“ইমাগী লৈকোলদা” শৈরেং লাইরিক অসিদা মীৎয়েং অমা
অইবীঃ রিতা থোকচোম
অফোংবাঃ হ্যুমেন রিসোর্স দিভেলপমেন্ট সেন্টর, ময়াং ইম্ফাল
লাইরিক মমিংঃ ইমাগী লৈকোলদা।
লাইরিক মখলঃ শৈরেং। লমায় মশিং ১১২
লাইরিক্কি মমলঃ লুপা ২০০
হৌজীক্কী মতমদা মমা মপা ওইবশিংনা মচাশিংবু ঙমজবা মওংদা মচাশিংবু মী ওইনবা শেম্লবা মতুং মচা ওইবশিংনা মতিক চারবা মতমদা মখোয়বু কদায়দা করি শোয়খিগদগে হায়না শেন্নজদুনা লাকপা অহল ওইরবা অপোকপা মমা মপাবু ওল্ড এজ হোমদা থম্বগী য়াম্না থম্মোয় কায়নিংঙাই ওইবা থিম অমদা ইরকপা শৈরেংনি “পাউজেল” শুপ্নতগী পরেং তরেৎখক্তনা শাবা শৈরেং অসিদা য়েক্লিবসি পুন্সিগী ভেল্যুস মাংশিল্লক্লবা অদুগা অরং অরাক্কি ওইবা পুন্সিদা হেন্না অশেংবা পুন্সিনি হায়না লৌনরক্লবা মতমসিগী পুন্সি মহিং অদু পুথোক্তুনা য়েংহল্লি, তৌনরিবা থৌওং অসি চুম্লিব্রা হায়না। শৈরেং অসিদা মমা মপা ওইরিবা অহল মতম ওইশিল্লক্লবা মীওইশিং অদুনা ৱারৌনা হায়রকপদুনি ইরিবসি, “ইচা শেম্বা লোইশিল্লক্লে।/ ওল্ড এজ হোম/ অফবা অমা পামজৈ।/ করিগুম্বা লৈবীরবদি/ মখাগীসিদা পাউ পীবিরকউঃ ইনাকখুনবম ইনাকখুনবী।/ লৈফমঃ লৈফম খুনৌ।” তেন্তকনা য়াম্না ৱাহন্থোক য়াম্না লৈবা শৈরেংনি।
মলেমসিদা লৈরিবা মচা ওইবা খুদিংমক মমা মপা ওইরিবা মখোয়গী লামন অমদি অদুমমক তোন্দুনা লৈ। ফনা য়াম্না মমা মপাগীদমক মচা ওইবশিংনা হোৎনরবসু শিংঙম্লরোইদবা লামন অমদি মচাশিংদুনা তোন্দুনা লৈ হায়নৈ। য়ুমগী কুপ্নোমদগী হৌদুনা মচা মশুশিংবু মীরক তিণবা ঙম্নবা হোৎনরিবসি মমা ওইবীশিং অমদি নুপী ওইবীশিংনি হায়বদা হায়মনবা থোকলোই। লায়রবগী চৈথেংনা, পুন্সিগী পোৎলুমদা ৱাই কৌবতা হায়বা লৈত্রবা মমা ওইবী কয়া লমদমসিদা লৈরি। অইবী রিতা থোকচোমগী অহানবা খুৎথাদা মিংথোল ওইরিবা শৈরেং “ইমাগী লৈকোলদা” হায়রিবা অসিদা য়েক্লিবসি অখাং কনবী, পুন্সিগী পোৎলুপ কয়া পুদুনতা লাক্লবসি অৱাবতা মশরুক ওইরক্লবী পালেম মমা অমগী শক্তম্নি। অদুনা হায়রক্লি, “ঐগী ইমাদি/ নোংমতা য়াহৌ থেঙখিদে/ নোংমতসু ঙন্না তুমখিদে।/ চেন্না চেন্না হল্লকখি।/ মীৱা মৈশাতা লাংখি।/ নোংমতসু মথৌ লেপখিদে…অৱাবা উৎখিদে নোংমতা।” তাইবঙপান অসিদা শক্তম অসিদা য়েক্লিবা অসিগুম্বা ইমাগী লৈকোল অমদা পুন্সি লৈরাং ওইনা লৈশাৎ তমদুনা লৈরম্লবা তুংদা নোংমা মতম হায়বদু লোয়দুনা কেনখিববু তেংথাদুনা ইরকপা শৈরেং অমনি। ৱাহৈশিং অসি য়াম্না চম্না নুংশিবা সুর অমদা পুদুনা চৎলি। অইবীগী অহানবা খুৎথাদা পুথোক্লকলিবা লাইরিক অসিদা পুন্না শৈরেং ১০০ য়াওরি। অয়াম্বা শৈরেং তেন্তক তেন্তক ওইনা তৌই। তোঙান তোঙানবা থিমদা পুন্সিগী মশক কয়াবু কোনশিন্দুনা শৈথানবা হোৎনরি।
অইবী অমা ওইনা নীঙোল মপোক্তা পোক্লুবা অমদি পুন্সিদা থেংনবা খুদোংচাদবশিং, অৱা অনা, পুন্সি অমদি পুকনিংগি ফিরেপ অনিগী মরক্তা মুকনরকপা অমসুং অইবীনা শৈরেং ইনিংলকপা অসিদা লৈরিবা লম্বেল অসিবু চাংয়েং তৌনিংলকই। অদুনা অরোইবা চাংয়েং তৌবা পাম্লকই। “অইবা নঙগী ৱারীগা/ ইনীংলিবী ঐগী ৱারীগা/ করিবু খেন্নরিবগে?/ অদুগা করিগীনো অনীসিনা/ পুন্সিন্নবা শুকয়ামক য়াদ্রিবা?” শৈরেং অসিদা ৱাহং কয়া হংলি অইবীনা। করিগুম্বদা খল্লিবা ৱাখলসিগা পুকনিংগা য়াশিন্নবা ঙম্লক্ত্রবা মতমদা তাইবঙ শেম্বীরিবা মপু মহাক্কী মফমদা চংজরদুনা মঙালগী লম্বেল অমা তাকপীনবা নীজরি মপু মাগী থৌজাল “নফমদা” হায়না মিংথোনবা শৈরেং অসিদা। “অমম অঙান খায়রিবা/ হে! তাইবঙগী মপু,/ লম্মাংনরে তোল্লবীদি/ তাইবঙ ঈপাক ঈয়াইসিদা।/ লুপকদৌরে পীক্লবা হিনাউসে।/ মায়কৈ খঙদা হুম্লকপা/ অমম্বা নোংলৈ, লকসিদা। লোইনদে কনাসু ননাইদি/ হিনাও শাবিয়ু তোল্লবীগী।/ কৈদা লৈবগে নহাকপু?”
মীওইবগী নাপলবু অইবীনা য়াম্না কিজৈ। মসিননি পুম্নমকপু হেক হেক মাংহল্লিবসি। ঐ হায়বা ণীশা অসিগী ময়াই অসি কাখৎলকলবদি ণীশা পুম্নমক্তগী হেল্লি। মীওইববু লৈখা তাহল্লিবসি নাপল হায়বসিসু অমনি হায়বসি অইবীগী “খোঞ্জেল” হায়বা শৈরেং অসিদা অচম্বা ৱাহৈনা ইরি। “লাউরি খোঞ্জেল অমনা/ তোইনা তোইনা/ মশক্তি উদে/ তারিবনি পুম্নমকনসু।” নাপল হায়বসি থাদোকপনা য়াইফবা ওইগনি হায়বা থিমদুনি।
হৌজীক্কী মতমদা মমা মপা ওইবশিংনা মচাশিংবু ঙমজবা মওংদা মচাশিংবু মী ওইনবা শেম্লবা মতুং মচা ওইবশিংনা মতিক চারবা মতমদা মখোয়বু কদায়দা করি শোয়খিগদগে হায়না শেন্নজদুনা লাকপা অহল ওইরবা অপোকপা মমা মপাবু ওল্ড এজ হোমদা থম্বগী য়াম্না থম্মোয় কায়নিংঙাই ওইবা থিম অমদা ইরকপা শৈরেংনি “পাউজেল” শুপ্নতগী পরেং তরেৎখক্তনা শাবা শৈরেং অসিদা য়েক্লিবসি পুন্সিগী ভেল্যুস মাংশিল্লক্লবা অদুগা অরং অরাক্কি ওইবা পুন্সিদা হেন্না অশেংবা পুন্সিনি হায়না লৌনরক্লবা মতমসিগী পুন্সি মহিং অদু পুথোক্তুনা য়েংহল্লি, তৌনরিবা থৌওং অসি চুম্লিব্রা হায়না। শৈরেং অসিদা মমা মপা ওইরিবা অহল মতম ওইশিল্লক্লবা মীওইশিং অদুনা ৱারৌনা হায়রকপদুনি ইরিবসি, “ইচা শেম্বা লোইশিল্লক্লে।/ ওল্ড এজ হোম/ অফবা অমা পামজৈ।/ করিগুম্বা লৈবীরবদি/ মখাগীসিদা পাউ পীবিরকউঃ ইনাকখুনবম ইনাকখুনবী।/ লৈফমঃ লৈফম খুনৌ।” তেন্তকনা য়াম্না ৱাহন্থোক য়াম্না লৈবা শৈরেংনি।
মেরাগী থানিলদা পুদুনা লাকপা নুংশিবা অমদি নীংশিংবা য়েংলিবা অমদি থাবল মঙালদা লুপ্লীবা অয়েংবা খুদিংনা পুকনিংদা ফাওরিবা খুদিংমক অমগা অমগা অমত্তা মান্নফম থোকতে। মপাং কায়নখ্রবা চেক্লানা থাবল উরগা করি ফাওরমগনি। নুংশিবা কায়নদ্রিবা কনানদি মসি খঙলম্লোই। মথোৎ কারক্লিবা শাবি শানৌশিংগী মফমদদি মেরাগী থাবলনা নোংমদোলদা লুপা মহি চেনবদু উরগা কয়াদি পুকনিং নৌরমগনি। মসিদি অমুক হায়নদ্রবসু পুম্নমকনা খঙনৈ। অদুনা অইবীসু পুন্সিগী লমায়দা ইখ্রবা ৱারী অমা নৌহৌননা হাংদোকলকখি “মেরাগী থানিল” না। অদুনা শৈথাদবা ঙম্লক্তে, “হ! মেরাগী থানিল/ নঙগী মেঙলবা নঙালনা/ ফিঙৌ-ফৌনা ফুদোরক্লবদা/ হাইদোকপিরে থম্মোয়গী য়ুখলসে।/ মথং মথং খাম্বা য়াদিনা।/ নীংশিংহল্লেনে অদুঙৈগী শক্তম।/ লোৎশিনবা ঙমদ্রেনে ৱারীসিদি।/ অতৎ অখম লৈত্রবা মীৎলুগী পিরাংনা/ লীরক্লে ৱারী মথং মথং।/ নঙগী খোঙচৎতি লেপত্রি/ লেপখ্রে ঐগী নুংশি খোঙচৎতি/ মতম খোঙলৈ তুংইন্না/ চৎখি নঙনা নীংশিংববু থনম্লদুনা।/ লাক্লি ঙসিসু নীংশিংবসে পুরদুনা।”
পাম্মু পাম্মুনা কায়নখিবা। নুংশি নুংশিনা তাম্নখিবা। য়েংজনিংনা অদুমমক উখিদবা পুম্নমক মতম মহাক্কী কল্লবা কোল্লুদা য়াওরুবা মীওইবগী লাইবকননি। কনানদি থিংলুবা ঙম্লুগনি। পেন্থোকপা নত্তনা করি পাম্বৈ লৈগনি অমুক হল্লকহনিংবা, অমুক লাকহনিংবা নুংশিবা পাম্মুবা কয়াদু। অইবীগী শৈরেং খরদা পুন্সিবু, মতম্বু অমদি মীওইববু য়াম্না পাম্মুজনা হেক হেক য়েকনবা হোৎনবা থেংনৈ। মসিমক অইবশিং তোয়না পুকনিং ইহুলদুনি। খাম্বা য়াদনা চৼলিবা মতমগী খোঙচৎ অসিদা পাম্মু শৈরোল অমদি ইরক্লি, “হৌখি চৎখি মতম/ লেপ্তনা অশুম অশুম/ খাম্বা ঙমদে মীৎকুপ অমফাও।/… অনৌবা চহীদগী অরিবা চহী।/ অরিবা চীদগী অনৌবা চহী/ মথং মথং লাক্লি/ পাঙনিংলম্বা কয়াসু পাঙহৌদে।/ নীংবা কায়রবা পুন্সিনা/ হৈনবিদুম ওইরক্লি।” অসুম্না চৎখিবা খোঙথাং অসি হৌনশানি হায়না য়াদবা ঙমজদে। মরমদি পুন্সি হায়বসি ঐনা পাম্বা অদু ঙাক্তা ওইয়ু হায়বা খক য়াদে।
অচুম্বদি অদুম উই। অইবশিংনসু মীয়াম্নসু। কনানা লানবা কনানা চুম্বা পুম্নমক ইখঙ খঙনৈ। অখঙ অহৈ কয়াসু লৈ। লৈবাক্কী লোইশঙ, মীয়ামগী লম্বী, হীংবগী ৱাহন্থোক মমি শাম্লে, অমম্বা অমদি অমোৎপনা থল্লে খঙলবসু পাম্বৈ লৈতে। অদুনা শৈরেং, “তিঙ শোকখি” হায়বসিদা পরেং মঙাদা ইরক্লি, “খুৎ নীকনা ইখি/ চৈনিংবনা লুচিং-পুরেলবু/ শুপ্নতগী ৱাহৈ খরতনি/ হৌবগা লোইবগা মান্নবা।/ কাখি চৈরাপ, য়ৌখি কৈশুমশঙ।” অচম্বা ৱাহৈনা নুংশিবা শৈরোলনা অপাবশিংবু ৱাখল খলহল্লি অমসুং পুন্সিবু নৌহৌননা মমল লেপ্নবা লমজৈ ওইনা য়েংবা য়াবা শৈরেংশিংসু য়াওরি। লেপ্তনা শৈরেং লাইরিক কয়া ইরক্কনি হায়না থাজবা থমজরি।
0 কমেন্ট:
কমেন্ট তৌবিয়ু