নেসনেল হেন্দলুম এৱার্দ খনগৎপদা স্তেত অসিদগী অঙোম অনিতা য়াওরক্লে
ইম্ফাল, জুলাই ২১ : লৈবাক অসিগী ফিশা-লোনশা তৌরিবাশিংগী মরক্তগী থোইদোক হেন্দোক্না হেন্দলুমগী সেক্তরদা মশক থোকপা পোত্থোক পুথোকপা ফিশাবীশিংদা পীবা নেসনেল এৱার্দ ইং ২০২৪ গী ওইনা নেসনেল হেন্দলুম এৱার্দকী খনগৎপদা স্তেত অসিদগী অঙোম অনিতা য়াওরক্লে। এৱার্দ অসি লাক্লিবা আগস্ত ৭তা পাঙথোক্কদৌরিবা ১১ শুবা নেসনেল হেন্দলুম দেগী থৌরমদা লৈবাক অসিগী প্রেসিদেন্ত দ্রৌপদি মুর্মুনা খূৎশিন্নরগনি।
মিনিস্ত্রি ওব তেক্সতাইলসনা ঙসি লৈবাক অসিগী ওইনা ফিশা-লোনশাগী লমদা থবক তৌরিবা মীশিংদা পূন্না এৱার্দ ২৪ লান্থোক্কদৌরি। এৱার্দশিং অসিগী মনুঙদা মঙানা সান্ত কবির এৱার্দনি। অদুগা ১৯ না নেসনেল হেন্দলুম এৱার্দনি।
অঙোম অনিতা দেবী মপুরোইবগী মিং চনম্বম ভেকো, ৱাংখৈ য়োংলান লৈরক্তগনি। মশাগী চহী ৫৬ শুরবী অঙোম অনিতা ফিশা-লোনশাগী লম অসিদা থৱায় য়াওনা হোৎনরকপা মীশক অমনি। হৌখিবা ইং ২০২২-২৩ দা দিরেক্তোরেত ওব হেন্দলুম এন্দ তেক্সতাইলসনা স্তেতকী থাক্তা পীবা হেন্দিক্রাফত এৱার্দসু ফংখ্রে। মহাক্না হন্দক ফংগদৌরিবা এৱার্দ অসি মহাক্না শাবা সিল্ককী ইনফি নমথাং খূৎহৎ কাঞ্জিপুবা হায়বা ফি অসিদা ফংবনি। এৱার্দ অসি লাক্লিবা আগস্ত ৭ তা নিউ দিল্লীগী ভারত মন্দপমদা পাঙথোক্কদবা ১১শুবা নেসনেল হেন্দলুম দেগা মরী লৈননা লৈবাক অসিগী প্রেসিদেন্ত দ্রৌপদি মুর্মুনা খূৎশিন্নগনি। এৱার্দ অসিদা শেল ওইনা লুপা লাখ ২, তাম্রপত্র, সাল অমসুং সার্তিফিকেত অমা য়াওরি।
মিনিস্ত্রি ওব তেক্সতাইলসনা পায়খৎলকপা নেসনেল হেন্দলুম দিবেলপমেন্ত প্রোগ্রাম (এন ঐচ দি পি) গী কম্পোন্তে অমা ওইরিবা হেন্দলুম মার্কেতিং এসিস্তেন্তকী মনুংচন্না লৈবাক অসিদা হেন্দলুমগী সেক্তরদা থবক তৌরিবা হেন্দলুম উইভরশিং, দিজাইনরশিং, মার্কেতরশিং, স্তার্ত অপ ভেঞ্চরশিং অমদি প্রদ্যুসর কম্পনিশিংদা থোইদোক হেন্দোকপশিংবু শকখঙদুনা পীবা এৱার্দনি।
সোর্স: পোক্নফম ।
0 কমেন্ট:
কমেন্ট তৌবিয়ু