আপডেট:
image

২০২০গী সাহিত্যদা নোবেল ফংলবী আমেরিকাগী কবি লুইস গ্লুক অমসুং মহাক্কী শৈরেং

লুইস গ্লুক ইউএসএগী নিউইয়র্ক ( এপ্রিলগী ২২, ১৯৪৩) শহরদা পোকই। অদুগা চাওরকখিবনা লোং আইল্যান্ড কৌবা পিকলবা টাউন মচা অমদনি। মহাক্কি ফজরবা মমিংদি লুইস এলিজাবেথ গ্লুক কৌজৈ, অদুবু সাহিত্যগী লমদা লুইস গ্লুক হাইদুনা ময়াম্না খংনৈ। গ্লুককী ইমুং মনুং আমেরিকাদা শুরোন অহুম মমাংদা ইমিগ্রেন্ট ওইনা লাকখিবনি। মহাক্কি মপাবুং ডেনিয়েল গ্লুক নিউইয়র্কতা পোকখি। ডেনিয়েল না মখোয়গী ইমুংদা অহান্বা পোক্পা আমেরিকান শুরোননি। মহাক্কি মপাবুংগী মপা মপুশিং হাঙ্গেরিয়ান ইহুদি নি। অমরোমদনা মহাক্কী মমা বিয়াত্রিশ গ্লুক রাশিয়ান ইহুদি ইমুংগী নিঙোলনি। লুইস গ্লুককি মপাবুং ডেনিয়েল সাহিত্য পামজবা লাইরিক য়াম্না পাম্বা অমসুং অইবা অমা ওইনিংবগী মঙ মঙজবা মীওই অমনি। অসোমদনা মমাইবেম্মা বিয়াত্রিস য়ুম্বুরেন্বি ওইনা লৈজরবসু ম্যাসাচুটসকি ওয়েলেসলি কলেজতা গ্রেজুয়েট লোয়শনখিবা নিঙোল অমনি। মহাক্কী অহলশিংনা অঙাং ওইরিঙৈদগী গ্রীক মিথকি লাইরিক য়াম্না পাহল্লকখি। অদুনা লুইস গ্লুককী শৈরেং দা গ্রীক পুরান অমদি মমাঙৈগী মীথ, পুৱারী, মৈহৌরোন য়াম্না তোইনা শীজন্নবা উবদা থোইদোকনা ঙকনিঙাই লৈতে।


 

ইউ এস এ ‘গী প্রসিদেন্ট বারাক ওবামা অমসুং লুইস গ্লুক

 

অমরোমদনা লৈশাবী পুংকক ফারকপা হাইবদি টিনএজ মতমদা লুইজ গ্লুক অ্যানারোক্সিয়া নারভোসা (Anorexia nervosa ) কৌবা ৱাখল লায়না মখল অমা নাখি। লায়না অসিগী পান্দমদি মশা মদোমতা নোয়থোকচরে খঞ্জবা, মশাবু মশানা শক থিজরে খঞ্জবা অমসুং মদোমতা লায়না অসিনা মরম ওইদুনা চাব থকপা য়াদবা, করিমতা চানিংদবা অমসুং নোংম নোংমা অসুম করিমতা চারকতবাদগী অসুম শোন্থরকপা, শিবা য়াবা ফাওবা ওইরকপা য়াবগী ফিভম অদু লাকখিবা য়াওনখি। মসিনা মরম ওইদুনা ঙল্লিঙৈ মতমদা ৱাখলগী লায়না য়েংবা ডাক্তর – সাইক্রিয়াটিষ্ট (Psychiatrists) অমগী মখাদা লাইয়েংখি অমসুং সাইকো-এনালাইসিস থেরাপি চৎথখি। হিরমসি পনবগি মরমদি লায়না অসিনা মরম ওইদুনা লুইস গ্লুক নুঙতিগী চৎলম্বা স্কুল থাদোকখি, ফরমাল এডুকেশনদগী খরা লাপথোকখি অমসুং চুম্নগী টেক্সটবুক পাবগী মহুৎতা শৈরেং ইবা পাবগী লমদা ঙন্না খোং থাংজনখি । কবিতা য়াম্না পাব ফংখি, অমসুং কবিতা ইবা হৌখি, মতমদুদা শৈরেংদা ছন্দ হাপ্পা হৌখি। লায়না অদুগী মরমনা মহাক্কী হকচাং- ৱাখলদা অয়েৎপা কয়া পিখিদবদি নত্তে। চহি তরেৎমুক সাইকো-থেরাপি তৌবা তাখি অমসুং স্কুল কাদুনা লাইরিক তম্বা ঙমখিদে। তৌববুদি রিগুলার ক্লাশ তৌবা য়াদ্রবসু সারাহ লরেন্স কলেজ (Sarah Lawrence College) তা শৈরেং ইবগী মথকতা চয়োল কয়াগী ক্লাশ অমাদা শরুক য়াখি। ১৯৬৬ ফাওবা কলম্বিয়া স্কুল ওব জেনারেল স্টাডিজ কৌবা ওয়ার্কশপ পোগ্রাম অমদা মীং চনখি। ফরম্যাল ডিগ্রী লৌদবা মহৈরোয়শিংদা পিবা ডিগ্রী অমা ফংখী। কলম্বিয়া ইউনিভার্সিটিগী কোর্স অদুদা আমেরিকাগী পোয়েট লোরিয়েট ( Poet Laureate) মীংথোন ফংলবা লিওনি এডাম (Leonie Adams) অমসুং স্ট্যানলি কুনিজ (Stanley Kunitz) কৌবা মতমদুগী মমিং লৈরবা আমেরিকাগী কবি অনিবু মহাক্কী ম্যান্টর ওইনা ফংনখি। মহাক্ন ঙসিগী মমীং লৈরবা কবি অমা ওইরকপদা ওজা অনিসিগী শিংঙমলোইদ্রবা তেংবাংননী হাইদুনা লুইস গ্লুকনা মিয়ামদা ফোংদোকপা ইন্টারভিয়ু কয়াদা হন্না হন্না হায়খিবা থেংনৈ। লুইজ গ্লুকনা মতমদুদা মাদমোয়াজেল ( Mademaoiselle), পোয়েটরি(Poetry), দ্য নিউ ইয়র্কার(The New Yorker) , দ্য অ্যাটলান্টিক মান্থলি(The Atlantic Monthly), দ্য ন্যাশন (The Nation)কৌবা চেফোং কয়াদা মহাক্কি শৈরেং কয়া ফোংবিনবা থাজনখি অমসুং ফোংখি।


 

নৌনা শৈরেং ইবা হৌরকপা মতমগী লুইস গ্লুক

 

লাইবক থিবদি, কলম্বিয়া ইউনিভার্সিটিগী ডিগ্রী অদুসু মহাক্না লোয়শনবা ঙমখিদে। মথংদা অফিস অমগি সেক্রেটরী ওইনা থবক মচা অমা চংখি। অদুবু শৈরেং ইবদি লেপখিদে। মহাক্কী অহানবা শৈরেংগী লাইরিক `ফাষ্টবর্ন ` ( Firstborn, ১৯৬৮ খ্রী:) কৌবা অমা ফোংখি । শৈরেং লাইরিক অদু ময়াম্না য়াম্না পাম্নখি। অদুদগী অমুক চহী অহুমলোম শৈরেংনা চিংবা করিমতা ইখিবা ঙমখিদে। অদুগা ১৯৭১ খ্রী: দা অমুক ভারমোন্ট (Vermont ) তা লৈবা গর্ডন কলেজ (Goddard College) তা সাহিত্যগী ওজা ওইনা থবক তৌবা হৌখি অমসুং ইনৌ নৌনা শৈরেং কয়া ইখৎপা হৌখি। অইবা অসিনা তুংদা অদুগী মতমদা ইবা শৈরেং ময়াম অদু খোমজিল্লগা ‘দ্য হাউজ অন মার্সল্যান্ড` (The House on Marshland) কৌবা মহাক্কি অনিসুবা শৈরেংগী লাইরিক অদু ১৯৭৫ ইং দা ফোংখি। শৈরেং লাইরিক অদুদা মহাক্কী ইতোপ তোপ্পা খোন্থোক অমা শৈরেং পামজবা ময়াম্না তাজবা ফংখি। শৈরেং নৈনবা ক্রিটিক শিংনসু য়াম্না থাগৎনরকখি। পনবা য়াবা অমনা ১৯৭৩ ইং দা মহাক্কী মচানিপা অহল নোহা (Noah) পোকখি। আমেরিকাগী মমিং লৈরবা অইবা জোন ড্রানো (Jonn Dranow) মহাক্কী অনিশুবা মপুরোইবনি। মখোয় অনিগী অহান্বা ফংজবা মচানিপানি। অদুগি মমাংদা লুইস গ্লুক না অহানবা ওইনা লুহোংখিবদি ( ১৯৬৭ ইং) চার্লস হার্টস জুনিয়র (Charles Hertz Jr.) কৌবা নিপা অমগনি, অদুগা মখোয় অনি কোন্নথংদা ডিভোর্স তৌদুনা তোঙান্নখিবনি। মতুঙদা লুইজ গ্লাক মহাক্কা কলেজ অমত্তদা ওজা ওইবিনখিবা জোন ড্রানোগা য়ুম পানখিবনি।


 

মহৈরোয় অমা ওইনা লুইস গ্লুক

 

চহী মঙা মতুংদা মহাক্কী অহুম শুবা শৈরেং লাইরিক ‘দিসেন্দিং ফিগর’ (Descending Figure) ১৯৮০ ইং দা ফোংখি। শৈরেং লাইরিক অসিগি তমক মহাক্পু সাহিত্যগি ক্রিটিক ময়াম্না মায়কৈ অমরোমদনা য়াম্না থাগৎনরকখি, তৌইগুম্বসুঙ ক্রিটিক খরনদি লাইরিক অদুদা য়াওবা শৈরেং খরগী য়াম্ন কন্না ক্রিটিসাইজ তৌরকখি। মরু ওইনা মহাক্কী লাইরিক অদুদা য়াওবা দ্য ড্রাউন চাইল্ড (The Drownend Children) কৌবা শৈরেং অদুবু `অঙাং তুক্কৎচবা তাথিনা ‘ তৌবা (child hater) মীওই অমনি হাইদুনা আমেরিকাগী কবি, অইবা অমসুং মমিং লৈরবা ক্রিটিক গ্রেড কুজমা (Greg Kuzma) না মহাকপু মরাল শিরকখি। তৌবতবু আমেরিকাগী সাহিত্য পামজবা শৈরেং নুংশীজবা অয়াম্বনদি লাইরিক অসিবু তরাম্ন ওকখি। নুঙাইতবা হাইববু চহী অদুমকতদা মহাক্কী ভারমোন্ত তা লৈজবা ময়ুম অদো মৈ না চাকখি অমসুং মহাক্কি লৈজবা মমল লৈরবা পোৎচৈ কয়াসু য়ুম মৈ চাকপা অদুদা য়াওখি। লুইস গ্লুক মথম্মোয় য়াম্না নুঙাইখিদে, অদুগী মতমদা থোকখিবা নুঙাইতবা থৌদোক কয়াগী মমি মহাক্কী তুংদা ফোংলক্পা শৈরেং লাইরিক শিংদা মমি তাখি। মহাক্না মথম্মোয় নুঙাইতবা মতমদা শৈরেং কয়া ইদুনা পুক্নিং থম্মোয় পোত্থাখি। মতমদুদা ইখিবা শৈরেং পুম্নমক খোমজিন্দুনা, মহাক্কি মরিশুবা শৈরেং লাইরিক ১৯৮৫ ইং দা ‘দ্য ট্রায়াম্প অব একিলিস’ (The Triumph of Achilles) মীংথোন্দুনা পুথোকখি। লাইরিক অদুদা য়াওরিবা শৈরেং ময়ামদুবু থাগৎতুনা ‘দ্য নিউ ইয়র্ক টাইমস’ চেফোংগী ক্রিটিক অমা ওইরিবা মতমদুগী য়াম্না মমিং লৈরবা কবি, নভেলিষ্ট অমসুং অইবি লিজ রোজেনবার্গ (Liz Rosenberg) না লুইজ গ্লুককি হান্না ফোংখিবা শৈরেংদগী হায়রিবা লাইরিক অসিদা য়াওরিবা শৈরেং ময়ামসিনা য়াম্না শাথিনা ফজবা, মরিক চুম্বা অমসুং ময়েকশেংনা ফোংদোরকপা ঙমখি হাইদুনা থাগৎতুনা ইরকখি। অদুতা নত্তনা ‘দ্য জর্জিয়া রিভিউ’ ( The Georgia Review ) চেফোংদসু লাইরিক অসিগী মতাংদা থাগৎতুনা লুইস গ্লুকপু মতমদুগী খ্বাইদগী মগুন লৈরবা শৈরাংবা কবিশিংগী মনুংদা হেন্দোক থোইদোকপা অমনি হাইদুনা ফোংদোরকখি। শৈরেং লাইরিক অদুদা য়াওবা শৈরেং `মোক ওরেঞ্জ ‘ (Mock Orange) মতমদুগী শৈরেং খোমজিনব লাইরিক এ্যান্থোলোজি কয়াদা খংগৎতুনা হাপখি অমসুং আমেরিকাগী স্কুল -কলেজ কয়াদা সাহিত্যগী টেক্সট অমা ওইনা লৌখৎতুনা মৈহৈরোয়শিংদা তাকপি তম্বিখি।


 

২০২০ ইং নোবেল প্রাইজ লাউথোকলবা মতুংদা জর্নেলিষ্ট অমগী কেমেরাদা লুইস গ্লুক

 

