“খা-গী লৈবাক য়ুনান” লমকোই ৱারী লাইরিক অসিদা মীৎয়েং অমা
অইবাঃ হরেস্বর গোস্বামী লাইরিক্কী মমিংঃ খা-গী লৈবাক য়ুনান, ২০১০ লাইরিক মখলঃ লমকোই ৱারী অফোঙবীঃ ৱাহেংবম অমিতা দেবী/ কংলা পব্লিকেসন্স লাইরিক্কী মমলঃ লুপা ২০০/- লমায় মশিংঃ ৭২
করম্বা মতমদগী ভারতকি অৱাং নোংপোক অমদি খা-নোংপোক থংবদা লৈরিবা টীবেতো বর্মন লোন ঙাংবা য়াম্লবা ফুরুপশিং অসিনা লৈরিবা লৈবাকশিং অসিবু ‘খা-নোংপোক এশিয়া হায়না খঙনবা হৌখিবগে হায়বগী হিস্তরিকেল একাউন্স অমা মরিক চুম্না অহানবা ইরি। মমিং লৈরবা হিস্তরিয়ানশিংনা ইরম্বা লাইরিকশিংগী রেফরেন্স ফজনা পীরি। মনিপুরদা লৈরিবা মীওইশিংবু অঙনবা মতমদা মপাল লমগী মীওইশিংনা করি হায়না মিংগৌনরম্বগে অমদি ভারতকি অৱাং নোং-পোক্তা লৈরিব মোঙ্গোলোইদ ফুরুপ খুদিংবুনা করি কৌরম্বগে হায়বনচিংবা মরিক চুম্না ৱাহৌদোক ওইনা ইরি। মথংদা, খা-নোংপোক এশিয়াদা করম করম্বা মীওই ফুরুপ কাঙলূপশিংনা করম্বা মতমদগী করম্বা লমদমশিংদা মাইগ্রেসন তৌখিবা য়াবা মরমশিং পুৱারীগী লমায়শিং হাংদোক্তুনা নৈনরি।
নীংশিংবা থোক্ত্রবা মতমদগী হৌনা মীওইবনা মালেমসিদা খুন্দা লৈতাদুনা চাদা-নাওদা মথং মথং শেমদুনা লৈরক্লি। য়ামখ্রবা ফুরুপ কাংলুপ, শক-চু মান্নদবা তোঙান তোঙানবা লাইনিং চৎপা, কলচর অমদি ত্রেদিসন তোঙানবা মীওই কাংলুপ কয়া মালেমগী মফম কয়াদা লৈরি। হায়রিবা তোঙান তোঙানবা লোন ঙাংবা, কলচর অমসুং ত্রেদিসন মান্নদবা ময়াম মরক্তা সাউত ইস্ত এসিয়াগী লৈবাকশিংদা লৈরিবা মোঙ্গোলোইদ ফুরুপ্তা চল্লিবা মীওইশিংগী মরক্তা শক মান্নবদা নত্তনা থাজনবী, চৎনবী পুন্সি মহিং, লোন অমদি ত্রেদিসন্দা মান্নবা মশক কয়া লৈরিবা অসিনা হায়রিবা খা নোংপোক এসিয়াদা লৈরিবা লৈবাকশিংগী মীওইশিং অসি মীহৌরোলগী ওইবা পুৱারীগী লমায়শিংদা কদায়দনো অমদি হৌফম শাৼফম মান্নফম থোকই হায়বসিনি। মপা মপুগী হৌরকফম খোঙ্গুল লীদুনা মশাগী অশেংবা শক্তম খঙজনিংবা মীওইশিংনা হৌখ্রবা পুৱারী লমায়শিং হায়গৎলদুনা থিনরক্লি। মতমগী ঈরোন্নুংদা লুপখ্রবা শক্তমশিংবু কলচরগী মীৎয়েংদা, পুৱারীগী লংলা অমনা শম্নবা য়াবা করি পাম্বৈ লৈ হায়না থৱায় য়াওনা হীরম অশোমদা চংশিন্নরক্লি। মরমদি মপা মপুগী হৌরকফম খঙদনা অমদি পুৱারী কদায়নো নৈনদনা খুনাই অমনা চাওখৎ লম্বেলদা মাং থাবা হায়বসি লমথুংফম খঙদনা চৎপগা পাংখক ওইগল্লি। খুনাই অমগী