খাইদেম প্রমোদিনিগী ১০০ শুবা মপোক কুমওন পাঙথোকখ্রে
ইম্ফাল, মার্চ ১৭ : লৈমরোল খোর্জৈকোল (লৈকোল) না ক্বাকৈথেল মোইরাং পুরেলদা লৈবা লৈকোলগী ওফিসতা চহী অমা চুপ্না চত্থগদবা খাইদেম প্রমোদিনিগী ১০০ শুবা মপোক কুমওন থৌরম পাঙথোকখ্রে। থৌরম অসিদা অথোইবা মীথুংলেন ওইখিবা হান্নগী উপা অধক্ষ্যা ক্ষেত্রি তামানা হায়, হৌজিক হৌরক্লিবা অঙাংশিংনা খাইদেম প্রমোদিনিগী থবক পূন্সি নৈনবা তঙাইফদে।
নুপী অইবী লময়ানবী অমা ওইনা খুন্নাইগীদমক পাঙথোক্লম্বা থবকশিং খঙবা চংই। অইবী প্রমোদিনিনা পামজরম্বা ৱাখল্লোন কয়া ঙসিগী লৈরিবা মৈরা পায়বী, নুপী খুন্নাইদা খঙহন্দুনা মাংলোমদা চংশিন্নবা হোৎনবদা চহী অমা পাঙথোক্কদৌরিবা থৌরম অসি য়াম্না মথৌ তাই হায়খি।
পাঙথোকখিবা থৌরম অসিগী থৌরম মপু ওইখিবা লৈকোলগী প্রেসিদেন্ট কে এস ঐচ সুবদনিনা ফোঙদোকখিবদা লময়ানবী অসিগী পূন্সি ৱারীদা নৈনবা হায়বসি থা খুদিংগী পাঙথোক্তুনা চহী অমা চুপ্না মহাক্কী মপোক কুমওন পাঙথোক্কদৌরিবনি। মহাক্না লমদম অসিগী অইবীশিংবু লমজিংবীরম্বা অদুবু নীংশিংবা ওইনসু থৌরম অসি পাঙথোকপনি হায়খি।
অথোইবা মীথুংলেন ওইখিবা মণিপুর য়ুনিভার্সিটি ওফ কলচরগী এসিষ্টেন্ট প্রোফেসর মাখোনমনি মোংসাবনা ফোঙদোকখিবদা মীয়াম্না উরিবসি অইবী অমা ওইননি অদুবু ওজা প্রমোদিনিদি হিরম খুদিংদা চংশিন্দুনা খুন্নাইগী য়াইফনবা থবক থৌরম কয়া পাঙথোকপীরম্মী। মহাক্না লাইরিক কয়া ফোঙদুনা থম্বীরম্বা অদুনা মহাকপু অইবী ওইনা উরিবনি। অইবী অসিনা ফিল্ম কয়দসু খুৎ থারম্মী। আর্টিষ্টশিংনা মহাক্কী পূন্সি অমসুং থবকশিং নৈনবদা তুঙদা অফবা আর্টিষ্ট অমা ওইনবা চংশিনবা খোঙথাংদা কান্নবা ফংগনি হায়না মহাক্না ফোঙদোকখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু