মণিপুরগী অইবশিংনা চোকথবা নায়দনা লৌরিবা থৌদাংশিং মমল য়াম্না য়াম্মিঃ বিরোলা
ইম্ফাল, ওক্টোবর ১০ : কুকিশিংনা লান্দারকপদগী হৌখিবা মে ৩দগী থোক্লকখিবা মণিপুরগী লান মরক অসিদা মণিপুরগী অইবশিং (রাইটার্স ওব মণিপুর) না চোকথবা নায়দনা লৌরিবা থৌদাং অসি মমল য়াম্না য়াম্মি হায়না তখেল লৈমা তেংবাঙ লুপকী সেক্রেটারি খোইস্নাম ওংবি বিরোলানা ফোঙদোকখ্রে।
মণিপুরগী অইবশিং (রাইটার্স ওব মণিপুর) দা ত্রিপুরাদা (তখেল) গী মীতৈশিংনা পাঙলকপা পুন্সি চেঙজেলগী মশক ওইরিবা চেঙ মুৎ ৩/৩ গী অপুনবা চেঙশিং খুৎশিন্নবগী নরসিংহ মন্দির, ককৱাদা ঙসি পাঙথোকখিবা থৌরম অমদা খোইস্নাম ওংবি বিরোলানা মখা তানা ফোঙদোকখিবদা মওং অমা নত্রগা অমদা মণিপুরদা ৱাথোক-লান্থোক অমা হেক থোক্লে তাবদা ত্রিপুরাদা লৈরিবা মীতৈশিংগী থম্মোয়দসু হায়নিংঙাই লৈতনা নুংঙাইতবা ফাওই।
হন্দক কুকিশিংনা মীতৈশিংদা লান্দারক্লিবগী মওং অসি অসুক্কি মতিক নুংঙাইতে। মখোয়গী মওং অসি হান্ননা থৌরাং তৌরগা তৌরকপনি হায়বসিসু ময়েক য়াম্না শেংলবনি। অদুগা মণিপুরগী গভর্ণর অমসুং অতোপ্পা সেন্টারগী টোপ ওফিসিয়েলশিংনসু হন্দক্কি কুকিশিংনা মীতৈশিংদা চত্থরক্লিবা লান্দা অসিদা অতোপ্পা ফোরেন কন্ট্রিগী খুৎ য়াওই হায়নসু ফোঙদোকখিবা লৈখ্রবনি।
মরম অসিনা হৌজিক চত্থরিবা লান অসি লোইশিন্ননবা হোৎনবদা অচৌবা অৱাবা খরা মায়োক্নখিগনি হায়না খল্লি। অদুগা কুকিশিংনা মে ৩দগী লান্দারকপগা মীতৈগীসু থৌনা ফরবা ফরবী খুলঙাকপা-খুলঙাকপি কয়া অমা থোক্লক্তুনা কুকিশিংবু লান্থেংনদুনা লাকপা অসিমক্তি অসুক্কি মতিক থম্মোয়সিদা পেঞ্জৈ। ঐখোয়গী ইপা-ইপুগী থৌনা ফবগী ঈরিকশিং অদু হৌজিকসু ঐখোয়গী ঈদা চেল্লি হায়না খঞ্জৈ। মসিগীদমক ঐখোয়গী খুল ঙাকপীরিবা খ্বাই খুদিংগী মফমদসু ইকায়খুম্নবা উৎচরি হায়না ফোঙদোকখি।
মে ৩দগী মণিপুরদা কুকিশিংনা লান্দারকপদগী অৱাবা তারবা অমদি খুলঙাকপশিংগী মতম-মতমগী ওইনা মথৌ তারকপা পোৎলমশিং মণিপুরগী অইবশিংনা মতেং পাঙবিদুনা লাক্লিবসিমক য়াম্না নুঙাইজৈ। ইশামকসু অইবি অমা ওইজরুবনা অসিগুমবা খোঙথাং অসিদা অঙম্বা মতেং য়াম্না পাঙজনিংখি। অদুবু লমদম তাম্না লৈখিবনা মরম ওইরগা মতাং মতম চানা মতেং পাংবদি ঙমজখিদ্রে। অদুবু ঙসিদি অদুগুম্বা মতেং পাংবা ফংবগী তাঞ্জা অদু ফংজবসিদা হায়নিংঙাই লৈতনা নুংঙাইবা ফাওই।
ঙসি পাংজরিবা চেঙ অমসুং শেনফমশিং অসি ত্রিপুরাদা লৈবা মীতৈ অইবশিংনা পাংবিরকপশিং অদুনি। মখা তারকপদসু মণিপুরগী অইবশিংদা ত্রিপুরাগী মীতৈশিংগী মায়কৈদসু অঙম্বা মতেংশিং পাংননবা থৌরাং তৌরদুনা লৈজরি হায়না মহাক্না মখা তানা ফোঙদোকখি।
ঙসিগী থৌরম অদুদা মণিপুর সাহিত্য পরিষদ ইম্ফালগী জোইন্ট সেক্রেটারি রামেশ্বর, মণিপুরী লিটরেরি সোসাইটিগী সেক্রেটারি নাউরেম রাজেন্দ্রো, অশাংবা কম্ম্যুনিকেসন্স, ইম্ফালগী এ সি নেত্রজিৎনচিংবা মীওই কয়ানসু মণিপুরগী অইবশিং (রাইটার্স ওফ মণিপুর) দা পুন্সি চেঙজেল অমদি শেলগী মতেংসু পাংনখি হায়রি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু