আপডেট:
image

থৌনাওজম শ্যামগী ৱারীমচা

মুত্থরুরবা মৈরী

থৌনাওজম শ্যাম

ক্ষেত্রিময়ুম চনু কৃষ্ণবতী টি.ডি.সি(সাইন্স) সেকেণ্ড ইয়ারদা তমলিবী ছাত্রীনি। খুন্নাইগী থবক থৌরমশিংদা মথ্বায় য়াওজৈ। লোনগী ঈহৌ ওইরো, ইনাৎকী থৌরম ওইরো অমত্তা চিত্থজদে। মহৌশাগুম ঙসিসু মানা তমলিবা কলেজ অদুগী মীফম অমা য়াওবা লাক্লম্মী।

মীফমদা মানা ঙাংগদবা ৱাশিংদু মবুক্নিংদা ঔরাইরম্মী--

করিগুম্বা ঐখোয়না ভারতবর্ষগী ইন্দিরা, সরোজিনী, কল্পনা চাওলানচিংবতা নত্তনা পৃথিবীগী পুৱারীগী চেনা হাংদোক্তুনা য়েংলবদি নুপীনা বিজ্ঞান,রাজনীতি অমদি অতৈ অতৈ হীরম কয়াদসু চাওখৎলম্বগী খুদম শোয়দনা উবা ফংগনি। বিজ্ঞানগী লমদা মেডাম কু্ড়ি,রাজনীতিগী লমদা বেনাজির ভুটো,সেখ হাসিনা, বেগম খালেদা জিয়া, শ্রীমাভো বন্দরনাইয়ক, সি. এ মার্গেট থেটচার, গ্রোটারলেন ব্রুটলেণ্ড অমসুং চন্দ্রিকা কুমারটুঙ্গেগী মিং পনবা য়াই। অদুগা নোংথকলোন্দা ভেলেন্টিনা টেরেসকোভাগী মিংলেন পৃথিবীদা তাদবা কনা য়াওবগে? অদুবু করিগীনো? ঙসিগী অসুক চাওখৎলবা মতম অসিদা মীতৈ নুপীবু ঐখোয়গী খুন্নাইনা করিগী দমক্তা অখুবা মিৎয়েংদা অদুক হন্থনা থম্বীরিবা করিগীনো? করিগীনো?

চহীদু ইং ১৯৯১নি।লোনগী ঈহৌগী মতমনি। স্টুডেন্টস য়ুনিওনগী চহীগী তার্ম লোইদুনা অনৌবা মীখল তৌবগী মীফমনি।

নুমিৎ অদুগী মীফম মপু হৈশিংলবা হৈস্নাম হৈথোইনা লাউথোকপীরকখি। "য়ুনিওন অসিগী প্রসিদেন্ট ওইগদবা মহাক্তু নুপা ওইগদবনি। নুপীনা ওইবা য়ারোই। "

হায়রিবা ৱাফম অদুদা মীগী মীরৎ-নারৎ খঙলবা অতোংবদা লেপ্পা পামজবা লোয়ুম্বানা মতাং চানা পাংশিল্লকখি। "নুপীনা প্রসিদেন্ট ওইরবদি খুদোংচাদবা কয়া লাক্কনি।মফম অসিগী কলেজসি অচৌবা কলেজ অমা ওইবনিনা চাউর-চাউরবা ইস্যু থোরক্কনি। জাতি কয়াগী লোনগী ঈহৌ হৌফম কলেজ অসিনি হায়বা য়াই। অদুনা মফম-মতম নাইদনা, অহিং-নুংথিল খাক্তনা চেন্থোক চেনশিন লাক্কনি। অমম্বা অহিংদা নুপী মতোমতা চৎপা য়াওরক্কনি। পুলিসনা ফারো, নুপীনিনা মথং মথং প্রোব্লেম কয়া কয়া থোরক্কনি। "

ৱাপুথোক শেবাৎপা ৱাফমশিংদু তাবদা শাউগনখিদ্রবা ইং তপ্লবা উলেনদো খাঙবা ঙমদ্রে। ফ্রং লাউনা শাউগৎখিদুনা মরক থৎনা মাগী মত ফোংদোরকই।"হৌজিক্তা মরূপ অমনা পনবিখিবা খুদোং চাদবশিংদুবু নুপী মখোয়না মায়োক য়াবা ঙম্লোই হায়বরনে? "

ঙসাই মখৈ নুপীবু হন্থনা ঙাংবদুদা শাউগৎখিদুনা মচীন পোমখৎতুনা,মনাতোন শুকতোক্তুনা নীঙদা ফম্লিবী নুপীমচাশিংদু মায়থোং মকা লাম্লকই। অদুবু কুইহৌদে। উলেননা ঙাংবা হেক লোইখিবগা মশানা ৱায়েললোনগী মরমদা খঙই খঞ্জবা ৱায়েল সনা ফুক হৌগৎলকই।অদুগা থৌনা ফনা,হৈশিংনা নুপীনা প্রসিদেন্ট ওইবগী মতাংদা ৱায়েল তাথরকই।

"নুপীদি ইমানি। নুপীদি মহৈ লাইরেম্বীনি।নুপীদি লল্লৈমানি। নুপীদি শক্তিগী খুর্জী পায়রিবীনি।অদুবু মখোয়গী য়াম্না খুদোংথীনীংঙাইসু লৈ। নুপী হায়বসিদি নুপানা অমুকপু খুদাং পায়রুরবদি লোইরে হায়নরিবনি। মহাক অদো ময়ুম পানবা ফাঊবা শিৎকদৌরিবনি।অদুনা নুপী হায়বসিদি য়াম্না লুই। ওইহননিংঙি হায়দুনা অফ-ফত্তা য়েংদনা হেক্তা ওইহনবা য়াদে। "

অদুবু মীয়াম্না লৌশিনবদা নুঙাইনবা য়ুনিওনগী মরমদা ৱাফম খরদং নীংশিংবা কান্নগনি। য়ুনিওনগী চৎন-পথাপ্নদি অসুম্না হায়রি। প্রসিদেন্ট ওইগদবা মহাক অদু সেকেণ্ড ইয়ার ডিগ্রী ওইগদবনি। য়ুনিওন অসি নন-পোলিটিকেল ওইগদবনি। পোলিটিকেল পার্টি অমগী মখাদা লৈবা স্টুডেন্টস ৱিং অমগী লুপমী অমত্তনা প্রসিদেন্ট ওইবা য়ারোই।

মীফম অদুদা কারক্লিবা থাক অসিগী মহৈরোয়না সুপ্নাতগী অনীখক। অনীদুদা অমনা নুপী অতোপ্পাদুনা নুপা। মহৈরোয় নুপামচা অদুদি য়ুনিওনগী চৎন-পথাপকী মতুং ইন্না মশানা য়ানা পোত্থাজখি।

অদুনদি প্রসিদেন্ট ওইগদবসি পুন্না মীরেপ অনী লৈরম্বদগী অমা উইড্রো তৌখ্রবনিনা মহৈরোয় নুপীমচা অদুনা ওইবা হায়বসি মশানা তাবনি। অদুবু ঙসাইগী হৈশিংলবা উকিল অদুদি কংয়েৎ য়েৎলি।শেল ফংগনি ফংলোই খন্দনা।মফম মরাং নাইদনা। মথোং মরম খঙদনা। নুপীনা প্রসিদেন্ট ওইবা য়ারোই হায়দুনা য়োংনা চু পায়বগুম্না থাখিদ্রে।

অসুম্না ফাদোক তারবা মী অমগী অচুম-অরান পুথোক্নদুনা চপচানা জুডিসিয়েল কোর্ট অমগী শক্তমগুম মীফমদু চত্থরম্মী। অদুবু শরক অদুদা ইখঙ খঙহৌদনা কা অদুদা নোংথাং কুপ্লকই।মীফম অদুগী উকিল মশেল হুন্নরিঙৈ, তাঞ্জা চাবা মাঙহন্দনা নীঙলোমদা ফম্লিবী থৌনা ফরবী লীন্থোইঙম্বীনা ক্ষেত্রিময়ুম চনু কৃষ্ণবতীবু প্রসিদেন্টগী ফমদা প্রোপোজ শৎ তৌশিল্লকই।

লীন্থোইঙম্বীগী থৌনাদুদা পেনমনখিদুনা উলেননা মখৌ পোংনা হায়রকই। "উবিরেদনা! নুপীবু কনানা পংঙি হায়জিল্লিবনো? নুপীবু কনানা শোল্লি হায়জিল্লিবনো? নুপীনা ঙমদবা করিবু লৈবগে?"

মসিগা লোয়ননা হোনারেরী উকিল অদুসু করি খল্লুরবা শৎ লৈশিল্লক্তুনা সেকেণ্ড তৌশিল্লকই।

কৃষ্ণবতীসু মহু চাওরবী অমুবী লিন খারৌনা মমৈদা নেৎপদা মকোক-মশা ফন্দোক্তুনা তমথীনা শাওরকপগুম্নি। ইচংথৌনা নুপীগী থৌনা উৎলগে মতাগুম খ্বাংচেৎ মচী লাক্তুনা প্রসিদেন্টগী ফমদা মশানা য়ানা চোংথোরকখি। অদুগা ঙসাই মানা মবুক্নিংদা ঔরাইখিবা ৱারোলদু মরী মরী হায়দরকই।

তিল্লিবা মীয়ামদুসু খুৎ অনী লোনশিন্দুনা অহৌবা খুবাক্কী কবোক পোক্লকই। কাদু পুমনিল নিল্লম্মী।

মুৎকে তৌরুরবা মৈরীদু খংচাক চাক্লকখি।

0 কমেন্ট:

কমেন্ট তৌবিয়ু

আপনার ইমেইল ঠিকানা প্রচার করা হবে না. প্রয়োজনীয় ক্ষেত্রগুলি চিহ্নিত করা আছে *

পাউ অতৈসু