দ্রৌপদি মুর্মু ইন্দয়াগী ১৫ শুবা প্রেসিদেন্ত ওইনা ৱাশক লৌখ্রে
নিউ দিল্লী, জুলাই ২৫
প্রেসিদেন্ত মীখলদা মায় পাক্লবী দ্রৌপদি মুর্মু ঙসি ইন্দিয়াগী ১৫ শুবা প্রেসিদেন্ত ওইনা ৱাশক লৌখ্রে। ৱাশক লৌদ্রিঙৈগী মমাঙদা মহাক্না রাজঘাততা লৈবা মহাত্মা গান্ধীগী নীংশিং খুভমদা হৈকৎ লৈকৎ তমখ্রে। মহাক্না হৈকৎ লৈকৎ তম্বা অদুদা মিলিটারি অমসুং অতৈ ওফিসিয়েলশিংনা এস্কোর্ত তৌখি।
মথং চহী মঙাদা মশাগী য়ুম অমসুং ওফিস ওইগদৌরিাব রাস্ট্রপতি ভবনদা দ্রৌপদি মুর্মু ঙসি অয়ূক থুংলবগা লোয়ননা মহাকপু হান্নগী প্রেসিদেন্ত রামনাথ কোবিন্দ অমসুং মহাক্কী লোয়নবী সবিতা কোবিন্দনা হরাও তরাম্না ওকখি। মসিগী মতুংদা পার্লিয়ামেন্তকী সেন্ত্রেল হোলদা লাক্তুনা ইন্দিয়াগী ১৫ শুবা প্রেসিদেন্ত ওইনা দ্রৌপদি মুর্মু ৱাশক লৌখি।
সন্থাল কম্যুনিতিদগী লাকপী মুর্মুনা লৈবাক অসিগী ওইনা অহানবা ত্রাইবেল লুচিংবী অমনা প্রেসিডেন্ত ওইরে। মুর্মুবু প্রেসিদেন্ত ওইনা চীফ জাস্টিস ওব ইন্দিয়া এন ভি রামাননা ৱাশক লৌখি। থৌরম অদুদা ভাইস প্রেসিদেন্ত এম ভেঙ্কয়া নাইদু, প্রাইম মিনিস্তর নরেন্দ্র মোদি, লোক সভাগী স্পিকর ওম বিরলা, য়ুনিয়ন মিনিস্তরশিং, গবর্নরশিং, কংগ্রেসকী প্রেসিদেন্ত সোনিয়া গান্ধী অমসুং মশক নাইবা মী কয়ানা শরুক য়াখি।
থৌরম অদুদা হান্নগী প্রেসিদেন্ত প্রতিভা পাতিল, চীফ মিনিস্তরশিং নবিন পতনাইক (ওড়িষা), একনাথ শিন্দে (মহারাস্ত্র), জয়রাম ঠাকুর (হিমাচল প্রদেশ), যোগি আদিত্যনাথ (উত্তর প্রদেশ) অমসুং এন বীরেন সিংহ (মণিপুর) সু শরুক য়াখি। ৱাশক লৌবা অদু লোইরবা মতুংদা প্রেসিদেন্তকী বোদিগার্দনা পার্লিয়ামেন্তকী গেট নম্বর-৫ দা নেসনেল সেলুত পীখি অমদি রাস্ত্রপতিগী ফোরকোর্ততা নৌনা খল্লবী প্রেসিদেন্তনা ত্রাই-সার্বিস গার্দ ওব ওনরবু য়েংশিনখি।
ঙসি ৱাশক লৌখ্রবা প্রেসিদেন্ত, দৌপদি মুর্মুনা হায়, প্রেসিদেন্তকী মীখল অসিদা মায় পাকখিবা অসি ঐহাক্কী নত্তে। মসিদি লৈবাক অসিদা লৈরিবা লায়রবা মীপূম খুদীংমক্কী মায় পাকপানি। লৈবাক অসিগী নাথৈবীরবা লায়রবা, দলিত অমসুং ত্রাইবেলশিংনা মখোয়গী মমি ঐঙোন্দা উবা ফংগনি’। মহাক্না লৈবাক অসিগী নীংতম লানদা থৱায় থাখ্রবশিংগী মফমদা ইকায়খুম্নবা ঊৎপগা লোয়ননা মুর্মুনা হায়, সবকা প্রয়াস অমসুং সবাক কর্তব্যগী মতেঙনা লৈবাক অসি খোঙজেল য়াঙনা চাওখৎ মায়কৈদা চৎলগনি। ইন্দিয়ানা নীংখা তম্লবা মতুংদা পোকপা অহানবা প্রেসিডেন্ত অমা ওইরিবা মহাক্না ইন্দিয়াগী নীংতম্বগী চহী ৭৫ শুবগী আজাদি কা অমৃত মহোৎসব মনুংদা লৈবাক অসিগী খ্বাইদগী ৱাংবা ওফিস পায়বা হায়বসি চাউথোকচনিংঙাইনি অমসুং লাইবক ফবনি।
মহাক অপিকপা ত্রাইবেল খুল অমদা পোকপা অমসুং চাউরকপনা মফম অদুদা প্রাইমারি এদজুকেসন ফংবা হায়বসি মতম অদুদা মঙলান অমনি। মহাক্কী খুল অদুদগী কলেজ তম্বা মহাক্না অহান্বা ওইখি। এক ভারত, শ্রেস্থ ভারত ওইহন্নবা হোৎনবদা লৈবাক অসি য়াম্না চিনবা মতম ওইরি। ইন্দিয়ানা চাওখৎপগী লম অসিদা অনৌবা চেপ্তার অমা ইরি অমসুং অসিগুম্বা তাঞ্জা অসিদা কোভিদ-১৯ সু লান্থেংনবগা লোয়ননা হৌজিক ফাওবদা মী কোটি ২০০ রোমদা হীদাক কাপথোকখ্রে হায়না লৈবাক অসিগী ১৫ শুবা প্রেসিদেন্ট মুর্মুনা ফোঙদোকখি।
অমরোমদা, দ্রৌপদি মুর্মুনা প্রেসিদেন্ট ওইনা ৱাশক লৌখিবা অসি লৈবাক অসিগী মরু ওইনা লায়রবা অমসুং নাথৈবীরবা মীয়ামগী ওইনদি পুৱারীদা অচৌবা মীকপ অমা ওইরে হায়না প্রাইম মিনিস্তর নরেন্দ্র মোদিনা ফোঙদোকখ্রে। দ্রৌপদি মুর্মুনা প্রেসিদেন্ত ওইনা ৱাশক লৌখিবা অসি লৈবাক পূম্বনা চাউথোকচবা ফাওবগা লোয়ননা য়েংনখি। মহাক্না লৈবাক অসিগী প্রেসিডেন্তকী ওফিস পুরিঙৈ মতমদা অফবা অমসুং লাইবক ফবা ওইরসনু হায়না মোদিনা য়াইফ পাউজেল পীখি।
সোর্স: পোক্নফম
0 কমেন্ট:
কমেন্ট তৌবিয়ু