মনিপুরগী মেটরিয়েল কলচর য়োকখৎপদা ইনোৎ হাপ্লিবা সনসম বীরেন্দ্রগী লাইরিক ‘খুৎহৈবলক্তগী’
লাইরিক্কী মমিং- খূৎহৈবলক্তগী (২০১৩)
অইবাঃ সনসম বীরেন্দ্র সিংহ
অফোঙবাঃ থোকচোম নিংঙোল সনসম ওংবী রাধেশ্যাম দেবীনা
সরদা ত্রান্সলেসন্স এন্ড পব্লিসিং গ্রুপকীদমক
লাইরিক্কী মখলঃ পুন্সি ৱারী খোমজিনবা
লাইরিক্কী মখুমঃ দাঃ মখোণমনি মোংশাবা
লাইরিক্কী মমলঃ লুপা ৫০০/-
লমায় মশিং- ১৫৩
লাইরিক অসিগী অনীশুবা খুৎহৈবগী পুন্সি ৱারী পরিংদা য়াওরিবা নুঙবী চাফূগী খূৎহৈবা মচিহান সসাগী ৱারী য়াম্না চংখোল্লি। নুঙবী চাফূগী মমিং তাদবা মী লৈরম্লোই। মৈতৈশিংনা থাজনবগী মতুং ইন্না নুঙবী খূল্লেন্দা নুঙগী মপী মপা লৈ হায়না থাজনৈ। তাংখুলশিংনা নুঙবীবু ‘লোংপী’ হায়না খঙনৈ। মচিহান সসাগী অহল লমণশিংনা হায়রিবা চফু শাবগী আর্ত অসি মাংহন্দনা য়োকখৎতুনা লাকপনা সসানা অমুক খুৎহৈবা ওইরকনবগী মরম ওইরি। ‘ব্লেক পোট্টরিগী খ্বাইদগী মগুন লৈরবা নুঙবীগী চফূ অমদি পোত্থোকশিংনা মালেমগী কৈথেলদা পাম্না লৈনরকপা অমদি হেন্না শিজিন্নবগী পাউদম তাবদা য়াম্না চাওথোকচনিংঙাই ওই। মচিহান সসানা অসুম্না লেপ্তনা পুথোক্লিবা পোত্থোকশিং অসিনা ভারতকী মফম কয়াদা পাঙথোকপা ক্রাপ্স মেলা কয়াদা শরুক য়াবা লাকখিবা মীওইশিংগী পূকনিং চিংশিনখি। অসিগুম্বা তোপ তোপ্পা খুৎহৈবগী পোত্থোক অসিবু শকখঙবা ওইনা ভরত সরকারনা ২০০৯-১০ দা ‘শিল্প গুরু’ মনা পীদুনা ইকায়খুম্নখি।
সনসম বীরেন্দ্র সিংহ
কলচর হায়বসিনা কোনশিল্লিবা হীরমশিং অসি য়াম্না পাক চাওখ্রে। ৱাহৈ খরদা মসিগী ৱাহন্থোক লোয়না ইবা ওইথোক্তে। মীওইবনা হেক মালেমসিদা খুন্দারকঙৈদগী মৈহৌরোলদগী হৌনা কলচর হায়বসি লোয়নদুনা লাক্লি। মালেমগী তোঙান তোঙানবা মফম কয়াদা খুন্দাদুনা লৈরিবা শক চু মান্নদবা, লাইনিং লাইশোল তিন্নদবা কয়ানা মাগী মাগী লৈরুরিবা মহৌশা অকোয়বগী ফিভম্না অমদি মফম অদুদা ফংলিবা পোত্থোকশিংতনা হিংনবা হোৎনরকখিবা থৌওং কয়ানা মথং মথং ইথিল পিদুনা মখল মখা কয়াগী লমদা শিজিন্নবা পোৎলমশিং শেম শান্নরকখি। মাগী মাগী কাংলুপ ফুরুপকি ওইবা তোপ তোপ্পা খুৎশাহৈবগী পোত্থোক কয়া লৈরি। হায়রিবা পোত্থোকশিং অসিগা শাগোন্নবা ৱারী কয়াসু মরাং কায়না লৈরি। অসিগুম্বা হেন্দলুম অমসুং হেন্দিক্রাপ্সকি ওইবা লমসিদা থোইদোক হেন্দোকনা মমল নাইদ্রবা খুদোল তৌরবা মীওই কয়া মনিপুরগী লোইজিং লোয়া কয়াদা লৈরি। সোসিয়োলোজি, এন্থ্রোপোলোজিগী ওইবা মীৎয়েংদা য়েংলুবদসু অসিগুম্বা খুৎশা হৈবগী পোত্থোকশিং অসিগা মনিপুরগী লৈরিবা ফুরুপ কাংলুপ কয়াগী মীওইশিংগী হৌরক ৱারীগা তৎন-থানবা য়াদ্রবা মরি অমদি লৈরি। ঙসিসু মমিং লৈরবা শিননাইবা কয়ানা মনিপুরগী খুৎশা হৈবগী পোত্থোক্তনা মালেমদা মনিপুর মশক তাক্লি। নীংশিংবা থোক্ত্রবা মতমদগী হৌনা লমদমসিদা ফংবা মহৌশাগী পোৎলমতনা হিংবদা চংদ্রবা য়াদ্রবা পোৎলম কয়া শাদুনা অমদি শিজিন্নদুনা লাক্লি। অসিগুম্বা খুৎশা হৈবগী পোত্থোকশিং অসিদা য়াওদুনা লাক্লি মীওইবগী পুৱারী। মসিদা শাগোন্নদুনা চৎলি খুনাইলোন, শেন্মিৎলোন অমদি হৈথোই শিংথোইবা কয়াগী পুন্সি ৱারীসু পাউদম্লি।
মনিপুরদসু খুৎনাইবা কয়া লৈরি। লেপ্পা লৈতনা মখোয়গী হুমাংমলতনা খুনাইগী শেনমিৎলোন্দা চাওনা মতেং পাংদুনা লাক্লি। অহল লমন হাক্তকতগী খুৎনাইবা ওইদুনা লাক্লবা কয়াসু ঙসিসু অদুমক লেপ্তনা মপা মপুনা পায়রম্বা শিনফম থাদোক্তনা হোৎনবা কয়া লৈরি। অদুবু হায়রিবা শিনাইব অমদি খুৎহৈবা মীওই কয়া অমদি শকখঙবীদনা পুন্সি লোমখিবসু য়াওদবা নত্তে।
অইবা সনসম বীরেন্দ্রনা থৱায় য়াওনা হোৎনদুনা খুৎহৈবা কয়াগী পুন্সি ৱারী, মখোয়না ইরমদম অসিগী ক্রাপ্সকি ওইবা পোত্থোক কয়া পুথোক্লিবা অসিদা হকথেংনা থিজিন্দুনা থোইদোক হেন্দোকনা লম সিদা শকনাইরবা মীওই ২৪গী মরমদা মরিক চুম্না ইরকপসি চাওরবা খুদোল অমনি।
সনসম বীরেন্দ্র সিংহ ইরেংবম খুঙ্গংদা লৈবা সনসম কোন্দুম অমদি অঙৌবী দেবীগী মপারী ওইনা ১৯৫৪দা তাইবঙ খোঙদারকখি। খুঙ্গংদা লাইরিক তম্লকখি। দি এম কলেজতগী বি এ লোইশিনখি অমদি এল এম এস লো কলেজদা লো তমখি। মহৈরোই ওইরিঙৈদা দিবেতিং কম্পিতিসন কয়াদা শরুক য়ারকখি। পি আই বিদা মতম খরা থবক তৌরমখি। ২০০১দগী ২০০৪ ফাওবা দিপ্যুতেসন্দা ভরত সরকারগী খাদি এন্ড ভিলেজ ইন্দস্ত্রিজ কম্মিসন স্তেট ওফিস, ইম্ফালদা এসিস্তেণ্ট দাইরেক্টর ইন-চার্জ ওইনা থৌ পুদুনা মনিপুরদা খাদি এন্ড ভিলেজ ইন্দস্ত্রিজ চাওখৎনবা য়াম্না কন্না হোৎনদুনা লাক্লি। হৌখিবা চহী খরসিদা মনিপুরদা মীওই কয়ানা এন্ত্রেপ্রেন্যুয়র ওইনা মশানা মশাবু থবক পীনবা হোৎনরকপা অমদি থবক ফংদবগী অৱাবা অদু খরমখৈ কোকনবা লৌখৎলকপা খোঙথাংশিংদা অইবা বীরেন্দ্রনসু মহাক্কী মায়কৈদগী অঙম্বা মতেং কয়া পাংদুনা লাক্লি। লমদম অমা চাওখৎনবা হোৎনবদা ইন্দস্ত্রিজনা লৌরিবা থৌদাং অমদি মসিগা মরি লৈনবা হীরম কয়াদা ১৯৮৬তগী হৌনা হৌজীক ফাওবদা ওল ইন্দিয়া রেদিও ইম্ফালদা টোল্ক ৮০ হেন্না ঙাংদুনা শন্দোকখিবা লৈরে। মশামক ইস্কোনগী লাইফ মেম্বরনি। মনিপুরদা লৈবা সাহিত্যগী লূপ কয়াগীসু মেম্বর ওইরি অমদি য়াম্না পামজনা শৈরেং, ৱারেং ইদুনা নুংতিগী ফোঙবা পাউচেশিংদসু হাপ্তুনা লাক্লি। অইবনা পামজবদি পুন্সিদা খুনাইগী য়াইফনবা করিগুম্বা খরদং খুদোল তমলম্বদুনি। অইবা অসি খুঙ্গংগী পুন্সিদা চাওরকখি। খুঙ্গংদা লৈবা মীওইশিংগী অৱাবা পুন্সিগী মশক মমূৎ তানা খঙই। লাইরিক অসিদা শিজিন্নরিবা ৱাহৈশিং য়াম্না থোৎ-মেংনা চংখোল্লি।
মনিপুর মীয়াম্না অমদি মপাল লমদফাওবা থোইদোকনা মমিং য়াম্না চৎলিবা রানি ফি পুথোকখিবী খূৎহৈবী চুংখাম রাণীগী মরমদা য়াম্না মরিক চুম্না ইবা পুন্সি ৱারীনা অহানবা ওইদুনা ফোটোগ্রাফকা লোয়ননা ইরি।
অনীশুবা মালেমগী লাঞ্জাও মমাং ফাওবদা লৈকাই লৈকাইদা নুপীশিংনা অমদি লৈশাবীমচাশিংনা ‘শিন্নাইফম’ দা লাক্তুনা ফিশা-লোনশা তৌনরম্বগী চৎনবী অমদি নুংশিনরবা কম্যুনিতি লাইফকী মশক ফজনা ইরি। তেন্তকনা ইরি কমদৌনা পাংয়োংদা ফি শাবা হৌদোকখিবা, খ্বাঙ ইয়োংদা ফি শানরম্বা, লৈকাই খুদিং, য়ুম্থোং খুদিংদা লৈরম্বা ৱার্ক কলচরগী শক্তম ময়েক লানা ইরি। ‘মুগা ইন্নফি লাকয়েন তাইবীদা সনা মচুনা লমথাং খুৎহৎ হৎপা ফি’গী সেম্পল অমা থাগৎপদা, মনিপুর লৈঙাক্কী কমমর্স এন্ড ইন্দস্ত্রিজ দিপার্তমেন্টনা খুৎহৈবশিংবু স্তেটকি থাক্তা পীবা লেমজনিংঙাই ওইরবা মনা চুংখাম রাণীদা পীদুনা ইকায়খুম্নখি। নেস্নেল থাক্তা পাঙথোকপা খুৎহৈবশিংগী নেস্নেল এৱার্দকি চাংদম্নবদা রাণীদা লেমজনিংঙাই ওইরবা নেস্নেল মেরিট এৱার্দ পীখি অসিতসু নত্তনা মনা কয়া মথং মথং ফংখিবগী নুংঙাইরবা অমদি নুংশিরবা ৱারী কয়া য়াওরি। অসিগুম্বা শিংথানিংঙাই ওইরবা ইয়োংগী ফি শাদুনা ফজরবা পোত্থোক কয়া পুথোক্তুনা লমদম অসিগী নুপী ওইবী কয়াবুসু থৌনা হাপ্লিবা চুংখাম রাণীদা মনিপুর সাহিত্য পরিষদ, ইম্ফালনসু খুৎনাইবী অসিগী মফমদা ‘শিল্প ভূষণ’ ২০১০ পীদুনা ইকায়খুম্নখি।
চুংখাম রাণীদি লৈখিদ্রে অদুবু মহাকনা পীরম্লিবা খুদোলদি মপাল নাইদে। মনিপুরগী তোঙান তোঙানবা মফম কয়াদগী লাকপা নুপীমচা ১০০০রোমদা আর্টিস্তিক তেক্সতাইল্গী লমদা মহাকনা তাকপী তম্বীরম্বগী পাউদমসু য়াওরি লাইরিক অসিদা। হেন্না নুংঙাইরিবদি রাণীনা তাকপী তম্বীরম্বা নুপীমচাশিংগী মরক্তা মখোয় মরীদি স্তেটকী এৱার্দ ফংখিবা য়াওরি। হীরম অমদা ওজা ওইরিবা মীওইশিংগী খ্বাইদগী কাওঙমদবা অদুগা নুংঙাইবা মীকুপ অমা হায়রগদি মীওই অদুনা তাকপী তম্বীখিবা মহৈরোই অদুনা মীয়াম্না মশক খঙলক্তুনা মনা কয়া ফংলকপা মীকুপ অদুনি হায়না লৌদবা ঙমদে।
লাইরিক অসিগী অনীশুবা খুৎহৈবগী পুন্সি ৱারী পরিংদা য়াওরিবা নুঙবী চাফূগী খূৎহৈবা মচিহান সসাগী ৱারী য়াম্না চংখোল্লি। নুঙবী চাফূগী মমিং তাদবা মী লৈরম্লোই। মৈতৈশিংনা থাজনবগী মতুং ইন্না নুঙবী খূল্লেন্দা নুঙগী মপী মপা লৈ হায়না থাজনৈ। তাংখুলশিংনা নুঙবীবু ‘লোংপী’ হায়না খঙনৈ। মচিহান সসাগী অহল লমণশিংনা হায়রিবা চফু শাবগী আর্ত অসি মাংহন্দনা য়োকখৎতুনা লাকপনা সসানা অমুক খুৎহৈবা ওইরকনবগী মরম ওইরি। ‘ব্লেক পোট্টরিগী খ্বাইদগী মগুন লৈরবা নুঙবীগী চফূ অমদি পোত্থোকশিংনা মালেমগী কৈথেলদা পাম্না লৈনরকপা অমদি হেন্না শিজিন্নবগী পাউদম তাবদা য়াম্না চাওথোকচনিংঙাই ওই। মচিহান সসানা অসুম্না লেপ্তনা পুথোক্লিবা পোত্থোকশিং অসিনা ভারতকী মফম কয়াদা পাঙথোকপা ক্রাপ্স মেলা কয়াদা শরুক য়াবা লাকখিবা মীওইশিংগী পূকনিং চিংশিনখি। অসিগুম্বা তোপ তোপ্পা খুৎহৈবগী পোত্থোক অসিবু শকখঙবা ওইনা ভরত সরকারনা ২০০৯-১০ দা ‘শিল্প গুরু’ মনা পীদুনা ইকায়খুম্নখি।
ঙল্লৈঙৈ মতমদগী হৌনা মনিপুরদসু তোঙান তোঙানবা শিণফমদা থবক তৌবা মীওইশিংগী মাগী মাগী য়ুম্নাক পীদুনা থবক তৌনরমখি। হায়রিবা থৌওং অসি হৌজিকসু অদুমক লেপ্তনা তৌনরি। মপা মপুনা পায়রম্বা শিনফমদা হেন্না পাকথোক চাওথোকনা থবক তৌদুনা শেন্দাল লম্বীদা মায় পাক্লবা কয়াসু লৈরি। সনা শুবগী থবক অসি কঙাবম, কৈশাম অমদি তৌরাংবমনচিংবনা তৌনরম্মী হায়না অইবনা পুৱারী মতেক অমসু হাপলি। অসিগুম্বা সনা শাবগী শিনফমদা মায় পাক্লবী কোন্সম ইবেমচাগী ৱারী য়াম্না পুকনিং লৌশিং ওই। সনানা খাম্বী মৈনুংদা ইক্লিবামখৈ সনাগী ময়েক শেংবা হেল্লকই হায়বদুমকনি। কোন্সম ইবেমচা দেবীনা শাবা ‘কিয়াম লীকফাংগা কোন্নবা সেট অমা’ নেস্নেল এৱার্দকি চাংদম্নবা য়াওদুনা লেমজনিংঙাই ওইরবা জ্বেলরি ক্রাপ্সতা নেস্নেল এৱার্দ ফংবা অহানবা ক্রাপ্সপার্সন ওইখি। হোৎনবা কনবা অখাং কনবগী মচূণা লোক্লবা পুন্সি ওইনা অপাবশিংদা পুকনিংগী থৌনা কয়া হাপ্লি লাইরিক অসিনা। মরু ওইনা নুপীশিংনা য়ুমগী কুপ্নোমদগী হেন্দোক্তুনা তৌরিবা মপাল নাইদ্রবা থোইদোক হেন্দোকপা খুদোল অদুগী ময়েক লারবা শক্তম্নি।
অসুম্না লাইরিক অসিদা য়াওরিবা খুৎহৈবশিংদি লাইশোম রাধামণি দেবী, অনচা মরিং, ক্ষেত্রিময়ুম ইবোয়াইমা সিংহ, লৌরেম্বম বীনো দেবী, কোন্সম কুঞ্জরাজ সিংহ, ওইনাম মঙ্গি সিংহ, মনোহরময়ুম বোনেশ্বরি দেবী, হাফিজ সফাউদ্দিনি, অখোম ইবেতোম্বী দেবী, নিঙোম্বম নৱাং সিংহ, খোংবানতাবম থোইবী দেবী, ওইনাম ব্রোজেন্দ্রো সিংহ, অহৈবম গোপেশ্বর সিংহ, ওইনাম শ্যামা দেবী, তাওরেম সনাহল সিংহ, নিংথৌজম হেমোলাতা দেবী, শমজেৎশাবম ইবোমচা সিংহ, খোমদ্রাম সুমিলা দেবী, ফুরাইলাৎপম প্রেমানন্দ শর্ম্মা অমসুং মাইকেল মীতৈ য়াওরি।
পুন্সি ৱারী লাইরিক ওইনা অমমমতা ওইনা হেন্দোকনা মপুং ফারগদবা শকনাইরবা খুৎহৈবা ২৪ অসিগী মায় পাক্লকপগী নুংশিরবা অমদি নুংঙাইরবা ৱারীশিং অসি মরি লৈনবা দিপার্টমেন্ট অমসু ওইরিবা কমমর্স এন্ড ইন্দস্ত্রিজনা অমদি লৈঙাকনা মতম চানা দোক্যুমেন্টরি ওইনা লৌশিন্দুনা থম্বসু হেন্না তুংগী মীরোলদা কান্নগনি। পুয়াগী রেফরেন্স কয়া য়াওরিবা, ইথনিক কম্ম্যুনিতি কয়ানা হৌজীক ফাওদা পুথোক্তুনা শেৎলি ইল্লিবা অমদি লাইনিং লাইশোল্গা মরি লৈনবা পোৎলম কয়া অসিবু হিংহল্লিবা খুনাইবশিংগী ৱারীদি লাইরিক অসিনা শৈহৌ ওইদুনা অতোপ্পা আর্টিসিয়ান কয়াগীসু অমুক মখা ইথরক্তুনা খূৎনাইবশিংগী ৱারীনা হৌরক্লিবা মীরোলদা থবক শুনিং নোম্নিংবা অমদি ৱার্ক কলচর অদু লেপ্না ইথিল পীবা ওইসনু।
লাইরিক অসি ঙসিগী মীরোলনা পাবদা হেন্না খুদোংচানবা মৈতৈ ময়েক ইদিসন অমসু অথুবদা পুথোকলক্লবদি হেন্না নুংঙাইগনি। মনিপুরগী শেনমিৎলোন্দা খুৎনাইবা কয়ানা মীপান তাংদনবা হায়দুনা পুথোক্লিবা পোত্থোকশিং অসি পুম্নমকনা পুকনিং থৌগৎনিংঙাইনি। লাইরিক অসি মনিপুরগী য়ুম্থোং খুদিংগী লাইরিক পাফমদা থমহননিংই। লাইফ স্কিল ওইনা তাকপী তম্বীবদা স্কুল সিলেবস্তা হাপলবসু হেন্না মহৈ য়ানগনি।
0 কমেন্ট:
কমেন্ট তৌবিয়ু