মণিপুর সাহিত্য সমিটি থৌবালগী মনা লান্থোকখ্রে
ইম্ফাল, আগস্ট ১৪ : মণিপুর সাহিত্য সমিটি থৌবালগী সাহিত্যগী মনা লান্থোকপা অমদি সমিটিগী চেফোঙ য়েন্নিং অমসুং লাইরিক চুমথাং মখোঙ থিবা ফোঙবগী থৌরম অমা থৌবাল ওক্রমদা লৈবা ৱাইখোম মনি গার্লস কোলেজগী মিনি ওটিটোরিয়ামদা ঙসি পাঙথোকখ্রে। থৌরম অদুদা খাঙবোক এসীগী এমএলএ ওক্রম সূর্যকুমারনা অথোইবা মীথুং, মণিপুর সাহিত্য সমিটি থৌবালগী প্রেসিদেন্ট থবক্তগী পোত্থারবা উইং কম্মান্দর অকোইজম দেবেন্দ্রনা থৌরম মপু অমদি মণিপুর পাব্লিক সার্ভিস কম্মিসনগী হান্নগী মেম্বর লাইমজম মনাওনা অখন্নবা মীথুংলেন ওইনা শরুক য়াখি।
ঙসি পাঙথোকখিবা থৌরম অদুগী শরুক অমা ওইনা অথোইবা মীথুংলেনশিং য়াওনা শরুক য়াখিবশিংনা সাহত্যিগী মনাশিংবু কৎপীরকখিবা লৈখিদ্রবা লাইওইখ্রবশিংগী ফোটোদা লৈ-শু কৎতুনা অমদি মীয়াম পুন্না মিনিট অমা তুমীন্না লেপ্তুনা ঈকায়খুম্নবসু উৎখি।
ঙসি লান্থোকখিবা সাহিত্যগী মনাশিং অদুদা সৈত্যবতি নিঙোম্বমনা কৎপা নিঙোম্বম প্রমোদিনী নীংশিং সাহিত্য মনা ২০২১, টিকেন্দ্রজিৎ অকোইজমনা ইবা ৱারীমচাগী লাইরিক পুন্সিগী লামায় অমদা; নাওশেকপম ওংবী লক্ষিলৈমনা কৎপা অকোইজম চাওতোন, রাজকুমারী মুক্তাসনা নীংশিং সাহিত্য মনা ২০২১ শ্রীকান্ত হায়বা নোভেল অদু মণিপুরদা হন্দোকপগীদমক ডা. তেনশুবম কুঞ্জেশ্বরদা ডা. অকোইজম লোকেন্দ্রনা কৎপা অকোইজম ওজা বিজয় নীংশিং সাহিত্য মনা ২০২১ ইমোজিৎ নিঙোম্বমনা ইবা শৈরেং লাইরিক লোইবী চীংগুম পোত্থারবা উইং কম্মান্দর অকোইজম দেবেন্দ্রনা কৎপা অকোইজম ওংবী বিনোদিনী নীংশিং সাহিত্য মনা ২০২১, কুঞ্জলাল যেন্দ্রেম্বমনা ইবা নৈন ৱারেংগী লাইরিক মহারাজ কুমারী বিনোদিনী হায়বশিং অসিনি। হায়রিবা মনাশিং অসিদা শেল, সাইটেসন অমসুং সোল অমমমসু য়াওরি।
সোর্স: হুয়েন লানপাউ।
0 কমেন্ট:
কমেন্ট তৌবিয়ু