লাঞ্জেন্নদুনা লৈরিবী নুপীমচা অনী নেসনেল বোক্সিং চেম্পিয়নশিপতা শরুক য়ারুনবগীদমক ইম্ফাল থাদোকখ্রে
ইম্ফাল, মার্চ ১৭ : মমাং চহীগী মে ৩দগী হৌরগা লমদম অসিদা থোক্লক্লিবা থা ১১ ফাজিল্লক্লবা হাৎন-শুনবগী ৱাথোক্না মরম ওইরগা মীওই লিশিং কয়া লাঞ্জেন্নদুনা ময়ূম হঞ্জিনবা ফংদনা অৱা-চৈথেং নংলিঙৈ মরক অসিদা চহী নৌরিবী বোক্সিং শান্নরোয় নুপীমচা অনীদি লানগী মৈশা মরক্তগী লিৎখৎলক্তুনা অহুমশুবা সাব-জুনিয়র বোইজ এন্দ গার্লস নেসনেল বোক্সিং চেম্পিয়নশিপ ২০২৪ দা মণিপুর রিপ্রেজেন্ট তৌনবগীদমক ঙসি ইম্ফাল থাদোকখ্রে।
থা অসিগী ১৮দগী ২৫ ফাওবা গ্রেটর নোইদাগী সহিদ বিজয় সিংহ পাঠিক স্পোর্টস কমপ্লেক্সতা পাঙথোক্কদৌরিবা নেসনেল চেম্পিয়নশিপ অসিদা শরুক য়ানবগীদমক হৌজিক লাঞ্জেন্নরিবা শান্নরোয় অনী মোরে ৱার্দ নম্বর ৫দগী লৌরেম্বম অঞ্জলি (১৩) অমসুং ইকৌদগী চনম্বম লাংলেন চনু (১৪) চেম্পিয়নশিপ অসিদা শরুক য়ারুনবগীদমক ঙসি ইম্ফাল থাদোকখিবনি।
মখোয় অনী সরিতা রিজনেল বোক্সিং একাদেমিদা শক্নাইরবী বোক্সার লাইশ্রম সরিতা অমদি মহাক্কী মপুরোইবা সী ঐচ থোইবগী মীৎয়েং মখাদা ট্রেনিং তৌদুনা লাকখিবনি। মখোয় অনীবু ঙসি মণিপুর পুলিস দিপার্টমেন্টকী এস পিসু ওইরিবী শক্নাইরবী বোক্সার লাইশ্রম সরিতানা এয়ারপোর্টতা থিল্লকখিবগা লোয়ননা চেম্পিয়নশিপ অসিগীদমক য়াইফ থৌজাল পীবীখি।
মখোয় অনীগী মথক্তা একাদেমি অসিগী বোক্সিং শান্নরোয় ৫ অমদি তোঙান-তোঙানবা বোক্সিং একাদেমিশিংদগী বোক্সর ১৫ না লমদম অসি মহুৎ শিন্দুনা চেম্পিয়নশিপ অসিদা শরুক য়াগদৌরি। থা ফারক্লবা হাৎন-শুনবগী ৱাথোক্কী তেমশীংনবা মরক্তা চহী নৌরিবী বোক্সিং শান্নরোয় অনীনা নেসনেল চেম্পিয়নশিপ অসিদা শরুক য়াগদৌরিবা অসিনা ফূরুপ অসিগী থৌনা লিংজেল ময়েক শেংনা তাক্লি।
হীরম অসিগী মতাংদা বোক্সার লাইশ্রম সরিতানা ফোঙদোকখিবদা, শান্নরোয় অনী অসি মহাক্না রিলিফ কেম্পশিংদা চৎপদা থেংনরকখিবনি। মখোয়সু বোক্সিং শান্ননিংই হায়বদগী পূন্না শান্নরোয় ১০ মুক একাদেমি অসিদা লেম্না ট্রেনিং পীদুনা লাকখিবনি। অহানবা হৌগৎলকপা মতমদা মখোয়গী ৱাখলদা লান নংখিবগী পাখৎপা, অকি-তুজুংবগী ৱাখলনা মরম ওইরগা চরাংনবা কয়া লৈরম্মী। অদুবু থা অমমুক্কী মনুংসিদা মখোয়বু বোক্সিং মশান্নগী মায়কৈদা মপূং ফানা মায় ওনশিলহনবা ঙমখিবনি হায়না ফোঙদোকখি।
সোর্স: হুইয়েন লানপাউ।
0 কমেন্ট:
কমেন্ট তৌবিয়ু