• 266
• ২৬শে জুলাই ২০২৫ ইং
• Share on:

পুন্সিগী অরেপ্পা শক্তম অমা থিরিবা কবি শোণীগী শৈরেং লাইরিক ‘ঐ লাই নীংবা চৎলে’- লাইরিক অসিদা মিৎয়েং অমা ---তোংব্রম অমরজিৎ

পুন্সিদা তৌরুবা থবক খুদিং মথং মথং অসিমদি খরা ফৈ হায়বা মতাংদু হেক থোক্লক্তবা মতমদা লাই নিংবা চৎখিবনা ফরদ্রা হায়না খনবসু য়াওরিবনি। মরমদি তায়নফম খংলক্তবদা লাইদা তায়নগনি মীওইবনা। মসিনা পুকনিং ৱাখলবু থেমজিল্লি। লাইনা তম্লমদ্রে। লাইনা তম্লবনি, নোংদমবা বিধি মাগী খূৎশেম্নি অসিনচিংবা তায়নফম অমদি লৈরি। অদুনা মীওইবনা হিংবা ঙম্লিবনি তাইবঙপালসিদা।  কবি শোণীনা মহাক্কী লাইরিক্কী মীংথোল ওইরিবা শৈরেং অসিদা মরু ওইনা ফোংদোকনিংলিবসি অতৈ নত্তে মঙোন্দা লাই নিংলো হায়রিবা অদুগুম্বা মীওই অদুসু মশাগী হকচাং কয়াৎশিংগী অপাম্বা, কাল্লকপা মিহৌবা, কারাম্বা পুম্নমক থাদোকপা ঙম্বা নত্তে। অদুগুম্বা মীওই অদুনা লাই নিংলো হায়রিবসিদা মহাকনা পুন্সিবু লেবোরেটরিদা পুশিন্দুনা চাংয়েং তৌনিংলকখি।

লাইরিক্কী মমিং- ঐ লাই নীংবা চৎলে (২০০৮)  
অইবা - শোণী (থোকচোম মনিহার)
অফোঙবা- অশাংবা কমিউনিকেসন, ইম্ফাল
লাইরিক্কী মখল- শৈরেং
লাইরিক্কী মমল- লুপা ৮৫/- 
লমায় মশিং- ৯২

    শোণী (থোকচোম মনিহার) শাপম লৈকাই, লালার দিঘীর সিলেট, মতম অমগী নোংপোক পাকিস্টান ঙসিগী বাংলাদেশতা পোকখি। অঙাং ওইরিঙৈদা ইম্ফালগী বেঙ্গলী হায় স্কুলদা চহী খরা লাইরিক তম্লমই অদুগা সিলেটতা অমুক হনখি। ইং ১৯৬২গী অঙনবা মতমদা সিলেটকী মুরালীচান্দ কোলেজদা আই এ তম্লকখি। মতুংদা চহি সিমক্তদা ইম্ফালদা থোক্লক্তুনা ডি এম কোলেজদা বি এ লোইশিনখি।  
নহা ওইরিঙৈদগী হৌনা খোরিলোলদা থৱায় লুপ্তুনা লাকখি। ইং ১৯৬২দা মহাকনা বাংলাদা ইবা ৱারীমচাগী লাইরিক একটি মানুষ এবং একটি শন্ধ্যা( মী অমা অমশুং শন্ধ্যা অমা) মিংথোনবা ৱারীমচা অসিদা নোংপোক পাকিস্টান্দগী ব্যুরো ওব নেসনেল রীকন্সট্ররক্সন্না পীবা অথোইবা ৱারীমচাগী মনা ফংখি। ইং ১৯৬৭তা বাংলা লোন্দা ফোঙবা চয়োলগী চেফোং য়ুগভেরী অমদি ইংরাজি চয়োলগী চেফোঙ ইস্তর্ন হেরালদগী সব ইডিটর ওইদুনা সাহিত্যগী চাওখৎ খোঙথাং কয়াদা শরূক য়াদুনা লাকখি।  
মতম অমগী ভারত অমসুং বাংলাদেশকী মমিং চৎলবী মৈতৈ জগোইগী কলাকার, মণিপুরগী নম্বোলদগী বলারাম খুলদা পোকখীবী পেবম শান্তিবালাগা পুন্সি খোঙলোয় ওইমিন্নদুনা মচানুপী অমা অমদি মচানুপা অনী ফংজখি। অইবনা ইমালোল অমসুং মণিপুরগী কলচর অমদি ত্রেদিসনবু নুংশিজবা মীওই অমা ওইনা মচানুপীগী মমিং লিক্লা হায়না মিংগৌখি। অদুগা মচানুপা অনীগী মমিংনা লৈচিন অমসুং লন হায়না মিংথোনখি। ইমুং মনুং পুম্নমক ঙসিদি থাপ্লবা লমদম কানাডাগী মোন্ত্রিয়াল সহরদা য়ুম্লিংদুনা লৈরি। মমাংদা লমকোয় ৱারী লাইরিক অহুম-খোঙচৎ, থৱানমিচাক অমদি অরোইবা খোঙচৎ ফোংদুনা মনিপুরি খোরিলোলদা খুদোল তমখিবা লৈরে।  
ঙসিদগী চহী ১৭ মমাংদা ফোঙখিবা শৈরেংগী লাইরিকনি অইবা শোণীগী ‘ঐ লাই নীংবা চৎলে’। লাইরিক অসিদা পুন্না শৈরেং ৫৫ য়াওরি। পুন্সিগী অরেপ্পা শক্তম অমা থিনবা হোৎনবগী লম্বেলদা শৈরেংগা মরুপ ওইদুনা তোঙান তোঙানবা থিম অমসুং খুৎফোংদোক অমদা ইরকপা শৈরেং কয়া য়াওরি। শকনাইরবা থিএটর দিরেক্টর রতন থিয়াম্না নুংশিনা ইখিবা শৈরেং ‘এলবম অমা’ গেস্ট রাইটর ওইনা হাপ্লি। মীয়াম্না শকখঙনরবা ক্রিতিক ওজা আর কে বিদূর, রতন থিয়াম অমদি অইবা শোণী মখোয় অহুম থেংনখিবগী নুংশিরবা মতাং য়াওরি। অদুগা থায়না দি এম কোলেজদা থেংনখিবা অমদি শোণীনা এদিটর ওইদুনা ১৯৬৩-৬৪গী মতম অদুগী মহৈরোইশিংতগী চেফোঙ ‘লাসানী’ পুথোকখিবা পুম্নমক নীংশিং লমায়দা ব্লেক এন্ড ৱাইট ওইনা কাওবা ঙমদনা লৈহৌরিবা মীকূপশিংগী মতাংদা ইরি। শৈরেংনা লংলা ওইনা পুন্দুনা মরু ওইনা মখোয় অহুম পুন্সিগী লেঙদ্রবা মরুপ ওইখিবনি। অইবগী ৱারোলগী হেক মথংগী লমায়দা আর কে বিদুর ইরিবা ৱারোল খরা ‘নীংশিংলকপদা’  হায়বসিদা মতম অমগী মনিপুরসু উবা ফংলি।

 
পুন্সিদা তৌরুবা থবক খুদিং মথং মথং অসিমদি খরা ফৈ হায়বা মতাংদু হেক থোক্লক্তবা মতমদা লাই নিংবা চৎখিবনা ফরদ্রা হায়না খনবসু য়াওরিবনি। মরমদি তায়নফম খংলক্তবদা লাইদা তায়নগনি মীওইবনা। মসিনা পুকনিং ৱাখলবু থেমজিল্লি। লাইনা তম্লমদ্রে। লাইনা তম্লবনি, নোংদমবা বিধি মাগী খূৎশেম্নি অসিনচিংবা তায়নফম অমদি লৈরি। অদুনা মীওইবনা হিংবা ঙম্লিবনি তাইবঙপালসিদা।  কবি শোণীনা মহাক্কী লাইরিক্কী মীংথোল ওইরিবা শৈরেং অসিদা মরু ওইনা ফোংদোকনিংলিবসি অতৈ নত্তে মঙোন্দা লাই নিংলো হায়রিবা অদুগুম্বা মীওই অদুসু মশাগী হকচাং কয়াৎশিংগী অপাম্বা, কাল্লকপা মিহৌবা, কারাম্বা পুম্নমক থাদোকপা ঙম্বা নত্তে। অদুগুম্বা মীওই অদুনা লাই নিংলো হায়রিবসিদা মহাকনা পুন্সিবু লেবোরেটরিদা পুশিন্দুনা চাংয়েং তৌনিংলকখি। অদুবু ঙমদে হায়রিবা তাইবঙগী মচৎশিং অদুবু পুম্থা থাদোকপদি। অদুনা সেতাইয়র ওইনা ইরক্লিবনি, ঐ লাই নীংবা চৎলে
“লাই নীংলো/ লম্বোইরো হায়রে মানা ঐবু/ মঙোন্দা লঙজখিবা/ অপরাধগী জালিনোটশিংদু/ মতিল থাক্তুনা, মশীং থীরগা/ অমমম পুথোরকই/ পাপ  কোকহন্নবা।…মাদি তুমিন তুমিন চাহৈদ্রবা শা/ শদুম শদুম ফক্লগা/ চাহৈদে তৌহৈদে/ হায়শিন্নরগা চারি…। পুন্সি অসি মখল অনী থোকই,/ মানা হায়/ অনীনা য়েনথোকপা অঙ্ক ফোলনি…” (লাঃ ১৭) 

পুন্সিগা শৈরেং লোয়নদুনা মতম পুম্নমক্তা চৎলি হায়বসি কবি শোণীনা মহাক্কী ‘লাইবকথিবী শৈরেং’ হায়বসিদা ফোংদোকনবা হোৎনরি। ৱারবা মতমদসু শৈরেংনা মরুপ ওইরি। তায়নফমসুনি মহাক্তি। পেন্দবা, নুংঙাইতবা নিংঙমদবা পুম্নমক শৈরেংদা নাওথি শাজরি কবিনা অদুননি কবিনা ‘লাইজ-পুন্সি’ হায়বা ৱাহৈ পুংবা অমা অমা পুশিল্লক্লিবসি। অদুনা ফজবা ইমেজরি অমদা পুন্সিগী ফিলোসোফিদা পুন্সি অমসুং শৈরেং হায়বসি অসিগুম্বা তাংককশিং অমা ওইবরা হায়না ইরক্লি, 
“পাত্র-পাত্র লান্নদুনা/ চিংবদা ৱাকায় লাকপা/ ‘লাইজ-পুন্সি’ কৌবা/ ইশানা শুংজবা মহিনি/ ঐগী শৈরেং।/…ইনস্যুরেনন্স পোলিসি চলহৌদ্রবা/ চেবাং অমদা সোই তৌবা কাব্যনি/ ঐগী শৈরেং।” (লাঃ ১৯)
মঙ অচৌবা মঙবশিংনা মঙলি মঙলান কয়া। পুন্সিদা পান্দম অমা ফংনবা হোৎনরি চোকথবা লৈতনা। মাগী মাগী অঙম্বা থাক অমদা হোৎনরিবা পুম্নমক মমা লৈবাক পোকনফম লমদমগীদমক হোৎনরি। খোইরি নাওফম তাফম পোকনফম লমদম্বু উনিংবগী ইখৌ লাংবসি লমদম তাম্না মীরমদা লৈরগনা অমুক্কা হেল্লিবনি। অশেংবা য়ুম হায়বসি কদায়বু কৌবনো হায়বসি পুকনিংবু শান্তি ফংহল্লিবা মফম অদুবুসু খঙনগনি খল্লি। তৌইগুম্বসুং য়ুম  অমসুং পোকনফম লমদম হায়বসি ঙসিগী মালেমসিদদি চপ চাবা ৱাহন্থোক পীবদা অমুক লুনা থোক্লকলিবনি। মরমদি ঙসি মালেমগী মফম কয়াদা তোঙান তোঙানবা লৈবাক কয়াদগী য়ূম হোংলকতুনা অতোপ্পা ফুরুপ কাংলুপকা পুন্না খুন্দা লৈতাদুনা লৈবগী মীশিং নোংমা নোংমগী হেনগৎলকলি। মেত্রোপোলিটান সিতিশিংদা আইদেন্তিগী মতাংদা য়েংবদা অয়াম্বনা য়ানশিন্নরবা অমত্তা ওইরবা গ্লোবেল ফেমিলিগী মশক অমনি উরক্লিবসি ঙসি। মসি পুম্নমক ওইরগসু হৌফম শাৎফম ওইবা পোকনফম লমদম অমগী শক্তমদি মীওইবগী পুন্সিগী লমায়শিংদা মুথৎপা ঙমদনা লৈরি। অদুগুম্বা নুংশিবা নিংশিং শক্তমশিংবু কবিনা হিরি কোন্দুনা লাকশিল্লগা য়েংলক্লি।  মঙ ময়াম মরক্তা খ্বাইদগী হেন্না উনিংবদি তাইবঙগী অৱা-অনা করিনো খঙদনা য়াম্না চমজনা হিংবা অঙাং ওইরিঙৈগী পুন্সিদুবু কল্লকচনা হেক হেক তকশি শোঞ্জবা মতাংদা থোক্লকপা শৈরেংনি, হে মঙ! মফম কৈদা লৈরিবা ইমালৈবাক ঐগী।   “ইমালৈবাক কৌবা লমদম অমা/ কুইরবনি থিরকপা/ লমদম অমদগী লমদম অমা/ শেকনা শেকনা, চৈশু শু শুদুনা,/ লোইশিল্লক্লবা মতম খরসে। তেক্তা কায়দনা চৌক্রি অমদা ফম্লগা/ ৱাকচিংগী মেঙলবা কোরৌ মৈশা লাংদুনা/ মঙ মচা মচাশিংগা/ খুল্লোকপী শান্ন-শান্নদুনা/ য়াহিপ তানগে খন্দুনা…” (লাঃ ২৫)
মীওইবনা লাই নিংনরিবগী ফীলোসোফি অদুদা য়ুম্ফম ওইদুনা ইরকপনি শায়োনগী শায়োন । ৱাখলনা লামশিনবা ঙম্লুদবা, পুন্সি অসিমক করিনো হায়বা খঙবদা ৱাবা অদুগা ৱাহন্থোক হেক্তা লায়না পীবা য়াদবা মতাং অদুদা ইরক্লিবনি খল্লি মসিগী থিম অসিমক অইবনা। শকউদবা অমনদি পুম্নমক অসিগী খুর্জি পায়রি হায়বসিদা য়ানিংই কবিসু। অদুননি হায়রক্লিবা  “ঈশ্বরগী শায়োননি/ কৃষ্ণ- বিষ্ণু- মুসা-ইসা/ অদুবু মখোয়শু মশা মশানা/ ঈশ্বর অম-মম শাগৎলগা লাৎলি,/ অমম্বদা করি লৈরমগদবা খঙদবনা/ অকিবনা নমহৎলগা/ হিংনবগী উকল ওইনবা। অমম্বদি অকিবগী অবতারনি।/ অমম্ববু কিদবা কনা লৈ?” (লাঃ ৪১) লাই লৈ নত্রগা লৈতে হায়বগী দিবেট ময়াম মরক্তা মশানা য়ানা শেম্বীবা মপু অদুদা চংজবা মতৌ থেংনৈ। তাইবঙ মীওইবা ওইনা পোক্লুরবনিনা তাইবঙগী মচৎশিং অদুদি হেক থাদোকপা ঙমগনি কনানা হায়বসিদা ৱারোইশিন পিরি। 
মপুংদা শৈরেং লাইরিক অসিদা কবিগী ইনর কনফ্লিক্ট অমা অদুমক থেংনরি মসিমক অইবনা মহাক্কী পুন্সিদা থেংনরকপা অকা অকুম নাইবা পুন্সিগী তাংককশিং অদুনা শাফু পীদুনা ইরকপা শৈরেংশিংনি হায়না লৌবা য়াই। কবিনা লাই নিংবা চৎলিবসি পুন্সিগী লেবোরেটরিদা চাংয়েং মখল কয়া শৈরেংদা পাদম লাক্তুনা থিরকপা পুন্সিগী মশক অমনি হায়না লৌবা য়াই।