• 603
• ৪ঠা অক্টোবর ২০২৩ ইং
• Share on:

লৈমরোল খোর্জৈকোল লৈকোলগী ২৩শুবা মপোক থৌরমগা লোয়ননা অইবা অইবীশিংনা ইবা লানগী লাইরিক ফোঙলগনি

ইম্ফাল, ওক্টোবর ০৩ : লৈমরোল খোর্জৈকোল (লৈকোল) গী ২৩ শুবা মপোক থৌরম য়াইস্কুল পুলিস লেনদা লৈবা মণিপুর দ্রামাটিক য়ুনিয়নগী হোলদা পাঙথোকখ্রে। লৈখিদ্রবী অইবী এম কে বিনোদিনি, খাইদেম প্রমোদিনি অমসুং তখেল্লম্বম থোইবী অহুমগী ফোটোদা হৈকৎ লৈকৎ তমদুনা ইকায়খুম্নবা উৎখি। মে ৩দগী চত্থরকখিবা লৈবাক্কী ইরাং অসিদা লৈখিদ্রবশিংগী মফমদসু মিনিট অনি তুমিন্না লেপ্তুনা অৱাবা ফোঙদোকখি।

থৌরম অসিদা অথোইবা মীথুংলেন ওইখিবী ফিল্ম প্রদ্যুসর এসোসিয়েসন মণিপুরগী প্রেসিদেন্ট থোকচোম  বিনাপানিনা অইবা অইবীশিংনা মে ৩দগী মীতৈদা কুকিনা লান হৌরক্লিবা অসিগী দোক্যুমেন্ট য়াওনা মপুং ফাবা লাইরিক অমা পুথোকপীরকউ। মসিদা লাইরিক ফোংনবগীদমক্তা লৈকোলগ কম্মিটিনা খনগৎকনি। লাইরিক অসি ফোংনবগীদমক্তা লুপা লাক্ষা অমসি পীজগদবনি। ইন্টলেকচ্যুয়েলশিংনা খন্না নৈনবদদি ইন্দিয়াগী লান্মীশিংনা লানসি খামজিন্দবগী মরম করিনো হায়বা ঐখোয় খঙবা ঙমদ্রি। ৱারোইশিন পুরক্নবসু হোৎনদ্রি হায়বসি তৎতনা তারে। 

থৌরম মপু ওইখিবী লৈকোলগী ভাইস প্রেসিদেন্ট ঙাঙোম একাশিনিনা হায়, অইবীশিংনা থৌনা হন্দনা ইশু কয়াদা য়ুম্ফম ওইরগা ইবিরক্কনি হায়বগী থাজবা লৈ হায়খি।

লৈকোলগী সেক্রেটারি ঘনপ্রিয়ারিনা হায়খিবদা লৈকোল অসি ইমাসি বিনোদিনিগী য়ুমদা ২০০১ গী  ওক্টোবরদা লিংখৎখিবনি। লৈমরোল খোর্জৈকোল (লৈকোল) হায়বা নুপীশিংতগী ওইবা অইবীশিংগী লুপ অসিগী মমিংসি ওজা খাইদেম প্রমোদিনিনা থোনবীরম্বনি। অদুনা অইবী য়োৎশবী মখোং অহুম হায়রগসু খঙনজরিবা এম কে বিনোদিনি, খাইদেম প্রমোদিনি অমদি তখেল্লম্বম থোইবী লাময়ানবী অইবী অহুমসিবু লৈকোলগী থৌদাং ওইনা নীংশিংজদুনা লাক্লি হায়খি।

থৌরম অসিগা মরী লৈননা ষ্টেন্দার্দ কলেজগী রিটয়ার্দ প্রিন্সিপাল চোংথাম ওংবী সুবদনিনা শৈদিন মপু ওইদুনা অইবী অইবা ৫০ না শৈরেং শৈদিন্নখি।

সোর্স: হুইয়েন লানপাউ।