নোবেল প্রাইজ ফংদ্রিঙৈদনা লুইস গ্লুক আমেরিকা, কানাডা অমসুং ইংল্যান্ড গী মরু ওইবা অমসুং মমল লৈরবা এওয়ার্দ কয়া ফংখ্রবা শৈরাংবা অইবিনি। ঐখোয়দা অনৌবা অমা নত্রগা ঐখোয়না খংদবা শৈরেং অইবি অমা ওইজরবসু ইংলিশ লোনগি শৈরেং পাম্বা মিয়াম্না খংনরবা মমিং লৈরিবা শৈরেং ইবা অইবি অমনি। প্রমান ওইনা হাইরবদা মহাক্কী ১৯৯৩ দা ফোংবা “ দি ওয়াইল্ড আইরিস” কৌবা শৈরেং লাইরিক্কি তমক পুলিৎজার প্রা্ইজ ফংখি অমসুং ২০০৩-২০০৪ খ্রী: মহাক আমেরিকাগী “পোয়েট লোরিয়েট” ওইখি। অসিনা তাকপদি আমেরিকাদা মহাক্কী শৈরেং ময়াম্না য়াম্না পানরবা অমসুং পাম্নরবা অইবি অমনি। অদুগী মথংদা ২০১৪দা ফোংখিবা শৈরেং লাইরিক ”ফেইথফুল এ্যান্ড ভার্চুয়াস নাইট” কি তমক অমুক ন্যাশনাল বুক এওয়ার্ড ফংখি। অমুক্কমুক ২০১৫ দা ইউ এস প্রেসিডেন্ট বারাক ওবামা না ন্যাশনেল হিউম্যানিটি এওয়ার্ড পিখি। অসুম্না নোবেল প্রাইজ ফংদ্রিঙৈদনা মমিং লৈরবা এওয়ার্দ ১২ (তরানিথোই)না লৈতেংখ্রবা অইবিনি। মহাক্কী পুল্লপ শৈরেংগী লাইরিক ১২ অমসুং ৱারেং খোমজিনবা লাইরিক অনি ফোংখিবা লৈরে।

 

লুইস গ্লুককী শৈরেং – “দ্য রেদ পোপী” – হন্দোকপাঃ হামোম প্রমোদ

 

অঙাংবা পোপ্পী 

 

নংগী ৱাখল -পুক্নিং অদো লৈরমদ্রবসু

য়াবনি, খ্বাইদগী মরূ ওইরিবদি –

পুক্নিংদা মীনুংশি ফাওবা থম্মোয় অদুনি:

তারিবরো, ঐগীদি মদো লৈজৈয়ে;

থম্মোয়নুংগী মীনুংশিনা লমজিংবি ঐবু। স্বর্গদা

ঐগীদি লৈজরি কোরৌহনবা মপু, নুমীৎ

ঐগী চাকলিবা থম্মোয় অসিবু হাংদোকতুনা য়েংহল্লি মাঙোন্দা –

ঙাংশং ঙাংদুনা চাকলিবা ঐগী থম্মোয়, মৈরি

নিংশিংহল্লি মহাক্কি খাংবা ঙমদ্রবা মৈশা

ঐগী থম্মোয়নুংদসু চাক্লি, মহৌশাগুম।

অদুবু, করিগুম্বা মীনুংশি খংবা থম্মোয় অদো লৈরমদ্রগদি

করম তৌবা? ও ঐগী নুংশিজরবা ইবুং, নুংশিজরবা ইচে- ইচল,

নখোয়না মীনুংশি য়াওবা তাইবং মী ওইদ্রিঙৈদা, কুমজা কয়াগী মমাংদা,

ঐবু খোয়দাজরম্বরা নোংমতং ওইরবসু, নখোয়না পামজরম্বরা?

অয়াবা পিখিবরা নশানা নশাবু অমুক্তং ওইরবসু কত্থোকপগী, শকায়জবগী,

অদুবু শকাইজবা ঙমখিবরা নোংমতসু?

ঙমখিব্রা কত্থোকপা কৈদৌনুংদসু ? অচুম্বমক্তি

মসি হাইবগি মরমদি-

নখোয়গী মতৌগুম্না ঐসু হৌজিক ৱা ঙাংবা ঙম্লে।

অদুবু, ঐ হাইখিগনি

মচেৎ মচেৎ তৎলবা ঐ ।

 

[ The Red Poppy – শৈরেং অসি মহাক্কী “The Wild Iris, published by Ecco Press, 1992.” শৈরেং লাইরিক তগী লৌখৎচবনি।]

 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: