আপডেট:
image

লাঙ্গোলজম বীরমঙ্গলগী ৱারীমচাগী লাইরিক ‘উশিন’- লাইরিক অসিদা মিৎয়েং অমা

লাইরিক্কি মমিং- উশিন (২০২০)

অইবা- লাঙ্গোলজম বীরমঙ্গল 

অফোঙবাঃ সতীনাথ সরকার, ত্রিপুরাবাণী প্রকাশনী

দত্ত সুপার মার্কেট, শকুন্তলা রোড, আগরতলা 

লাইরিক্কী মখল- ৱারীমচা

লাইরিক্কী মখূমঃ এন জোগেশ্বর অপু

লমায় মশিং-১২৮ 

লাইরিক মমলঃ লুপা ২০০/-

মনিপুরী সাহিত্যদা মশাগী খুদোল মরাং কায়না অমসুং লেপ্তনা তৌদুনা লাক্লিবা লোয়ননা মনিপুরগী মপান্দা মনিপুরী লোল, সাহিত্য অমসুং কলচরবু হিংহন্নবা হোৎনরিবা মরু ওইবা মীশকশিংগী মনুংদা লাঙ্গোলজম বীরমঙ্গলসু অমনি। মহাক ৱেস্তত্রিপুরা দিস্ত্রিক্তকী মনুং চন্না লৈবা নারায়ণ খামারদা ১৯৫৬ কী মার্চ ১০দা পোকখি। হৌজিক হৌজিকনা আগরতলাগী ধলেশ্বর সাওথতা লৈরি।  অপোকপা অপোকপীগী মিংনা রতনকুমার অমসুং গোলাপী দেবী কৌই। মচীন মনাও তরেৎকী মনুংদা মহাকনা তরুকশুবনি। অঙাং ওইরিঙৈদগী হৌনা ইবা পাবা য়াম্না পামজদুনা লাকখি। সাহিত্যবু পামজদুনা লাকপনা বাংলা সাহিত্যদা এম এ লোইশিনখি। মনিপুরী অমসুং বাংলা লোন অনীমক্তা ৱারেং অমসুং ৱারীমচা কয়া ইদুনা ফোংখ্রে অমসুং লেপ্তনা ইবগী লমসিদা চংশিল্লিবা অইবা অমনি। হৌজীক ফাওবদা লাইরিক তরামাথোয় ফোঙখ্রে। মহাকনা ইবগী লমদা চংশিল্লিবা অমদি লৌরিবা থৌদাংবু শকখঙবা ওইনা মনিপুরী সাহিত্য পরিষদ ইম্ফালনা কামিনীকুমার গোল্ড মেদল, ত্রিপুরা বাণী প্রকাশনীনা অমূল্য-স্নেহলতা সাহিত্য পুরস্কার, মনিপুরগী সাহিত্য থৌপাং লূপ্না থিয়াম ইবোচৌবী নেস্নেল এৱার্দনচিংবা পীদুনা ইকায়খুম্নবা উৎখিবা লৈরে। ত্রিপুরা সরকারনা শেম্বা মনিপুরী লেঙ্গুএজ দিবলপমেন্ট এদভাইজরি বোর্দকী মেম্বরনি। লোয়ননা সাহিত্য একাদেমীগী মনিপুরী লেঙ্গ্যুএজ এদভাইজরি বোর্দকী মেম্বরসু ওইরি।  হৌজীক হৌজীকনা মনিপুরী সাহিত্য পরিষদ ত্রিপুরাগী জেনরেল সেক্রেটরি ওইরি।

 

চৎনবী থাজনবী হায়বসি খুনাই অমদা মরা তাদুনা লৈখিবা মরমনা পাক হেক হোংদোকপা য়াদে। থাজনবা হায়বসিদা য়ুম্ফম ওইদুনা কলচরেল ভেল্যুস কয়াসু শাগৎতুনা চৎনদুনা লাক্লি মলেমদা লৈরিবা খুনাইশিংদা।  থাজনবা অমসুং চৎনবী হায়বসিনা করিগুম্বদসু খুনাই অমদা হিংলিবা মীওইশিংদা পুরোইদবা পোৎলূমসু থাংগৎতুনা পুনদবা নত্তে। অদুগা থাজনবী অসিনা মরম ওইদুনা করিসু লাঞ্জবা মীওইশিংদা অরানবা মিৎয়েংনা ৱাখলনা পংশা শাগত্তুনা পুন্সি চুপ্পা বদনাম লৈহনবসু থোক্তবা নত্তে। অন্ধবিস্বাসকি কুয়োম্না কুপ্তুনা লৈরম্বদগী সাইন্সনা চাওখৎলকপগী মতুং ইন্না অরানবা থাজনবী কয়াদি তপ্না তপ্না খুদম্না অমসুং চাংয়েং তৌদুনা মিৎনা উবদগী অমম্বা ৱাখলদগী মঙাল ফংদুনা অফবা মায়কৈদা লাকপসু য়াওরক্লি।  খুদম ওইনা কনাগুম্বা অমা ঙাওনা ফৈনা নাবা মতমদা মদু পোৎশেম যাদুননি, লাই থেংনরুরে হায়বনচিংবদা লান্না থাজদুনা দক্তরদা লায়েংবগী মহুত্তা য়ুমদা পুজা তৌবা, লাই খুরুম্বা, মীনা পোৎসেম তৌরক্তুনা থোক্লিবনি  হায়বসিদা লান্না থাজবা অসিগুম্বসি খুনাইসিদা হেক হেক থোকপা থৌদোকশিংনি।  অসিগুম্বসিনা  মীওইবগী ৱাখল খনবা ঙম্বগী শক্তি অসি অরানবা লম্বীদা চিংশিন্দুনা মী মশেল মরক্তা থাজনদবা অমসুং নুংশিনহনদে। অসিগুম্বা তোয়না থোকপা থৌদোক অমদা য়ুম্ফম ওইদুনা ইরকপা ৱারীমচানি লাঙ্গোলজম বীরমঙ্গল সিংহগী ‘উশিন’।  লাইরিক অসিদা পুন্না ৱারীমচা ১০ য়াওরি। মিংথোল ওইরিবা ৱারীমচা অসিমক পাবদা ওন্থোকনা নুংঙাই। অয়াম্বা ৱারীমচাশিং অসিমক তেন্তক তেন্তক তৌবা লমায় ২/৩দা লোয়না হায়নিংলিবা ফোংদোকনিংলিবা পুম্নমক ময়েক শেংনা ৱারীগী পরিং কায়হন্দনা পাবদা নুংঙাইহল্লগা পিনিংলিবা পাউজেল অদু অসিনি হায়বদু অপাবশিংদা চপ চানা ফোংদোকপা ঙম্মি। ৱারীমচা ইবগী কলা অসিদা বীরমঙ্গল মায় পাক্লবা অইবনি হায়বসি লাইরিক অসি পাবদা শোয়দনা থেংনবীগনি। ৱারীমচা পাবগী মহাও অমসু শোয়দনা ফংবীগনি।

 

লাইরিক্কি মিংথোল ওইরিবা ‘উশিন’ হায়রিবা ৱারীমচাসিদা চন্দ্রজিনী কৌবী মখ্বাঙ কোল্লী-কোল্লী তৌরবী চহী মরীফু শুরবী লুখ্রবী অমগী পুন্সিদা থেংনরিবা মচা মমৌনা থৌওইবীদ্রবী অমনা করিসু লাঞ্জদবদা মমৌনুপীনা লান্না থাজদুনা মশুনুপী রাধাদা উশিন তৌশিল্লে হায়বগী থৌদোক অমদা য়ুম্ফম ওইদুনা ৱারী অসি শেমগৎলকই।  চন্দ্রজিনীনা মচা মমৌশিংগা শাওনরকপা খুদিং, মবুকনিং নুংশিরকপা মতমদা মহাক্কি চংজফম হায়বদু মচেনা পোক্লম্বা মচানুপী থম্বালগীদা নত্তনা অতৈদা চৎলুদে। থম্বালনা মদোমচাবু নুংশিনা সেবা তৌবী।  অসিগুম্বা থৌদোক অসি ইমুং কয়াদা থোক্তবা নত্তে হৌজীক হৌজিকসু।  অদুনা অইবনা ইরক্লি অসিগুম্বা থৌদোক অসিদা।  “চহী মরীফু শুরক্লবী, অহল ওইরবী চন্দ্রজিনীনা ৱাজরিবসি পৈশা লৈতবগী নত্তে।  মচা-মমৌনা মপুকনিং চঙনা অহল ওইবগী সেবা যতন তৌবিদবতা নত্তনা অহোইনদুম তাথী-তাওইনা তৌবিবগীনি” (লাঃ ৩৪)।  করম্বা মমানা মপুকনিং নুংঙাইনা খুয়া-তুশিৎনা ইংনা লৈনিংগনি মচানা মমৌনা অসুম্না থৌওইবীদ্রবদা।  তুরেলগী ঈচেল হংগৎনা চেন্দে হায়বদু চুমগদৌরিব্রা হায়বা ৱাহং হংনিংহল্লি।  মমা মপা ওইবশিংনা মচাশিংবু নুংশিজবগা মচাশিংনা মমৌশিংনা মনেম মকু নুংশিবগা অসুক খেন্নরিবসি করিগীনো হায়বা খন্থহল্লি।  মীওই খুদিংমক নোংমদি অহল মতম ওইরক্কনি নহা অদুম ওইদুনা লৈয়ু হায়বা য়ারোই।  মচা মশুশিংবু চাওনবা য়োক্লক্লিবা অহল লমনশিংদা মচা মমৌনা মীনুংশিগী ইরিক অদু খিকলকত্রবদা চন্দ্রজিনী মচেনা পোকচরম্বী মচানুপী থম্বালগী মনাক্তা মতম খরা লৈরুরগে খনদুনা লাকনবা  হোৎনবদা মমৌনুপী, মাবু তাথি তাওইনা হেক হেক তৌবী অদুগী মচানুপী রাধানা ময়ুম পাল্লিবা লৈকাই অদুগা থম্বালনা লৈরিবা অদুগা লৈকাই অমত্তা ওইবদুদা মনেম্বোক্তা মশুনুপীগী পোৎ-চৈ খরা পীরম্নবা ওটো দ্রাইবরদা শিন্নরকখি।  চন্দ্রজিনীনা থম্বালগী মনাক্তা লৈহৌরবা মতুংদা থম্বালগী মচানুপা অনিলনা ওটো অদুদগী পুশিল্লকপা পোৎ-চৈ মরক্তা অতোপ্পা পোৎয়োম অমা য়াওরম্বা থেংনখি।  মদু রাধাদা পিনবা পোৎ-চৈ খরা মমৌনুপীনা হাপ্লকপদুদা খরা চিত্থহৌরে খন্দুনা চন্দ্রজিনীনা মশুনুপা অনিলদা পোৎয়োম অদু রাধাগীদা থিলহনলুখি।  অসোমদা মমানা পিরকপা পোৎ-চৈশিংদি ওটো দ্রাইবর অদুনা লোয়না পিরমদুনা রাধানা মমাগা পাউ ফাওনখি করি করি পোৎ পীরকপগে হায়বদু।  অদুনা কোন্না অনিলনা পোৎয়োম অমা থিল্লকপা অদুদা রাধাসু অদুগা রাধাগী মনেমবোকনসু য়াম্না চিংনখি।  লৈকাইদা লৈবা মাইবা অমদা য়েংহনবদা রাধাগী মবোক চন্দ্রজিনীনা উশিন তৌরকপনি হায়রকখি।  মখোয়না চিংনরম্বদু চুম্লে হায়দুনা রাধাগী মনেম্বোক, রাধা, অমসুং মমাদা মবোকনা ফৌ ময়োম অমা পীরক্তুনা উশিন তৌশিল্লে হায়দুনা করিসু খঙজদ্রবী অবোক চন্দ্রজিনীদা বদনাম শিখি।  চন্দ্রজিনীগী মপুরোইবনা লৈখিদবদুসু মহাকননি অদুগা মচা নুপা অমা য়ু থকমন্দুনা শিখিবা অদুসু মমাননি অদুগা হৌজিকসু অমুক মশুনুপীগী পুন্সি তেন্নবা অদুগা মবোক্কি পুন্সি শাংনবা পোৎশেম তৌরে, ফৌদা উশিন তৌরে হায়দুনা লৈকাই ৱা ৱা লাওহনখি।  মরাল শুকলৈ লৈজদবী চন্দ্রজিনী শাথিনা ৱাখি।  মানা য়াম্না নুংশিজবী মচেনা পোকচরম্বী থম্বাল ফাওবনা মদোমচাদা চিংননা হংলকপদা খাংবা ঙমখিদে।  অদুবু ৱারী অসিনা লোয়শিল্লকপদা চন্দ্রজিনীনা মচানুপীদা থম্বালদা ওটো দ্রাইবর অদুগী ফোণ নম্বর অদু থিরগা অমুক্তা ফোণ তৌদুনা হংসি হায়দুনা ফোন তৌরগা হংবদদি ওটো  দ্রাইবর অদুনা ব্লোক ওফিসতগী লৌরকপা  অতাংবা হায়ব্রিদ ফৌদি ময়োম অমা মাগী গাড়ীদগী কদায়দা তাহৌরবনো হায়দুনা কোয়থি থিখিবা অদু ওইরমখি।  ওটো দ্রাইবর সামিরনা ফৌদি ময়োম লৈরম্বগী হরাওবা শক্তম মরক্তা চন্দ্রজিনীদনা মহাদশা তাবা অদুগা কোকলরোইদবা বদনাম অমা পিশিনবা অনীগী ফজরবা ৱারীগী খুলান্থোক অসিনা অপাবশিংদা পুকনিং থম্মোয়বু শেংদোকহনবা নুংঙাইবা মখল অমা ফাওহল্লি।  মীবু প্রমান লৈতনা লান্না ভাবনা শাগৎতুনা ফত্তনা ঙাক খনবা অসিবু ফত্তে হায়বদু ৱারীমচা অসিনা তাক্লি।  অদুগা খুনাই অসিদা থাজনবা অমা ওইনা পোৎশেম যাদু তৌবা উশিন তৌবা হায়বসিনা মীওই অমগী পুন্সিদা কয়া য়াম্না অৱাবা পীবগে হায়বদুসু ফোংদোক্লি।  ইমুং কয়াগী অমসুং খুনাইগী মমশিল্লবা শক্তম অমা অইবনা পুথোক্তুনা নৈনদুনা মসিদি ফত্তে হায়বদু ৱাহৈ খরদা ফিভম খরদা নিংথিজনা ফোংদোকপা অসিমক মায় পাক্লে হায়নিংই।   

 

অইবগী ৱারীমচাশিংদা খুনাইবু কুপ্না য়েংদুনা মসিদা থোকলিবা থৌদোক ৱাথোকশিং য়াম্না হৈনা-শিংনা লাচন্নবা হোৎনবা থেংনৈ।  কোভিদ মতমদা থেংনখিবা অৱাবশিং, অমাং অশেংগী পল, লাইনিং লম্বী অমসুং চৎনবীগী অৱাবশিং, মীশিং য়াম্বা কাংলুপ্না মশিং লিকনা লৈবা কাংলুপশিংদা য়েংলিবা মিৎয়েং, থবক ফংদবগী অৱাবা, ইমালোনগী, কলচরগী অমসুং আইদেন্তিগী ইসুশিং; তেকনোলোজিগী লাক্লীবা অহোংবশিংদা হৌজিক্কী মীরোল অমসুং হান্নগী মীরোলদা থেংনরিবা খুদোংচাদবশিং অমসুং মীনুংশি হায়বদু করিবু কৌবগে হায়বনচিংবা তোঙান তোঙানবা থিমশিংদা ৱারীগী য়াংলেন ওইদুনা অপাবশিংদা ৱারীমচাগী মহাও ফজনা পীরি।

 

ত্রিপুরাদা মনিপুরীশিংনা মশাগী লোন ময়েক অমসুং চৎনবী থাজনবী ঙাকনা অমসুং মসিবু হিংনবা লেপ্তনা হোৎনরি হায়বসি লমদম অসিদা খুন্দা লৈতাদুনা লৈরিবা মনিপুরীশিংনা ইরকপা লাইরিকশিং অমসুং মখোয়গী থবক থৌরমশিংদা মমি তারি।  মীশিং লিকনা লৈরবসু থৌনা লৈনা হিংলি, মচা মশুশিং নিংথিজনা মী ওইনবা শেম্নরি।  বাংলা লোননা মপুং ওইনা ঙাংনবা লমদমদা কমদৌনা মনিপুরী অমা ওইনা মশাগী কলচর অমসুং ত্রেদিসন ঙাকনা হিংলিবগে হায়বদু বীরমঙ্গলগী ৱারীমচাদা মরিক চুম্না ফজরবা নেরেতিবতা থেংনৈ।  মনিপুরী খোরিলোলগী পুক্কৈদা লেপ্তনা ফজরবা ৱারীমচাশিং ইরকখিগনি হায়না থাজবা থমজরি।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু