• 527
• ১৫ই এপ্রিল ২০২২ ইং
• Share on:

মণিপুরগী ১৫শুবা মমি নুমিৎকী থৌরম পাঙথোকখ্রে

খোন্থাং য়ৈনা খোংলম্বা

---

লৈরম্মী মতম্ অমদা ,

কোকিল্ নহা খোন্নৌবা ।

 

খোন্থাং শিন্না নিল্লদুনা,

মায়কৈ থুংনা পাইরকপা,

খুনিঙ্ কাঙনা য়েংনখি,

কুহু খোন্জেল খৌরাংনখি ।

 

নঙগী মিরবা খোন্থোক্না,

তাইবং থম্মোয় শুমহৎনখি ।

 

ওন্থোকপনি তাইবং কুমহৈ ,

নীংবনা অমা তম্বনা অমা ।

 

খোন্থাং য়ৈনা খোংলম্বা,

লেপখ্রে ঙসিদি খঙহৌদনা ।

 

খোয়থুম্নরা নুংশি খোন্জেলনা,

লোইজিং লোইয়া নিল্লম্বা,

থাবুম্ য়াম্লকলে তারকখিদবা।

কল্লক্ চাউবা তাইবংশিদা,

হুমখ্রবরা হুগী নোংলৈনা।

 

অদুবু ,,,,

লৈজবা থৌনা উত্তুনা ,

চৎলি মহাক্তি শিন্থুংনা,

পাইরি শাখপ্ তোয়না,

শৈশকখিদ্রবা চেক্লা ওইনা ।

 

তোংলি উশা খুদিঙদা,

খুৎশা লৈখন তাদুনা,

য়েংলি মফম্ কয়াদা ,

থৱায়দুনা হিংলিমখৈ লেপ্তনা,

য়েল্লমগে মতাগুম্ নুংশিবা ,

নঙগুম্না তোঙলিবা ঊশাদুদা।

 

খোংবদি খোংজনিং পেন্না,

খোংজবদি ঙমজদা মহৌশাগুম্ ,

মালঙগী ঈপাক্তা তাউদুনা,

পাইরি মায়কৈ শিনথুংনা ।

 

লেপখিনু খোঙচৎ নহাক্কি,

চেন্থখো ঈচেল্ পুন্সিগী ,

মপান্ নাইদ্রবা ইপোমলক্তা,

শান্নরখো ননীং তম্না ।

 

নঙগি ৱাখল ঈথক্না

শীনখিসনু মালেম্ থুংনবা ,

য়েল্লম্মু মফম্ খুদিঙদা ,

নঙগী নুংশি ঈরিক্না।

 

মুৎখিদনবা মতম্ খুদিঙদা ,

য়েল্লম্মু লৈনম্ থুংননবা।।

খোন্জেল্ থোকত্রবা খোন্থাংদুনা,

নিলহৌরসনু তাইবং থুংনবা ।

 

থৱায় পানবা মপোক্নি ,

পোকঙমদনা পোক্লিবা মীওইপোক,

তম্বা ঙমদে কনানসু,

হল্লক্কনি হল্লক্লরোই খঙদবা ।

 

য়েংলমখো থৌজালগী মীৎয়েংনা

কনানসু য়ৌশীন্বীদ্রবা' মফমদুদা ,

নুংশিনা নাল্লম্মু নখুত্তুনা,

মৈচাক্নরবা নঙগুম্বা থৱায়শিংদুদা।

 

   খোঙ্গুল অমত্তং 

 

নংহৌব্রা ফাবা ?

হৌখিবা মতমশিং,

থায়না ওনখ্রবশিংদো ।।

তকশিতা শোল্লগা চৎখি,

অসুম্ চৎখি খঙহৌদনা ।।

খল্লুই লোইনাইদ্রবগুম্,

য়ৈথোকখি মতম্ কয়া,

তৌফম্ থোক্লবা ইথৌশিং,

হোরেনগী হয়েংগী হংচিৎকি ।।

অসুম্ লাপথোকখি,

য়াম্না লাপথোকখি,

অদুদগী ওইখি থায়না,

মথায় থায়না ।।

হেক্ থংনবা মীকুপ্তদি,

কয়াদা নক্না লৈরম্লবা ,

অরোইবা চৈখৈগী মনাক্তুদা,

লেপ্তুনা লৈরম্লে ঐহাকসু ।।

ঙরাং ওইরম্বা ঐগি শক্তম্,

ঙসিদি মঙাল্ ফাওরমদ্রে,

অহোংবতনা পিক্ থল্লম্লে ।।

অনৌবা য়েন্নিঙ্ হুল্লমদ্রে,

কিন্থগদবগি ঙাইদুনা লৈরম্লে,

মন্থরম্লে হকচাংসু ।।

মাঙখ্রে লোইনা ঙসিদি,

ঐগীনি হায়না তম্লকপা মখৈ ।।

হে পুক্নিং !

হুনখো য়েন্নিঙ্,

চোংখো হানৌ,

য়াইফরবা হয়েং অমগিদমক্,

নংহৌদ্রে খন্দুনা করিমত্তা,

মাঙখিনু তুমিন্না লৈরোন্নুংদা ।।

শীংনরমখো থৌনা লৈনা,

খুদোনবী উত্তুনা অমুক্তংদি,

হয়েংগী অনৌবা লম্বী অমগী ।।

থাশিরমদাইগি মুশিরবা মঙাল্লক্তা,

চুখৎলমখো মৈরী অমত্তং ।।

নংহৌদ্রে হায়দুনা শিন্থা পাঙবা,

কপ্তুনা লৈথোক্কদ্রা নীংঙয়দনা,

খল্লরোইদরা করিমত্তা অঙাওবীগুম্ ।।

নুমিৎনা চীংয়া থাংখ্রবসু,

কোরৌনা নারল্ ৱায়রক্লবসু,

থাশিরমদাই অহীং ওইখ্রবসু ,

লৈরিদনা,

মুশিরবা মঙাল্ অমত্তংদি ।।

নীংঙমদবগি নুংদা চাক্লিবা,

মৈরা অদো চমখৎখো,

মপান্ থোক্না চাকহল্লু ,

মদুগি মঙাল্ ফাওহল্লু ।।

খল্লুরনু ঙরাংগীদমক্,

কাউথোকখ্রো নীংঙমদবা অহীং,

ঙরাংনা চৎখ্রবসু খঙহৌদনা,

ঙসিদি থম্লম্মু খোঙ্গুল্ অমত্তং,

হয়েংগি য়াইফরবা পুন্সিগীদমক্ ।।

 

মী লল্লোন্বা

---

অহাঙবা তরঙ্ মালং,

অরোয়বা হায়বদু উদ্রবা,

ৱাখলনা য়ৌবা ঙমদ্রবা,

লৈ হায়নৈ মফমদু,

মঙলানগী লৈকোলদগিসু হেল্লবা ।

অদুগা

অমরোমদনা অমুকসু ,

অপুম্ অশাতনা থল্লবা,

শক্ফম্ কায়রবা কয়াগি্

অৱা তেংথাখোলতনা থল্লিবা,

য়েংহৈদ্রবা মফম্নি মফম্'মা !

তাইবংদা লৈরিবা খুদিংনা,

নোংমত য়ৌরুদে লৈকোলদুদা,

পুন্সিগি কল্লবা শিন্থালক্তা,

খন্থবা শংনদে মফমদুগি।

হায়নৈ মীপুম খুদিংনা,

চৎশি নোংমা মফমদুদা,

ঐসু মখল্লি নোংমদি,

মফমদুদা শোয়দনা য়ৌরুগনি।

করি ইরালবু লঙজরুবননো?

নীংশীংলুদে খল্লুদে চৎননবা!

ওইথোক্লরোইদবা মঙলান্দুগি।

মসিমক্না ওইরিদ্রা লাউনরিবা,

খোঙনরিবা, ঙাংনরিবা, চৈনরিবা!

নাপলনা মথোই কানরিবা !

হায়রি লাউরি হন্না-হন্না,

মকুম্ মথা য়ৌরকপদা;

য়ৌহনগনি মফমদো শোয়দনা,

সনাগি কৈরাক থাদুনা,

মীপুম খুদিঙ্ নুংঙাইহনগনি।

খল্লুই চুম্বাজাৎলা মসিবো?

মঙগি ৱাবু তাইবং ফাওহনবা!

ওইররোইদৌবা মঙলানগি ৱারী!

তূ চুংই খ্যাও-খ্যাও!

নোক্নিংবসু পোক্লক্ই ইথন্তা,

মী লল্লোনবশিংগি ৱারীদা,

মী লল্লোনবগি ৱারিদা।

 

 অমত্তনি

 

অসুক্ ফজরবী মায়থোং,

অসুক্ নীংথীরবী শক্তম্,

অসুক্ নুংশিরবী মতৌ,

উরক্লি খঙলক্লি ঙসিতা ।।

 

নীংঙোলনি নহাকসু লমদমসিগী,

ঈমাগী তম্পাকসিদা হৌমীন্নরকপা,

মমোমশিংগী মরক্তসু নঙসে ।।

 

নঙগী কোকখুম্ ফিদুনা,

তাক্লি থকশি খাশিসু,

য়েক্লি নঙগী লমচৎপু,

চেকশিন্ খোমজিল্লবী নতৌনা ।।

 

ময়েক্ নাইবি ফনেক্নে,

মোইরাং ফিজন্ ইন্নফিসিনে,

কয়াদা চঙখোন্না লেপ্লিবা,

থৌনা লৈনা মাঙশিদা ।।

 

মীতৈ চনুগী খোয়জিখাদা,

নাউয়েক্ নাউতমদুনা পোকখিবী,

ঈ নিকো নহাকসু ঈমাগী,

অশেংবা ঈফুরুপকি ঈশেংনি।।

 

১৭ শুবা চহীচাদা,

ইনিংথৌ পোইরৈহনবা খাগেম্বগী,

মীচেল্ ওইখ্রবা শানৌতোন্,

য়াইস্কুল্ লাকপা শানোঙবগী,

লাল্ পাংগনি লাকখিবা,

মুহম্মদ শানিগী লীচিংখাদা

মাইথিখ্রবসু মখোয়না,

মৈদিংঙুগী ফজবা পুকচেলনা,

য়াইফ থৌজাল্ কুবিখি।।

 

থৌজাল্ লৈবা ইনিংথৌনা,

খুৎ-শা হৈবা মখোয়বু,

মীতৈ ঈচেলদা ঈতিনহন্দুনা,

নীংঙোলশিং পীদুনা য়ুমদাহনখিবা ।।

 

নখোয়গি য়ুম্নাক্ শাগৈনা,

লীরিনে ৱারী হৌরকঙৈগি,

কাউবা লৈতনা ঙসিসু ।।

 

পাঙ্গল্ লৈবা পাঙ্গল্লবশা,

খুৎ-শা হৈবা খুৎহৈবশা,

লমদম্ কংলৈ মশুংলাংগী,

অৱাবু মায়থীবা পীবদা,

অচৌবা মতেং পীখিবা ।।

 

থৌনা পাঙ্গল্ পুথোক্তুনা,

ইচঙ্ থৌনা কংলৈপাক্কি,

খোঙফম্ চেৎনা লেপখিবা,

অদুনোংগীবু হায়দবরা,

পাঙ্গল্ কৌখি পাঙ্গলবু ।।

 

পারী-পুরি তুংইন্না,

ইসলাম্ লাইনীং চত্তুনা,

নঙগী লাইনীং তোঙানখ্রবসু,

য়াওরিনে নঙগী হকচাংদা,

মান্নবা ঈগী ঈচেলশিং,

ঈমাগী অথৌবী মমোম্নি

খ্বাঙচেৎ মচি লাংলিবীনি।।

 

হা হা কার লাউনদুনা,

চরী তৎনা খাঙনরবদা,

য়াওখি নঙসু নুপী লাল্,

উৎখি থৌনা নঙগীসু,

চাকখাউ হামচৎনরবা ঈরৈবাক্কীদমক,

নোংমৈ শংগিনগা মায়োক্নদুনা।।

 

সনা লৈবাক্ ইরমদমগী,

নীংশীং লমায় পুৱারীদা,

সনাগী ময়েক্না ইখিবা,

নঙবু করম্ কাউগনি।।

 

লাউ চঙশিল্লকউ ইনাকশিদা,

ওয়গা য়েৎকা খুৎশম্ননা,

ইচীল্-ইনাওনি তাক্লমশি,

ঐখোয়গি মান্নবা থৌনানা,

মালেম্ থুংনা খঙহল্লমশি।।