খুইথরবা খুনাইদা য়েন্নিংথাগী আশা পীরিবা শৈরেং লাইরিক “ঐ লৈত্রে”: মীৎয়েং অমা -- তোংব্রম অমরজিৎ
মনিপুরী খূনাইদা মৈতৈ নুপীশিংগী থৌনা অমদি মখোয়গী লীংজেল পুৱারীনা লেংদ্রবা খুদম ওইদুনা লৈরি। লৌশিং লৈবদা অমদি মথৌনা মরিংজেলদা। অদুবু মতমসে য়াম্না হোংলে হায়না কবিনা উরক্লি। অশেংবসু য়াম্না অহোংবা লৈরে মনিপুরসু। অরিবা সোসিয়েল ভেল্যুজ অমদি কলচরেল ইদেন্তিতি অদু কয়াম ঙাকনা হিংলি হায়বসি অচৌবা ৱাহং অমদি ওইরক্লি। অদুনা মহাক্কী পোদোন হায়না মিংথোংবা শৈরেংসিদা মঙালগী মশক ওইরবা নুপী খুনাইগী সিম্বোল অদুনা পোদোননা ওইরগা হেক থংনবা শৈরেংগী পরেংদা ইবেনদি পিশুম ফোয়রি হায়বসিনা পুরিবা নুংগী ৱাহন্থোক অদুদি অপাবশিংদা শিন্নরি। মরমসু হৌজিক হৌজিক্কি খুনাইদা অদুম য়েংবা য়ারনি হায়বনি অশৈবনা হায়নিংলিবদি।
লাইরিক্কী মমিং- ঐ লৈত্রে (২০২২)
অইবাঃ দেবদাস মাইরেম্বম
অফোঙবাঃ খ্বাইরাকপম সনায়াইমা সিংহ
সেক্রেটরি, লোক্তাক খোর্জৈ লূপ
লাইরিক্কী মখূমঃ বিরেন্দ্রজিৎ নাওরেম
লাইরিক্কী মখলঃ শৈরেং/ লমায় মশিং-১৩৩
লাইরিক্কী মমলঃ লূপা ২০০/-
দেবদাস মাইরেম্বম মোইরাং থোয়া লৈকাই মোইরাংদা ১৯৭৩দা তাইবঙ খোঙদারকখি। খোরিলোল পামজনা লাকপনা মহৈ তম্বগী লমদসু ইংলিস লিতরেচরদা পোস্ত-গ্রেজুয়েট লোইশিনখি। মহাকনা মপুং ওইনা ইবদা চংশিল্লিবসি শৈরেংনি। অদুনা শৈরেং লাইরিকঙাক্তা ফোঙলকখি মথং মথং। (১) পাং তিংলিবা যীশু অমা (২০০২); (২) থৱায়গী ঈশৈ (২০০৬); (৩) সাবিত্রি নহাক লুহোংগদবনি (২০১০) অমসুং (৪) হায়নৈ নহাকসে অঙাওবীনি (২০১৭)। অইবগী শৈরেংগী খোঙচৎ অসিদা মহাকনা ২০১৭দা ফোঙখিবা ‘হায়নৈ নহাকসে অঙাওবীনি’ হায়না মিংথোনবা শৈরেং লাইরিক অসিদা রাইটর্স ক্লব, নম্বোলনা ‘চন্দ্রেশ্বর নীংশিং সাহিত্য মনা ২০২০’পীদুনা ইকায়খুম্নবা উৎখি। শৈরেং ইবতা নত্তনা খোরিলোলগী নৈনবগী লমদসু লেপ্তনা চংশিল্লি লোয়ননা ত্রান্সলেসনদসু খুৎ থারি। কলমনিস্ত ওইনা নৈন-ৱারেংশিংসু পোকনফম পাউচেদা ইরি। সাহিত্য একাদেমিনা শিনবা নেশনেল সিম্পোসিয়মশিংদা শরুক য়াদুনা লাক্লি। শৈরেং শৈদিন্নবা কয়াদসু লেপ্তনা শরুক য়াদুনা লাক্লি। শকনাইরবা অইবা লমাবম বীরমনিগী ‘ময়োকনবা’ হায়না মিংথোনবা ইংলিস্তা হন্দোক্তুনা ফোংখ্রে। অমসুং অঙাংগী ৱারীদা কাব্যগী ৱারেপ হায়বসিসু হন্দোকখ্রে। অশৈবা দেবদাস শৈরেং তেন্না ইবদসু য়াম্না ইচং থৌই অমসুং শাংনা ইবদসু পাউজেল কয়া লোয়নবা অমদি অপাবশিংদা ৱাখল য়াম্না খন্থহনবা ঙম্বা খুৎইদসু খুৎ থারি। অতেনবা শৈরেং অমদা মহাকনা ইরিবসি য়েংবা য়াই।
নোংলৈ
করিগুম্বা নোংলৈ হৌরবা/ নীংশিংবিয়ু- ঐ হিংলবনি।/ কিগনু নোংলৈসে/ জগোয়নি/ নোংপোক নিংথৌ, পান্থোইবীগী। লাঃ ২৯
মনিপুরগী ক্রিএসন মিঠ, লৈসেম নোংশেম্বগী ৱারী অদুমক তারি। নৌহৌনা নিংশিংলি কুমওন খুদিং কালেন লাই হরাওবা মতম্না লাকপা খুদিং। অশৈবা দেবদাসনা শিজিন্নরিবা নোংলৈসিমক সিম্বোলনি।রোমান্তিক অমসুং optimist কবি P.B. Shelley মহাক্কি মমিং লৈরবা শৈরেং Ode to the West Wind হায়রিবা অসিদা য়াওরিবা মালেম ফাওরবা পরেংনি If winter comes can spring be far behind হায়বদু দেবদাসকি তেনখ্রবা শৈরেং অসিদসু মমি তারি। তারিবা মমি অসিদি মনিপুরি অশৈবা অমনা ইমা লৈবাক ইরমদম অসিদা পোকলুবা অমদি লমদম অসিগী লৈবাক লৈহাও অমসুং ঈশিং নুংশিত্তা চাওরকপনা মসিনা পীরকপা ইথিলদুনা ইরকপনি নোংলৈ ওইনা। হায়রিবা নোংলৈ অসিমক্তি মাংনা তাকনবা অদুগুম্বা নোংলৈদুদি নত্তে। লাই ঈরিক ঈশেংবু নোংমদোলদগী খীক্লেন চায়থরকতুনা মোৎশিল্লিবা অমদি মাংশিল্লিবা পুম্নমক কোকথোক চামথোকনবা অদুগুম্বা নোংলৈদুনি। ঐখোয়গী লৈশেম নোংশেম্বগী জগোয় খুৎথেক অদুবুনি। অরিবা মরুদগী অনৌবা য়েন্নিং চোংলক্লিবা মতম অসিদা লাক্লিবা নোংলৈগুমলবা খুদোংচাদবা লৈবাক্কী ইসুশিং ফনা লৈরগসু নোংলৈসিগী মতুংদা লাক্কদৌরিবসি অঙানবা নুমিৎকি মঙালনি হায়বদু য়াম্না তেন্না কলচরেল রেফরেন্স অমদা পুথোকতুনা শৈথারি।
মনিপুরী খূনাইদা মৈতৈ নুপীশিংগী থৌনা অমদি মখোয়গী লীংজেল পুৱারীনা লেংদ্রবা খুদম ওইদুনা লৈরি। লৌশিং লৈবদা অমদি মথৌনা মরিংজেলদা। অদুবু মতমসে য়াম্না হোংলে হায়না কবিনা উরক্লি। অশেংবসু য়াম্না অহোংবা লৈরে মনিপুরসু। অরিবা সোসিয়েল ভেল্যুজ অমদি কলচরেল ইদেন্তিতি অদু কয়াম ঙাকনা হিংলি হায়বসি অচৌবা ৱাহং অমদি ওইরক্লি। অদুনা মহাক্কী পোদোন হায়না মিংথোংবা শৈরেংসিদা মঙালগী মশক ওইরবা নুপী খুনাইগী সিম্বোল অদুনা পোদোননা ওইরগা হেক থংনবা শৈরেংগী পরেংদা ইবেনদি পিশুম ফোয়রি হায়বসিনা পুরিবা নুংগী ৱাহন্থোক অদুদি অপাবশিংদা শিন্নরি। মরমসু হৌজিক হৌজিক্কি খুনাইদা অদুম য়েংবা য়ারনি হায়বনি অশৈবনা হায়নিংলিবদি।
পোদোন
কাচিন অমদা/ তাদুনা লৈরি পোদোনসে/ মতম অমদদি/ ইবেনগা লোয়ননা/ ৱারী শান্নখিবনি/ হুরানবা ফাখিবনি।/ হৌজিক/ কনাগুম্বা কবি অমনা হায়খি- ঐখোয়গী ইবেনদি পীশুম ফোয়রি। লাঃ ৩৬
লৌবূকশিংনা ফেক্তরি ওনখিবদা অমসুং লনাই মীওই খরতনা মপু ওইখিদুনা কেপিতালিস্ত ইকোমিদা অসুম লেপ্তনা চংশিল্লকলিবা মালেমগী চাওখৎপগী খোঙজেল অসিদা মহৌশা য়াম্না চম্না নুংশিননা লৈজরবা অরিবা পুন্সিগী ভেল্যুজ অদুদি চাওখৎপগী কোল্লূদা লোয়না চপখায়রক্লি হালেংবা লৈতনা। ইনাকখুনবগা লায়রবগা লৈনরিবা ঙমখৈ শম্বল হেন্না ৱাংখৎলক্লি। মহৌশাগী মশাইকোলদা লৈরিবা ফৌগৈ চেংগৈ পূম্নমক অঙম্বশিংনা মখোয়গীতা ওইনবা নৈখায়রক্লি। অসিগুম্বা ফিভম অসিদা অশৈবা দেবদাস তুমিন্না লৈশিনবা ঙমলক্তে। অদুনা খোঞ্জেল থোকনা তেংথারক্লি চুমই, ঐ লৈত্রে থৱায়সিনা/ অনৌবা ফৌগী পান্দোং মরক্তা/ মালংগী শহুমদা শান্নজবসিদা/ খঞ্জবনি ঐ/ হকচাংসিনা লৈশাদা তিনখ্রবসু/ থৱায়সিদি লৈহৌনি তাইবংসিদা।/ লৈখোম- লৈনাঙ মরক্তা/ অনৌবা ফৌগী পান্দোংনা/ হেক-হেক চোংখৎলকপা উবদা/ ঐগী থৱায় লৈহৌনি হায়বদু/ খঞ্জবদু চুমই হায়না।/ অদুবু থৱায়গী তুংনফম ওইরিবা/ ইপা লৌদি, ইপূ লৌদি/ উরে ফৌ পাম্বীগা কায়নরকপাঃ অদুনা তাদ্রে লৌতা ঈশৈসু/ উদ্রে হাওবা নুরাবীগী জগোয়সু।/ অদুনা চূম্লে নহাকনা হায়বদু/ ঐ লৈরে। লাঃ ১২৭
মহৌশাগী মীহুল হুল্লিবা অদুগা ইকোক্রিতিকেল ওইবা মিৎয়েংদা পুশিল্লক্তুনা য়াম্না কুপ্না নৈনবা য়ারিবা শৈরেংনি ‘চুমই, ঐ লৈত্রে’ হায়না মিংথোল পীরিবা অসিমক। ঐ হায়বসি মহৌশাদুনি। মহৌশাদা মীওইবনা তাংদুনা হিংদুনা লাক্লিবনি। মসিদা অশৈবা কবিনা হায়নিংলিবদি অতৈ নত্তে ঐখোয়গী মহৌশাদগী শাগোন্নদুনা মৈনা ৱাই তাংনা শম লাক্লিবা অরিবা অমদি নুংশিবনা থল্লবা লীকলম অমদি পথাপ অদুনি। পামমুনা নুংশিনা চৎনদুনা লাক্লিবা লীকলম অমদি কায়রে লৌ শিংউ তৌবদা পুন্সি মহিংদা। লৌবূক হায়না শিজিন্নরিবসি সিম্বোলনি। পোকপা শিবা নাইবা মীওই মপোক্তা অসিগুম্বা পুন্সিগী ভেল্যুজ অমদি মহৌশা লাইরেম্বী ইমা মহাক অদু লৈরি হায়বসি কাওথোক্লবা মীওইবদা খোঞ্জেল থোকনা তাবা হৈত্রবা মীওইবগী নাকোংদা তানবা হায়রকপনি ঐ লৈত্রে হায়না। মসিদা নুংঙাইতবা পোকলকপ্রা হায়নসু য়েংলিংলি। অমসুং অসিগুম্বা ভেল্যুজ অসি অমুক হঞ্জিন্নবা হোৎননিংলিবরা হায়বদুগী চাংয়েং অমনি শৈরেং অসিমক। লাইরিক অসিদা শকনাইরবা অইবা অনীনসু হায়রি
