আপডেট:
image

মীতৈদা হিংচা য়াইতম্বগী লান চত্থরক্লিবা কুকি-জোমিগী মিলিটেন্ট গ্রুপ ৪গী মথখ্তা এন আই এনা উকায় তকপা হৌরে

নিউ দিল্লী, অক্টোবর ১১ : চহী লিশীং ৩ হেনবগী পুৱারীগা শাগোন্নরক্লিবা মণিপুরগী অপূনবা ঙমখৈ থুগাইদুনা মচেৎ অমা ফক্তুনা লৌরগা তোঙানবা এদমিনিষ্টেসন শেম্নবগী দিমান্দ তৌরদুনা য়েলহৌ পূরুপ মীতৈদা ওনশিন্দুনা হিংচা-য়াইতম্বগী তমথীরবা লান চত্থরক্লিবা কুকি মিলিটেন্টশিংগী মনুঙদগী কুকি অমসুং জোমি ফূরুপকী মিলিটেন্ট গ্রুপ মরিগী মথক্তা থিজিন্নবা মিনিষ্ট্রি ওফ হোম এফ্যেরস (এমঐচএ) না পাউতাক পীবগী মতুংইন্না নেসনেল ইনভেষ্টিগেসন এজেন্সী (এন আই এ) না উকায় তকপা হৌরে হায়রি।

এজেন্সীগী পাউনা হায়বদা এন আই এনা উকায় তকথরক্লিবা লালহৌলূপশিং অদুদি কুকি নেসনেল আর্মি (কে এন এ), জোমি রেভল্যুস্নরি আর্মি (জেদ আর এ), কুকি নেসনেল ফ্রন্ট (কে এন এফ-নেলুন ফেক্সন) অমসুং য়ুনাইটেদ কুকি লিবরেসন আর্মি (য়ু কে এল এ) নি হায়রি।

এম ঐচ এগী পাউতাক মতুংইন্না কুকি মিলিটেন্ট গ্রুপ ৩ অমসুং জোমিগী  মিলিটেন্ট গ্রুপ অমা পূন্না গ্রুপ ৪ অসিনা হৌজিক মণিপুরদা তংদু লৈতাদবা ফীবম অসি ওইহল্লকপ্রা হায়বদুগী মতাংদা চপ চানা খঙদোক্নবা এন আই এ না চপখাইবা হৌরে হায়রি। এম ঐচ এনা এন আই এদা পীরকখিবা দিরেক্সনদা মিলিটেন্ট গ্রুপশিং অসিনা মণিপুর, বাংলাদেশ অমসুং ম্যান্মারদগী লম মচেৎ মচেৎশিং লৌথোক্লগা মনীং তম্বা চিন-কুকি-জোমি ষ্টেট অমা শেম্বা পাম্মী হায়বা ৱাফমসু ফোঙদোরকখি হায়রি।

পাউ অসিনা মখা তানা হায়বদা, হোম মিনিষ্ট্রিগী পাউতাক অদু মণিপুরদা মে ৩দগী তমথীরবা লান চত্থবা হৌরকখ্রবা মতুং হৌখিবা জুলাই থাদা পীরকখিবনি। অদুগা মণিপুরদা থোকখিবা থোকহন্নীংদবা থৌদোকশিং অদুগা মিলিটেন্ট গ্রুপশিং অসিগা করি মরী লৈনবগে হায়বদুগী মতাংদসু থিদোক্নবা খঙহল্লকখিবনি হায়রি।

এন আই এনা  ইনভেষ্টিগেসন চত্থবা হৌরক্লবা লালহৌলূপ মরি অসিগী মনুংদা হৌখিবা কুমজা ২০০৮ দগী মণিপুর অমসুং ইন্দিয়া লৈঙাক্কা সস্পেন্সন ওফ ওপরেসন (সূ) তৌনরক্লিবা কে এন এ অমসুং জেদ আর এ য়াওরি। সূ তৌনবা অসিদগী হোম এফ্যেরস মিনিষ্ট্রিনা লালহৌলূপ অনী অসিগী পোলিটিকেল উইংশিংগী মহীহুৎশিংগা হৌখিবা চহী কয়া অসিদা ৱারী-ৱাতাই শানবগী থবক চত্থদুনা লাকখিবনি।

মে ৩দগী তমথীরবা লান থোরক্ত্রিঙৈগী মমাঙ ফাওবদা নাকল অনীগী মরক্তা মণিপুরগী চীংগী ত্রাইবেল ফূরুপশিংদগী মরক্তা ঈং-তপ্পা য়ানবা অমা পুরক্নবা পান্দম থমখিবনি। অদুবু মে ৩দগী লান চত্থরকখিবদগীদি মণিপুরদা মহৌশাগী তংদু লৈতাবা ফিভম হঞ্জিলহল্লক্নবা অমসুং থোক্লিবা ৱাথোকশিং অসিগী মতাংদা পোলিটিকেলগী ওইবা সোল্যুসন অমা পুরক্নবা রোমদা নাকল অনীনা চঙশিল্লকখিবনি।

পনবা য়াবদি, হন্দক থোরকখিবা লান অসিগী মাঙওইননা হৌখিবা মার্চ থাদা মণিপুর লৈঙাক্কী কেবিনেট মীফম্না সূ তৌনরক্লিবা কুকি-চিন-জোমি মিলিটেন্টশিংগী মনুঙদগী কে এন এ অমসুং জেদ আর এগা তৌনরকপা সূগী য়ানবশিং লৌথোক্নবা ৱারেপ লৌখিবগা লোয়ননা ৱারেপ অদুদা অয়াবা পীবীনবা মিনিষ্ট্রি অসিদা হায়জখিবনি। অদুম ওইনমক ঙসি ফাওবদা মিনিষ্ট্রি অসিগী মায়কৈদগী মণিপুর লৈঙাক্কী ৱাফম অদুদা হোয়নি-মায়নি হায়দনা তূমিন্না লৈরক্লিবনি।

এজেন্সীগী পাউ অসিনা মখা তানা হায়বদা ম্যান্মারদা বেজ তৌবা পিপলস দিফেন্স ফোর্স (পি দি এফ) তগী এন আই এনা থিজিল্লিবা মিলিটেন্ট গ্রুপ মরি অসিনা মতেং ফংই। অদুগা পি দি এফ হায়রিবা লালহৌলূপ অসিনা হৌখিবা কুমজা ২০২১ দা ম্যান্মারদা কূ তৌদুনা মিলিটরি জান্তানা লৈঙাক পায়খিবদগী জান্তা অসিগী মায়োক্তা লান থেংনরকখিবনি হায়বা ৱাফমসু মিনিষ্ট্রিনা এন আই এদা খঙহল্লক্লে হায়রি।

অদুগা মণিপুরগী তম্পাক্কী মফমশিংদা থোকহন্নীংদবা থৌদোকশিং অসি থোকহন্নবগীদমক ম্যান্মারদা লৈবা চিন-কুকি-জোমি কাঙলূপশিংনা মণিপুরদা বেজ তৌবা কুকি মিলিটেন্টশিংদা শেলগী মতেং পাংই হায়বগী ৱাফমসু লৈরিবনি। অদুগা মণিপুরদা লান চত্থরক্লিবা কুকি মিলিটেন্টশিং অসিনা ম্যান্মার অমসুং নোর্থ ইষ্টকী অতোপ্পা ষ্টেটশিংদগী খূৎশু খূৎলায়শিং ফংই হায়বগী ৱাফমসু লৈরিবনি।

সোর্স: হুইয়েন লানপাউ

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু

আপডেট: