তুংগী য়ুম্বীরেল ওইরক্কদৌরিবা রিলিফ কেম্পদা লৈরিবা অঙাংশিং লৈঙাক্না ঙাকপী শেনবীগদবনিঃ সুবদনি
ইম্ফাল, ওক্টোবর ২০ : চহি অসিগী মে ৩ দগী চিন-কুকি টেররিষ্টশিংনা মীতৈশিংদা অতম্ননা শীংনদুনা চত্থরক্লিবা তমথিরবা ভাইওলেন্সকী থৌওংশিং অসি অকনবা মওংদা কন্দেম তৌই। লোয়ননা তুংগী মীরৈাল ওইরক্কদৌরিবা রিলিফ কেম্পতা লাইঞ্জেল্লক্তুনা চংজফম লৌদুনা লৈরিবা অঙাংশিংবু ঙাকপী শেনবীগদবনি হায়না য়ুনিয়ন ওফ এসোসিয়েসন ওফ মণিপুর রাইটারসগী এগজিক্যুটিভ মেম্বার অমসু ওইরিবী শক্নাইরবী অইবী ক্ষেত্রিময়ুম সুবদনিনা ফোঙদোকখ্রে হাযনা য়ুনিয়ন অসিগী সেক্রেটারি রাকেশ নাওরেমগী চেরোল অমনা ফোঙদোরক্লি।
ৱাফম অসি চিন-কুকি-নার্কো টেররিষ্টশিংনা ময়ুম-মকৈ মৈনা থাদোকপীখিবদগী লাঞ্জেন্নদুনা হৌজিক হৌজিক ভলন্টরি য়ুথস দিভলপমেন্ট ওর্গানাইজেসন (ভি ৱাই দি ও) কৈবুল লমজাও ময়াই লৈকাইনা শিন্দুনা লৈকাৈই অসিদা হাংলিবা রিলিফ কেম্পতা লৈরিবা ইনমেটশিংদা য়ুনিয়ন অসিনা লাইরিক তম্লিবা অঙাংশিংগী স্কুল বেগ, এক্সরসাইজ বুক, পেন্সিল, ইরেজর অশদি অচা-অথকশিং য়াওনা নুপী ওইবীশিংগী ওইনা সেনিটরি পেদশিং, অহল ওইরিবীশিংগীনা নিংথমথাগী ফিরোলশিং অমসুং ভি ৱাই দি ওগী থৌমীশিংদনা খোঙউপনচিংবা পোৎলমশিং খুদোল তমখি।
তেংবাং খোঙচৎ অদুদা য়ুনিয়ন অসিগী ভাইস প্রেসিদেন্টশিং সরতচান্দ থিয়াম, এস ঐচ প্রহলাদ শর্ম্মা, সেক্রেটারি রাকেশ নাওরেম, এগজিক্যুটিভ মেম্বার ক্ষেত্রিময়ুম সুবদনি, খোমদ্রাম দোরেন্দ্র অমদি নাওরেম রোমিলানচিংবা মীওইশিংসু শরুক য়াখি। লোয়ননা ভি ৱাই দি ও কৈবুল লমজাওগী প্রেসিদেন্ট সরত, সেক্রেটারি নিংথৌজম বোবো, ফাইনান্স সেক্রেটারি সলাম মনিহার, মীদিয়া কোওর্দিনেটর সোমোর্জিৎ সলাম অমদি সঙাই প্রোটেক্সন ফোরাম কৈবুল লমজাওগী মরুওইবা থৌমী কয়াসু শরুক য়াখি।
তেংবাং খোঙচৎ অদুদা অইবী ক্ষেত্রিময়ূম সুবদনিনা মখা তানা হায়খিবদা, য়াম্না থম্মোয় শোক্না নুংঙাইত্রবদি করিসু খঙজদ্রিবা পীক্লিবা ইচাশিংনা লান অসিদা ভিক্টিম ওইদুনা রিলিফ কেম্পশিংদা লৈরিবা অসিনি। মখোয় অরানবা লম্বীদা চৎখিদনবা লৈঙাক্না অখন্নবা থৌরাং শিনবীদুনা মখোয়বু ঙাকপী শেনবীগদবনি হায়খি।
খোঙচৎ অদুদা শরুক য়াখিবা য়ুনিয়ন অসিগী ভাইস প্রেসিদেন্ট সাহিত্য একাদেমি এৱার্দি সরতচান্দ থিয়াম্না হায়খি, লাঞ্জেন্নদুনা লৈরে হায়দুনা ঐখোয় কৈদৌনুঙদা নিংহন্নরোইরি। মীতৈ হায়বা ফুরুপ অসি থৌনা ফরবা ইপা-ইপুশিংগী মচা-মশু ঙাক্তনি। মণিপুরগী ঙমখৈ অমদি অপুনবগী শক্তম লাইওইখ্রবা ইপা ইপুশিংনা ঙাক্তুনা থম্লম্বগুম ঙসিগী মীরোলনসু তুংগী মীরোলগীদমক মণিপুরগী শক্তম কায়হন্দনা ঙাক্তুনা থম্নবা হোৎনবা হায়বসিনা ঐখোয় পুম্নমক্কী থৌদাং ওইফম থোকই হায়খি।
থৌরমদুদা শরুক য়াখিবা য়ুনিয়ন অসিগী সেক্রেটারি রাকেশ নাওরেমনা হায়, য়ুনিয়ন ওফ এসোসিয়েসন ওফ মণিপুর রাইটার্স হায়রিবা য়ুনিয়ন অসি ২০১৯ গী নভেম্বর ১১ দা এম দি য়ুগী হোলদা পেত্রিওটিক রাইটার্স ফোরাম মণিপুরনা মপুং ওইবা থৌদাং লৌদুনা মণিপুরগী মণিপুরগী ঙমখৈ অমদি অপুনবগী শক্তম ঙাকপদা অইবশিংগী থৌদাং হায়বা হিরমদা পাঙথোকখিবা রাইটার্স কনভেন্সন অমনা তোঙান তোঙানবা ৱারেপ কয়া লৌবগা লোয়ননা য়ুনিয়ন অসি লৈবাক মীয়াম খঙনা শেমখিবনি।
য়ুনিয়ন অসিনা পি এম, হোম মিনিষ্টার, সী এম, গভর্নর অমসুং য়ুনাইটেদ নেসনগী সেক্রেটারি জেনারেলদা ইন্দো নাগা পিছ একার্দকী ৱারোইশিন পুরক্নবা হোৎনবদা মণিপুরগী বাউন্দারি, ইন্টিগ্রিটি অমদি হিংমিন্নিরিবা ফুরুপশিংগী অপুনবগী শক্তমদা শোকহল্লকপা যারোই হায়না মেমোরেন্দম পীদুনা তকশিনখি হায়নসু ফোঙদোকখি।
সোর্স: হুইয়েন লানপাউ.
0 কমেন্ট:
কমেন্ট তৌবিয়ু