image

শণিদগী শোণীঃ তারমদাই নুমিৎকী মশেক্লক্তা খোঙচৎ

মশাগী পুন্সি খোঙচৎকা লমকোয় খোঙচৎকনা ময়ুং-মফেল ওইদুনা চাশিন-চূশিন্ননা শাগৎপা শোণীগী লমকোয়ৱারী খোঙচনি। লাইরিক অসিগী অহৌবদা ‘১৯৭৬’, মে’ হায়না থাই; অদুবু কোনশিল্লিবা মতমদি য়াম্না পাক-চাউই। লমকোয়ৱারী অসিদা সোসিয়েল হিষ্ট্রিগী মচাক য়াম্না য়াওই। ইন্দিয়া অমদি ইষ্ট পাকিস্তান হায়না ভারতপু অনি থোক্‌না শেগায়খিবা, হিন্দু-মুসলমান হাৎনা-শুনবগী ঈখেং তাখিবা  মতমদু অইবনা চহী মঙারোমগী অঙাং ওইনা মমি-শামি খঙহৌবা, তাহৌবদগী হৌরগা বাংলাদেশ পোক্লকপা ফাওবগী মনুংদা হোংলক্লিবা সমাজকী শক্লোনশিং কূপ্না শীংথারি। ইষ্ট পাকিস্তান খায়দোরকপদগী হিন্দু কয়া নীংবা কায়না ভারতলোমদা চেনশিন্নখিবা, ফিজেৎ-চাকচাদা অহোংবা লাকপা-ফৈজোম শেৎপা তোক্‌নরকপনচিংবা কয়া পাউদম্লি। বাংলাদেশতা লৈবা মৈতৈশিংগী চৎনরোল অমদি হরাও-কূম্মৈগী ৱারোল কয়া পীরি। পীরিবা পাউদমশিং অসি অইবগী পুন্সি খোঙচৎকী শরুক ওইনা পুশিল্লকই।

 

থোকচম মণিহার শোণী

 

মণিপুরী লমকোয়ৱারীগী খোরিরোলদা অনৌবা ঈথক-ইপোম পুদুনা লাকখিবা অইবদি শোণী (১৯৪১--)নি। মশামক্কী পুন্সিবু লমকোয় খোঙচৎ ওইনা শেমখিবা অইবনি। বাংলাদেশ, মণিপুর, কানাদা অইবগী পুন্সি খোঙচৎ শেম্লকখিবা লম্লোং অহুম্নি। লমকোয় খোঙচৎ ওইনদি য়ুরোপকী লমদম কয়া শীনথুংনা চৎখি। অককèবা পাদমগী নুমিৎ খরনিতগী ওইবা খোঙচৎ নত্তে। পুক্‌নিং ইহুলগী অকন্বা লীচিং য়াওরি। অঙাং ওইরিঙৈদগী কোয়চৎ চৎনীংবগী ইহুল অমনা কাইহৌদুনতা লৈখি;

 

তাম্লবা লমদম কয়াগী নীংথিরবা শহর, চীংমান লৌবুক-লম্হাং, লৱাই খুঙ্গং অমসুং মদুদা লৈরিবা মীওই কয়া অমনা ঐবু অহীং-নুংথিল খাইদনা মখুৎ অনী তিংথোক্তুনা খুৎলাম তোয়না য়ূমদগী কৌথোকপগুম তৌখি। (লাঃ ১৯) ৱা

 

মালেমগী তোঙান-তোঙানবা শক্লোনশিংনা কৌরকপগী মীকৌ তারদুনা তপথবা ঙমদ্রবা থৱাই অসি শোণীগীনি। মীকৌ অসিগী খোন্থাংনা চিংদুনা পুরকপনা হৌজিক্তি কনাদাগী মোন্ট্রিয়ালদা খুন্দা-লৈতাদুনা লৈরে। মপোক্কী ওইনা শাগোন্নদুনা লাকপা লমকোয়নীংবগী ইহুল অসিনা খোরিরোলগী তাইবংদা চঙলক্তুনা কলাগী মণি-মুক্তা ওন্থোরকপদি খৃষ্ট কুম ১৯৯৯ দা খোঙচৎ ফোঙলকপদগীনি।

 

মণিপুর খোরিরোলদা লমকোয় ৱারোল য়াওবা লাইরিক কয়া লৈরি। চীংথংখোম্বা মহারাজ গঙ্গা চৎপা, চন্দ্রকীর্ত্তি জীলা চঙবানচিংবা লাইরিকশিংদা চৎলুরিবা খোঙচৎশিং অদুগী পাউদম, থেংনরকপা থৌদোকশিংগী ৱারোল কয়া শুগায়না ইরি অদুবু হৌজিক্কি মতমদা লৌনরিবা লমকোয়ৱারী অসিমক্কি চপ চাবা মশক্তি নত্তে। লৈবাক নিংথৌগী য়াথংদগী ইৱাকশিংনা লেংশিনবনি। অদুনা পাউদমশিং অসি ওবজেক্টিভ ওই। অনৌবা মতমগী লমকোয়ৱারীশিংদা চৎলুরিবা মীশক অদুগী মিহুল য়াওনা তম্লকপা পাউদমগী মশক্তুমক্তি নত্তে।

 

 অনৌবা মণিপুরী খোরিরোলদা লন্নাই মীওইশিংনা মশা-মশানা চৎলবুা পাউদম মশাগী অপাম্বগী মতুংইন্না ইনরকপগী ৱারোল ময়েক শেংনা থোরকই। হিজম ইরাবত (১৮৯৬-১৯৫১) কী ‘মন্ডলে খোঙচৎ’ মপূংফাবা লাইরিক অমা নৎত্রবসু জহাজ তোংদুনা রেঙ্গুন পাংলকপগী ৱারোল নীংথিনা উত্তুনা ইবা ফজবা লমকোয় ৱারেংনি। লমকোয়ৱারীগী শাগৈগী ময়েক শেংবা খূদোলনি। মুতুৱা ঝুলোনগী গ্রেট ৱার মালেমগী অহানবা লাঞ্জাওগী পাউদম্নি। মণিপুরদগী অহানবা লানজাও য়াওরুবশিংগী মরমদা খোমজিন্দুনা ইবনি; মশামক য়াওরুরবদি নত্তে। খৃষ্ট কুম ১৯৭৭ তা নোংথোম্বম কুঞ্জোমোহন্না (১৯৩৫-২০১৪) সোভিয়েটকী লৈবাক্তা ফোঙলক্তুনা লমকোয়ৱারীগী য়ূম্ফম চেৎশিনখি। তোঙান-তোঙানবা থৌদোক ৱাথোকশিংগা মরী লৈননা লম চৎলুবা নত্রগা মশাগী অপাম্বদগী লম কোয়রুবনচিংবা খোঙচৎ কয়াগী পাউদম লাইরিক ওইনা অমদি ৱারেং ওইনসু লেপ্তনা ফোঙনরক্লি। মণিপুর মনুংমক্তদা, ভারতকী মফম কয়াদা, ভারতকী ওয়াংমদা মীরৈবাক্তা চৎলুবগী পাউদম কয়া মথং-মথং ফোঙনরকই।

 

খোঙচৎ কী খোঙহৌফমদি শোণীনা মিলান শহরগী ময়োলদা লৈবা দুয়োমো কেথিদ্রেলগী লম্পাক্তা নুমিৎ কুন্নি উয়ান চাক্তিন্নবগুম তিন্নরম্বী ইটালিয়ান শকহেনবী দোলোরিজ কোলোম্বোগা কায়নবগী মৈচাক খাঙবদগী হৌরকই। ফ্রাঙ্কফুট চৎকদবা ট্রেন ঙাইনা ঙাইনা অইবগী ৱাখলগী পরীংদা নীংশিংবগী ঈচেল লেপ্পা লৈতনা চেন্থরকই। খা থংবা ইটালিগী অপীকপা ভেনিসকী লিডো কৌবা ঈথৎ মচা অমদা নুমিৎ কুন্নিগী মমাঙদা লমকোয়মী অইবনা মথন্তা নাইতোম ফমদুনা মশানা য়ুরোপতা লৈরগা ৱাখলনা ইম্ফালগী দি এম কোলেজগী লমপাক্তা কোলেজ তম্লিঙৈগী মরূপ-মপাংশিংগা লোয়নখিবগী কাউঙমদ্রবা নীংশিং মঙলান্দা লূপ্লিঙৈদা দোলোরিজনা মৈখেৎ নিরকপদগী অশেংবা তাইবংদা মীকপ থোরকখি। “নহাক জাপানিজরা” হংলকই।  লমকোয় খোঙচত্তা থেংনবা শকখঙনদবা অনী ঙাইহাক্তংগী মনুংদা লোন্দিন্নরকই- লমকোয়নীংবগী লীচিংনা কোনশিনখিবনি। মিলান চৎনবা খোঙবু ওইমিন্নখি। অদুবু কলচর মান্নদবগী মতুংইন্না চীঞ্জাক্তা খেন্নরকপগী নুংঙাইরবা পাউদম অমা য়াওরি। দোলোরিজনা পামজদুনা কোয়থি থিরবা মতুংদা য়াম্না রোমান্টিক ওইরবা মোমবর্তি থানবা রেষ্টোরা অমদা অইববু দিন্নর চামিন্ননবা পুশিল্লি। চামিন্নরিবা মেনু অদুগী মমিং ‘ভর্মিসেলি’গী ৱাহন্থোক্তি দোলোরিজনা তীন্থ্রোক মচা হায়বনি হায়রকপদগী শোণীনা হঙ্গোইবা পোক্তুনা চাশিনবা ঙমখিদে। অমরোমদা লন্দনদা অইবনা ঙারী লৌরগা চারুবদগী শন্দোরকপা মনমদুনা মপূক মথক-মখা ওন্না মকোক ঙাওহল্লবা য়ূম্লোন্নবনা পুলিসতা ৱাকৎলক্তুনা ৱাহং-পাউহং তৌনবা থানাদা ফাওবা কৌখৎখি। অসিগুম্বা নুংঙাইরবা পাউদম কয়াগা লোয়ননা লন্দন, পেরিস, দেনমার্ক, রোম, গ্রীস, এথেন্স, জর্মনি, স্পেন, মাদ্রিদ অসিনচিংবা য়ুরোপকী মরুওইবা মফমশিংদা কোয়রুবা মদুদা লোয়নখিবা, থেংনখিবা তোঙান-তোঙানবা মীওই কয়াগী শক্তম য়াওনা ইরকপা লমকোয়ৱারীনি।

 

মশাগী পুন্সি খোঙচৎকা লমকোয় খোঙচৎকনা ময়ুং-মফেল ওইদুনা চাশিন-চূশিন্ননা শাগৎপা শোণীগী লমকোয়ৱারী খোঙচনি। লাইরিক অসিগী অহৌবদা ‘১৯৭৬’, মে’ হায়না থাই; অদুবু কোনশিল্লিবা মতমদি য়াম্না পাক-চাউই। লমকোয়ৱারী অসিদা সোসিয়েল হিষ্ট্রিগী মচাক য়াম্না য়াওই। ইন্দিয়া অমদি ইষ্ট পাকিস্তান হায়না ভারতপু অনি থোক্‌না শেগায়খিবা, হিন্দু-মুসলমান হাৎনা-শুনবগী ঈখেং তাখিবা  মতমদু অইবনা চহী মঙারোমগী অঙাং ওইনা মমি-শামি খঙহৌবা, তাহৌবদগী হৌরগা বাংলাদেশ পোক্লকপা ফাওবগী মনুংদা হোংলক্লিবা সমাজকী শক্লোনশিং কূপ্না শীংথারি। ইষ্ট পাকিস্তান খায়দোরকপদগী হিন্দু কয়া নীংবা কায়না ভারতলোমদা চেনশিন্নখিবা, ফিজেৎ-চাকচাদা অহোংবা লাকপা-ফৈজোম শেৎপা তোক্‌নরকপনচিংবা কয়া পাউদম্লি। বাংলাদেশতা লৈবা মৈতৈশিংগী চৎনরোল অমদি হরাও-কূম্মৈগী ৱারোল কয়া পীরি। পীরিবা পাউদমশিং অসি অইবগী পুন্সি খোঙচৎকী শরুক ওইনা পুশিল্লকই।

 

শোণীগী লমকোয়ৱারীনা হান্না লৈরম্লিবশিংদগী তোপ-তোপ্পি। লমকোয়ৱারী অসিদা লমকোয় খোঙচৎকী পাউদমগা পুন্সি খোঙচৎকী ৱারীগা পূন্না চেন্থমিন্নরি। ঈরম অনীনা পূনবনা ঈচেল পাকথোক-চাউথোকই। অপাবশিংগী থম্মোয়বু থুহ্মৎপা ঙমই। শোণীগী খূৎইদদি লমকোয়ৱারীগা পুন্সি ৱারীগা শেত্তোক্‌নবা য়াদে। অইবগী লমকোয়ৱারীগী মশক শেংনা খঙগে হায়রবদি মহাক্কি পুন্সিদগী হৌনা য়েংবা তাই। মরুওইনা অতৈ অইবশিংগা শোণীগা খেন্নরিবসি মহাক্কি মশাদা ফাওরিবা পোকপদগী লোয়নরক্লবা লমকোয়নিংবগী ইহুল অসিনি। খৃষ্ট কুম ২০২০দা ফোঙলকপা শোণীগী ওটোবাইওগ্রাফি ঐগী পুন্সিগী অমম-অঙাল হায়সিনা হেন্না ময়েক শেংহল্লক্লে। লমকোয়নীংবগী ঈখৌ অমগা লোয়ননা পোক্লকপা শোণীনি। শেঙ্গাও থন্না শেল পুরগা নুংঙাইনা লমকোয়বা চৎপগী পান্দমদা খোঙশানবা শোণীগী খোঙচৎ নত্তে। অখন্নবা মরমগী অককèবা মতমগী মনুংদা চৎপা খোঙচৎসু ওইদে। লম কোয়নীংবগী ঈখৌনা কনমন্বনা খুদোংথীবা থেংনরুগনি হায়বগী নাচুংখিদে। এদভেঞ্চরগা মায়োক্‌নীংবগী থৌনানা লমদিংদুনা লমকোয়নীংবগী ইহুলদা থোইনা হেন্না শঙই। মশাগী চহী তরামরি তরামঙারোম শুরকপদগী হৌনা লোন্না ময়ূম থাদোক্তুনা চেন্থোরকই- ‘শিবা নাবা খঙদে লম কোয়বা চত্তবা য়াদে হায়বগী ৱাশক অমা ঐগী থম্মোয়দা চেৎনা থমখি।’ (লামায়: ২১) ৱাশক অসি থাগোন্নদুনা চেন্থোরকপনি।

 

অঙাং ওইরিঙৈদগী শোণীদা লম কোয়নীংবগী অকনবা নিশা লৈ হায়বসি মহাক্কি নীংশিং ঈচেলদা ময়েক শেংনা উবা ফংই। শোণীনা মহাক্‌না পামজবা সোমরসকুম্না খোয়থুম্নরবা অঙাং ওইরিঙৈগী নীংশিং নিশা পেন্না থক্লি। মতাং অসি মপূং ওইনা অইবগী পুন্সি খোঙচৎকী পাউদম্নি। অইবগী পুন্সি খোঙচত্তা খোৱাইদগী খৌরাংজবা ঈখৌসু লমাকোয়নীংবগী ঈখৌনি। শোণীগী অঙাং ওইরিঙৈগী মঙলান্দি চৎনীংবা মফমদা, য়েংনীংবা লমদমদা কনাগীসু অথিংবা য়াওদনা কোয়চৎ চৎপগী ৱাখল অসিনি। অহাঙবা নোংমদোলগী মখাদা অশংবা তিংথৌগী মথক্তা লোংখাক লোংনা হীপ্লগা অঙাং ওইরিবা অইবনা উচেকশিংনা মনীং তম্না পাইবদু উরুগা মিহৌজৈ; মহাকসু উচেক্কুম্না পাইনীংখি, ফাজিন-পুনশিন্বগী লৈই লান্থোক্তুনা চৎনীংবগী ৱাখল ফাথনবা হোৎনবদা অৱাবা ওইখি। খাঙঙমদ্রবা মৈশা ফাওখি। মশাগী চহী তরামরি তরামঙারোম শুরকপদা খৃষ্ট কুমজা ১৯৫৬ গী পোইনুগী সংক্রান্তি নুমিৎতা মমানা লোত্তুনা থমজবা শেল খরনা খূৎপায়শেল ওইদুনা মরম অমত্তা লৈতনা ময়ূম থাদোকখি। মরম হায়ববু লমকোয়নীংবগী থিংঙমদ্রবা ইহুলগী লীচিংনি। হেলোইনা পুরবা অঙাং অমগুম্না লম কোয়বগী নুংঙাইরবা মঙলান অমনা শুহ্মৎলদুনা অকি-তুজুং তুংওইনরগা পল্লেপফম লৈতবা খোঙচৎ ওইনা খোঙশাল্লকখি। খোঙবু ওইনা চেনমিন্নরকপা মমান্নবা ধীরেননা সুরমা তুরেলগী মথক্তা ক্বীন সাহেবনা শারম্বা থোং ফাওবা য়ৌদ্রিঙৈদা থম্মোয় নৌথোরক্লে; ময়ুম নীংশিংদুনা মপি তৈথোক-তৈথোক্তুনা লৈহৌরে। মথন্তা ঙায়রবসু নীংহন্নবা লৈতে। ট্রেন ষ্টেশন য়ৌরে শোণীনা তোংলুবা ট্রেনগী দব্বাদা ময়ূমদগী মীচেন ওইনা চেল্লকখিবা নরেনগা থেংনখি। জুৱারদা মচন্নুপীগী সনা থাদোক্লুবদগী মীচেন ওইরকপা নরেননি। নোংদম্বনা এদভেঞ্চর পামজবা শোণীগী খোঙবু ওইহল্লরে। নরেনগী অতোপ্পা মগুণ অমনা খোঞ্জেল নুংশিনা ঈশৈ শকপা হৈবা অমদি বাঁসি খোংবা ঙম্বসিনি। ষ্টেসন মচাদগী অনীনা জঙ্কসন অচৌবা কুলাউড়া য়ৌরকপদদি ট্রেনগী ট্রেন ঙাক্তা থেংনরে। কদোমদা চৎকদগে হায়বা পন্থুংফম অমা পুথোক্তবা য়ারক্ত্রে। ইন্দিয়াগী কলকতা য়ৌরসি হায়না লেপ্নদুনা নরেননা ঈ-পাউ লৌবা চৎখ্রে; শোণীনা ফম্ফম কন্দুনা লৈহৌরে। তাঞ্জা অসিদা মপাং কনা য়াওদ্রবী শাদানবনা তান্নরক্লবী শজি অমোমগুম তনিক-তনিক্লবী মেহেরবানুগা থেংনখি। মমা-মপা লৈজদ্রবী ইনখৎলকদা ঙায়রিবী মেহেরবানু মখুরানা শেল লৌরগা ইনাকখুনবা হনুবা অমদা য়োন্থোক্‌নবা থৌরাংলকপদগী নান্থোক্‌নবা চেল্লকপী মীচন্নি। মখুরানা থাবা লম্মৈগী মৈশাদা মশা কঞ্জনবা চেল্লকপনি। লমকোয়নীংবগী ইহুলনা মীচেন ওইহল্লবা শোণীগা নোংদম্বনা থেংনহল্লরে। ময়ুমগী কৈশুমশঙদগী অহানবা ওইনা চেন্থোরক্তুনা অহাঙবা মালংগী চেক্লাচাগুম্না মণীং তম্বগী সুরদা পাইদুনা শাগৎখিবা অতেনবা খোঙচৎ অসিদা শোণীগী থম্মোয়দা মপুন্সিগী হক্তুনা লৈহৌবদি মেহেরবানুগী নীংশিং মুর্ত্তিনি। ইনখৎচরক্লিবী তনৌবী লৈশাবী মচা অমগী উপায় লৈত্রবা ফীভম উদুনসু শোণীনা কনবিহৌবা ঙমখিদে। মখুরাদগী শেল হূরাল্লগা চেনখিবী হুরানবী তাহন্দুনা মীনা ক্রক-ক্রক ইন্নরবা ট্রেনগী দব্বাদগী চিংথবিহৌবা কনাসু লৈত্রবী ওইনা চঙজফম থিরম্বী মেহেরবানুগী মায়থোঙদা শোণীগী থনুংগী মীৎনা মরাল পক্ত্রবী শেংলবী চনুরা অমা ওইনা উখিবগী নীংশিং-মূর্ত্তি অদুদি মহাক্কী পুন্সি খোঙচত্তা মতম পুম্নমক্তা মূত্তনা লৈখি।

 

শোণীগী অহানবা লমকোয় খোঙচৎ অসিদা থেংনখিবা খুদোংথীবনা মহাকপু শীংনবগী ৱাখল পোকহনখি। নীংহন্নবগী মহুত্তা ৱাখলগী থৌনা ফংহৌই। ষ্টেশন খূদিংগী কূমদুনা চাথোক-থক্তোক্তুনা লাকপনা অচৌবা জঙ্কসন অমা ওইরিবা আখাউড়া য়ৌরকপদদি শেল-থুম লোইশিল্লক্লে। কাঙ-হয়িং মরক্তা ইশং কাবা প্লেটফোর্মদা ৱানা লেনখি। ফীভম অদুনা থোইনা হেন্না মৈ ঈত্তুনা লমকোয়মী ওইগে খল্লিবা শোণীগী থম্মোয়দা অচেৎপা ৱাশক অমা লৌরকই:

 

অদুবু থম্মোয়দদি খঞ্জখি পুন্সিগী অহানবা ওইনা থেংনরিবা ঙসিগী অৱাবসি করিসু নত্তে হায়না লৌগদবনি। মসিবু ঙমদ্রবদি শাংলবা লম্বীসী করম্না চৎকনি। ৱাখল অসিগী শক্তিমক্‌নসু ঐগী তুংগী পুন্সি খোঙচত্তা মন্ত্রগুম্না কান্নবা ফংখি। (লাঃ ৩১)

 

নরেনগী মপাবুং লাক্তুনা খোঙচৎ অসি থূপচিনখ্রবসু শোণীগী থম্মোয়দা অচেৎপা ৱাশক অমা লৌদুনা লমকোয়নীংবগী অপাম্বগী অকনবা য়ুম্ফম অমা থোলহৌরে। য়ুরোপ মহাদেশ অহুম্লক কোয়গদৌরিবা লমকোয়মী অমগী পূক্‌নিংগী ফিরেপতা মথৌ শঙহৌরে। বাংলাগী উপন্যাসকার শরৎচন্দ্রগী (১৮৭৬-১৯৩৮) শ্রীকান্ত’গী ইন্দ্রনাথকুম শোণীগী পুন্সি খোঙচৎকী শৈহৌদা থেংনখিবা নরেন নোংথাঙগুম্না ঙাল্লম্লগা মূৎখি; অইবগী নীংশিং লায়ুমদদি মঙালগী মশেক্তো ময়েক লানা লৈহৌরে।

 

খোঙচৎ অইবগী পুন্সি খোঙচৎনে, য়ুরোপকী খোঙচৎনে অনীগী অপুনবনি। মীওইবগী পুন্সি হায়বসি অমম-অঙান্না শাবা ঙাক্তনি। অঙানবা মায়কৈদবু উৎনীংবা হায়বসিস মীওই অয়াম্বগী লীচৎনি। পোকপদগী শাগোন্নরক্লবা লম কোয়নীংবগী ইহুল অসি ফোঙদোরকপদা অইবনা অঙাং ওইরিঙৈ ইনখৎলকপা মতমগী পুন্সিগী মশক অমম-অঙান খায়দোক্তনা পূকচেল শেংনা হায়দোকপা ঙম্বগী থৌনা উবা ফংই। অইবা অসি ‘অফবা নুপামচা’ হায়বদুগী শক্তাক চে পায়বা মীশক্তি ওইরক্তে। লাকঙম-ফাঙমদ্রবা ইহুল কয়াগী তূংনফম ওইনা হৌরকই। গৌড়িয়া বৈষ্ণবকী খমথেংবা ইমুং অমদগী হৌরক্তুনসু ইমুং অদুগী চৎনা-লোনচৎকী ওয়াংমদা চৎলগতা নুংঙাইজবা ওইরকই। লাই থাজদে। অনকনভেন্সনেল ওইবা কেরেক্টরনি। নিশা মখল কয়া শীজিন্নরকই। এদভেঞ্চর পামজবনা পুন্সিবু চাংয়েং তৌবদা চিংনবা লৈতে। লমকোয় খোঙচৎ নৎত্রবসু পুন্সি খোঙচৎনসু অইববু অঙাং ওইরিঙৈদগী কোয়না চৎপা হৌহনকি। খৃষ্ট কুম ১৯৪৮দা মপাবু থোকচোম সোনামণি (১৮৯০-১৯৭১) সিলেটতগী থোরক্তুনা লিংখৎপা কুইদ্রিবা ইম্ফালগী দি এম কোলেজদা (১৯৪৬ তা লিংখৎখিবা) মৈতৈমচা এম এ পাস তৌবা ওইনা ওজা ওইখি। অসুম্না শোণীগী অঙাং ওইরিঙৈগী পুন্সিদা ইম্ফালগী এক্সপিরিয়েন্স তিনশিনখি। ইম্ফালগী বেঙ্গলী হায় স্কুলদা লাইরিক তম্বা হৌই।

 

অঙাং ওইরিবা শোণীগী পুন্সি খোঙচত্তা দি এম কোলেজগী ক্বার্টরদা লৈরিঙৈদা থেংনখিবা কাউঙমদ্রবা কেরেক্টর অমদি নেপালী চৌকিদার বহাদুরনি। অইবগী চহী তংখাং অমা হেন্না হনবা কোলেজগী চৌকিদারগা মরূপ ওইনা তিন্নৈ। চৈরাওচিংদা শীং চনবা চৎমিন্নৈ। শারপ থুম্লপ তৌবা উশিংশাগী মকূ, কাবুলিয়াগী অথুম্বা মপাল অনিমক্কি মহাও খোঙচৎশিং অসিদগী খঙবা ঙমখি। মঙোন্দগী তম্বা পারাশিংনি। শীংচন খোঙচৎকী বহাদুরনা গুরুনি। মঙাও থীবনা চূরূপ, বেরীগী চাংয়েংগী মথক্তা সিনেমাগী নিশাসু কন্না হাইগৎলকই। ‘স্যামসন এন্দ দেলায়লা’ য়েংনীংমনবদগী বহাদুরগী কাঙখদা থম্বা আলু হূরাল্লগা মমাদা অমুক হোঙনা য়োনশিল্লি। শোণীগী মমাইবেম্মনা করিগী হোঙনা য়োন্থোক্লিবনো হায়রকপদগী বহাদুরনা থৌওং পূম্নমক খঙলে। অদুবু হূরানবা হায়বা মিংদা থীবদগী নুপামচা শোণীবু কনবিখি। কনাদসু হায়দোকখিদে। নীংঙম্লক্ত্রদুনা মশামকèা চত্তুনা বহাদুরগী মফমদা থম্মোয় শেংদোকলুই। মপান্দদি মী মচা চৌকিদারনি; মনুংদদি অচৌবা থম্মোয়গী মপু ওইরম্মি। অমরোমদা পূকচেল চাউবা বহাদুরগী থম্মোয়দসু ফাওখি। মমা-মপা, মচীন-মনাও কনাসু লৈত্রবা পাখং বহাদুরগী অচীকপা থম্মোয়গী চৈনা অইবনা চিংথোক্তুনা উৎলকই। খৃষ্ট ১৯৬২দা ইম্ফালদা অমুক হন্না লাক্তুনা দি এম কোলেজদা তম্বা মতমদা শোণীনা বহাদুরবু কলাপাহাড় তাম্না সাইকলগী খোঙচত্তা থিরুই, ফংখিদে। লমকোয় খোঙচত্তগীসু হেনবা পুন্সি খোঙচৎকী ৱারীনি। খৃষ্ট ১৯৫২দা মপাবুংনা থবক থাদোক্লবদা ইমুং মনুংগা লোয়ননা সিলেটতা হল্লকখি। তাঙ্কক অসিদনি মহাক্কি কাউঙমদ্রবা মরূপশিং- নরেন, গুরু সুরেননচিংবা থেংনখিবা। সুরেন ঙাওশিন্নবা নহাশিংগী গুরুনি; শোণীগীসু গুরুনি। অদুবু ওক্ত্রবা নহাসিগী থম্মোয় লৈখাদা অশোন অনা, উপায় লৈত্রবশিংগী মিনুংশিনা ঈ তুংদুনা লৈরম্মী হায়বসি বাংলাদেশ (১৯৭১) পোকপগী লানগী চৈনা মরক্তা ময়েক শেংনা চোংথোরকই। বাংলাদেশকী লান্দা মহাক্কা লোয়নরক্লিবা কৈরোয় লৈকায়গী মচাশিংদা রাজাকার গুন্দাশিংদা ওৎ নৈগে কা তৌরকপদা চোংথোক্তুনা মায়োক য়াবতা নত্তনা কা হেনবা গুন্দা অমদি মখৌরী মেত্তুনা হাৎখি। অসুম্না পেরালাইসিস তৌরবা মমাবু পোরগা হান্নগী মচল-মচেশিং অদুতা নত্তনা পাকিস্তান লান্মীনা ওৎপি-নৈবিরম্লবী নুপী মরিসু য়াওনা মফমদুদগী মাইল তরানিথোই লাপ্পা মেঘালয়গী বোর্দর য়ৌনা সুরেন্না ঙাক-শেন্দুনা পুরকখি। সুরেনগী লেমহৌরিবা পুন্সিনা কাছার জিলাগী হোস্পিটাল অমদা কুষ্টি থুংবশিংগী সেবা তৌদুনা লেনখি। নরেন, সুরেন, বহাদুর শোণীগী পুন্সি নোভেলদা শরুক য়ারিবা কাউঙমদ্রবা কেরেক্টরশিংনি। কেরেক্টরশিং অসিদা অপাবগী পূক্‌নিং চিংশিল্লিবদি নুং-পান অনীমক তুনা য়েক্লকপদনি। পানগী লীচৎ-শাজৎকী মরুমদা নুংদা থাজ-ওইথোক্ত্রবা মতৌ অমা লৈরম্বসিনা মীওইবগী পুন্সি খোঙচত্তা মরূদ্যান থেংনবগুম নুংঙাইহল্লি। মীওইববু নুংশিবগী ৱাখল পাকথোক-চাউথোকহল্লি। মেত্রিক পরীক্ষা অনীরক থারবা মতুংদা খৃষ্ট কুমজা ১৯৫৯দা মেত্রিক পাস তৌদুন পুন্সি খোঙচৎকী খোঙফম অমা কান্থোক্লে, কোলেজ কারে। মথোক কারকপগা কোলেজ কাখৎলকপগা ঈরাংশিং অসিগী ঈথিলনা অকে-অমৌদা তাউজনীংবা মতম ওইদুনসু ইমুংগী শেল-থুমগী ফীভম ফত্তবনা নীংবা থুংদ্রে। জুৱার শান্নরে। অসিগুম্বা চয়েৎনবা কয়া অসি লৈদুনা পুন্সিগী তাঙ্কক অসিদসু লমকোয়নীংবগী ইহুল নমথদুনা থম্বা ওইথোক্তে; ইহুল অসিগী ঈনোৎ তোয়না তোয়না হৌরকখি;

