মণিপুরগী পোপি পাম্বীশিং লোক্ত্রিঙৈদা মাঙহন্নবা দিফেন্স মিনিষ্টারনা ইন্দিয়ান এয়ার ফোর্সতা খঙহনখ্রে
ইম্ফাল, ওক্টোবর ০৩ : মণিপুরদা থারিবা পোপি পাম্বীশিং লোক্ত্রিঙৈগী মমাঙদা মাঙহন্নবা য়ুনিয়ন দিফেন্স মিনিষ্টার রাজনাথ সিংহনা ইন্দিয়ান এয়ার ফোর্সতা খঙহনখ্রে হায়না নিউজ এজেন্সী অমনা রিপোর্ট তৌরক্লি। পাউ অসিগী মতুংইন্না ৱাফম অসি রিপাব্লিক পার্টি ওফ ইন্দিয়া (অথৱালে) গী নেসনেল জেনারেল সেক্রেটারি ওইরিবা মহেশ্বর থৌনাওজম্না ঙরাং দিল্লীদা লৈবা মিনিষ্টর অসিগী ওফিসতা হকথেংননা উনখিবদা দিফেন্স মিনিষ্টারনা ৱাফম অসি ফোঙদোরকখিবনি হায়রি।
মহেশ্বর থৌনাওজম্না ফোঙদোরকই হায়বগী মতুংইন্না ঙরাং মহাক্না দিফেন্স মিনিষ্টারগা উনখিবদা মণিপুরদা থারিবা পোপি পাম্বীশিং লোক্ত্রিঙৈগী মাঙওইননা মাঙহন্নবা হান্না হায়জখ্রবা মতুঙদা ঙরাংসু অমুক হন্না তকশিনখিবনি হায়রি। য়ুনিয়ন হোম মিনিষ্টারগা উনখিবগী মতাংদা হংবা ৱাহংগী পাউখুমদা মহেশ্বর থৌনাওজম্না ফোঙদোরকখিবদা অথুবা মতমদা দিফেন্স মিনিষ্ট্রিনা মণিপুরগী পোপি পাম্বীশিং মাঙহনবগী থবক চত্থবীবগা লোয়ননা ৱাফম অসিমক মণিপুর লৈঙাক্তসু খঙহনবীনবা হায়জখি হায়রি।
পনবা য়াবদি, মণিপুরগী সী এস ওশিংগী অপূনলূপ ওইরিবা কোকোমিগী মায়কৈদগীসু দিফেন্স মিনিষ্টর উনদুনা মণিপুরদা পোপি পাম্বীশিং পাক্তক্ননা মাঙহনবীনবা তকশিনখিবা লৈখ্রবনি। অদুগা ষ্টেট অসিদা ৱার ওন দ্রাগসকী কেম্প্যেন চত্থরক্লিবা চীফ মিনিষ্টারনসু মমাঙ থাগী ২৩দা পোপি পাম্বীশিং থারিবা মফমশিং খঙদোক্তুনা পাম্বী অসিবু মাঙহন্নবগীদমক নার্কোটিক্স কন্ত্রেল ব্যুরো অমসুং নার্কোটিক্স এন্দ এফ্যেরস ওফ বোর্দারগী ওফিসিয়েলশিং য়াওবা অপূনবা কম্মিটি অমা নৌহৌননা শেম্লে হায়না লাউথোকখিবা লৈখ্রবনি।
পাউ অসিনা মখা তানা হায়বদা, নার্কোটিক্স এন্দ এফ্যেরস ওফ বোর্দারদগী ফংবা ডাটাগী মতুংইন্না হৌখিবা কুমজা ২০১৭ তগী চৎলিবা চহী অসি ফাওবগী মনুঙদা মণিপুরগী চীংগী অপূনবা এক ১৫,৪০০ দা পোপি পাম্বীশিং থারে হায়রি।
সোর্স: হুইয়েন লানপাউ ।
0 কমেন্ট:
কমেন্ট তৌবিয়ু