পুৱারী খঙদনা লৈবাক্কী লুচিংবশিংনা কৈদৌনুংদা খুনাই অদু লমজিংবা ঙমদে। ঐখোয় করি তৌরম্মী কদায়দা হীংলম্মি কমদৌনা হীংদুনা লাকলিবনো হায়বসি অমুক অমুক নীংশিংনিংঙাইনি। পুৱারী হায়বসি য়াওদনা ঙসি হায়বসি শেম্বা য়াদে। হৈয়েং হায়বা য়ুমফম অসিসু পুৱারী অমদি ঙসি হায়বসি য়াওদনা ওইবা য়াদে। অসিগুম্বা পুৱারী অমসুং কলচরগী লম্বীরোমদা য়াম্না খঙনিংবা অমগা লোয়ননা চৎখিবা খোঙচৎ অমদা য়ুম্ফম ওইদুনা শাগৎলক্লপা লমকোই ৱারীনি অমনি হরেস্বর গোস্বামীগী ‘খা-গী লৈবাক য়ুনান’।
হরেস্বর গোস্বামী ১৯৫৯দা ইম্ফাল ইস্ট ডিত্রিক্টকী মনুং চনবা ৱাংখৈ কোন্সম লৈকাইদা পোকই। ৱাংখৈ বোইজ অমদি সিঃ সিঃ হাইয়র সেকেন্দরিদা তম্লকখি। দিল্লি য়ুনিভর্সিতিদগী বিঃএঃ হিস্তরি ওণর্স লোইশিনখি অমসুং মণিপুর য়ুনিভর্সিতিদগী এমঃএঃ হিস্তরি লোইশিনখি। অমদি ‘মাসা্দ’কি অমদি অতৈ এসোসিয়েসন কয়াগী জেনরেল সেক্রেটরি ওইনা থবক তৌরম্মি। কলচর অমসুং হিস্তরিদা থৱায় য়াওজবা অমদি রিচর্স কয়াদা থবক তৌরি। কলচরগা মরি লৈনবা লূপশিংদসু লেপ্তনা থবক তৌমিন্নরি অমদি মণিপুর পুৱারীগা মরি লৈননা পাঙথোকপা সেমিনার কয়াদা পেপর কয়া পাদুনা লাকলি। অইবনা ফোঙখ্রবা লাইরিকশিংগী মনুংদা ‘হিস্তরি ওফ দি পিপল ওফ মনিপুর’ অমসুং ‘মঙলানগী লৈকোল’ পনা য়াই। ওল ইন্দিয়া রেদিও ইম্ফালদা ‘ইতিহাসকি লমায়দগী’ হায়না মিংথোনবা রেদিও সেরিয়েলসু মহাকনা ইদুনা শন্দোকখিবা লৈরে।
অইবা হরেস্বর মশামক পুৱারীবু সব্জেক অমা ওইনা য়াম্না থৱায় য়াওনা তমলকখি হায়বসি মহাক্কী ফোঙলিবা লাইরিকশিং অসিনা লেংদ্রবা খুদমনি। কনাগুম্বশিংদি য়ুনিভর্সিতিগী অৱাংবা থাক্কী মহৈ তম্লুরগসু লৈবাক খুনাইগীনি হায়দুনা করিসু কান্নবা তৌরমদনা অদুমমক হীংবদমক হীংলমলগা চৎখিবসু য়াওদবা নত্তে। অদুবু অইবনা মনিপুরগী কলচর অমসুং পুৱারীগী লিকলম অমদা চংশিংদুনা মসিগী হৌরকফম খোঙ্গুল লীনবা হোৎনবদা মণিপুর ৱাংমা লান্দুনা মীরমদা ফাওবা চৎতুনা রিচর্স তৌবসি পুকনিং থৌগৎনিংঙাইনি।
মনিপুরী খোরিলোলদা লমকোয় ৱারী ইবসি মশিং য়াম্না লিক্লি হায়বা য়াই। ত্রাভেল রাইতিং তৌবসিনা খোরিলোলদা অমদি লম অদুগী খুনাইলোলদা কান্নবা হীরম কয়াদা মতেং ওই। মরমদি চাওখৎলবা ফিদম্নফম ওইরবা লৈবাকশিংদা কোয়রুবদা থেংনরকপা ফজবা নিতি নিয়ম কয়া, লম্বী থোং ফবা, লৈরম্লিবা লৈবাক অদুগী মীয়োক মীচান ফবা মখোয়গী কলচর অমসুং ত্রেদিসন অদুনা লমকোয়বা লাক্লিবা মীওইশিংদ ইন্সপাইয়র তৌদনা তোকতে।
হরেস্বরগী লমকোই ৱারী ‘খা-গী লৈবাক য়ুনান’ পন্দুপ তরেৎ থোকনা ‘খা- নোংপোক এশিয়া, কদোমদনো য়ুনান, খাগী লৈপাক য়ুনান, ইতিহাসকী মীৼয়েংদা য়ুনান, তাইশিংনা খা-নোংপোক এশিয়াগী লমদমদা কুমথরকপা, য়ুনানগী মরু ওইবা ইথনিক মাইনোরিতি খরা অমসুং লোইশিলকপদা হায়দুনা রিচর্স ৱার্ক অমগুম্নস মচা খায়না ইরি। লাইরিক অসিদা পুৱারীগী লমায় কয়া মথং মথং হায়দোক্তুনা থিজিন খোঙচৎ চৎখিবা অইবনা য়াম্না এন্থ্রোপোলোজীকেল, জিওগ্রাফিকেল লোকেসন য়াওনা তোঙান তোঙান মেপশিং, মরি লৈনবা ফোটোগ্রাফনচিংবা খরসু হাপ্তুনা হেন্না মরিক চুম্না পাউদম্বা থেংনৈ। করিগীদমক্তা য়ুনান চৎলিংলুরিবা হায়বসিদা অইবগী ৱারোলসিদা অসুম্না হায়রি, “মণিপুর ইতিহাসকী লাইরিক অমত্তং হাংদোক্লুবদা, হৌরকফম কাঙফমগী ৱাফম অমত্তং নৈনরুবদা, তাই, লাই, শান, পোইরৈতোন-খন্থোক, খমনুং-সৱা, কাচিন কারেন, খম, খম-মী গী মরমদা নৈনরকপদা য়ুনান হেক্তা নীংশিংলকই। চাইনাদ্গী মনিপুর ফাওদুনা ইন্দিয়া অমসুং ৱেস্ট এশিয়া লমদম কয়া চৎখিবা লম্বীশিং নৈনরকপদা য়ুনান য়ৌদবা য়ারক্তে। লাই-নিংথৌ নোংদা লাইরেন পাখঙবা নুমিত্তগী থোরকপনি, লৈচিলদগী কুমলকপনি, নোংদগী তারকপনি, খঙ-হৈরবা, লাইওইখ্রবা ইপা-ইপুশিংনা ৱাফমশিং অসিবু লোৎনা থুপ্না তুংগী মীরোলগীদমক কিশি কিদুনা থম্বিরম্বরা? মণিপুর ইতিহাস্তা থেংনরিবা খাগী লৈপাক, খাগী ঙম্বা, য়ুনান লৈপাক্কা করি মরি লৈনৈ?” ৱাহং কয়া অসিগী পাউখুম অদু থিবা ওইনা চৎখিবা খোঙচৎনি লাইরিক অসি ইবগী পান্দমসু।
করম্বা মতমদগী ভারতকি অৱাং নোংপোক অমদি খা-নোংপোক থংবদা লৈরিবা টীবেতো বর্মন লোন ঙাংবা য়াম্লবা ফুরুপশিং অসিনা লৈরিবা লৈবাকশিং অসিবু ‘খা-নোংপোক এশিয়া হায়না খঙনবা হৌখিবগে হায়বগী হিস্তরিকেল একাউন্স অমা মরিক চুম্না অহানবা ইরি। মমিং লৈরবা হিস্তরিয়ানশিংনা ইরম্বা লাইরিকশিংগী রেফরেন্স ফজনা পীরি। মনিপুরদা লৈরিবা মীওইশিংবু অঙনবা মতমদা মপাল লমগী মীওইশিংনা করি হায়না মিংগৌনরম্বগে অমদি ভারতকি অৱাং নোং-পোক্তা লৈরিব মোঙ্গোলোইদ ফুরুপ খুদিংবুনা করি কৌরম্বগে হায়বনচিংবা মরিক চুম্না ৱাহৌদোক ওইনা ইরি। মথংদা, খা-নোংপোক এশিয়াদা করম করম্বা মীওই ফুরুপ কাঙলূপশিংনা করম্বা মতমদগী করম্বা লমদমশিংদা মাইগ্রেসন তৌখিবা য়াবা মরমশিং পুৱারীগী লমায়শিং হাংদোক্তুনা নৈনরি।
‘কদোমদনো য়ুনান’ হায়বসিদগী হৌরে অইবগী য়ুনান খোঙচৎ। য়ুনান চৎনবা ইম্ফালদগী নোংথক লম্বীদা চৎপগী পাম্বৈ দাইরেক ফ্লাই লৈতবনা কোলকটা তম্না পাইদুনা অমুক থাইলেণ্ডগী বেঙ্কোক ফাওবা পাইদুনা চৎপা তাখি। মতাং চানা পুৱারীগী তাংকক অমসু নৈনরি। হৌজীক্কী বঙ্গলাদেশ, ৱেস্ত বেঙ্গলগী লমদম য়াওনা ওরিষ্যা, বিহার অমসুং নোংপোক থংবা লমদমশিংদা খূৎকন-পাঙ্গন্না পাল্লম্বা মৌষ্য (মোরিয়া) শাগৈ অসি অষ্য নত্তে হায়বা লৈরি। মতাঙ অসিদা ডাঃ গোগোইনা মাগী লাইরিক ‘তাই এন্দ তাই কিংদম’ হায়বসিদা ইরিবা অসি অইবনা পল্লদুনা ইরি, “ …Asoka may be asseumed to be a non-Aryan ruler of Magadha. Hence the possibility of his racial affinity with Mongoloid peoples of Yunan or Burma is not to be brushed aside on sentimental ground” অসুম্না মতাং চানা য়ুনান খোঙচৎ হৌরকপদা ইরিবসিগা অইবগী খোঙচৼ অসিগা মরি লৈনহন্দুনা অপাবশিংদা পূকনিং লৌশিং য়াম্না ওইহল্লি। খোঙচৎ অসি আগস্ট ৩০, ২০০৭দগী হৌদুনা থাইলেণ্ডগী বেঙ্কোক এয়ারপোর্টতগী অমুক য়ুনান তম্না চৎপগী এক্সপিরেন্স অদু দাইরি নোটকুম্না মরু ওইবা ৱাফমশিংদা নৈনবা থেংনৈ। থালেণ্ডনা কমদৌনা সিয়াম কৌরম্লিবা হায়বসিদসু তেন্তকনা ইরি। “সিয়াম হায়রিবা মমিং অসি চাইনিজশিংনা তাইশিংবু চীংদা লৈরম্বা মীশিংনি হায়দুনা শান হায়না কৌরম্বদগী ইন্দিয়ানশিংনা সিয়াম হায়না কোন্না খঙনখিবগী…” ৱাফম পল্লি। লুবা নানবা, চীং লেম্বা মীওইশিং, পুকনিং হুরবা লেন্দস্কেপশিং শক-চূ মান্নবা কয়া থেংনবদা অইবদা ফাওখিবা পুকনিং মতা মতাং চানা ফোংদোক্লি। লাইরিক অসি মপুং ওইনা লমকোই ৱারী ওইরবসু ইরিবা খুৎই অমদি খুলান্থোক অসিগী রিচর্সকি ওইবা মওংনি। য়ুনান চৎপগী লম্বীদা গ্বাংঝৌদা লৈবা ডাঃ সন য়াত সেন ইনস্তিট্যুত্তা মনিপুরদগী মেদিকেল তম্বা মহৈরোই য়াওরম্বদা অইবনা কয়াম নুংঙাইজবা। শক-চু মান্নবা কলচর অমসুং ত্রেদিসন্দা মান্নবা কয়া লৈবসিনা হেন্না কুপথনা থিজিন্নিংবা মতাংশিং পল্লি। চাইনা লৈঙাক্কী মনুংদা লৈরিবা অদুগা য়াম্না মরু ওইবা দিবিজন অমসু ওইরিবা য়ুনানগী পুৱারী, মসিদা খুন্দানা লৈরিবা ইথনিক মাইনোরিতিশিং মখোয়গা মনিপুরদা লৈরিবা য়েক তরেৎ সলাই মপলগী মীওই কাংলুপ ফুরুপশিংগা মান্নবা চৎনবী থাজবী কয়া অদু কুপ্না নৈনবা থেংনৈ। অইবগী খোঙচৎ অসিদা য়ূনানগী কোনুং কুনমিং য়ৌদুনা মসিদা হকথেংননা উরকপা থেংনরকপা কয়া অদু মতাং চানা রেফরেন্স ফজনা পীদুনা মোঙ্গোলোইদ ফুরুপকি ইথনিক মাইনোরিতি কয়াগী হৌরকফম ওইরম্বা য়াবগী মতাংদা কুপনা ইরি। পাউখুম ফংদনা লৈরিবা, হৌরকফম শাৎফম মান্নরম্বা য়াবগী ওইথোকপা লৈরিবা, চাকচা, য়ুথক, পুন্সি মহিং, চৎনবী থাজনবী, লাইনিংলোনদা মান্নবা কয়া লৈরিবা য়ুনান লমদমগী পাউদম অসিমক অপাবশিংদা শোয়দনা পুকনিং লৌশিং ওইগনি খল্লি।
য়ুনান হায়বসি চাইনিজ লোলদা হায়রগদি “য়ুন” না লৈচিল অদুগা “নান” হায়বনা মখা মায়কৈ হায়বনি অদুনা ‘য়ুনান’ হায়রগদি লৈচীলনা কুপ্পা খা-গী লমদম হায়বনি। মনিপুরগুম্না অৱাংলোমদগী মখা মায়কৈদা চেপথবা অদুগা সমুদ্রা ইমায়দগী মিটর ৬,৭৪০ ৱাংমা লমদম অসি মনিপুরগা অদুক্কী মতিক মান্নবা কয়া লৈবা থেংনবদা অইবদি মখা তানা হেন্না কলচর অমসুন হিস্তরিগী লমদা থিজিননিংলি। য়ুনানগী কোনুং কুনমিংদা লৈহৌবা ‘য়ুনান ইথনিক ভিলেজ’, য়ুনান মিউজিয়ম ওফ নেসনেলিতিজ, দিয়ানচি লেক, স্তোন ফোরেস্ত অসিনচিংবা কয়া য়েংলুবদা ফাওরকপা পুকনিং ইহুলশিং কমদৌনা অসুক য়াম্না মান্নরম্লিবা হায়বসি ৱাহং ওইরি। য়ুনাণদা লৈহৌবা নুপীশিংনা ফম্বা কৈথেল, মফমদুদা য়োলহৌবা মনা চারিবা ফুদ হেবিত। মান্নবগী মান্নবা ঙাক্তা থেংনরকপগী পাউদম কয়া য়াওরি।
তাইশিংনা খা-নোংপোক এশিয়াগী লমদমশিংদা কুমথরকপা। মাইগ্রেসন মথং মথং তৌরকখিবগী মতাংশিং পাবদা য়াম্না পুকনিং লৌশিং ওইরি। হেন্না কুপ্না থিজিন্নবা অইবনা অপাবশিংগী পুকনিংসু চিংশিল্লি। মনিপুরদা ঐখোয়না থাজনরিবা নীংনরিবা উমং লাইশিং অদুগা কৌব্রু চীংজাও, থাংজিং চীংজাও, নোংমাইজিং চীংগা য়ুনান্দা থাজনরিবা নীংনা লাৎনরিবা মান্নবা কয়াসু লাইরিক অসিদা নৈনরি। হেন্না নুংঙাইরিবসি ঐখোয়গী মিঠ, টেলস, লিজেন্দশিংগী ৱারীশিং অসিদা ফাওবা মমিং মথা কয়া অমা য়ুনান্দা লৈরিবা অসিগা মান্নবসিনি। লোলগী ওইবা হৌরকফম, লাইনিং লাইশোলগী ওইবা মান্নবা কয়া শক-চু মান্নবা চিঞ্জাক মান্নবা কয়াগী মায়কৈদগী হেন্না লম অশোমদা থিজিন্দুনা কান্নরবা পুৱারী লংলা খরদি অইবা হরেস্বর গোস্বামীনা মনিপুরী খোরিলোলদা খুদোল তম্বা ঙম্লে। মতুংদা কান্নরবা পুৱারীগা মরি লৈনবা লাইরিক কয়া ইবীরক্কনি হায়না থাজবা থমজরি।
0 কমেন্ট:
কমেন্ট তৌবিয়ু