ৱার্ল্ড ওয়েটলিফটিং চেম্পিয়নশিপ্সতা সাইখোম মিরাবাই চনুনা ইন্দিয়ান টিম লুচিংলগনি
নিউ দিল্লি, জুলাই ১৪
ৱার্ল্ড ওয়েটলিফিটিং চেম্পিয়নশিপ্সতা মেদল অনীরক ফংখ্রবী মণিপুরগী সাইখোম মিরাবাই চনুনা চহী অসিগী সেপ্টেম্বর থাদা সাওদি অরাবিয়ানা য়ুম্বু ওইদুনা রিয়াধতা পাঙথোক্কদবা ইদিসনদসু অমুক হন্না ইন্দিয়াগী টিম লুচিংলগনি।
কেজি ৪৯ কাঙলুপ্তা শরুক য়াগদৌরিবী মিরাবাই চনুগী মথক্তা কমনওয়েলথ গেমসকী মেদলিষ্ট সোরোখাইবম বিন্দ্যারানি দেবি (কেজি ৫৫) অমসুং অচিন্টা শিওলি (কেজি ৭৩), শুভম টোদকার (কেজি ৬১) অমদি নরায়ান অজিথসু (কেজি ৭৩) ৱার্ল্ড ইভেন্ট অসিদা ইন্দিয়াগী মহুৎ শিন্দুনা শরুক য়াগনি।
শুভম টোদকারখক নত্তনা ইন্দিয়াগী চপ মান্নবা স্কোয়াড অসিমক্না সেপ্টেম্বর অমসুং ওক্টোবর হ্বাংজোদ পাঙথোক্কদবা ১৯ শুবা এসিয়ান গেমসতসু শরুক য়াগদৌরিবনি। টোকিও ২০২০ অলিম্পিক গেমসতা সিলভার মেদল লৌদুনা অনৌবা পুৱারি অমা শেমখিবী মিরাবাই চনুনা হৌখিবা মে থাগী এসিয়ান চেম্পিয়নশিপ্সতা তরুকশুবা মফম কনখ্রবা মতুং ৱার্ল্ড চেম্পিয়নশিপ্স অসিনা মহাক্কী অহানবিা কম্পিটিসন ওইনা শরুক য়াগদৌরিবনি।
মিরাবাই চনু অমদি বিন্দ্যারানি দেবি অনীমক হৌজিক য়ুনাইটেদ ষ্টেটসকী সেন্ট লুইসতা হান্নগী ওয়েটলিফটর টর্ন ফিজিকেল থেরাপিষ্ট অমসুং ষ্ট্রেঙ্ক এন্দ কন্দিস্নিং কোচ দাক্টর আরো হোর্চিগকী মখাদা নুমিৎ ৬৫ নিগী ট্রেনিং তৌরিবনি। হৌজিক মিরাবাই চনুগা লোয়ননা য়ুনাইটেদ ষ্টেটসতা লৈরিবা নেসনেল কোচ ভিজে শর্ম্মানা হায়, ‘মিরাবাই অশোকপা নংদ্রে, ঐখোয়না হৌজিক মফম অসিদা মহাক্কী মপাঙ্গল কনখৎহন্নবা য়াম্না কন্না হোৎনরি। মহাক্না ৱার্ল্ড চেম্পিয়নশিপ্স অমদি এসিয়ান গেমসতা শরুক য়াগনি।
পনবা য়াবদি, ৱার্ল্ড চেম্পিয়নশিপ্স অমসুং এসিয়ান গেমসকী মরক্তা অতেনবা মতম খরখক লৈরিবনি। মহৌশানা চহী লোইরমদাই নভেম্বর অমসুং দিসেম্বর থাদা পাঙথোক্তুনা লাক্লিবা ৱার্ল্ড চেম্পিয়নশিপ্সনা সেপ্টেম্বর ৪দগী হৌরগা এসিয়ন গেমসনা সেপ্টেম্বর ২৩দগী চাইনাদা পাঙথোক্কদৌরিবনি।
পনবা য়াবদি, এসিয়ন গেমস অসি পেরিস অলিম্পিক গেমস ২০২৪ গী ক্বালিফাইয়িং ইভেন্ট অমা ওইদ্রবসু মিরাবাই চনুনা মহাক্কী লেমজনিংঙাই ওইরবা কেরিয়ারদা এসিয়ান গেমসকী মেদলদি অমত্তা লৌবা ঙমদনা লাক্লিবনি। হান্নগী ৱার্ল্ড চেম্পিয়ন মিরাবাই চনুনা হৌখিবা দিসেম্বর থাদা পাঙথোকখিবা ৱার্ল্ড চেম্পিয়নশিপ্সকী অরোয়বা ইদিসনদা সিলভর মেদল অমা ফংখি।
পেরিস অলিম্পিক গেমস ২০২৪ গী ক্বালিফিকেসন রুল মতুং ইন্না লিফটর অমনা ৱার্ল্ড চেম্পিয়নশিপ্স ২০২৩ অমদি ৱার্ল্ড কাপ ২০২৪দা শুকশোয় শোয়দনা শরুক য়াগদবনি হায়না লৈরবনি। হায়রিবা ইভেন্ট অনী অসিগী মথক্তা লিফটর অমনা ৱার্ল্ড চেম্পিয়নশিপ্স ২০২২, কন্টিনেন্টেল চেম্পিয়নশিপ্স ২০২৩, গ্রান্দ প্রি ৱান ২০২৩, গ্রান্দ প্রি টু ২০২৩ অমদি কন্টিনেন্টেল চেম্পিয়নশিপ্স ২০২৪ গী মনুঙদা ইভেন্ট অহুমদি শুকশোয় শোয়দনা য়াগদবনি হায়নসু লৈরি।
ৱার্ল্ড ওয়েটলিফটিং চেম্পিয়নশিপ্সকী ইন্দিয়ান টিমদা খনগৎখ্রবা লিটরশিং অদুদি কেজী ৪৯ কাঙলুপকী সাইখোম মিরাবাই চনু, কেজি ৫৫ কাঙলুপকী সোরোখাইবম বিন্দ্যারানি দেবি, কেজি ৬১ কাঙলুপকী শুভম টোদকার, কেজি ৭৩ গী অচিন্টা শিওলি অমসুং কেজি ৭৩ কাঙলুপকী নারায়ন অজিথনি।
সোর্স : সঙাই এক্সপ্রেস
0 কমেন্ট:
কমেন্ট তৌবিয়ু