ত্রিপুরাদা ইবুধৌ পুথিবা হরাওবা হৌখ্রে
ইম্ফাল, জানুয়ারি ২০ : ত্রিপুরাগী কোনুং আগরতলাগী অভয়নগরদা লৈরিবা ইবুধৌ পুথিবা হরাওবগী থৌরম থা অসিগী ঙসিদগী হৌখিবগা লোয়ননা নুমীৎ ৫ নি চুপ্না পাঙথোক্লগনি। মণিপুরগী মপান্দা মরু ওইনা ত্রিপুরাদা খুন্দারিবা মৈতৈশিংনা মশাগী শক্তম ঙাক্নবা, হিংনবগী পান্দমদা উকলনা চহী ১৫ রোম অসি মণিপুর মীয়ামগী মতেঙগা লোয়ননা ত্রিপুরাগী অভয়নগরদা ইবুধৌ পুথিবা হরাওবগী থৌরম অসি পাঙথোক্তুনা লাক্লি হায়না উকলনা থাদোরকপা চেরোলদা ফোঙদোরক্লি।
চেরোল অসিনা হায়, ঐখোয়গী নাৎ-চৎনবী, থকশি-খাশি, ফীজেৎ-লৈতেং, জগোই-ঈশৈ, খূন্নাইলোন অমদি পুন্সিলোন্নচিঙবা কয়া শাগোন্নরিবা লাইহরাওবগী থৌরম অসি পাঙথোক্তুনা ঈশাগী অমদি ফুরুপকী শক্তম ঙাক্না হিংগদবনি হায়বসিনা মরু ওইবা পান্দম ওইদুনা চহী কয়া অৱা-অনা থিদনা হোৎনরক্লি। পুথিবা ওয়েলফেয়ার এসোসিয়েসন অমদি পুথিবা লাই হরাওবা কমিতি, ত্রিপুরানা মরু ওইবা থৌদাং লৌদুনা হোৎনমিন্নরকপগী মহৈ ঙসিদি ময়েক শেংনা উবা ফংলে হায়রি।
পাঙথোক্লিবা ১৫ রক শুবা ইবুধৌ পুথিবা হরাওবগী থৌরম অসিদা ত্রিপুরাগী মশক নাইবা মীওই কয়া শরুক য়াবগা লোযননা ইনিংথৌ লৈশেম্বা সনাজাওবা, উত্রা শঙলেন, সনা কোনুং, দিপার্তমেন্ত ওব আর্ত এন্দ কলচর মণিপুর, মিনিস্তর এল সুশিন্দ্রো অমদি মণিপর স্তেত কালা একাদেমিনচিংবা কয়ানসু মতেঙ পাংলগা পাঙথোকপনি। ত্রিপুরাগী কোনুং আগরতলাদা কিলোমিতর ৯৮ মূক লাপ্না লৈরিবা কমলপুর মৈতৈ খুলদসু লাই হরাওবগী থৌরম মখা তানা পাঙথোক্লগনি হায়রি।
সোর্স: পোক্নফম
0 কমেন্ট:
কমেন্ট তৌবিয়ু