লাইশ্রম রোমোলাগী শৈরেং অহুম
চৎখ্রবসু নঙনা ইনাক্তগী
লৈরম্মী নঙনা ঐগী ইনাক্তা
শেন্নদুনা লৈরাংগী লৈখোংসে
চাইবিরম্মী নুংশিগী ঈরিক।
মৈশা লাংলবসু কোরৌগী
লেনজরম্মী নঙগী ঊপালখাগী
উরুমদুদা হরাও হরাও।
অদুবু,পুবিখ্রে নমদুনা ইফমদগী
ফংহল্লে শেৎনা কায়না মৈচাক
মৈৱায়হল্লে মৈরীসে
লান্মৈগুম শন্দোকলক্লে
নুঙ পাল,কয়াৎ পুম্বা ঙম্নমক্
ওলহল্লে তাঙ্গোয় ঙসিদি।
হুমলক্লে মীৱাগী নোংলৈসু
পুখিগে খল্লদুনা ইফমদগী
নঙগী নুংশি শক্তমবু
নাথৈহল্লগে খন্দুনা অমুক্কসু।
অদুবু চৎখ্রবসু নঙনা
তাইবংসিদগী থাদোক্লমলগা ঐবু
লৈখিগনি ঐগী থম্মোইদদি
নঙগী নুংশিবদি লেঙদনা।
ঙংলসনু খোইমু চাম্মা চাম্মা
তৌরসনু চিরোল নাপ তম্না
য়েংজসনু অপাম লাংগী মিৎয়েঙ
অদুবু হেক্তমক্ য়াগদ্রনে
নঙবু নাথৈদুনা থমখিবা
নঙবু নাথৈদুনা থমখিবা।
চৎনবীনা পুল্লিবা লিপুন্নি,
শেন্নবিনবা য়াওদ্রবা লৈখোংবু
হেক্তমক ফুক্তোকতুনা মাংহল্লদ্রা!
হেক্তমক ফুক্তোকতুনা মাংহল্লদ্রা!
নঙগী চার্ গী মরুনা
হৌরক্লি মশা মরেঙ ফন্দুনা
ঙসিদি ঊজাওগুম লেপ্লরি,
নুংশিবগী লুরবা লাইজ ঈরিক্ন
চাইরদুনা অমুকসু পামেলসে
নিংশিং ৱারী লিররী
নিংশিং ৱারী লিররী।
নঙনা চৎখ্রবসু ইনাক্তগী
য়েংলকউ ঐনা উব ফংদ্রবা
মমিং চাম্মা চাম্মা থোল্লিবা
মফম খঙদ্রবা লমদমদুদগী
মফম খঙদ্রবা লমদমদুদগী।
অদুবু ঐদি য়েৎলরোই
অনৌবা উপাল অমদা
ঊরিগী মপোক্তা পোক্লুরবসু
থিররোই অনৌবা কাইদোংফম
চেক্লাগী মপোক ওইরবসু
নঙনা মীরাইবিরম্লবা ঐসে।
হৌরিবনি লৈবাক্লৈ লৈরাংগুম
য়েক্ন তিংখঙ তুম্বৌলকসিদ
কোরৌগী মৈশা খাঙদুনা
নোক্নবা মীনোক নাথৈদুনা।
হায়বিগনু ঐবু নাতোনচাবী গুলাপনি
মীংথোন্বীনু ঐবু নুমিৎলৈগুম
অদুবু লৈরিবনি ঙসিসু
মুৎপ কৌবা লৈতনা
নঙগী শক্তমবু থম্মোইদা
লাৎখিগনি মপোক লাংওনসিমগী
চৎখ্রবসু নঙনা ইনাক্তগী
চৎখ্রবসু নঙনা ইনাক্তগী।
অকাওবগী পন্দুপ অমদা
নঙগী অমুবা শম্লাংদুদা
তৈশিল্লু ঐগী অঙাংবা ঈখেঙ
চোৎহল্লু নঙগী হকচাং
উহল্লু অঙাংবা নোংজাবীগুম।
চীংথক্তগী চীংখাদা চেন্থরিবা
অরুবা চীংজুম লাইজ
ওলহল্লু ঈখেঙগী তুরেল
উরগা পেন্না নোকচসনু
ঈখেঙতবু খৌরাংলিবা মখোয়না।
পুন্সিবু শান্নপোৎকুম খল্লিবা
থৱায়বু খুবামনুংদা পাইশিন্দুনা
হিংবগী হক মৎপিখ্রবা
মখোয় কয়াগী লূ-তোঙগী ঈ
থকউ পেন্না য়াউম থন্না।
অশিবা থৱায়না খোন্জেল থোক্তনা
তেংথা নাওইনা মোংফমগী লৈমায়দা
ইহৌরিবনি পেন্দবগী ৱারী
লারোল মশিং খংদবা মখৈ।
ঙরাংত পোমশাৎনরম্বী
ঙসিনা লৈখোক লোইরবী
ঈখেঙলক্তা চোইজাইন কেল্লবী
হয়েংগী ৱারীখক্কী হিংলম্বী
ঙসিদি মহাকসু তিনখ্রদৌরবনি
অকাওবগী পন্দুপ অমদা
অকাওবগী পন্দুপ অমদা।
মচু
মঙফাওনরকপনি তাইবঙসিদা
মঙাল মচেৎ'মা ফঙদনা।
ইমাগী শিয়োমনুঙদা থাবুম তরা
লেনজরকখি লোৎচদুনা ইথন্ত
শাগৎচখি নুংঙাইবা খোঙচৎকী ৱারী ।
হঙা খোনজেলদা শকখঙনখি
পলেম তাইবঙ মতম্বাকত।
শান্নজখি হরাওনা
পিথ্রাই খোঙদাইবীনা লক্নদুনা।
ৱাশকলম্মী শেম্বীবা মপুদা
শিন্নবিরকপা ইথৌদাং
পাঙথোকচগে শোয়ফদনা।
কোরৌ থাবুম শুরদুনা
অমম্বা শিয়োমনুঙ থাদোকলম
খোঙদারকপদা তাইবঙ মালেম
তায়োন্ননা থোকহল্লরে।
মচুগী খেৎনবা খঙদ্রবা
অঙান্বা অঙৌবা উদ্রবা
অমুবতনা ইশরুক থুঙলম্লবা
ওইহন্বীরে ঐগী তাইবঙ্ দি।
লৈরাংগী লৈনমদি য়েল্লরি
লৈশক লৈচুদি উদরি।
লৈনমনা থম্মোইদদি চুহৌরে
মৈচাকনা মৈশা লাংহল্লে।
অয়ুক্কা অহিংগা খেৎনরিবরা
অতিয়াগী মচুবু করিনো
কৌরৌগী শক্তমসু উদরে
মৈশাত ঙাইরে ফাওরিবা।
অচিকপা অহিংগী থাবলদো
কমদৌবগে তম্বীয়ু অমুক্তং,
লেমলৈনা লাইজগা ঙাওজবা
থম্বালনা ইয়াইদা শাৎচবা
লিবিয়ু ৱারী অমুকখক্তং।
অঙান্বা অঙৌবা উদ্রবসু
খল্লি থম্মোইদদি অঙৌবত
য়েংলি অমম্বসিদগী অঙান্বদা
মচুগী খেৎনবা উদ্রিবা ঐনা।
- ট্যাগ:
- শৈরেং
0 কমেন্ট:
কমেন্ট তৌবিয়ু