• 328
• ১৮ই মার্চ ২০২৪ ইং
• Share on:

মারাদোনা ক্ষেত্রিময়ুম অমসুং ইঙুদম কবিতা চনুনা গোল্ড মেদল লৌবা ঙমখ্রে

ইম্ফাল, মার্চ ১৭ : ঙরাংদগী হৌরগা পাঞ্জাবকী লুধিয়ানাদা চত্থরকখিবা ১৫ রক শুবা মিষ্টর ইন্দিয়া ২০২৪, সিনিয়র মেন্স এন্দ ‍উইমেন্স বোদি বিল্ডিং চেম্পিয়নশিপতা মণিপুরনা গোল্ড ২ য়াওনা পূন্না মেদল ৪ হৌজিক ফাওবগী ওইনা লৌবা ঙমখ্রে হায়না ওল মণিপুর বোদি বিল্ডার্স এসোসিয়েসন (এ এম বি বি এ) গী সেক্রেটারি য়ুম্লেম্বম সুনন্তনা খুৎয়েক পীদুনা প্রেসতা থাদোরকপা চেরোল অমনা হায়রি।

                           মারাদোনা ক্ষেত্রিময়ুম

চেরোল অসিনা হায়, হৌজিক চত্থরিবা নেসনেল চেম্পিয়নশিপ অসিদা মণিপুরনা গোল্ড মেদল ২, সিলভার ১ অমসুং ব্রোঞ্জ ১ হৌজিক ফাওবদা লৌবা ঙমখ্রে। মেদল লৌবা ঙমখ্রবা শান্নরোয়শিং অদুদি উইমেন্স বোদি বিল্ডিংগী কেজি ৫৫ মথক্কীদা ফ্রেন্দস ফিটনেস জিম তেরাগী ইঙুদম কবিতানা গোল্ড, মেন্স বোদি বিল্ডিংগী কেজি ৯০গীদা মসল ফেক্টরি ককচীংগী মারাদোনা ক্ষেত্রিময়ুমনা গোল্ড লৌবা ঙমখিবনি। অদুগা মেন্স বোদি বিল্ডিংগী কেজি ৬০ গীদা য়ুনাইটেদ জিম নাওরেমথোংগী নেতা লাইশ্রমনা সিলভার অদুগা উইমেন্স বোদি বিল্ডিংগী কেজি ৫৫ গীদা ৱার্ল্ড জিম য়াইস্কুলগী থোকচোম সঞ্জিতানা ব্রোঞ্জ লৌবা ঙমখিবনি।

                          ইঙুদম কবিতা চনু

পাঙথোক্লিবা চেম্পিয়নশিপ অসিদা তোঙান-তোঙানবা য়ুনিট ৩২ দগী লাকপা এথলিট ৩৯০ না অথোই-অহেন চাংদম্নরি। অথোই-অহেন চাংদম্নবা অসিদা রেলওয়েজ, সার্ভিসেস, রেভেন্যু বোর্দনচিংবসু শরুক য়ারি। চেম্পিয়নশিপ অসিদা শরুক য়ারিবা মণিপুরগী টিম অসিগী মেনেজারনা এস ঐচ সনাথোই অদুগা কোচনা আর কে মণিসনানি।

সোর্স: হুইয়েন লানপাউ