“লাইরিক অসিগী মিংথোন্না ঐ লৈত্রে হায়রগসু লাইরিকসিগী শৈরেংশিংনদি হায় “ দেবদাস হিংলি য়াম্না হিংলি, ঐখোয়গা পুন্না লৈমিন্নরি” মখা তারকপা মহাক্কী শৈরেংশিংনসু মহাকপু অসুম লৈহনগনি।”– য়ূমলেম্বম ইবোমচা
মচেকনা য়ৈবা অদুগা নাকোয়ননা হায়নিংলিবা য়াম্না শাফু কন্না হায়নিংবা ৱাহৈশিং শিজিন্নবদসু কবি দেবদাস থোইদোকনা য়াম্না হৈ শিংবা থেংনৈ। “চেকয়ৈ শৈরেংশিদা য়াম্না নুংঙাইরিবদি অৱাংবা থাক্তা থমলুরিবা শক্তমদুবু পুন্সিগী তাইবংগী চনৈনবা মরকসিদা পুশিল্লকলবা মতুংদা “অৱাংবা” হায়বা কনসেপ্ত অসিমকপুসু হনজিন্না চেকয়ৈ তৌবা ঙমলকপা অসিনি।”– বি এস রাজকুমার।
“ঐ লৈত্রে” শৈরেং লাইরিক ফোংবা থৌরমগী মতাং অমা
কবি দেবদাসকি শৈরেংগী মিংথোলশিং য়াম্না তেন্না অমদি ৱাহন্থোকশিং ফুমদুনা হেক হেক পুবা থেংনৈ। অসিগুম্বা মতাং অমদা মহাকনা ফোক লিতরেচরগী ওইবা ইলিমেন্তশিং পুশিল্লকতুনা হৌজীক্কি মতমগী মনিপুর অসিবু য়েক্লি অমদি ফজবা ইমেজরি অমসুং সিম্বোল শিজিন্নদুনা ঐখোয়দা শোয়রিবা অমদি চুম্থোকতবা য়াদবা লীচৎ অমদি লীকলম অদু অসি তৌরদি শেমদোকপা য়াগনি হায়না ইঙ্গিত পীরি হায়নিংই। খুত্তা শক্তি হায়বা অঙম অথৌশিংনা ঙম্মি মতাগুম্বা লৈবাক অসিদা শাণ্ণরিবা লীলা ময়াম অদুগা থায়না মোইরাং কংলৈরোলগী খম্বা-থোইবীগী শাইওন লাংওনগী ৱারী পরিং অদু পুশিল্লকতুনা অমদি নৌহৌন রি-ভিজিত তৌদুনা করিশু লাঞ্জদবা খম্বা মহাকতবু নোংবান অমদি মহাক্কি মিচংদা লৈবা নীংথৌ অমদি অঙম্বশিংনা অরানবা তাহনবা অদু ঙসিগী পাম্বৈ লৈত্রবা অচুম্বদি করিনো খঙবা মীচম মীয়ামগা চাংদমনরক্লি। থোইবীদি অরানবা চৎনবী অমসুং ওইদবা লৌনম নমথাকনা পংথহণবা য়াবা অদুগুম্বা নুপীদু নত্তে হায়বগী সিম্বোলনি। খুনাই অসিগী খোঙচৎ অসিদি অদুমক চৎখিনি অদুগা চাক-ঙাহোংবা লমদম অমগী লৈ-লাং জগোয় অদুদি শাখিনি অমসুং খোঙ্গুমমেল্লৈসু অদুমক লোইবী চীংগী নাপোমশিংদা থিরুগনি অমদি শোয়দনসু শালমখিনি হায়না আশাদি মাংবা লৈত্রি কবিনা।
লৈ-লাং জগোয়
জগোয় শাখ্রবমক্তদা/ খম্বা-থোইবী,/ থুগাইনবা হোৎনৈ জগোয়দু/নোংবান্না।/ কায়রবা মিংশেল/ লাউরিবা খোল্লাউ/ নোংবানগীদি নত্তে উরিবা/ খম্বা-থোইবী লৈ-লাং জগোয়গীনি;/ মসিদবু ঐগী শৈরেংনা করি হায়গদৌরিবনো?/ খম্বনা হায়-ঐদি কায়রবা মিংশেলনি/ থোইবীনা হায়-ঐদি লাউরিবা খোল্লাউনি/ ঐখোয়গী খোঙচৎ লৈ-লাং জগোয়গীনি।/ খোঙ্গুম্মেল্লৈদি?/ মৎখ্রে নোংবান্না/ মুনখ্রে নোংবান্না।/ অদুনা চৎলিবনি ঐখোয়/ ঐখোয়গী খোঙচৎ। লাঃ ১২৯
শৈরেংগী পরেং খরতনা ৱাহন্থোক লীশিংদা পাউজেল পিবা য়াবা শৈরেংশিংগী মরক্তা
‘মঙ’ হায়না মিংথোনবা অসিসু অমনি। হঞ্জিন হিঞ্জিন হিংবা অমসুং শিবনা কারেম্নরবা পাম্বৈ লৈত্রবা থৱায় কয়াদা পুকনিংগী লৈহাও হাপ্লীবসি শৈরেংনি হায়নিংই। খ্বাইদগী ৱারবা অমসুং পুন্সিগী পোৎলূম্না লাংগোই চনশিল্লকলবা মতাংশিংদা অমুক লৈবাক অদুদা নে তানা য়াইবী মরা তপ্না লৈবা ফংদবা, ঙসি করি থোক্কনি হায়েং করি ওইগনি হায়বা তম্বা ঙমদবা অদুগুম্বা খুনাই অমনি মনিপুর। মসিবু কবিনা মিংথোল অসিমক্তদা ৱাহন্থোক অনী পুহনদুনা অমা আশা অমদি মঙ মঙবা ওইনা অদুগা অমনা অশিবগী মঙ, মঙফম অদু ওইনা পুশিল্লক্তুনা পাউখোং চল্লি। শিজিন্নরিবা আইরোনি অমদি সিম্বোল অসি য়াম্না চংখোল্লি। অপাবশিংদা ৱাখল য়াম্না খলহল্লি।
বোম পোকখাইফমশিংদা/ ঐ পোক্কনি হায়না/ মঙ মঙলমই ঐঃ/ মঙদু থুগাইরমই ঐ।/ মৈফম অমা লৈরমই/ মদুদা হুনজিল্লমই/ বন্দ ব্লোক্কেদ করপসন/ মৈচাক শীং ওইনা।/ মৈঙালদুদা/ অহল মতম ওইরবী/ ইমা-ইবেন কয়ানা/ ইন্সাং-নাপী য়োল্লমই/ ৱারী-ৱাতাই শাদুনা।/ ঐনা দারুগা ওইদুনা/ মঙসি ঙাক-শেল্লমই। লাঃ ৪৩
লৈবাক খুনাইবু লুচিংগনি হায়না থোক্লিবা, খুঙ্গংদগী সহরদা লাক্তুনা চাওখৎপগী ফীজোলদা লৈবাক নীংবা শারিবশিংবু কারেম্নরি মহাক্কি শৈরেংন ‘য়ূমগী খুনুনা ক্বাক ওনবা উরব্রা’
য়ূমগী খুনুনা ক্বাক ওনবা উরব্রা/ উরে ঐদি নম্বুল তুরেল মপান্দা।/ নম্বুল তুরেল মপান্দা/ হেক চাক্তারুরবা/ ক্বাক হেক্তা ওল্লকই/ য়ূমগী খুনুদো।/ মদুদগী খুনু ওনবা ঙমদদুনা ক্বাক্তু, ৱাহোংগী মতু। থেৎচিল্লগা থোক্লকই। লাঃ ৪৯
তুরেল অসিনা উৎলিবসি মনিপুরী খুনাইনি। ঙসিদি য়াম্না মোৎলে হায়বনি ঈচেলসে। তৌশিন্নবা ময়ামসিনা মশাগী শক্তম করিনো খঙজদনা য়ুমগী খূনুদুনা খ্বাক অমদি ৱাহোং ওইনিংলিবা অদুবু য়েংউ তোরিসে হায়না খুৎ থিদুনা তাক্লকপনি। নৈননিংঙাই শৈরেং কয়াসু য়াওরি। পুন্না শৈরেং ৭৯ য়াওরি। মহৌশা মালেম অমসুং ঐখোয়গী অমত্তা ঙাইরবা লোক্তাক্কি পুৱারী অমসুং ত্রেদিসন ঙাকনা থম্বা অমসুং কলচরেল ভেল্যুজশিং ঙাক শেন্নিংবগী ঈহুল য়াওরবা ফজরবা শৈরেংশিংসু লাইরিকসিদা য়াওরি। মনিপুরী শৈরেংগী পূক্কৈদা চাওরবা খুদোল অমদি তম্বা ঙম্লে অশৈবা দেবদাস মাইরেম্বম্না।
👍👍