আপডেট:
image

মণিপুরীদা হন্দোকপা লুইস গ্লুক-কি শৈরেং খরা – হন্দোকপাঃ হামোম প্রমোদ

[ লুইস গ্লুক ইউএসএগী নিউইয়র্ক ( এপ্রিলগী ২২, ১৯৪৩) শহরদা পোকই। অদুগা চাওরকখিবনা লোং আইল্যান্ড কৌবা পিকলবা টাউন মচা অমদনি। মহাক্কি ফজরবা মমিংদি লুইস এলিজাবেথ গ্লুক কৌজৈ, অদুবু সাহিত্যগী লমদা লুইস গ্লুক হাইদুনা ময়াম্না খংনৈ। গ্লুককী ইমুং মনুং আমেরিকাদা শুরোন অহুম মমাংদা ইমিগ্রেন্ট ওইনা লাকখিবনি। মহাক্কি মপাবুং ডেনিয়েল গ্লুক নিউইয়র্কতা পোকখি। ডেনিয়েল না মখোয়গী ইমুংদা অহান্বা পোক্পা আমেরিকান শুরোননি। মহাক্কি মপাবুংগী মপা মপুশিং হাঙ্গেরিয়ান ইহুদি নি। অমরোমদনা মহাক্কী মমা বিয়াত্রিশ গ্লুক রাশিয়ান ইহুদি ইমুংগী নিঙোলনি। লুইস গ্লুককি মপাবুং ডেনিয়েল সাহিত্য পামজবা লাইরিক য়াম্না পাম্বা অমসুং অইবা অমা ওইনিংবগী মঙ মঙজবা মীওই অমনি। অসোমদনা মমাইবেম্মা বিয়াত্রিস য়ুম্বুরেন্বি ওইনা লৈজরবসু ম্যাসাচুটসকি ওয়েলেসলি কলেজতা গ্রেজুয়েট লোয়শনখিবা নিঙোল অমনি। মহাক্কী অহলশিংনা অঙাং ওইরিঙৈদগী গ্রীক মিথকি লাইরিক য়াম্না পাহল্লকখি। অদুনা লুইস গ্লুককী শৈরেং দা গ্রীক পুরান অমদি মমাঙৈগী মীথ, পুৱারী, মৈহৌরোন য়াম্না তোইনা শীজন্নবা উবদা থোইদোকনা ঙকনিঙাই লৈতে।

নোবেল প্রাইজ ফংদ্রিঙৈদনা লুইস গ্লুক আমেরিকা, কানাডা অমসুং ইংল্যান্ড গী মরু ওইবা অমসুং মমল লৈরবা এওয়ার্দ কয়া ফংখ্রবা শৈরাংবা অইবিনি। ঐখোয়দা অনৌবা অমা নত্রগা ঐখোয়না খংদবা শৈরেং অইবি অমা ওইজরবসু ইংলিশ লোনগি শৈরেং পাম্বা মিয়াম্না খংনরবা মমিং লৈরিবা শৈরেং ইবা অইবি অমনি। প্রমান ওইনা হাইরবদা মহাক্কী ১৯৯৩ দা ফোংবা “ দি ওয়াইল্ড আইরিস ” কৌবা শৈরেং লাইরিক্কি তমক পুলিৎজার প্রা্ইজ ফংখি অমসুং ২০০৩ -২০০৪ খ্রী: মহাক আমেরিকাগী “পোয়েট লোরিয়েট” ওইখি। অসিনা তাকপদি আমেরিকাদা মহাক্কী শৈরেং ময়াম্না য়াম্না পানরবা অমসুং পাম্নরবা অইবি অমনি। অদুগী মথংদা ২০১৪দা ফোংখিবা শৈরেং লাইরিক ”ফেইথফুল এ্যান্ড ভার্চুয়াস নাইট” কি তমক অমুক ন্যাশনাল বুক এওয়ার্ড ফংখি। অমুক্কমুক ২০১৫ দা ইউ এস প্রেসিডেন্ট বারাক ওবামা না ন্যাশনেল হিউম্যানিটি এওয়ার্ড পিখি। অসুম্না নোবেল প্রাইজ ফংদ্রিঙৈদনা মমিং লৈরবা এওয়ার্দ ১২ (তরানিথোই)না লৈতেংখ্রবা অইবিনি। মহাক্কী পুল্লপ শৈরেংগী লাইরিক ১২ অমসুং ৱারেং খোমজিনবা লাইরিক অনি ফোংখিবা লৈরে। – হামোম প্রমোদ ]


 

End of Winter BY LOUISE GLÜCK

নিংথমথানা লোইরকপদা

 

লেংদনা লৈরিবা পৃথিবী, মুশুক মুরবা ঊশা- ্‌বাশাগী মোংশো মরকশিদা

মদোমতা হৌগৎলগা খংপ্রেক খংনা খোংলকই চেক্লা অমা।

 

তাইবং মপোকতা অমুক্কা পোকচনিংখি নংনা; নঙবু ঐনা অমুক পোকহনগনি

ঐগি পেন্দ্রবা পুন্সিগী তেংথাখোলনা, নংগী নুঙাই য়াইফরবা পুন্সি লম্বীদা

কৈদৌনুংদসু অপনবা পীখিবা লৈখিব্রনে?

 

পুংলুপ লুপশিন্দুনা য়েংজনীংখি

অমুক্তংদা অমমবা অমসুং অঙানবদা

খংজনীংবনা ঙাইঙমখিদে থম্মোয়নুংদা করি ফাওখিবা

 

নঙ করিগুম্বা অনৌবা পোৎশক অমগুম, নদোমতা

ফোংদোকনীংখি মীয়াম মাংদা

 

থৌনা লিংজেল পুম্নমক, নংগী হরাও তয়াম্বা পুম্নমক

 

খনখিবা লৈরম্মোয় কৈদৌনুংদসু

অসিনা মরম ওইদুনা অসুম্না লমন শিংগনি হায়বা

নঙনা কৈদৌনুংদসু কল্পনা তৌরম্মোয় ঐগী মেংলবা খোঞ্জেল

নংগী থম্মোয়নুংদগী থোকলকপা শরুক অমা নত্তনা করিসু নত্তে–

 

অতোপ্পা মালেম অদুদা নংনা মহাক্কি খোঞ্জেল অমুক হন্না তাবা ফংলরোই

ময়েক শেংনা ফংলরোই কৈদৌনুংদসু

চেক্লাগী খোঞ্জেলদা নত্রগা মীওইবগী তেংথাখোল ওইনা,

 

ময়েক শেংলবা খোঞ্জেল নত্তে, চুম্নগী

খোল্লাউ খোঞ্জেল পুম্নমক্কী

লেপ্পা নাইদ্রবা খোন্থাং

মদুগী পান্দমদি বিদায়, বিদায় –

 

তৎনবা য়াদ্রবা লংলা লংজিন অমনা

পুনশিনবরে ঐখোয় অনীবু মফম অমত্তদা।

 


 

Happiness BY LOUISE GLÜCK

                    নুঙাইজবা

 

নুপা অমা নুপী অমা ওন্ন থোইনা শান্নরি

ঙৌশোক ঙৌরবা ফমুং, তুম্বা য়াদ্রবা অহিং ।

নুঙাল্লক্কদৌরে, মখোয় অনি

হৌগৎকে হায়রনি ঙাহাক লৈরগা ।

ফমুংগী নাকনদা নোকফেৎ তৌদুনা লৈরি থম্বান চরোং

ফজরবা লীক্লিগী গ্লাস অমদা; ঙ্রাঙ্রানরবা নুমীৎকী মঙাল

হৈথরক্লি মখোয় অনিগী ঙকশম য়ৌনা।

নুপা অদো তপ্না য়েংলকই

মহৌশাগুম কৌরকই শোন্থাংননা, চান্নবী

থোংনাউদা খনবা ফিজি নোম্লি নোম্লি

কদোমদগীনো চেক্লা খরা খোংলকই

অমুক, অনীরক

অমসুং মমাই ওনশল্লকই নুজা মহাকসু, মহাক্কি

হকচাং কয়াৎ পুম্বা ওমচাকনহল্লি নুপাগী শারবা নুংশ্বাস্বর ।

 

মীৎ পাংথোকতুনা য়েংঙি ঐনা: নংসু য়েংলম্মী ঐবু ।

নুঙাল্লকপগী নুমীৎ, নংগী ফজরবা মঙালনা

ইমুং মঙ্গোল কোইথুং থুংলম্মি।

ঐনা নঙগী মায়থোং অদুবু য়েংলম্মী

মীংশেলদা উরম্মী ঐগী মায়থোঙতবু।

চপ লেপ্তুনা লৈরম্মী ঐখোয় পুম্নমক: তৌবতবু

ঐখোয়গী কোরৌদি নুমীৎ নংতদি

লান্থোক্তুনা চৎলম্মী ঐখৌয়বু, মঙাল পুম্বা শন্দোক্তুনা।

 



 

The Wish BY LOUISE GLÜCK

 

      নিংজবা

 

নীংশিংলিব্রা নঙবু খরনি মমাংদা

করিনো নঙনা নীংজখিবা, অপাম্বা অমা লৈরে হাইখিবদো?

 

ঐগী পামজবদি ময়াম্মনি, নীংজবসু ময়াম`মা লৈজৈ ।

 

নহান ঐনা নঙোন্দা কুরাক অমগি মরমদা

মীনম্বা ্‌বাহৈ কয়া হাইখি।

মতম পুম্বদা চাঙকনখি ঐ

নহাকনা পামজরিবসি করিনো হায়না।

 

ঐনা নীংজরিবা পামজরিবাসিদি করি ওইরমগনি নহাক খঙলব্রা?

 

খঙদেদা ঐসু। হল্লকনিংঙম্বনি ননাক্তা অমুক।

খঞ্জরম্বনি নোংমা নত্রগা নোংমদি

ঐখোয় অনি থুংনগনি, লৈমিন্নগনি অরোয়বদা অরোয়বা মতমদুদা।

 

তৌবতবু ঐনা পামজখিবদি অদুখক্তনি

মতমপুম্বদা ঐনা নীংজদুনা লাকচখিবদো।

ঐদি শৈরেং অমখক্তংগা পামজখিবনি।

 

 

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: