ইমালোনগী নুমিৎ পাঙথোক্তুনা পেমোজিৎ, অনেশ্বরী, দেবযানিদা লিটরেরি এৱার্দশিং খুৎশিন্নরগনি
ইম্ফাল, আগষ্ট ১৬: পেট্রিওটিক রাইটার্স ফোরাম (পি এ দব্লিউ এফ), মপিুরনা শীন্দুনা চহী খূদিংগী পাঙথোক্তুনা লাকপা ইমালোনগী নুমিৎ মণিপুরী লেঙ্গুয়েজ দে সেলেব্রেসন থা অসিগী ২০গী অয়ুক পূং ১১.৩০ তাবা মতমদা মণিপুর প্রেস ক্লাব, ইম্ফালগী ওদিটোরিয়ামদা পাঙথোক্লগনি হায়না ফোরাম অসিগী চেরোল অমনা খঙহল্লক্লি।
চেরোল অসিনা হায়, কুমজা ১৯৯২ দা মণিপুরী লোন্না ইন্দিয়াগী নিপালশুবা সেদ্যুল্ডদা চনখিবা নুমিৎপু নীংশিংলদুনা পাঙথোক্কদৌরিবা ইমালোনগী নুমিৎ থৌরমগী মনুং চন্না ফোরামনা চহী খূদিংগী লৈপাক নীংবা ৱারীমচাশিংদা লেপ্তনা পীদুনা লাক্লিবা ‘পাচা মীতৈ লিটরেরি এৱার্দ ২০২২’ ‘লুপা ১০০’গী অইবা মাইবম পেমোজিৎ, ‘ডোঃ সরোজ নলিনি অরাম্বম পারাট লিটরেরি এৱার্দ ২০২২’ ‘নোং ঙানখিদ্রবা অহিং’গী অইবী খুমন্থেম অনেশ্বরী অমদি ‘আর কথিং তাংখুল লিটরেরি এৱার্দ ২০২২’ ‘ইমা’গী অইবী দেবযানি য়ুম্নামদা পীদুনা ইকায় খুম্নরগনি হায়রি।
এৱার্দ অসিদা কেস ওইনা লুপা লীশিং ৩/৩, সোল, সাইটেসন অমদি মেমেন্টো অমমম য়াওরি। কেস এৱার্দ ৩ অসি চহীসিগী ওইনা ৱাংজিং বাজার কো অপারেটিভ সোসাইটি ৱাংজিংগী সেক্রেটারি সোবিতা মাইবমনা দোনর ওইবা এৱার্দনি হায়রি। ইমালোনগী নুমিৎ থৌরমগী মনুং চন্না কে সি মঙাংনা ইবা ‘ঐখোয়গী হোজাই’ হায়না মিংথোনবা হোজাই লমদমগী মরমদা ইবা লাইরিক অমসু হৌনবী মতুং ইন্না ফোঙদোক্লগনি।
থৌরম অসিদা লংথবাল এ সিগী এম এল এ করাম শ্যামনা অথোইবা মীথুংলেন, ফোরামগী প্রেসিদেন্ট নাওরোইবম খম্বা লুৱাংনা থৌরম মপূ অমদি ফোরামগী পেত্রোন মেম্বার ডোঃ নোংমাইথেম শান্ত সিংহনা অখন্নবা মীথুংলেন ওইনা শরুক য়াগনি। লোয়ননা বাংলাদেশ মণিপুরী সাহিত্য সংসদ, সিলেট, বাংলাদেশকী এসিষ্টেন্ট জেনারেল সেক্রেটারি খুন্দ্রাকপম সোমেন্দ্রো সিংহ অমদি মণিপুরী শোর্ট ষ্টোরি সোসাইটি, ইন্দিয়াগী প্রেসিদেন্ট লাইসোম গুলাপনা স্পিসিয়েল গেষ্ট ওব ওনার ওইনা শরুক য়াগনি হায়রি। থৌরম অসিদা লমদমসিগী অইবা অইবীশিং, প্রিন্ট এন্দ ইলেক্ট্রোনিক মেদিয়াগী ইচিল ইনাওশিংনা মতম চানা শরুক য়াবীরনবসু আপীল তৌরক্লি।
সোর্স: পান্দম
0 কমেন্ট:
কমেন্ট তৌবিয়ু