লৈমপোকপম রঞ্জিতা দেবীদা নাইতিঙ্গল এৱার্দ খূৎশিন্নখ্রে
ইম্ফাল, মে ৩০ : লৈবাক অসিগী প্রেসিদেন্ত দ্রোপদি মুর্মুনা লেমপোকপম রঞ্জিতা দেবীদা নেসনেল ফ্লোরেন্স নাইতিঙ্গল এৱার্দ ২০২৫ খূৎশিন্নখ্রে। মনা অসিগীদমক্তা লৈবাক অসিগী নার্স ১৫ খনগৎপগী মনুংদা মণিপুরগী এল রঞ্জিতাসু অমনি।
কত্থোকপগা লোয়ননা মথৌদাং পাঙথোক্লিবা নর্সশিংগী থৌদাংবু শকঙবা ওইনা মিনিস্ত্রি ওব হেল্থ এন্দ ফেমিলি ওয়েলেফেয়ার, গবর্নমেন্ত ওব ইন্দিয়ানা পীবা নেসনেল ফ্লোরেন্স নাইতিঙ্গল এৱার্দ খূৎশিন্নবগী থৌরম ঙসি নিউ দিল্লীগী রাস্ত্রপতি ভবন্দা পাঙথোকখি।
লৈমপোকপম রঞ্জিতা দেবী বিষ্ণুপুর দিস্ত্রিক্তকী ওইনাম বাজারদগী থিংবাইজম হোমেন্দ্রো সিংহগী লোয়নবীনি। মহাক্কী মচা অহুম লৈরে। হৌজিক মহাক জেনিমসতা নাসিং সিস্তর (সিনিয়র নার্সিং ওফিসার) ওইনা লৈরি। ইন্সস্তিত্যুত অসিদা মহাক ২০০৬ তা স্তাফ নর্স অমা ওইনা থবক তৌবা হৌরকখি। মহাক আসামগী দাউন তাউন য়ুনিবার্সিতিদগী এম এসসি নর্সিং লোইশিনখি।
স্তেত অসিদা অহানবা ওইনা গবর্নমেন্ত হোস্পিতালদা মায় পাক্না কিদনি ত্রান্সপ্লান্ত তৌখিবগীদমক ২০২২ দা পাঙথোকখিবা ৭৬ শুবা ইন্দিপেন্দেন্সদেদা চীফ মিনিস্তরনা শকখঙবা ঊৎখিবদা মহাকসু য়াওখি। মহাক তি এন এ আইগী লাইফতাইম মেম্বর, দ নর্সিং তিচরস এসোসিএসন, ইন্দিয়াগী লাইফ মেম্বরশিপ ওইবদা নত্তনা জেনিমস নসের্স এসোসিএসনগী প্রেসিদেন্তসু ওইরি। নর্স অমা ওইনা রঞ্জিতানা হকশেলগা মরী লৈননা লৈবাক অমদি মালেমগী থাক্তা পাঙথোকপা ত্রেনিং অমদি সেমিনার কয়া মায় পাক্না শরুক য়াবদা নত্তনা ৱার্কশোপ অমদি সেমিনার কয়াদসু রিছোর্স পার্সন ওইদুনা লাক্লি।
মনা খূৎশিন্নবা থৌরম অদুদা হেলথ এন্দ ফেমিলি ওয়েলফেয়ার অমদি কেমিকেল এন্দ ফার্তিলাইজরগী য়ুনিয়ন মিনিস্তর জগত প্রকাশ নদ্দা, হেলথ এন্দ ফেমিলি ওয়েলফেয়ারগী মিনিস্ত্রি ওব সেত্ত অমদি মিনিস্ত্রি ওব আয়ুশকী মিনিস্তর স্তেত (ইন্দিপেন্দেন্ত চার্জ), প্রতাপ রাও যাদব অমদি হেলথ এন্দ ফেমিলি ওয়েলফেয়ার অমদি ফর্তিলাইরজরগী মিনিস্তর ওব স্তেত অনুপ্রিয়া পতেলসু শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু