এম এ হাশিমগী শৈরেং অহুম
অদুনা ঙাইরিবনি ঐ
নঙনা লেংজুমদা ঙারকপা
অশিবদি মফম খুদীং লৈ
ঈশিংদা মৈদা নুংশিত্তা
অতৈ মফমশিংদা,
থেংনদবনি মরম অমা
নত্রগা অমনা।
ফম্লদুনা স্বর হোনজিল্লি
অমুকসু হোন্দোকই
ঙাইরদুনা কনানো অমা।
থেংনরবা মাগা
শিরবা য়াই ঐ,
মরমদি, লৈশেম্বা মাগীনি
অশিবসু।
ওহ!
অশিবা,
করিগুম্বা শিবা তারবা
শিজনীংই চান্নবী নঙনা নুংশিরিঙৈ।
নঙগী তবারবা চীনবালদা
মোমোন মীনোক লৈরিঙৈ।
অরংবা মঙালনা নঙগী
শম্লাংদা য়ৈরিঙৈ।
মালংনা পাউখোল্লোই ওইনা ঐগী
নঙগী নাপ্পদা চিরোল্লঙৈ।
অস!
লাক্লরোই নুমীৎ অমতসু
অসিগুম্বা।
নুমীৎ অসিদগী হেন্না ফজবা
পুনখ্রবনা অশিবগা নঙগী চেংলৌগা নুংশিবগা।
অদুনা ঙাইরিবনি ঐ
নঙনা নুংশিনা য়েংলকপা
নঙনা লেংজুমদা ঙারকপা।
কোকপা ঙমদ্রবা ময়েক
মখূৎ ওইগী মখুবাক্তা
শিন্মীদুনা
অচৌবা ময়েক্না ইরি
খুবাক্কী শরূক
লান্থোক্তুনা ফাউবা হোৎলি চাউরবা খুদোম্বীদুনা
মাগী অঙ্কগী ময়েক।
য়ুম কুপ্নবা চরুগী মমল,
ফৌ সংবাই অনীগী,
অঙাং অহলগী থাগী শেলহুন,
মীগী শেন্দোন,
মৌ অহলগী সনা হনবগী
পুন্না লিশিং তরাতরেৎকা চনি।
মচীন্না হন্না হন্না
মুরুম-মুরুম শোল্লকই।
তরাতরেৎকা চনি।
অদুদগী কনাদনো উৎপগী মতৌদা
হন্না-হন্না উৎলি মাগী খুবাক অদু।
অমুকসু মথন্তা মুন্না য়েংলকই মাগী খূৎ।
মতমদো নোং তারি হায়বা
মহাক খঙদবগুম্মী।
অঙকপনি।
চামবা ঙমখিদে নোংলিক্না
খুবাক্তা হোৎলিবা শেন অদুগী
অঙ্ক অদু।
তরাতরেৎকা চনি।
মুরুম মুরুম শোল্লদুনা
চৎখি মহাক নোংলক্তা।
খোঙচৎসিদা
ঐনা নঙগী থম্মোয়নুংদা
অদুগা
নঙনা কদায়দা!
করিগী খঙদবনো!
হোয়,
করি করিগুম্বদা অতিয়াগী থৱানসু ঙানফম খঙদবা য়াউই।
নোংমা ঐগী ৱাহৈ লানখ্রে খন্দুনা নুংঙাইখিদে
অদুবু ঐগী ৱাহৈ মমল লৈরমখি,
নঙনা
পি ফাউবা শিন্থবগী ৱারী তাখি।
নোংমা অমনা ঐনা ফজবা ৱাহৈ অমা হায়রে খন্না হরাউখি,
ইদোম,
অদুবু ঐগী ৱাহৈনা ৱাহল্লম্লে নঙবু।
মসিনি অৱাবা
মুসি মুসি ঙাল্লিবা
মৈরিসিদা
উবা ফঙদে নঙগী লুরুক্নবী মায়থোঙ।
নতুং ইন্নরে হন্না য়েংলক্তে।
পুন্সিগী অৱাবা
ঐনা খঙলে
ঐ অমদি ঐগী
পুন্সিগা তত্তনা থেঙ্গাইনবনি
খোঙচৎসিদা।
- ট্যাগ:
- শৈরেং
0 কমেন্ট:
কমেন্ট তৌবিয়ু