image

‘ঐবু নুংশিবীয়ু হায়দে’ ফোঙখ্রে

ইম্ফাল, জানুয়ারি ১৯ : শক্নায়রবা রতন থিয়ামনা ইবা ‘ঐবু নুংশিবীয়ু হায়দে’ হায়না মিংথোনবা শৈরেং লাইরিক অমা ঙসি উরিপোক কাংচুপ রোদ ইম্ফালদা লৈবা কোরস রিপরতরি থিএতর কমপ্লেক্সকী ‘দি শ্রাইন’ প্লেহাউসতা ওল ইন্দিয়া রেদিও, ইম্ফালগী স্তেসন দিরেক্তর ওইরম্বা দিলিপ ময়েংবম অমসুং মণিপুরী সাহিত্য পরিষদ, ইম্ফালগী প্রেসিদেন্ত লোংজম জ য়চন্দ্র অনীনা ফোঙখ্রে।

লাইরিক ফোঙবগী থৌরম অদুদা দিলিপ ময়েংবমনা চীফ গেস্ত ওইখি। লোংজম জয়চন্দ্রনা ‘ঐবু নুংশিবীয়ু হায়দে’ হায়বা শৈরেং লাইরিক অসিবু মশক তাকপগা লোয়ননা থিএতর পার্সনেলিতি অমা ওইবদা নত্তনা অইবা অমসুং ওইরিবা রতন থিয়ামগী তোপ তোপ মগুণ কয়া শীংথাদুনা ৱা ঙাঙখি। থোইদোক্না রতন থিয়াম্না ইবা ঙসি ফোঙলিবা শৈরেং লাইরিক অসি থারগা মহাক্কী অপূনবা শৈরেং লাইরিক ৫ দা য়ারিবা মহাক্কী তোপ-তোপ্পা খূৎই অমদি মফোঙদোকশিংগী মতাঙদা মরীক চুম্বা ৱাফম কয়াসু থমখি।

শৈরেং লাইরিক অসি কমদৌনা ফোঙখিবনো হায়বগী মতাঙদা পল্লদুনা রতন থিয়ামনা হায়, ‘ঐবু নুংশিবীয়ু হায়দে’ হায়রিবা মহাক্কী শৈরেং লাইরিক অসি মহাক্কী অথেঙবা খোঙচৎকী তাঙ্ককশিংদা থেংনবা অমদি মীকূপশিং অদুদা ফাওরকখিবশিংদু মহাক্না চেবাংদা খোৎচিল্লগা থমহৌবদু লাইরিক ওইনা ইথোক্লগা ফোঙজবনি। মহাক্না য়াম্না হৈরুদনা লাইরিকসি ইরগে খন্না থওইনা ইখিবা নৎতে। মহাক্কী লাইরিক অসি মীয়াম্না অশংবা মতমদা নৎত্রগা লাইরিক অসিবু থেংনবা মতমদা অমুক্তং ওইরবসু পাবীয়ু। মদুনা মহাক্না ইজরিবা অসি মহৈ য়াল্লে হায়না লৌজগে হায়নসু মহাক্না মখা তানা ফোঙদোকখি।

থৌরম অদুদা চীফ গেস্ত ওইনা শরুক য়াখিবা দিলিপ ময়েংবম্নসু, অইবা অমা ওইনা ঙসি ফোঙখিবা রতন থিয়ামগী শৈরেং লাইরিক অদুদা য়াওরিবা মহাক্কী খূৎইশিংগী মতাঙদা মহাক্না উজবা ৱাখল্লোনশিং ফোঙদোকখি। লোয়ননা অইবগী পুন্সিগী তাঙ্ককশিংদা মহাক্কা থেংনহৌবা অমসুং মহাক্কা লোয়নরকপগী মতাঙদা ৱাফম কয়া থমখি।

লাইরিক ফোঙবগী থৌরম অদুদা মরী লৈননা হৌজিক ফাওবদা রতন থিয়ামনা ইবা অপূনবা শৈরেং লাইরিক ৫ দগী খনখৎলবা শৈরৈংশিং শক্নায়রবা অইবা অমদি অইবী ৪না পাথোকপগী থৌরম অমসু পাঙথোকখি।

সোর্স: পোক্নফম

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু