নুংশিবা থাজবা অমসুং কৎথোকপা হায়বসিদা য়ুম্ফম ওইদুনা শাগৎলকপা “অশেংবা মরুপ” শৈরেং লাইরিক অসিনা পীনিংলিবা পাউজেল
লাইরিক্কী মমিংঃ অশেংবা মরুপ
অইবীঃ তাওরেম ওংবী সুনিতিবালা
অফোংবাঃ দ কলচরেল ফোরম, মণিপুর
লাইরিক্কি মখলঃ শৈরেং। লাইরিক্কী মমলঃ ২০০
লাইরিক্কী লমায় মশিংঃ ১৪৪
মমানা মচাশিংবু নুংশিবদি শিবসু নাইদে, ময়েং তাবা হায়বসু লৈতে। মচাগীদমকনি হায়রবদি শিবা হায়বদুসু নাচুংদে। অকিবা হায়বদুসু লৈতে মমা ওইবীশিংগী মফমদদি। পুন্সিদা থোকপা থৌদোক অদুগী মৈচাক পুবা হন্থনবা হোৎণবদা শক্লোণ অমদা শৈরেংবু থৱায় হাপ্লদুনা লেপ্তনা ইরক্লি, হংলি ৱাহংশিং, “ৱাহং” লাকখি ৱাহং কয়া পুদুনা/ চৎখি ৱাহং কয়া হংদুনা/ করিগী লাকখিবা/ করিগী হনখিবা/ লৈরমগনি মরমদি/ অমা শোয়দনা নঙগী…। কয়াদা ৱাহল্লবা/ থম্মোয়সে ঐগী/ ৱাহং কয়ানি হংখিবা ইথন্তনা/ পাউখুমদি ফংদনা… তশেংবসু পুন্সি হায়বসি মৈচাক খাংবা তম্লুনবা লাকখিবা খোঙচৎ অমা ওইগনি। ৱাহংতনা লাংগোই চন্দুনা মাগী ঐগী মতম হায়বদু লোয়বা ঙাইবনি। পুম্নমক অসিদা আশা অমদি পীরি নুংশিবা শৈরেংনা। অদুনা অইবীনা ইরক্লি, য়েণ্ণীংথা লাকপদা হায়বা শৈরেংসিদা, ‘ৱাকচিং উলেন খাঙবদা/ মনা হুপ্না কেল্লবা/ থৱায় য়াওদ্রবা পাম্বীরা?/ লেপকং কংলবা উপাল্লা?/ ফাইরেলগী লৈচিল তুংওইনা/হল্লকখো অমুক মালেমদা/ য়েন্নিংলো, মীকপ থোক্লো।/ ঙরাংগী ওলাংলবা অহিংদু/ পোত্থানদ্রবরা জীব নখোয়সু/ তারিনে চেক্লাগী খোঞ্জেল/ মরোল শুদ্রিবা তেতুরা?… অমম অঙান শিন্নখ্রে/ তাইবঙ পুম্বা য়াহৌনরে/ লৈগী লৈনমসু য়েল্লরে… শিন্থা পাঙনবা হৌদোক্লরেনে/ পাউজেল ওইনা লৈনম্না।
হৌজিক্কী মতমদা অশেংবা মরুপ অমা থিবা হায়বসি অরাইবা অমদি ওইদে। মতমসিনা পুম্নমক হোংহল্লে। মসিনা হোংলক্লিবসি মীওইবগী পুকচেল, লমচৎ শাজৎ পুন্সি মহিং, থকসি খাসি তৌহৈবা তৌহৈদবা কয়া অমা মহৌশাগা মান্নদবা মওং অমদা শাথিনা হোংলে হায়বসিমদি পুম্নমক য়ানরবা ৱাফম অমা ওইরি। অহোংবা অওনবা হায়বসি মীওইবা খুনাইগী মচৎ অমা ওইরবসু ফত্তবা লমদা অহোংবা লাক্লবদি মদু পুম্নমক্কী অমাংবা হায়বদু অমুক ওই। অচৌবা জাতি, মীশিং য়াম্বা খুনাইগা চাংদম্নরুবদা মনিপুরগুম্বা অপিকপা খুনাই অসিদা লাক্লিবা অহোংবা কয়া অসিদা অফবা ঙাক্তা অহোংবা লাকপসু ওইদে। মীশিং য়ামজদবা কাংলুপ ফুরুপ কয়ানা খুন্দাবা মনিপুরদা থোক্লিবা থৌদোক ৱাথোক, আইদেন্টিতিগী ইসু, কলচর অমসুং ত্রেদিসন্দা লাক্লিবা অপিকপা অহোংবা, লেপ্তনা মীশিং য়ামখৎলকপনা ওইহল্লিবা খুদোংচাদবা কয়া, লায়রবা ইনাকখুনবা অনীগী মরক্তা লাক্লিবা শম্বল, মী অমগা মী অমগগী মরক্তা লাক্লিবা থাজনদবগী চাং, তাহৈ উহৈদবা থৌদোক, অশেংবা নুংশিবা থিবদা ৱারক্লবা মতম অসিগুম্বা ফিবম কয়াসিনা খুনাই অসিদা লৈরিবা খরা হেন্না সেন্সিতিব ওইবা মীওই কাংলুপশিংগী মরক্তা অমা ওইরিবা অইবশিংদসু নুংনাংবা, লৈতাদবা থৱায় ৱাজবা অমদি তুংদা করি ওইহৌগনি খঞ্জবদা তুমিন্না লৈবা ঙমজদে। শৈরেংবু মেদিয়ম অমা ওইনা শিজিন্নদুনা খোরিরোলদা মখোয়না পুকনিংদা ফাওরিবা পুম্নমক অদু ইথোক্লক্লি। পুন্সিবু লূনা খঞ্জবী অইবী তাওরেম ওংবী সুনিতিবালা পুন্সি ঈপাক ঈয়াইদা কলমনা নৌরেল ওইদুনা হিহোল্লক্লি। থিরক্লি ঈথক ঈরৈ মরক্তা “অশেংবা মরুপ” অমা।
তাওরেম ওংবী সুনিতিবালা ( খোইস্নাম সুনিতিবালা দেবী) ইম্ফাল ইস্তকি নোংমৈবুং ৱাংখৈরাকপম লৈকায়দা ১৯৭০দা পোকখি। অইবীগী শৈরেংশিং মনিপুরদা লৈবা খোরিরোলগী লূপশিংনা ফোংবা চেফোংশিংদা হাপ্তুনা লাক্লি। হান্না লাইরিক অনী” পোনগী চেক্লানি ঐ” (২০১৫) “ অমম্বগী লম্বীসিদা” (২০১৭) হায়রিবসি মনিপুরী খোরিলোলদা খুদোল তমখ্রে।” অশেংবা মরুপ” (২০২১) অসিনা অইবীগী অহুমশুবা লাইরিকনি। শৈরেংগী খোমজিনবা লাইরিক অসিদা পুন্না শৈরেং ৪৮ য়াওরি। লাইরিক অসি হৌজীক্কী মীরোলনসু পাবদা হেন্না খুদোংচানবগীদমক মৈতৈ ময়েক্তসু য়াওরি। শৈরেং লাইরিক অসিমক অইবীগী পালেম অমসুং পন্থৌগী মফমদা কৎচরি অদুগা য়াইফ থৌনিজরি।
সাহিত্যদা পুন্সিগী মমিশিং ময়েক লানা হেক হেক য়েক্লি অইবশিংনা। পুন্সিগা হেন্না নকশিনবা ঙম্লিবমখৈ সাহিত্যগী পোত্থোক অদু হেন্না ফজৈ মতম পুম্নমক্তা হিংদুনা লৈ। অইবী সুনিতিবালাগী শৈরেংশিংদসু অসিগুম্বা হিংদুনা লৈহৌরগদবা ৱাহৈশিং য়াওরি। ৱাহং কয়াসু হংলি পুন্সিনা পুন্সি কয়াদা। নাইতোম তারবা, মরু মরাং কোক্লবা হন্না য়েংবদা কনাসু মনাক্তা লেপ্লদ্রে খল্লকপা মীকুপশিংদা থিরক্লি মহাকনা অশেংবা মরুপ অমা। অদুনা হায়রক্লি, ঐনা য়াম্না ৱারবা মতমদা/ চোংথোক্লকই… মীৎমাংদা হেক হেক লেপ্পীরৈ।/ …নহাক্তনি ঐগী মরুপ/ নহাক্তনি ঐগী মীৎলু পিরাং/ নহাক্তনি ঐগী অশেংবা মরুপ। অশেংবসুনি পীরাংগী মরুপতি অৱাবনি, নীংবা কায়বনি, থম্মোয়গী খাংঙমদবা মৈচাক অদুনি। শিন্থদবদি নত্তে নুংঙাইবা মীকুপশিংদসু অদুবু মদু হরাওবগী ফিজং মরুমদা মীনোকনা খুমজিনখি। থম্মোয় মৈশাদি নীংশিংবা খুদিং ৱামৈগুম্না মৈচাক হেলহল্লি। অইবীগী মথানুংদগী পিক্লিবা মচানুপা অমা মনুং মতম চাদনা লায়না অমনা শেৎনা খায়নখিবদা পুহৌরিবা মৈচাক অসিমক অইবীগী ৱারোলদা পনবা থেংনৈ। থৌদোক অসিনা মরম ওইদুনা মচা খায়ণা মৈচাক খাংবদা অহীং কয়া নুংথিল কয়া শৈরেং ইখি হায়না পল্লম্মি। করম্নদি খাংঙমগনি খায়না মৈচাক। মমানা মচাশিংবু নুংশিবদি শিবসু নাইদে, ময়েং তাবা হায়বসু লৈতে। মচাগীদমকনি হায়রবদি শিবা হায়বদুসু নাচুংদে। অকিবা হায়বদুসু লৈতে মমা ওইবীশিংগী মফমদদি। পুন্সিদা থোকপা থৌদোক অদুগী মৈচাক পুবা হন্থনবা হোৎণবদা শক্লোণ অমদা শৈরেংবু থৱায় হাপ্লদুনা লেপ্তনা ইরক্লি, হংলি ৱাহংশিং, “ৱাহং” লাকখি ৱাহং কয়া পুদুনা/ চৎখি ৱাহং কয়া হংদুনা/ করিগী লাকখিবা/ করিগী হনখিবা/ লৈরমগনি মরমদি/ অমা শোয়দনা নঙগী…। কয়াদা ৱাহল্লবা/ থম্মোয়সে ঐগী/ ৱাহং কয়ানি হংখিবা ইথন্তনা/ পাউখুমদি ফংদনা… তশেংবসু পুন্সি হায়বসি মৈচাক খাংবা তম্লুনবা লাকখিবা খোঙচৎ অমা ওইগনি। ৱাহংতনা লাংগোই চন্দুনা মাগী ঐগী মতম হায়বদু লোয়বা ঙাইবনি। পুম্নমক অসিদা আশা অমদি পীরি নুংশিবা শৈরেংনা। অদুনা অইবীনা ইরক্লি, য়েণ্ণীংথা লাকপদা হায়বা শৈরেংসিদা, ‘ৱাকচিং উলেন খাঙবদা/ মনা হুপ্না কেল্লবা/ থৱায় য়াওদ্রবা পাম্বীরা?/ লেপকং কংলবা উপাল্লা?/ ফাইরেলগী লৈচিল তুংওইনা/হল্লকখো অমুক মালেমদা/ য়েন্নিংলো, মীকপ থোক্লো।/ ঙরাংগী ওলাংলবা অহিংদু/ পোত্থানদ্রবরা জীব নখোয়সু/ তারিনে চেক্লাগী খোঞ্জেল/ মরোল শুদ্রিবা তেতুরা?… অমম অঙান শিন্নখ্রে/ তাইবঙ পুম্বা য়াহৌনরে/ লৈগী লৈনমসু য়েল্লরে… শিন্থা পাঙনবা হৌদোক্লরেনে/ পাউজেল ওইনা লৈনম্না।
মমা মপা ওইবশিংনা মচাশিংবু নুংশিজবা, মপু মবেন্না মশুশিংবু নুংশিজবা, মখোয়গীদমক্তা খঞ্জবা ৱাজবা, মচা মশুশিংগীদমক য়াইফনা খঞ্জবা মসি তাইবঙগী লীচৎনি, হৌনবীনি। ময়েং তাবা লৈতে মখোয়গী নুংশিবা অমদি কৎথোকপদি। মৈতৈশিংগী য়ুম্বাল্লোন্দা য়াওরিবা নুংশিরবা চৎনবী অমা অইবীনা লাইরিক অসিদা ফজরবা থিম অমদা শাগৎ্লগা য়েক্লকলিবা “নাহোং ফি” য়াম্না নুংশীবা শৈরেং অমনি হায়না লৌজৈ। ফজরবা সিম্বল অমদা পুথোকতুনা ইরিবা শৈরেং অসিদা পুরিবা পাউজেল অসি অচম্বা নত্তে। ইরমদমগী ইয়োংদা শাজবা,/ ইরমদমগী চৎন-লোণচৎণা লৈতেংবা, থাবুম মশীং শুরেদো তাকচবা,… মপু-মবোকনা মশুগীনি খুদোলজবা,/ পারি-মমোমগীদি নাওকোন ফি,/ নাহোং ফি। নাফোং ফি!/ খোঙকাপ শুবা ঙমজদ্রিবা মচাবু,/ হানৌ শাইগুপ্না কুপ্লম্বদাই মশাপুম্বা,… মতমদু হৌখরে, মতম‘মা মাংওইনরক্লে,/ ওইহন্নীংদে খুয়াগী ফদি,/ হুন্দোকপীগনু কনা খঙদনা, নাহোং ফিবু লমহাংদা,/ মফম খঙদনা লমহাংদা। অমুক্তং তাংনা ফংবা মীওই মপোকপু য়াম্না লূনা খঞ্জবী অইবীনা পোকপদা ঙাইরিবা অঙাংশিংবু নাফোং ফি অমদা য়োমদুনা লমহাংদা, নারক মোংশোংদা হুন্দোকপগী থৌওংশিংবু পেঞ্জদনা য়েক্লি। মীনুংশি চেন্দ্রবা অদুগুম্বা মমা মপাশিংদুদা পুন্সিগী ৱাহন্থোক খঙহন্নিংই। মতমসি্গা য়াম্না মরি লৈনবা শৈরেং অমনি হায়না লৌজৈ।
নোংজু পান্থাসু লাক্লে হৌজীক লৌমী শিন্মীশিংদি থৱায় ৱাজরি মরমদি অইং অসাগী খল কায়রে। লৌ পানগদবা মতমদা নোং মতম চানা চুদ্রে। মহৌশাগী খল কায়বদা নত্তনা মীওইবসু মহৌশা ওইদ্রে লায়রবনা অসুম লায়রবা অদুগা ইনাকখুনবনা অসুম ইনাকখুনখিবা অসিগুম্বা ফিভম অসিদা লৌমীশিংগী পুকনিংগী ৱারোল অদুমক থম্লক্লি ‘ঐদি লৌমীনি‘ হায়না মিংথোনবা শৈরেংদা, ঐদি লৌমীনি/ নোংজু নুংশা খাক্তনা/ তীনফা কাকফৈ মরক্তা/ লৈখোম লৈনাং না ইতৈ তৈ/… ষন পাবোৎ মাংদা থা/ লাঙ্গোল খুশুনা চৈসু ওই…/ লৌবুকনা ঐখোয়গী থৱায় ওই। থবকনা ঐখোয়গী পুন্সিনি/…লৌমী ঐখোয়গী পুন্সিসে কনানসু মীথানবীদে…/ তোঙাণ তোঙানবা শিনফমদা থবক তৌরিবা মীওইশিংবু অইবীনা চপ মান্না মিৎয়েংনা য়েংদুনা মখোয়গী পুন্সিদা চংশিন্দুনা য়েংলুই। মসিদা থেংনরকপা অমদি পুকনিংদা ফাওরকপদু ইরক্লি ‘অথোইবা লান্মী‘ হায়না মীংথোল্লদুনা। হায়রিবা লান্মীশিং অসি অতৈ কনাসু নত্তে চাওর চাওরবা গাড়ীশিং মনিপুরগী থেকনা খোয়রবা চীং লম্বীদা নোংজু নুংশা নাইদনা মীয়ামসিনা শিজিন্নরিবা চংদ্রবা য়াদ্রবা পোৎলমশিং মপাল লৈবাক্তগী পুশিল্লক্লিবা নেস্নেল হাইৱেশিংদা গাড়ী থৌরিবা মখোয়গী পুন্সিবু শৈথাবনি। মসিসু নুংশিরবা শৈরেংশিংগী মরক্তা অমনি। মান্নবা মীৎয়েংদা অমদি মখোয় মখোয়না পায়রিবা অপিকপদগী খ্বাইদ্গী চাওবা শীনফমদা লৈরিবা মীওইশিংনা অচৌ মচা খায়দনা অমনা অমবু ইকায়খুম্নবা মতমদুদা চাওখৎপা লমদম অমদি শোয়দনা ওইগনি হায়না চেৎনা থাজৈ অইবীনা।
মহৌশাগী মশকপু হেন্না ফজহল্লিবা চীং পাৎ তুরেল, উমং ৱামং পুম্নমক অসিদা অশৈবা কবিশিংনা ঙাওনবগুম্বা অইবী সুনিতিবালাসু অদুমক থৱায় লুপচৈ। মহাক্কী শৈরেংশিংদা মহৌশাগী পোৎশকশিংবু পার্সিনিফাইদ তৌদুনা শোকচীল্লকলিবা মালেম তাইবঙপান অসিবু কঞ্জনিংবগী ঈহুলশিং নুংশিবা ৱাহৈনা অপাবশিংগী পুকনিং চিংশিল্লি। অদুনা ঈশিং, উনিংথৌ, ঊ থম্বাল ঈয়াঈগী থম্বাল, উপাল অসিনচিংবা শৈরেংশিং ইরি। শঙাইগী তেংথাখোল, মৈতৈ নুপীশিং থৌনা, নুপী লানগী শৈথা শৈরেং অসিনচিংবা থিম কয়াদা চংখোন্না শৈথারকপা অসিমক পুকনিং থৌগৎনীংঙাই ওই। ইমা লৈবাক মনিপুরবু মহাকনা কয়াম নুংশিজবগে হায়বদুসু শৈরেং খরদা ময়েক লানা ইরি। মতুং তারকপা পুন্সি খোঙচত্তা লেপ্তনা কলম পায়দুনা মনিপুরী খোরিলোলদা খুদোল তম্বীরকখিগনি হায়না থাজবা থমজরি।
0 কমেন্ট:
কমেন্ট তৌবিয়ু