লোলগী পূক্কৈ হেনগৎনবা অনৌবা ৱাহৈ-ৱাতাশিং থিজিনবীয়ু: সনায়াইমা
ইম্ফাল, অক্টোবর ৭ : অপূনবা খোরিরোলগী মালেমগী লূপনা ২ শুবা ইন্টারনেসনেল রাইটার্স মীতকা লোয়ননা সোসিয়েল এক্তিভিস্ত নিংথেমচা সনা য়াইমগী ৭৭ শুবা মপোক কুমওনগা মরী লৈননা মহাক্কা উনবগী থৌরম অমা ঙসি জে এন দান্স একাদেমিগী ওদিতোরিয়ামদা পাঙথোকখ্রে।
থৌরম অদুদা ক্রিতিক অমসুং প্লেরাইত বুধ চিংথামনা নিংথেমচা সনায়াইমগা মহাক্কী ৭৭ শুবা মপোক নুমিৎকা মরী লৈননা অখন্ননা উনদুনা ৱারী ৱাতাই শানখি।
থৌরম অদুদা সোসিয়েল এক্তিভিস্ত নিংথেমচা সনা য়াইমনা হায়, মহাক থোইদোক্না মপোক নুমিৎ অসি পাঙথোক্তে অদুবু ঙসি লূপ অসিনা পাঙথোকপীদুনা খোরিরোয়শিংগা উনবগী খুদোংচাবা অমা পীবা অসি নুংঙাইবা ফাওই। ঙসি ফাওবা হিংলক্লিবা পুন্সি লম্বী অসিদা লৈবাক মীয়ামগী করিগুম্বা খরা তৌবা ঙম্লিবা অসি ইরৈচাশিংনা মহাক্কী মফমদা থাজবা থম্বীদুনা থৌনা লিংজেল হাপ্পীবা অসিননি।
মহাক্না ঙসি লৈরিবা ফীবম অসিদসু লৈবাক খুন্নাইগী তৌবা য়াবা থবকশিং তৌখিগনি। মসিনা পুন্সিগী চৎকদবা খোঙচৎকী অরোইবা পন্থুং ওইগনি। মহাক্না হায়, ঙসি খুন্নাই অসিদা খোরিরোয় ময়াম অমা থোক্লকপগা লোয়ননা খোরিরোয়গী লূপ কয়া থোক্লকপা থেংনবা অসি নুংঙাইবা ফাওই। আর্ত অমসুং লিতরেচর হায়বসি খুন্নাই অদুগী ওইরিবা ফীবম, হিংলিবা পুন্সি মহিং, থৌদোক ৱাথোক ময়াম অসি নৈনরগা মদুগী ৱাখৈরোল অদু ইথোক্তুনা মীয়ামদা খঙহনবনি। মতম অমদা শৈরেং লাইরিক ফোঙবা অসি তাঙনা থোক্লম্মী। অদুবু ঙসিদি পূক্নিং-ৱাখলদা লৈবা ৱাফম ফোঙদোক্নবগী মেদিয়াম অমা ওইরিবা শৈরেংগী লাইরিকশিং ফোঙনরকপা অসি নুংঙাই।
খোরিরোয়শিংনা ৱারেং নৎত্রগা শৈরেং ইবা মতমদা লোলগী পূক্কৈ হেনগৎনবা হোৎনবগা লোয়ননা অনৌবা ৱাহৈ-ৱাতা থিজিনবা তঙাইফদে। ঐখোয়গী অরিবা লাইরিক ওইরিবা পুয়াদা ইরিবা ৱাহৈ-ৱাতা ময়াম অসি অইবা-অইবীশিংনা নৈনদুনা শৈরেং ৱারেংদা হাপ্তুনা অনৌবা মীরোলদা খঙহনবা তঙাইফদে হায়না সনা য়াইমনা ফোঙদোকখি।
অমরোমদা সনা য়াইমনা হায়, ম্যান্মার য়াওনা অতোপ্পা লৈবাক্না মণিপুরদগী লম ফক্তুনা লৈবাক অমা শেম্ননবা থৌরাং তৌরে হায়বসি ঐখোয়না খঙলবা ৱাফম্নী মসি ইন্দিয়া গবর্নমেন্তনসু অদুমক খঙলমগনি। হন্দক এন আই এন ম্যান্মাদগী খুৎলায় পায়বশিংনা মণিপুরদা লান্দরকপা অসি ইন্দিয়াদা লান্দারকপনি হায়না ফোঙদোরকপা অসি হন্দক্কী অসিনা অহানবনি। ৱাফম অসি খঙলক্লিবা অসি অফবা খোঙথাং অমনি হায়না লৌই। মসিদা ইন্দিয়া গবর্নমেন্তনা করি খোঙথাং লৌরকই হায়বদু য়েংবা মথৌ তাই। ইনভেস্তিগেসন রিপোর্ত অসিগী মতুংইন্না থবক লৌখৎপা হায়বসি ইন্দিয়া গবর্নমেন্তকী থৌদাং নি। অদুবু মসিদা স্তেত গবর্নমেন্তনা ইন্দিয়ান গবর্নমেন্ততা প্রেসার পীবদি মথৌ তাই হায়না নিংথেমচা সনায়াইমনা ফোঙদোকখি।
জে এন মণিপুর দান্স একাদেমিগী দিরেক্তর পি বিলাশনা চীফ গেস্ত, রিতয়ার্দ প্রোফেসার দাঃ হামোম নবচন্দ্রনা প্রেসিদেন্ত অমসুং য়াইরিপোক থম্বালনু সাহিত্য মরুপ কম লাইব্রেরিগী প্রেসিদেন্ত ইবোতোম্বী খুমনচানা গেস্ত ওব ওনার ওইনা শরুক য়াখিবা থৌরম অদুদা পি দব্লিউ দিগী রিতায়ার্দ চীফ এঞ্জিনিয়ার এন নোরেন অমদি মেনুস্ক্রিপ্ত কস্তদিয়ান ৱাই চাউবনা রিসোর্ছ পার্সনশিং ওইনা শরুক য়াখি। থৌরম অদুগী শরুক অমা ওইনা অইবা-অইবীশিংনা ৱারী মচা পাথোকখি অমসুং শৈরেং শৈদিন্নখি।
সোর্স: পোক্নফম
0 কমেন্ট:
কমেন্ট তৌবিয়ু