 

জুৱারসু শান্না, লাইরিকসু তম হীরম অনিমক লেপত্রবসু মপানলম চৎনীং-য়েংনীং কোয়নীংবগী ঈহুন অমা তত্তনা ঘড়ীগুম্না থম্মোয়দা ধং ধং ফুবদি লেপখিদে। (লা: ৪৭)

 

 লম কোয়নীংবগী অকনবা লীচিংনা মচা কায়নবগী মৈশা লাংহৌরবা মমাগী মায়থোঙ থম্মোয়দা পুরদুনা গৌহাটিগীদমক শোণী ময়ূম থাদোকখি। গৌহাটিদা থেংনখিবা মীওইশিংগী মরক্তা জিবনসিং তোঙানবা কেরেক্টর অমনি। গুন্দানি, নুপা লৈরবা নুপীগী মরুম্বনি; অদুম ওইনমক মহৈরোয়শিংবু নুংশিবা থম্মোয় পানবা মীওইনি। মপানগী লীচত্তনা মীওইবগী মশক লেপ্পা ওইথোক্তে হায়বা অইবগী মীৎয়েংদা উবা ফংই।

 

শোণীগী অঙাং ওইরিঙৈগী মঙলান তপ্না তপ্না তাইবং ওন্থোকপা হৌরক্লে। যুরোপ মহাদেশ য়ৌরে। শেল মতীক চানা য়াওরগা খোঙ শাঙদোরকপা নত্তে। পাখঙমচা ওইরিঙৈগী লমকোয় খোঙচত্তা শকখিবা ৱাশক ঙাক্লে। অৱা-অনা থিদনা অফং-অফংবা থবক তৌদুনা শেল তাল্লে। লন্দনদা লৈরিঙৈদা সিনেমা হোলগী গেটকীপর ওইনা, ফ্রাঙ্কফুটতা লৈরিঙৈদনা হোটেলদা থুংলবা মীশিংগী পোৎ-চৈ থাংদুনা লম কোয়নবা খোঙচৎনা শাগৎপা পুন্সিনি। লন্দনগী লৈমায়দা লেপ্লদুনা পিকাডিলি সার্কসতা ইরোসকী মূর্ত্তিগী মখোঙদা মালেমগী নাগারিক মরক্তা শোণীসু ফম্লুরে। শাবী-শানৌশিংগী পুনফম, ঙাইনফম, থেংনফম ওইবা মফমদুদা গ্রীক্কী শকহেনবী আরেটি বুত্তোপালাসকা থেংনদুনা মতম খরগী খোঙবু ওইমিন্নৈ। অইবা মশাদি শেল খরা হোঙবা মফম ইষ্ট লন্দনগী মাইলোজ ষ্ট্রীটতা লৈরম্মি। ইষ্ট লন্দনগী কোল্লুপ অসিমক্তি অতোপ্পা লৈবাক্তগী মরায়বক য়েংবা ওইনা লাকপা লায়রবশিংগী মফম ওইবনা চমোৎনৈ; নাপল চাউবী লন্দনগী মায়থোঙদা পকপা মায়হিংগুম্বনি। লায়রবশিংগীনা লাইরম্লেননি।

 

আরেটিগা খোঙবু ওইমিন্নরদুনা লন্দন, বৃটিস ম্যুজিয়ম, হাইদ পার্কনচিংবা মফম কয়া য়েংমিন্নখি। হাইদ পার্ককী অওয়াংথংবদা লৈবা, ‘স্পীর্কস কোর্নর’ ট্রেদিসনেল ওইবা সোসাইটিদগী থোরকপশিংদদি অঙকপা মফম্নি। হায়নীং-ঙাঙনীংবা ৱাফম কয়া অথিংবা লৈতনা হায়দোকপা য়াবা মফম্নি। অদুনা খরা হেন্না ওর্থোদোক্স ওইবা অফা-অপুন হেন্না লৈবা মফমদগী লাকপা শোণীদদি পূমঙক ঙকখি, ঙকèা নুংঙাইখি। ব্লুমবেরি স্ট্রীটতা লৈবা বৃটিশ ম্যুজিয়মদা গ্রীক অমসুং রোমানশিংগী অরিবা মতমগী আর্ট, কলচর, আর্কিটেকচর, এথনোগ্রাফি ময়ামদু উরগা মীওইবগী মমল, মীওইবগী মতিক হেন্না খঙলকই:

ইথন্তা শোঞ্জৈ, অরিবা সভ্যতাগী তীর্থনি হায়রিবা মফমশিং অসি পরিক্রমা তৌদুনা পোকচমনগী পুন্য তানদবা য়াদে। অমুখক্তং ফংজবা পুন্সিনি লেম্নদি করম্না মাঙহল্লুনি?” (লাঃ ৫৯)

মীওইবনা মানা-মানা থাজবা ধর্ম্মগী মতুংইন্না লাইফম চৎনৈ; চৎনরিবশিং অসি পুন্য তানবগী ৱাখলদনি। লাই থাজদবা শোণীগীদি মীওইবগী মতীক্তা থাজৈ; লম কোয়দুনা অরিবা সভ্যতা কয়া য়েংবনা পুন্য তানবনি হায়না লৌই। লম কোয়ববু পুন্য তানবগী থাক য়ৌনা পুখৎলকপা অশেংবা লমকোয়মীনি, শোণী।

 

লন্দনগী টোটেনহাম কোর্ট রোদ শোণীগী লমকোয় দাইরীদা ময়েক লানা চোংথোক্লিবা মফম অমনি। মফম অসিগী লৈনুং রেলগী নোংচুপ থংবা থোঙজিন মনাকমক্তদা লৈবা খবরগী ষ্টোল মচাগী মপু দ্যুক অমদি মফমদুমক্তদা অয়ুক অমদা থেংনখিবী জপানিজ নিঙোল হারুয়ো নকাজরা অনীমক অইবগী থম্মোয়নুংদা নীংশিং মৈরী ওইনা ঙান্দুনা লৈরি। ইটালিয়ানশিংগী লীচৎ, ফ্রেঞ্চশিংগী লোনচৎ ইংরেজশিংগী শাজৎ লমকোয়মী অমা ওইনা অইবনা মুন্না খঙই। অইবগী মীৎয়েংদা ইটালিয়ান ৱা ঙাঙগল্লি; ফ্রেঞ্চশিং রোমান্টিক ওই; ইমোসন লোত্তে; ইংরেজশিংদি য়াম্না রিজার্ভ ওইবা মশাগী ৱা কয়া ফোঙদোক্‌নদবা জাতিনি। ‘লন্দনরশিংগী নূংগুম্লবা থম্মোয়’ ওইদুনসু অইবনা তকশিন্দুনা দ্যুক্কী থম্মোয় মরোল থোকহল্লকখি। দ্যুকনা অইববু মণিপুরীনি, ইম্ফালদগীনি খঙলকপদগী খংলু লুনা তৌদুনা য়োল্লিবা পাউচে ফাওবা শেল লৌদনা পীরকখি। মিনুংশি অসিগী মরুমদা করি লৈরিবগে হায়বসিনি অইবনা খৌরাংনা খঙনীংলিবনা। থম্মোয়গী ৱা থম্মোয়না তাদবা ঙম্ব্রা! ময়াম্বা দোনাল্ডগা লোয়ননা দ্যুক মালেমগী অনীশুবা লাঞ্জাওদা ইম্ফাল য়ৌরক্লম্বা লান্মীনি; ময়াম্বা দোনাল্ড জপানিজশিংগী মখূত্তা লৈখিদে। দ্যুক্কী থম্মোয়দা ফুমদুনা থম্লিবা অরোনবা আশাদি লোট্টরি ফাওরবদি ময়াম্বগী নীংশিং খুভম লৈরিবা ইম্ফালদা চৎকে হায়বসিনি। ভারতকী নোংপোকথংবা চিদাইদা লৈবা অপীকপা লমদম অমগী নীংশিংববু থম্মোয়দা থূপ্না ঈরাৎলিবা ইমোসন উৎকন্দবা ইংরেজ অমগী থম্মোয়গী ৱারী লমকোয়মী অমগী নীংশিং ঈচেলদা তিল্লরে। মসিসু পুন্য তানবগী খুদম অমনি।

 

শোণীগী নীংশিং লম্বীদা টোটেনহাম কোর্ট রোদকা শাগোন্ননা লংনা ঙাল্লিবী অমনা হারুয়ো নকাজৱানি। অইবগী লমকোয় খোঙচৎকী খোঙবুনি। পুন্সি খোঙচৎকী খোঙবুমক ওইখিদ্রবসু অইবগী থম্মোয়নুংগী পুজারিদি ওইরিবীনি। জাপান্দগী য়ুরোপতা লম কোয়বা লাকপদা লন্দনগী টোটেনহাম কোর্ট রোদতা অইবনা থেংনবনি। লমকোয়নীংবগী নিশা মান্নবনা খোঙবু ওইমিন্নখি; ঙাওমিন্নখি; পূকনিং হকচাং অমত্তা ওইশিনখি। অইবগী ৱাহৈদা; ঐবু খুৎ শম্লগা নম-হাদুনা য়ুরোপ, এসিয়াগী লৈরক-খুঙ্গং শহর শীনবা থুংনা পুবিখীবীনি হায়না হারুয়ো শীংথারি। লমকোয় খোঙচৎকী লমজিংবীনি হায়না শক্তাক্লি। খোঙচৎ হায়রিবা লমকোয়ৱারীগী লাইরিক অসিমক হারুয়ো নকাজৱাগী মফমদা কৎথোক্লি। লমকোয়বদা লূপচবী হারুয়োনা রোমগী কোলোসিয়মগী মনুংদা পুৱারীগী মনম চেল্লবা থৌদোক্‌না মথৱায় থাখ্রবা অকল-অথৌ গ্লাদিয়েটরশিংগী ঈরিক য়াওরবা চোইনা তারিবা অঙাংবা নূংকূপশিং খূনগত্তুনা মরূপ-মপাশিংদা খূদোল তম্নবা থৌরাং তৌজৈ। মীৎকূপসিদা অইবগী ৱাখলগী ঈচেলদা কোলোসিয়মগী নুংশিৎ অদুনা ইপোম হৌহন্দুনা কবি লাইশ্রম সমরেন্দ্র (১৯২৫-২০১৬)গী মরায়বকপু নূংনা শুগাইজনীংলবা লায়রবশিংগী লাইবকপু শৈথাবা শৈরেং অমা নীংশিংলকই (লাইরবগী ৱা;, ৱা অমত্তা হায়গে তেলঙ্গ, ১৯৬২)। অকন-অথৌগী হিদান্নবদা শাক্ষি ওইখিবা নূং অমরোমদনা লায়রবশিংনা পুরিবা হিংবগী পোৎলুম্বু মশক তাক্লিবা নূং- খেন্নরবা ফীভম অনী মতম অমত্তদা অইবগী পূক্‌নিংদা ফাওরকই। ‘নুং’ না ৱাহৌ ওইরগা খেন্নবা ফিভম অমা চিংশিল্লক্লিবসি লৈবাক-খুন্নাইনা মীরায়বিরবা মীওইশিং (মার্জিনেলাইজ তৌবিরবা) অসি শোণীনা নুংশিজবনা মহাক্কি নীংশিংবগী ঈচেলদা চেনল্লিকপনি হায়বসি থোইনা হেন্না ময়েক শেংহল্লে।

 

লমকোয় খোঙচৎকী খোঙবু চহী অহুমরোম (১৯৭৩-১৯৭৬) ওইমিন্নরম্বী হারুয়োদি খুজেং পালোয়ননা লমকোয় খোঙচৎকী লমজিংবী ওইবতা নত্তনা শোণীগী থম্মোয়গীসু থাউমৈনি। খৃষ্ট কুম ১৯৮৮দা হারুয়োনা শোণীগী পুন্সি খোঙলোয় ওইনবা কানাদাদা লাকখি। অদুবু মথংলেনগী ওয়দা ঙানবী লৈরম্লে; লুহোংলীপুন্না কনাগুম্বী অমগা পুনশিল্লম্লে। লাইবক চাউবী পিতঙঙাগুম ময়ুম লমদম জাপানদা হনখি। য়ুরোপ কোয়বা খোঙচত্তা মথংলেনগী ঈ নাউপুখিবনি। অদুবু তাইবং ফাওবা ঙমখিদ্রবা মচাগী মমা ওইখিবী হারুয়ো অনৌবা পুন্সি খোঙবু থিখিদ্রে। জাপান্দা মথন্তা নাইতোম হিংলি। লৈমিন্নদবা ঙাক্তনা থাপ্নবদি নত্তে। থম্মোয় চাউবী হারুয়োনা মহাক্কি চান্নথোইববু ঙাকপিখি। ৱারৌচাউবী ওইনচাউবী ওইনা ইন্থোকখিদে। ঙসি ফাওবদা পুন্সিগী অৱা-নুংঙাইগী  পাউ ফাওনরি কানাদাগী শোণীগা জাপানগী হারুয়োগা। পুন্সি নুমিদাংৱাইরম য়ৌরক্লে। তূমখুন তাদ্রিবা ফাওবদি হারুয়োগী নীংশীং থাউমৈ শোণীগী থম্মোয়দা ঙান্দুনা লৈরগনি। পূকচেল চাউবী জাপানিজ নিঙোল হারুয়োগী নীংশিং মূর্ত্তি।

 

রোম য়ৌরকপদা শোণীগী থম্মোয়দা কাউঙমদবদি মাইকেল এঞ্জেলোগী ‘পীয়েটা’নি। মমা-মপাগী নুংশিবদগী লমকোয়বনা হেন্না ঙাউজবা শোণীগী থূপ্লবা থম্মোয়গী কাচিন্দা মমাবু নুংশিজবগী শেংলবা খুভম অমা লাত্তুনা থম্লি। মচা তরা নাউকোনবদা অমদি য়ূম্বানবগী অৱা-অনা নোংলৈনা হন্না-হন্না য়ৈদুনসু চীং-লেম্না  পুন্সিবু মায়োক্‌নখিবী মমা ইবেম্মবু ফনা মঙাও থীবা মচা ওইদুনসু অইবনা চেৎনা নুংশিজৈ। জমিন্দারগী ইমুংগী নিঙোলনী অদুম ওইনমক শেন্থোক য়ামদবা মওংদা শূবা-নোম্বা লেপখিদে। ‘পীয়েটা’গী লাইয়েক অদু য়েংলুরগা ফাওরকপা থম্মোয়গী শেংলবা ইহুলনা মমাবু ঈরাৎনচরিবা থম্মোয়গী খুভম অদুবু হন্না হন্না শেংদোকচৈ। ‘পীয়েটা’ মেরিনা মচা যীশুগী অশিবা মশাদু মতম্বাক্তা কোল্লগা মুন্না য়েংদুনা লৈবা মার্বলগী মূর্ত্তিনি। অইবগী থনুংগী মীৎনা ৱাহন্থোক্‌না থল্লবা মেরিগী মীৎস্নাগী মরুমদা মচা কায়নবগী নুংহীক্‌নরবা মমাগী মায়থোঙগী মমি উখি। মরাল লৈতনা মরাল লৈহনবিরবী তুশোন্নরবী মেহেরাবনুগী মায়থোঙসু ‘পীয়েটা’গী লাইয়েক্তুদা চোংথোকপগুম উরকই। শোণীদদি ‘পীয়েটা’ ফোঙঙমদ্রবা অৱা-অনাগী অমদি শেংলবা থম্মোয়গী মমি তারিবা লংলবা শিংশেলনি। অইবনা “পীয়েটা’ ঐগী শেংলবা মিৎলুগী পিরাংনি’ (লাঃ ৭৪) হায়না ফোঙদোকচৈ। খমথেংনা ঙাওশিন্নবা মানবা মীওই অমদা থুপতুনা লৈরিবা থম্মোয়গী অশেংবা নুংশিবগী সিম্বোল ওইনা অইবনা ‘পীয়েটা’বু শীজিন্নরকই। ‘পীয়েটা’ শোণীগী থম্মোয়গী শক্লোন অমগী সিম্বোলনী।

 

চহী কয়াগী মমাঙদা মৈগী চীং বিসুভিয়সকবী তমথীরবা লাভাশিংনা ফুমজিনখ্রবা পোম্পৈ শহর শোণীগী লমকোয় খোঙচৎকী কাউঙমদ্রবা মফম অমনি। মহৌশাগী তমথীবা মশাজৎ অমদি মীওইবনা শেমগৎচবা সভ্যতা লাইবক অনিগী অপূনবা মপাউ পুরিবা পুৱারীগী মফম অসি অইবনা “ঐগী পুন্সিগী পেন্নাইদ্রবা পোত্থাফমনি” (লাঃ ৭৮) হায়না শিংথারি। খৃষ্টগী তরাতরেৎশুবা চহীচাগী লোইরমদাইদা টন্নেল তৌবা মতমদা থেংনবা হৌরকখিবা পোম্পৈ শহরনা মীওইবগী সভ্যতাগী চাওখোল্লবা ফিজোল শেৎলগা মতমগী থারবা ফৈজুপ্না শূপচিল্লগা লৈনুংদা য়াতাদুনা লৈরম্লি। মীওইবগী হৈ-শিংবা খূৎনা থারবা লৈরোল কয়া হাইদোক্তুনা পোম্পৈ শহর অমুক হন্না তাইবং মীৎমাঙদা পুথোক্‌নরে। লোর্দ লিট্টলগী দ লাষ্ট দেজ ওফ পোম্পৈগী ৱারীদা য়াওবা ফুমজিনখ্রবা শহর অসিনা অশেংবা ইতিহাসকী মফম ওইমদুনা লমকোয়মী ওইরিবা অইবনা পোম্পৈগী লৈমায়দা শোকচবদা মখৈ ফংনা নুংঙাইজখি। মহৌশাগী তমথীবা শাজৎনা মীওইবগী সভ্যতাবু য়োৎশিনবা, মীওইবনা অমুক হৌগৎলকপা মতমগী খোঙচৎকী পাউখোংনি। মচৎ অসিবু উৎথোকফম ওইরিবা পোম্পৈগী লৈমায়দা লেপ্লুবদনি অইবনা নুংঙাইজরিবা।

 

শোণীগী লমকোয় খোঙচত্তা খোঙবু ওইমিন্নবা অতোপ্পা মীশক অমনা জাপানিজ মচা সতোসি-নি। সতোসিগা লোয়ননা খোঙচত্তা ভিয়েনাদা থেংনখিবা কাউঙমদ্রবা থৌদোক্তি বৃটিশ নুপীমচা অমনা ট্রেন মনুংদা খোংখিবা বাঁসিগী সুর অদুনি। বাঁসিগী খোঞ্জেলনা অইবগী থম্মোয় পূমশুম শুহ্মৎখি। শোণীগী ধর্মদি কলানি, কলাবু ঈরাৎচবনি:

 

 অচুম্বনি, কলাদা ওয়েষ্টর্ন-ইষ্টর্ন, জাতি-বিজাতি, ধর্ম্ম নাইদে হায়বদু। মীবু মীদগী খায়দোক্তে। ঐঙোন্দদি মদু ধর্মদগীসু হেনবনি খল্লি। (লাঃ ১০৪)

 

কলাগী লাইনিং-ঈনুংবুংদা লূপচবা পাম্বদগী থোরকপা খোঞ্জেলনি।

 

অঙাং ওইরিঙৈদগী লাইনিং ওইদুনা লাক্লবা শকখঙনদ্রিবা লমদমশিংগা থেংননীংবগী অচেৎপা ফিরেপ্না য়ুরোপকী লৈমায়দা খোঙদাদুনা চৎলকপদা মফম মফমদুদগী পাউদম পীবতা নত্তনা পুকিèংদা ফাত্তরকপা ঈথিলশিংসু মতাং মতাংদা ফোঙদোকপনা অইবগী পুকিèং ৱাখলগী শাথেক উবা ফংই। পেরিস য়ৌরুরগা পুক্‌নিং চিংশিন্নীংঙাই ওইনা মকে শেম্লবী ‘সাাঁজে লিজে’গী লম্বীদা হাই হুম্না চৎলুদ্রবা মীবু মীনি হায়না শীংথানদবনা অইবসু লম্বীসিদা চৎলুই। চাউখৎপগী নাপলনা লৈতেংলবী ‘সাঁজে লিজে’গী লম্বীদা চৎনা চৎনা মমালৈবাক অনীগী শক্তম নীংশিংলকই- ইম্ফালগী পাউনা বাজারগী চগুংনরবা দুকান, সিনেমা হোল অমসুং বাংলাদেশকী সিলেটকী বন্দর বাজারগী রিক্সোনা খুরক হাঙদ্রবা লম্বীশিং। মীরৈবাক্কা মরমদমদা অনীগী কা-হেন্না খেন্নবা মতৌসিনা অইবগী পুক্‌নিংবু খোয়রাং খোয়শাওহনখি। কল্লক-মিহৌবা শাউনীংবতা নত্তনা কপনীংবসু ফাওহনখি। ফাথবা ঙমদ্রবা ইহুলশিং অসিনা আর্ক দ ট্রিয়োম্ফপু কোয়না খারিবা য়োহ্লিংদা য়ুগী লীক্লি থুগায়দুনা ওমখৎলক্লিবা ইহুলশিংগী ইখায়ফম থিরকই। পিকাসোগী নীংশিং খুভম ওইনা স্পেনগী বার্সেলোনাদা লৈরম্বা য়ুমদগী ম্যুজিয়ম ওন্থোক্লবা য়ুম অদুগী থোঙগী অহোবা মখুল অমদা সিগরেট উপুগী মখুমদা ডা. কমলগী ‘মৈতৈ চনু’ হায়বা শৈরেংদগী লৌথোকপা পরেং খরা শোণীনা ইরগা থম্লুই;

 

     অথাপ্পদা লৈবা অনকপদা লৈবা

       অচৌবসু অপীকপসু

       নীংনসি মৈতৈ চনুগী মচানি।

       লৈগী পরেং তত্তনবা।

 

অইবনা মজাতিবু মমালেনবু নুংশিজবগী ইহুলদগী কবি কমলগী শৈরেংগী পরেং খরসি ইনীংখিবনি। চাওখৎপগী নুংঙাই-য়াইফ, অরং-অরাক্‌না মজাতিবু নুঙশিবগী ৱাখল মুৎথৎপা ঙমদে। মথানুংদা চেৎনা কোন্দুনা পুরি।

স্পেনগী বর্সেলোনগী মশাইকোন্দা ডা. কমলগী শৈরেং নীংশিংলকপগী মরমদি অইবগী থম্মোয়গী কাখলশিংদা অঙাং ওইরিঙৈদগী হৌনা খোরিরোলনা কনশিন্দুনা থম্বা মফম লৈরকই। নহা ওইরিঙৈদগী অনিল কিষণ সিংহগা লোয়ননা ‘সঞ্চয়’ কৌবা হোম লাইব্রেরী অমা শেমগত্তুনা খোরিলবু য়োকখৎপা পামজরকই। খৃষ্ট কুম ১৯৬২ আই এ পাস তৌবা চহীদা ‘একটি মানুষ ও একটি সন্ধ্যা’ (মী অমা সন্ধ্যা অমা) হায়বা শোণীনা ইবা ৱারীমচাসিনা ফাষ্ট তারে হায়দুনা ব্যুরো অফ নেসন্যাল রিকল্যাক্সন, ইষ্ট পাকিস্তাননা সার্টিফেকেটকা কোন্ননা পাকিস্তান রুপী ৩৭৫ মনা ওইনা পীরকখি। শেনফম অসিনা চেঙজেল ওইনদুনা গৌহাটিগীদমক খোঙ শান্দোরকই। খৃষ্ট কুম ১৯৬৫ দা বিএ পাস তৌরবা মতুংদা পুণেদা ফিল্ম ইনস্টিটিউটতা দিরেক্সন কোর্স লৌদুনা থা মরিরোম তম্লবা মতুংদা ময়াম্বশিংনা কৌথোক্লকখি। মপুং ফাদনা তম্বা তোকপদো মমান্নবশিংগী মমাঙদা ইকায়বদগী ইম্ফালদা থোরকপগী মহুত্তা গৌহাটিদা লমদখি। হিংনবগীদমক মরূপ অমনা পুশিনবিদুনা ‘হাউজি’ লাউথোকপগী থবক তৌই। পাউ অসি তাবদগী তাতোমচানা (ময়াম্বা ডা. অমর) শেল পীদুনা ইম্ফালদা থোকহল্লকখি। খৃষ্ট কুম ১৯৬৭ তা শোণীগী কোয়ঙাওনরুরবা পুকিèংনা খোরিরোলদা লুপশিল্লকই। রতন থিয়াম, আর কে বিদুরনচিংবা মরূপশিংগা লাসানী হায়না থাখায়গী ওইনা ফোঙবা চেফোঙ অমা থৱায় য়াওনা পুথোকখি।  ঋতু দসু শৈরেং ফোঙখি। মপাবুং মশা ঙমদ্রে হায়রকপদগী চহীসিগী (১৯৬৭) লোইরমদাইদা সিলেটতা হল্লি। মফমদুদা চয়োলগী চেফোঙ যুগভেরীগী সাহিত্যগী সেক্সন পুদুনা শৈরেং, ৱারীমচা কয়া ফোঙদোকপা য়ানবা শেমদোক শাদোক্তুনা থৱায় য়াওনা হোৎনৈ। লফাংলবা পুন্সি খোঙচৎকী লমদাং কয়াদা চৎলুরবসু শোণীগী পুন্সিংগী পোত্থাফমদি সাহিত্য সেবাদা ওইরি। খোরিরোলগী লৈহাও চেল্লবা পুক্‌নিংদগী পুন্সি অমদি লমকোয় খোঙচৎ অনীনা তিনশিন্নরগা নুংশিরবা সুর অমা শেমদুনা খোঙচৎ পুথোরকই। অঙাং ওইরিঙৈদগী হোম লাইব্রেরী লিংখৎমিন্নদুনা সাহিত্যগী খোঙবু ওইমিন্নরকখিবা অনিল কৃষণনা খোঙচৎপু বাংলাদা পথ চলতে, চলতে হায়না খৃষ্ট কুম ২০০৬কী দিসেম্বরদা হন্দোক্তুনা ফোঙখি। বাংলাদেশতা মাইনোরিটি ওইনা লৈরিবা বাংলাদা মমালোনসু ওইদুবা মৈতৈ মচা অমনা ইথোরকপা খুৎই উবদা ঙক্‌না নুংঙাইনখি। শোণীগী খোঙচৎতা মৈতৈ জাতিবু চিংখৎলে। বাংলা সাহিত্যদা মথুম মরাং হৌহনখি। সাহিত্যদি মীচং মীখায় নাইদে। মনম নুঙশিবা লৈগুম্না লৈনম শন্দোকই।

 

 অহল লমন্না নুংশিনা থোনবিবা মচানুপা অতোম্বগী মিংনা মণিহারনি। মশানা শোণী হায়না পামজনা ওন্থোক্তুনা খোরিরোলগী তাইবংদদি পুম্নমক্‌না মিং অসিবুনা হেন্না খঙনরে। মিংথোল অসিগী হৌরকফমদি শোণীগী মরূপ অহুম্না মহাকপু খঙহন্নীংদবা থবক থৌরমশিংদা মহাক্‌না হেক্তমক তাঞ্জা চান্নারুবা কয়াদগী অফবা থবক থৌরমদা য়ৈখায়বা পীবা ‘শণি’গুম্না মীথিঙ্গাই ওই হায়দুনা ‘শোণী’ কৌখিবনি। অইবনা মশানা মিং অসি খরা লূমহনবা পামজবদগী বানান শেমদোক্তুনা ‘শোণী’ ওইখি। মতা চান্ননা ৱাহৈ অসিগী ৱাহন্থোক লৈরম্লে। বাংলাদা ‘তরামদাই নুমিৎকী অরোইবা মঙাল’ হায়বা ওইরম্লে। অফবা-ফত্তবা, অওকপা-ওক্তবা কাচিন-কোয়া য়ৌনা চঙলুবা মঙাও থীবা ‘মরম ওকপা হায়বা ইনবা অফবা পাখঙ’গী মার্কাদগী মনীং তৌনা চোংথোক্তুনা কোয়চৎ চৎখিবা শণিনা শোণী ‘তারমদাই নুমিৎকী অরোইবা মঙাল ওইনা’ খোরিরোলবু পামজবশিংগী থম্মোয়দা ঙাল্লরে। তশেংনমক মপুন্সিগী অথেঙবদা ফোঙলকপা শোণীগী লমকোয়ৱারীশিং ঙান্দুনা লৈহৌরগনি।

লমকোয় খোঙচৎকী মরক খায়না-খায়না চেনশিল্লক্লিবা পুন্সি খোঙচৎকী শরুক অমা ওইরিবা অঙাং ওইরিঙৈ অমদি মথোক কারকপগী নীংশিং ইপোমশিং অসিনা অইবগী মশক তাকই। ফনা মঙাও থীরবসু মীওইববু নুংশিবগী অশেংবা থম্মোয় উবা ফংই। নীংশিং মূর্ত্তিশিং অসিনা শোণীবু ঙান্থোকহল্লি। লমকোয়ৱারীনা তোপ্না তারিবা। লমকোয়নীংবগী অচেৎপা ৱাশক লৈবা, লম কোয়ববু মথৌমক ওইনা খনবা, মশাগী পূক্‌নিং ইহুল, লমচৎকী অচেৎ-অকোম শেংনা তিংনা হায়দোকপা ঙম্বা লমকোয়মী অমগী ৱাখলগী ঈচেলনা পুথরকপা লমকোয় ৱারোলগী শকয়েক কয়া য়াওবা হৌজিক ফাওবদা ফোঙলবা লমকোয়ৱারীশিংগী মরক্তা তোপ-তোপ্পা মহাও পীরিবা শোণীগী লমকোয়ৱারীনি।

 

মরী লৈনবা লাইরিকশিং

১। শোণী, ঐগী অমম-অঙাল পুন্সি (সেন্সর তৌদ্রবা পুন্সি ৱারী), অশাংবা কমিউনিকেসন, ইম্ফাল, ২০২০

২। শোণী, খোঙচৎ, সনথোঙ, ইম্ফাল, অনীশুবা খুৎনম, ২০০৩

৩। হাওবম গৌরদাস সিংহ (এডিতর), মণিপুরী সাহিত্যগী মমল লেপ্পা, নহারোল সাহিত্য প্রেমী সমিতি, ইম্ফাল, অহুমশুবা খুৎনম, ২০২০

৪। লৈমরোল খোর্জ্জৈকোল (লৈকোল)না পাঙথোকপা সেমিনার, ‘অনৌবা মণিপুরী ৱারেংগী মশক নৈনবা’, জৱাহেরলাল নেহেরু মণিপুর দান্স একাদেমী, ইম্ফাল, ১৯ নভেম্বর ২০০৬

৫। Shobhana Bhattacharji (Ed.), Travel Writing in India, Sahitya Akademi, New Delhi, 2008



 

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু