত্থোকপা য়াবা কত্থোক্কদবনি। মরমদি পোক্নফম ইমানা ঐখোয়গীদমক পীরিবা মমল নাইদ্রবা খূদোল অসি ঐখোয়নসু কৈদৌঙৈদা কাওফম থোক্তে হায়না ফোঙদোকখি।
উন্নবগী থৌরম অদুদা অইবা অসিনা মালেমগী মফম খরদা চৎলুবা মতমদা থেংনরকপা তমজনিংঙাই ওইবা কয়াগী মরমদসু মরীক চুম্বা পাউদম কয়াসু শরুক য়াখিবশিংদা ফোঙদোকখি। মহাক্না ইহান হান্না চৎলুবা গ্রীসতা থেংনরকপা কয়াগী মরমদা লোয়ননা মোর্দন ওলিম্পিক গেমস ১৮৯১ দা এথেন্সতা পাঙথোকখিবা অমসুং শিনফম পূম্নমক অমনা অমদা ইকায়খুম্নবগী মতাঙদসু ৱাফম কয়া ফোঙদোকখি।
ইমালোনগী মতাঙদসু অইবা অসিনা হায়, ঐখোয়না খ্বায়দগী লুনা অমসুং নুংশিনা লৌজরিবা ইমালোন হায়বসিগী খ্বায়দগী মরুওইবা অমসুং ইমালোন্না শিখিবদা ঐখোয়সু শিখিগনি হায়না ফোঙদোকখিবগা লোয়ননা মহাক্না বাংলাদেশতা চৎলুবগী মতাঙদসু পাউদমখি। মখা তানা, মহাক্না ম্যান্মাদা চৎলুবা মতমদা মান্নদবা কাঙলূপ কয়ানা পূন্না খুন্দামিন্নহৌবা অমসুং মণিপুরগী কন থৌরবা নিংথেীশংনা য়েক্নবা কয়াবু মায়থীবা পীখিবগী মতাঙদসু ৱাফম কয়াসু ফোঙদোকখি।
ইং ২০২০ দা মহাক্না জাপান্দা চৎলুবগী পাউদম তম্লদুনা, জাপানিজ শিংনা খ্বায়দগী মমল লৈনা লৌনরিবসি মতম্নি। মতমগী মমল খঙনা চৎপা মরম্না ঙসি জাপান্না চাওখৎলিবনি। হিরোসিমা অমসুং নাগাসাকিদা এতাম বোম থাদদুনা উৎ ওল্লুরবা জাপান হৌজিক্তি ইশঙ শংদুনা মহৌশাগী ফীবমদা লাক্লে। মসি পূম্নমক হোৎনবা কনবা অমসুং মখোয়না মরৈবাক মরমদম্বু নুংশিবদগীনি। ঐখোয়সু ইমা লৈবাক্কীদমক অঙম্বা থাক্তা হোৎনগদবনি হায়নসু মহাক্না মখা তানা ফোঙদোকখি।
ঙসিগী থৌরম অদুগী অহৌবদা হকচাং ফবনা লননি হায়বসিদা দাঃ ৱাই সেবাশোরি দেবীনা ৱা ঙাঙখি। লোয়ননা সেন্তর অসিগী সেক্রেটারি কেএসঐচ জয়কুমার সিংহনসু শরুক য়াখিবা অঙাংশিংদা স্পিসিয়েল সানডেগী মরমদা অমসুং মসিগী কান্নবা হায়বসিদা ৱা ঙাঙখি।
থৌরম অসিদা শরুক য়াখিবা ক্লাস ৱানদগী ফাইভ ফাওবগী মনুংদা লৈবা মহৈরোয়শিংদা পান ইন্দিয়ান মণিপুরী মৈতৈ সাইন্তিস্ত এন্দ একাদমিসিয়ান এসোসিয়েসন, দেহরাদুনগী মায়কৈদগী সচি সোইবমনা স্কুল বেগ অমমমসু য়েন্থোকখি। অখন্নবা থৌরম অদুদা দি এম য়ুনিভার্সিতিগী ভাইস চাঞ্জেল্লর প্রোফেসার এন রাজমুহোনসু শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু